畫畫 – 鈴蘭 Convallaria Majalis（水彩）

呢兩個星期都冇心機去上堂，上星期六去咗 joy in arts諗住買枝水彩筆，但冇我想買嘅型號。想買 schmincke horadam嘅紫色，紫色好好用，成盒最快用完係佢，我諗住用完嘅色都會轉 horadam，不過都係冇，點解呢⋯，我仲以為紫色都算 basic colour添。

買咗幾枝 daniel smith試吓，不過連 colour chart都未有 mood整。

粉紅色同紫色部分好似多咗 d，我本來諗住右上加少少㗎咋，見顏色咁靚，愈加愈多😁

d花畫得冇乜精神咁，好彩鈴蘭嘅外型突出，求其有個形就似。

Schmincke on Baohung 300g HP 7.5" x 5.5"

唉，唔通係我唔識用留白膠？今次又係捽唔甩，朵朵花都有 d膠黐住，好彩 d膠顏色同我上嘅色一樣（😂又會咁啱嘅）。

係唔係因為上色時濕過水，溶咗入張紙度？定係因為我落得太薄？

今次呢枝留白膠都係筆形嘅，係為上一堂買嘅，呢類筆型留白膠都出得唔暢順，應該係因為膠質嘅關係啦，都係傳統嗰種最好嘅，不過又留唔到細位⋯，再要用先算啦。

水彩班 – 泛舟湖上（水彩）

erm.....呢幅.....，唔知講咩好，畫咗十年畫，都仲係畫到咁，未至於要沮喪咁誇張，但的確係對自己失望嘅。

成幅畫最滿意係划船人嗰枝桿。

Cotman on Saunders Waterford 300g CP 11" x 15"

水彩班 – 彩鳳

個稿明明啱晒比例，唔知點解畫出嚟比例怪怪哋。

生物真係難畫好多，我堂上畫唔晒，返屋企都仲要畫多兩個鐘，慢到😂

見到雀仔肚嘅顏色，仲特登帶埋枝 sennelier嘅 turquoise去，點知效果並沒有比 cerulean blue好😌😅

對翼簡直畫到想直接放棄，由起稿已經錯。真係好奇怪，睇到一會事，畫又係一會事，明明睇住條線向上，隻手係要畫平咗，有時隻手又會好忠實咁將睇到嘅所有無關重要嘅細節畫晒出嚟，點解咁奇怪嘅呢？自己隻手都控制唔到。

呢幅畫，我最滿意嘅只有雀仔企住嗰條樹枝。

Cotman on Saunders Waterford 300g cp 11" x 15"