畫畫 - inktober - 試畫hamburger（marker）

水彩班完咗，畫咗幾個月水彩想停吓，本來諗好唔好玩吓acrylic，反正買咗咁多唔用會乾，但忽然網上睇到有人話準備 inktober，係喎，我舊年係咁意畫咗兩日，不如今年當練習又玩吓啦，又可以用吓d copic marker。


於是就由水彩嘅彩色世界變成黑白世界。
但後來先知道，ink唔係指黑白，有colour ink嘛，所以我用五顏六色staedtler fineliner都得啦。
不過暫時我都係用緊黑同灰，4枝copic toner grey，4枝 staedtler fineliner，白色gel pen，白色鉛筆黑色擦膠，連畫簿都係黑色，我覺得呢set畫具好有氣質啊！呵呵呵~

試畫咗一張，生硬 says all.....
個包去咗唔同altitude，
不過我幾鐘意d薯條，我終於處理到『裡面』。

inktober原意係成個月每日畫一張，養成每日畫畫嘅習慣，但我畫畫咁慢，有時又冇時間畫，想日日都參與到唯有偷步，已經畫咗幾幅，十月頭有幾日假，可以再畫定多幾幅。

每年inktober都有prompt，呢個係今年official prompt。我心諗：好空泛啫....
後來睇 youtube先知，可以自己設定主題，然後同個prompt配合，咁就make sense嘞。
譬如我決定用 disney princess做主題，咁long就可以畫rapunzel，因為佢有一頭長髮，poison可以畫snow white食毒蘋果，咁fat呢？有冇肥公主？哈哈哈...不過我冇設定主題，一來我知道時已經畫好幾幅，二來有主題我未必全部畫到，rapunsel都好難畫呀。或者下次先咁玩，今年亂畫住先。


唔知係唔係因為我得4枝marker咁少，好快用到乾，refill好多次都係畫一陣就乾，畫咗6張A4 size，image唔大，只係集中喺中間，但已經用咗半枝refill ink。


畫多幾幅greyscale，可以轉畫彩色，我有36色staedtler fineliner。
有冇其他可以用？用墨？好似miss ho以前教咁用竹筆畫，100% ink最切合要求。


~*~*~*~*~*~*~*~*
6 November, 2017


我畫晒成個月31日啊！！真係好開心！


畫到後來，都覺得自己順手咗，靈感都多咗，好似比較容易諗到畫乜。
最後幾日雖然去咗旅行，但一早畫好，都準時post上instagram，只係blog就等番嚟先用電腦寫。


回想舊年畫兩日就放棄，今年好成功，自覺畫功同概念都好咗。
好多事情都係迫住嚟就做到，只要唔放棄就得。
（畫幾幅畫啫...，你當你achieve咗乜呢究竟...？）

Laver Cup (22 - 24 September 2017)

有人話會成為tournament其中一站，但暫時只係一場show，由federer自己嘅agency team8主辦。第一届喺Prague舉行，已經定咗明年喺chicago，唔知明年有冇咁大卡士？今年連fedal雙打都出埋，仲有更大嘅gimmick？

呢場係隊制比賽，分team europe 同 team world，
team europe 有 federer, rafa, zverev, thiem, berdych, cilic, borg (coach)
team world 有 tiafoe, isner, shapovalov, sock, kyrgios, querrey, mcenroe (coach)
如果唔係murray同djokovic養緊傷，兩隊實力會更懸殊，咁好似唔係咁好睇...不過如果一直辦落去，或者會變成勢均力敵，又或者team world強勢呢，who knows？不過咁嘅賽制點fit落atp tournament？應該都係講吓。

雖然唔計落atp分數，但個個都算落力演出，last day federer同kyrgios都喊晒，federer喊比較易明，自己公司成功拉到十幾個明星球員演出，唔係容易，又賺到錢，梗係開心到喊啦。但kyrgios....我就唔明喇。

rafa 好投入，玩得超開心咁，佢同federer喺網球上嘅關係一向都幾好，唔只係場上對手，曾經一齊做player asso之類嘅正副主席咁，federer又有出席支持rafa嘅網球學校同基金會活動，所以今次rafa都表現得好積極。

我一向都覺得佢兩個係天生一對，
好一段時間兩人身高體重完全一樣，而家都仲係差不多，好多時睇比賽片，睇一陣先分到邊個係邊個，多數睇手啦...
一個左手，一個右手；（唔同都天生一對呀？！）（喂，一隻左一隻右仲唔係一對？！）
另外我每次見到roger federer嘅 RF標誌都覺得係rafa，
見到rafa嘅牛頭標誌又令我諗到federer嘅國家有好多牛....哈哈哈哈

laver cup有好多兩個人嘅溫馨場面，it's brotherhood，兩個頂尖高手惺惺相惜，其實真係只有對手先知道你擺咗幾多時間血汗心機落去，互相欣賞都好自然。以前美國球員當道，喜歡互相攻擊，可能係文化唔同啦，歐洲人感覺係比較含蓄，注重禮儀，所以可以相敬如賓。

呢幾日並肩作戰咁融洽（融洽到甜蜜嘅感覺），會唔會影響到以後嘅比賽？會唔會失去咗嗰種火？會唔會用另一種目光睇球場另一邊嘅對手？

或者只係我哋fan自己有fantasy，其實職業球員都係一種performer, entertainer。

兩個都係nike贊助，都鍾意用headband

能夠站在同一方嘅感覺真係好

使唔使咁肉緊？

federer背傷仲未好喎....

laver cup已經完咗，臨時組合又要分道揚鑣，江湖再見喇！

畫畫 - 寫生 - 摘錄自『江啟明藝術空間』

以前每次有同學話我畫得似，miss ho就會話，『我哋唔係要似，我哋有相機喇』，我都唔想似，都想有自己風格，但我冇理由為咗唔似而亂畫嘛，畀我用『似』嚟作為階段目標都得啩？總比之前畫乜都唔似好少少，係咪？

我覺得係要『似』到熟咗，先發展到自己嘅sytle，起碼我自己暫時只做到咁樣啦。

我都覺得跟圖片畫只能夠練習到上色技巧，唔正式叫畫畫。

要經過自己觀察、判斷，決定colour and value，咁先算畫畫。

遲d冇咁熱應該去吓寫生，其實少少想跟阿sir嘅私人寫生班，但驚技術唔夠畫唔到。又擔心學學吓唔想學會尷尬，唔知係咪就係江老師所講嘅人際關係呢？

不過我懷疑我哋係咪真係流住中華民族祖先嘅血，『宋後無中國』，當時北方外族已經將中國人殺的殺趕的趕，元同清之間嘅明能夠收復到幾多中華文化？唔好忘記開國君主都係個流寇，有幾多文化底蘊？有幾多中國人係純粹中華血統？北方匈奴蹂躪中原咁耐，血統都已經同化咗啦，我哋比較大機會係流住北方匈奴嘅血囉。

畫畫 - 人體（marker）

畫畫比例好重要，但好難掌握，畫風景同靜物都唔係影響咁大，畫人唔啱比例就唔靚，甚至畸形。

我有小小想學人體素描，但擔心畫功唔夠，同唔知自己對住裸體model會唔會感覺唔良好...
不過都係擔心畫唔到多d，所以水彩班完咗，我冇報下一班，諗住自己畫吓人體先，搵d 人體素描相嚟學啦，不過喺屋企係咁畫裸男裸女唔知屋企人見到會點....

人體真係好美麗嘅形體，肌肉嘅紋路、關節轉彎造成嘅明暗，好適合做描畫對象。

搵到張背影嘅outline相，真係啱晒，正面好難畫，第一次梗係畫背面啦。
而且只係outline，光暗位靠自己想像，都唔算完全抄襲吖。

我用咗marker畫，因為呢排好想玩marker。初時覺得好貴，$38一枝，但原來refill好平，$48可以refill 10次，咁價錢就合理好多。不過好似加咗好多價，舊年買都係$33，但香港算平，網上睇到歐洲要成 8-10 euro，可能係香港同日本近嘅關係啦。

明暗自己想像出嚟，都ok啦，
背脊雞翼位唔知點畫先啱，而家好似畀人斬咗兩刀咁....正中就好似畀人界開咗...
左邊patpat底下要暗d，而家跌咗落去。
前臂畫短咗，粗壯咗，
大脾同膊頭留白幾好。

Copic Marker on paper

我儘量唔買太多畫具，唔想變成鐘意買畫具多過鐘意畫畫嘅人，但各樣買少少都買咗一堆，又冇地方擺。
我用飲品膠樽裝住都幾好，扭埋蓋撞跌都唔會散晒。

水彩花卉風景 2017-10 - 荷花

呢幅圖構圖簡單，但花瓣上面有水珠，荷葉中間仲裝咗水，成個水信玄餅咁，我以為阿sir要教我哋畫水珠，好擔心畫唔到，但好期待睇阿sir示範。
不過上堂前已經畀同學點醒咗，佢話水珠一定唔會畫，連葉都係帶過。事實證明佢係啱嘅，我諗嘢真係太天真喇....，或者係太認真....

我以為一朵白花會好快畫好（that's why我會諗住要畫埋水珠），阿sir都畫咗成個鐘，d葉雖然係抽象，但都重疊渲染咗好幾次。上堂時覺得佢亂塗一堆綠色做背景，但後來先睇到原來隱現一片片荷葉。所以就算亂塗其實都要有根據，背景係荷葉就唔用筆直尖銳嘅筆觸，用波浪形就容易喺一片混沌中透露荷葉嘅形態。
第一次見到阿sir喺一個位來回擦，仲要係花瓣，但佢反覆擦完都唔見污糟，塊花瓣都係咁fresh。

唔知點解我冇心機喺堂上畫，睇完示範就走咗。
本來起咗嘅稿有花有葉，睇完示範再畫過，將朵花畫大d搬番去中間。
白花本身得白色，所以佢反映到好多環境色，就係靠呢d環境色嚟表現花嘅立體感。
通常白花都反映到葉嘅綠色，呢朵唔算純白，瓣尖小小粉紅，於是又反映到紅色，仲有空氣色，就係藍色，但全部都要淡淡咁。

朵花都好容易，逐塊花瓣畫，area細，唔使顧慮同旁邊融合嘅問題。
但背景咁大面積就難好多....通常都會乾咗融合唔到，同埋調唔番相近顏色，接合得好突兀。今次我整到張紙好濕，又開定深淺兩種顏色，唉，唔知係咪開咗冷氣，有d地方都係乾乾哋睇到條界。最論盡係開定嘅顏料都係唔夠多，好快用完都係要臨時調色，顏色同濃度又唔同咗，於是個背景又係一塌糊塗。不過都預咗要再執番葉嘅形態出嚟嘅，阿sir嘅背景太抽象，我畫唔出，係真架，模糊之中表達一個形態唔容易囉.....我覺得。

反覆咁上色，終於有荷葉嘅樣，算喇，再加都唔會更好。
我怕有水痕，後加嘅顏色比較濃，所以好乾，擦出好多筆痕，整到亂七八糟咁，左上角係重災區。
我諗我應該吹乾張紙，再疊比較watery嘅顏料，咁線條就唔會咁惡形惡相。

我都幾滿意呢幅畫，d葉歷盡滄桑但都幾靚，好彩我一開始就諗定要波浪咁畫，所以後來都可以搵到適合嘅線條嚟加工做荷葉。
而且我一早跟住光暗上色，所以效果都好自然。

唔知點解，阿sir都係冇like呢幅，instagram都好少人like。

Shinhan on Saunders Waterford 190g rough 11"x15"

木顏色版

https://iceefaery.blogspot.com/2017/09/blog-post_15.html

2018 自己再畫，冇reference，唔掂。

https://iceefaery.blogspot.com/2018/04/blog-post_7.html

水彩花卉風景 2017-9 - 樹

風景通常都有樹，雖然係背景，但畫唔到都會破壞幅畫，次次畫樹就個個都喊晒。
阿sir知道我哋唔識畫樹，呢堂特登用樹做主題，仲唔死~？^0^

後面d樹用乾筆畫，用rough紙係冇難度嘅。
前面嗰堆....其實本來唔係一堆，係最少有兩層，阿sir用唔同配色分開一層層，而我就畫咗一堆出嚟，仲要一舊舊....唉
不過個天污煙障氣咁幾靚吖，
水，倒影都好自然，
前面有一大片唔知係浮萍定其實植物，打咗底，未加細節，但顏色我幾滿意，初時用好淡嘅yellow orchre，但都係太鮮色，記得壓低明度要用對比色，雖然有小小懷疑，加紫色咁神奇？會唔會變咗好深色？但調色原理係咁，就試吓加小小，果然即刻變暗淡晒，好開心。

呢幅畫好神奇，掉轉睇好靚㗎....😂

Shinhan on Saunders Waterford 190g rough 11"x15"

番屋企冇再改，加咗d浮萍。又再畫咗兩張，唔使起稿係比較有動力再畫嘅。

浮萍嘅畫法係參考同學，咁畫好傳神。

各有各好，各有各差咁啦，但都算有小小進步，不過阿sir冇like.....

薛高 - 試圖解密

最近有聽薛高嘅「試圖解密」，首先要講就係音響效果都幾差，聲音時大時細，主持都有突然爆笑嘈到死，我聽得好忙，較完大聲又要較番細聲。

幾好聽，雖然都係似做節目，對住稿講畀聽眾聽，partner偶然插科打諢講爛gag，薛高成日聽完思遠d笑話好似冇嘢咁繼續講，但講兩句又會返轉頭答番佢，好似programme咗要完成一句先可以去respond第二個task，又好似人哋句說話出外太空繞咗個圈先去到佢度咁，好明顯係讀緊稿，讀完嗰段先答咁啦。

佢成日煞有介事咁講天龍星人、天狼星人、大角星人、七姊妹星人，講到有根有據，有晒星際歷史咁，最攞命係佢唔係當breaking news咁講，而係輕描淡寫：「blablabla....就好似天龍星人咁都係blablabla」，唔需要解釋，信手拈來做例子，好似係人都知咁，聽到我懷疑係咪自己完全miss咗某d記憶、某d知識。

佢講嘅topic有d好天馬行空，唔知係咪因為佢係網台冇咁多規限。不過雲海嘅網台節目都唔係咁，咁應該係人嘅關係啦。

都有人鬧佢入唔到題，我覺得唔算喇，講幾句題外話傾吓偈幾好吖，反正佢有稿，唔會扯得太遠，不過佢哋d題外話好唔吸引囉。

但我好appreciate 佢冇將「百慕達三角」講成三角洲。

～*～*～*～*～*
8 September 2017

聽到2013講費城實驗嗰集，原來佢都係講「百慕達三角洲」！🙄
好彩後來佢都醒悟到，2016定17嘅節目佢都講百慕達三角。

真係咁難分咩？工程師嚟喎，讀咁多書都唔識咁普通嘅嘢？

~*~*~*~*~*~*~*

18 September 2017

有少少支持唔到，佢講得太天馬行空，將所有外星人傳說當事實咁講，雖然我都相信有外星人，但有greys嚟咗地球，都係傳說啫，更遑論甚麼天龍星天狼星人。

但佢講呢d就好似一般人講成吉思汗同希特拉咁，好似佢哋嘅存在個個都知，仲多少知道佢哋嘅事蹟咁添。

到佢唔講星際歷史，講吓科學知識，最近嗰集『機率宇宙』，又深奧到我唔明......

冥鏹

早幾個月清明節，我哋去拜婆婆，媽咪嫌我哋往年個衣包細，今年自己去買咗一大包。
婆婆係骨灰位，要去公眾化寶爐燒冥鏹。我哋同往年一樣，碑前拜完帶住衣包同一枝香去燒。

去到有人燒緊，但冇人排隊，下一個就到我哋。
前面d 冥鏹仲未燒完，但可能見有人等，好快就走咗，不過一般都唔會等到燒晒，七七八八就走，唔想阻住人。
嗰日唔係好多人，爐裡面只得呢堆燒緊，人哋走咗，我哋等咗一陣，就將枝香攝落個衣包，擺入個爐。
我哋唔敢拋入去，驚撞散人哋d嘢，亦唔想撞起d灰，所以擺喺爐邊，攞用嚟撥火嗰枝鐵棒推佢入去。

因為裡面有嘢燒緊，所以一推入去就著咗火，我哋都未嚟得切退後，爐裡面突然『哄』一聲，好光，一團灰翻騰，有d仲飛咗出嚟。
火光只係一下就冇咗，睇吓爐入面，我哋個衣包竟然唔見咗！
個衣包比往年大，往年都要燒一陣，由出面燒到入面，會睇到入面d 嘢，有時仲要用枝鐵棒撩開一下等入面都燒到。
點解今年嗰個會一下子就唔見咗？最詭異係，人哋嗰份仲燒緊！

我哋問媽咪，會唔會畀人呃，其實裡面冇擺嘢，只係吹氣脹咗？但梗係唔會啦，邊有人會呃呢d？而且一路拎嚟都感覺到呀。
我哋十幾年都係咁樣拜婆婆，今年真係同以往一樣，點解會咁？

會唔會係入面嗰份嘅收件人唔鍾意一齊燒？唔會啩？我哋冇撞散佢，只係喺旁邊掂到黐咗佢d 火，人人都係咁，因為碑同爐離咁遠，唔會燒住過嚟，因為嚟到可能要排隊，所以都係擺埋入去借火燒。

我哋唯有諗係婆婆等錢使心急收件啦.....

畫畫 - 層層山（acrylic）

上咗兩次miss ho嘅素描與繪畫，兩次都有3 堂用acrylic，唔知點解我第二次都買咗新嘅顏料，可能仲係有d潛藏嘅購物慾啦，好彩都只係買白色同三原色。

除咗白色用嚟灑星星(白色竟然買咗三枝！），其他都冇乜用，擺得耐又會乾，都幾浪費。
有次睇saunders waterford個instagram，話畫壞咗嘅水彩紙可以用嚟畫acrylic，係喎，成日覺得acrylic要用canva（因為上miss ho堂都係用canva嘛），咁我d畫壞嘅水彩紙用完嚟試色之後仲可以畫acrylic，咁就冇咁浪費啦。而家我試完色仲用嚟做杯墊，因為吸水力強嘛，做完杯墊再上acrylic都仲得添，哈哈。

其實我唔想浪費嘅唔係錢，一張水彩紙咁高質量，要砍伐好多樹木，造紙仲需要好好嘅水源，如果唔好好用張紙真係浪費咗好多資源架。

呢張係水彩初階一教層次畫嘅，都唔記得影番張水彩版，我用水彩畫到一pat咁，完全分唔到層次，嗰次畫到好沮喪。尋日決定畫吓acrylic，攞咗佢嚟畫，直接喺上面加工。
可能係acrylic比較容易，又可能我上咗咁多堂終於有進步，加咗acrylic效果唔錯，見到層次，遠山仲有沐浴在夕陽中嘅感覺添。
前面間屋仔有小小pop出嚟咁，可能係太光。

Shinhan acrylic on Monval

st chutbert 教先塗一層gauche，應該係遮咗底層啩，不過我呢幅係跟底層畫，睇唔出遮唔遮到，下次再畫先算啦。

水彩花卉風景 2017-8 - 繡球花

唉，今堂真係大災難，完全唔知道自己畫緊乜，完全掌握唔到花嘅節奏。
可能因為阿sir冇畫到真係繡球花咁樣，我stubborn嘅思路就拒絕運作啦.....

雖然同我估計一樣畫到如煙似霧，

但阿sir冇好似我想像中咁整濕張紙嚟渲染，

同埋完全睇唔到繡球花嘅結構同形狀，

我好困擾啊~~~~

用色我都掌握唔到，畫到瘀咗，加咗太多藍色，唔知係咪用咗唔啱嘅藍色呢....阿sir都加好多藍，都唔會咁。

每次畫到咁鬼樣我都覺得超尷尬，『究竟你有冇睇示範架！？』

唔應該好似阿sir咁係咁點顏色上去，阿sir梗係胸有成竹啦，我諗我要安排一下球形咁畫，再用暗色強調個球形，雖然阿sir嗰幅唔似球形，但我點可以唔球形都說服到自己畫緊嘅係繡球花？

左邊底色好流暢呀，葉都好自然，

仲有上面嗰三枝小配角我都好滿意，如果平時畫樹都有咁效果就好嘞。

個玻璃瓶、花幹同枱面嘅花瓣都幾好吖，係咪？（咁都攞得出嚟講...）

星期六畫過啦.....

返屋企改完都冇乜幫助，正中間畫得太差，

決定再畫一幅，今次起稿畫好每個花球嘅位置，冇跟阿sir嘅畫法，我將張紙底面都整濕，等佢可以持久保濕，希望做到朦朧感。
哈哈哈....排得好整齊。
後面嗰排好小小，白色嗰d完全變成黃色😓😓😐
底色同個花樽都冇上次咁好。
畫花難過畫風景啊。

Shinhan on Saunders Waterford 190g rough 11"x15"