畫畫 – Christmas 2（水彩）

底色係唔係太平淡？定係太鮮艷？可能應該 tone down少少、冷少少，而家好似搶咗 fo；

唔記得擦番火焰嘅鉛筆線先開始上色，濕咗水就再擦唔到😣😣😣；

枝蠟燭身同頂嘅顏色好似唔係好夾咁…，不過蠟燭身環境色反映都幾好吖；

個聖誕球顏色我覺得好靚，schmincke真係幾清透，疊咗好多層色都唔覺好厚；

松果有少少亂，形狀少少怪，但都幾似，都表現到松果一瓣瓣之間嘅距離感；

兩枝 cinnamon同珠鏈位置錯咗，好彩唔多覺。

Schmincke Akademie on Saunders Waterford 190g rough 7.5"x5.5"

畫畫 – Christmas 1（水彩）

一個唔為意，就到聖誕，市面上冇乜節日氣氛，…

聖誕？
仲信唔信有上帝？
讀咗十幾年天主教學校，我間學校好有宗教氣氛，學校有修院、有教堂，幼稚園到中學，校長都係修女，校舍裡面成日有修女行嚟行去，每日上堂前念經唱聖詩。中學年年都有修女做 subject teacher，好似唔止係 religious knowledge，有教…domestic science，english literature…唔肯定，anyway，咁樣過咗我人生頭嗰十幾年嘅生活，我始終都冇信教。
primary 1 嘅時候，老師話每個小朋友都有守護天使，我諗我信咗一陣啦，雖然都有諗過：『咁多小朋友，真係有咁多天使？』『天使真係會跟住我？』
然後嗰年我喺操場跌咗好幾次，跌到損晒流血，痛到死，我就諗：『天使呢？點解會畀我跌咁多次？』我就唔再相信有守護天使，亦冇再生過信有天主嘅念頭，上聖經堂都一直當故事咁聽。

後來大個咗，見到聽到世上咁多事，更加令我唔相信有天主，就算有，我覺得佢已經放棄咗我哋，好耐。

雖然唔信有天主，聖誕對我嚟講，都係重要同期待嘅，因為係一個節日，一個假期，係大家以一個共同主題玩吓開心吓嘅日子，大家心裡面都諗住同一件事，感覺好cozy。
今年，大家心裡面都有同一件更具體嘅事，唔開心，但都係一種 cozy嘅感覺，a sense of belonging。

Schmincke Akademie on Saunders Waterford 190g rough 7.5"x5.5"

畫畫 – golden sail （wetcanvas nov 2019 challege）（水彩）

唔怪得好多人不斷買畫具啦，有新畫具顏料係可以刺激吓畫畫嘅意欲架。

夕陽同山個位我自己覺得好靚，喺相中睇，成條山脈嘅顏色同明暗都好好，但天空就太多紅色喇，原本諗住主色係橙色，唔知點解畫畫吓用咗咁多紅色，仲要均勻分佈咁添，上截都唔知點解會用咗咁深色，有 d格格不入，本來仲深色，我不顧一切洗咗佢😆。

海呢…，同個天一樣，畫到成張氈咁，總係畫唔到『水』嘅樣😒，我記得愈近線條愈疏，但要粗幼有緻表示水波，第一層都做到少少，再疊色就亂晒，畫到規律咗。

隻船喺一團黑中都畫到輪廓，但好似太黑，我有加咗少少橙同黃，但影相睇唔到（張相影得黑咗…），佢喺夕陽嘅光裡面，係唔係應該有一條金黃色嘅輪廓線呢？雖然參考圖都冇（唔係好明點解會冇），但我諗有會靚好多。

兩個碼頭…，我最怕 d睇唔清楚分唔開嘅 object，胡亂畫一團我實畫唔似，要認真畫又睇唔清楚冇得參考😖，所以我畫咗個簡陋版，人哋本身都有 d規模架😃。

Schmincke Akademie on Saunders Waterford 190g rough 11"x15"

除咗 prima咁明顯唔同嘅質感之外，我唔係好分辨到唔同嘅顏料有乜分別，我都係唔好諗 horadam同 daniel smith住喇，暴殄天物呀😄

夢境連續劇

幾歲大嘅時候，經常發同一個夢，又唔 exactly係同一個夢，係有連貫性、有後續嘅，夢境重覆一段時間後，會突然有新發展咁。
並唔係每晚都發同一個夢，而係隔一段時間發吓咁啦。

最初，彷彿係有人約我一齊去一個地方，但詳細唔記得，可能因為太耐，或者因為呢一幕冇重覆出現好多次。

維持最長時間嘅情節，係深夜，感覺係有月光，我同幾個人一齊朝住目的地行，
雖然一齊，但又各有各，分開少少距離咁行。
我唔知自己著乜，但其他人都著住黑衫黑褲，黑玫瑰咁。

最有趣係，維持咗…應該有好幾年，都係行緊同一段路，嗰條路就係當時屋企樓下一個好大嘅空地，有個好簡陋嘅足球場，有兒童遊樂場，我最記得隔開行人路一級級由矮到高用紅磚砌嘅矮圍牆，我每次都行得好近圍牆，其實每次畫面都係一樣，夢境中都只係行一陣，大概幾十步，嗰種深夜嘅黝黯，同埋半夜特別涼嘅空氣，對細細個嘅我嚟講，真係好刺激。

同我一齊行嘅大概有4、5個人，其中兩個係明星嚟架，不過喺我咁細個嗰時佢哋都已經唔再拍戲（我唔想用『過氣』，畢竟我哋係一齊大冒險過嘅 team mate呀😄），呀…，記起喇，就係佢哋約我一齊去嘅。

係咁行咗好幾年，終於行咗一段距離，其實就係漸漸行到個空地嘅盡頭，現實中係另一橦樓，呢橦樓嘅地下係冇單位嘅，得幾條柱，即係又係空地狀態，但夢裡面就變成一間類似古堡或者古老莊園，地下嗰層冇乜印象，一樓有一個好大嘅露台，我哋就係要上去。

我見有人好好身手，打個跟斗就上咗去，但都有人試咗好多次，而我…我好似係想助跑、跳起、翻跟斗，或者攀爬上去，但唔成功，於是，夢境又喺呢幕重覆咗一段日子，我好似有做各種嘗試，同行嘅人都好似有試過幫手拉我，終於有一晚…我唔記得我點上去，只知道上咗去。

上面係一個好大嘅『走馬露台』，大家都四處查探，唔知要搵乜，如是者又搵咗唔知幾耐。

有一晚，唔知係我定係其他人，發現咗一盆盆栽，種住一棵番茄樹，真係一棵樹，樹上結咗幾個大番茄，好大個，我伸手去番茄底部想托住佢，我唔係想摘落嚟，只係見到咁大個蕃茄好得意想揸吓喺手，點知，個番茄就喺我托住佢預備揸住嘅時候，喺我掌心開始收縮，好似氣球放氣咁，我再去試攞另一個，但都係咁，我有 d失望同不解，咁就醒咗。

呢一幕夢境可能冇重覆過，或者最多兩三次，之後，我就冇再發呢個夢。
但個蕃茄喺手上漏氣縮細嘅感覺，同埋嗰種不解、失落嘅心情一直都冇忘記。

一個史詩式嘅長篇夢境，我唔介意有個 tragic ending，但竟然就咁草草收場真係好令我失望，連一個 decent d嘅 ending都冇。
難道係預示我嘅人生？逐步行過漫長嘅路，千方百計接近目標，最後都係一無所得？
好 sad嘅夢，好彩當時唔明，如果唔係點做人？

畫畫 - poppies （wetcanvas oct 2019 challenge） （水彩）

畫班完咗都冇 mood畫畫，不過買咗盒新顏料，激發番少少畫畫情緒，咁啱 wetcanvas challenge又有一幅好靚嘅圖片，於是畫番張嚟試色啦。

本來諗住畫得奔放 d，但心想嘅嘢手唔合作😆

左邊朵花都還可以，但下面花瓣唔知想點…，不過顏色 ok，
右邊嗰朵原圖都係咁，但顏色冇明暗，令本來拗拗哋嘅花瓣更加莫名其妙，
後面兩朵應該虛 d，畫好先諗到，夾硬加水加色想畀條鬆 d嘅 outline佢，結果都係失敗，或者應該好似老師咁直接捽鬆佢。
花冧同花莖都冇乜難度，玻璃樽都算 ok，不過樽裡面嘅水就被我忽略咗…
cast shadown好似唔係好夾個主體咁。

schmincke akademie顏色好容易出，唔似人哋話 pan paint好硬、好難出色，可能係唔同牌子嘅唔同表現啩。
至於話 schmincke水彩好透唔容易 muddy，我都唔係好有感受，唔識分。
（雖然只係 akademie，但因為大部分色都係同 horadam用相同嘅 single pigment，所以都應該有相同嘅清透度，大部分啦，有幾種係唔同，或者唔只一種 pigment。）

Schmincke Akademie on Saunders Waterford 190g rough 11"x15"

Schmincke Akademie

最近忽然想試吓 schmincke，本來想買專業級嘅 horadam，但店裡面嘅 horadam 24 tube個盒幾殘舊，我擔心 d顏料會有變化，好似沈澱、pigment同 binder分解咁，因為都唔平，我唔想 risk。

見到有幾盒學生級嘅 akademie，個盒好靚，價錢梗係平好多添啦，雖然都知道質素低 d，但都買咗先啦，反正都買唔到 horadam。

後來先知道呢盒係 2017嘅聖誕特別版，哈哈，仲以為只有化妝品同朱古力先會出節日特別版添。

其實我想買 tube，
但 akademie只有 pan paint，而我已經畀個盒吸引住，shopping mode又已經 activate咗，pan就 pan啦。

我呢盒係24色，已經係整個 akademie齊色喇，而 horadam就有成153色，嘩，我懷疑自己有冇能力辨識全部顏色呢？

24色裡面包括 titanium white, payne's grey同埋 black，都係我唔會用嘅色，灰同黑要用都用得著，但白色…，點用呢？不過又每個牌子都有白色，仲要唔只一種白，或者我應該了解吓白色嘅用法，可能 for一種特別嘅 technique都唔定。

睇咗 d介紹 akademie嘅 video，原來好多種色都同 horadam用相同嘅 pigment，只係份量唔同，pigment嘅嘢我冇認識，不過即係話akademie嘅質素應該都幾好，色澤同 attitude會同 horadam同色冇分別咁啦。
色彩好明亮，少少顏料就好夠色。

24色配搭都係常用色，不過冇我好鍾意嘅 sienna，有少少失落。

schmincke pan paint嘅製造過程好講究，唔會一次過填滿，akademie會填一半，乾咗再填另一半，我諗係畀 d顏料有足夠時間乾透啦，horadam仲要分四次添。

唔知係唔係 enamel palette定係 pigment嘅特性，又係 staining…，雖然用耐咗梗係唔會保持潔白，但用一次就染色個心都少少唔舒服。

inktober 2019 day 13 #ash

構思中，erbrow噴嘅火會將壞人燒成灰，但畫畫吓先諗起自己仲未諗點表現『燒成灰』😂
所以就…就咁樣囉，畫不對題，或者話係隱藏咗啦。🤷🏻‍♀️

l'ultimo elfo裡面，yorsh同 erbrow都係咁樣帶領 daligar嘅人民同官兵戰鬥…

erbrow都係畫到肥肥腫腫咁，不過對翼都唔錯；d壞人用咗碳筆打底，再加 marker；火焰就用咗喺光南買嘅 ace wan brush英士丸筆（個名好得意），水性，加水可以暈開少少。

inktober 2019 day 12 #dragon

概念嚟自 l'ultimo elfo，我畫嘅係 bb時候嘅 erbrow，不過將 yorsh變成小女孩（好唔好幫佢改番個名呢？）。

erbrow畀我畫到一團粉咁，baby fat吖嘛，我用粉紅色木顏色畫咗少少鱗片，仲加咗Daniel smith嘅 duochrome green pearl，忠於原著，不過影咗相乜都睇唔到。

煙霧畫法學 jazza，都係生硬。

inktober 2019 day 11 #snow

唔想跟相畫，但冇 reference又畫唔出細節，
每一幅都係咁，除咗主體就乜都冇，好單調。

inktober 2019 day 7 #enchanted

濫竽充數到一個點😆

inktober 2019 day 6 #husky

inktober 2019 day 3 #bait

濫竽充數，乏善足陳
不過線條柔順咗喎，真係可喜可賀，可歌可泣…

今日喺 instagram發現香港有個 freetoberhk2019，當然都有自己嘅 prompt，不過我諗我轉唔切喇，或者遲吓有時間補番啦。

inktober 2019 day 1 #ring

呢兩年堅持到整個 inktober，今年都想繼續。
畫得咁差，唔想多講，作為一個開始，希望畫落去會有進步。

真係應該認真學吓點畫人物，因為好多構思都要用人物表達。
都見有畫班專教畫人物，不過都係畫面部，最多加半個上半身，但我想畫全身，尤其是各種姿勢，可能真係要去上人體素描至得。

inktober 2019

今年個 prompt好 fit而家嘅社會狀況。

本來諗住配中文書法，用所有 prompt串起成件事，不過諗咗好耐都串唔好內容，書法亦唔掂，所以放棄咗。

網上搵咗圖諗住照畫，marker之外加木顏色水彩，試畫咗一張，感覺唔係幾好。

有諗過今年放棄，但尋晚忽然諗到挑戰一吓人物，用一個 character嚟表達。

不過，想像中係一個卡通化、Q版嘅小肥妹，但創作力同畫功有限，結果畫咗個好普通嘅造型，動作生硬，線條都好唔流暢，希望畫31次可以愈畫愈好啦。

終於個 character係一個似 ballerina嘅小女孩，粉紅裙仔同髮髻，本來都係想畫成 Q版，頭大、身同手腳都瘦長，但畫出嚟唔係好成功，邊畫邊調整啦。

構思中，character代表弱勢，表達會有 d fantasy，有 d反映現實，正就係而家年青人一樣，本來可以生活得好 fantasy，但無奈變咗要面對殘酷嘅現狀。

Laver Cup 20-22 September, 2019

本來冇留意 laver cup，今日唔覺意喺 Instagram睇到一堆男人團抱、跳住氹氹轉，因為 team Europe贏咗。我心諗：『有冇咁 high呀…』，兩隊實力咁懸殊，贏唔到至出奇。well, 做戲做全套啩。

Team Europe	rank		Team World	rank
Nadal	2		Isner	19
Federer	3		Raonic	25
Thiem	5		Kyrgios	27
Zverev	6		Fritz	30
Tsitsitpas	7		Shapovalov	34
Fognini	11		Sock	210

 jack sock因為傷咗一排所以排名跌到咁低，受傷前都曾經去到前十嘅。

睇吓 ranking，完全係大蝦細嘅感覺，點解兩組要咁分呢？跟排名梅花間竹，實力平均 d仲好啦，就叫 team odd, team even囉😂。 

少少奇怪今年仲會有 kyrgios，佢整個態度同受喜愛程度都唔適合呢種 event，我以為會有 Medvedev 同 dimitriv 又冇喎。 

唉，今年對乜都冇興趣，us open都冇心機留意，rafa贏到第19個 grand slam我都開心嘅，同 Federer只相差一個，好大機會超過佢，goat之爭有好大變數，如果 Federer 37歲仲贏到，難道 rafa33、34會唔得？佢有 French open，最多兩年就可以超越 Federer，federer…走到盡頭喇，佢體力差咗，冇以前咁容易佔優勢，佢要打順風波，如果落下風好多時都沉唔住氣（冇數據支持，不過佢一般係接受唔到落後，好多次開局落後就草率咁輸咗場比賽，因為唔想面對）（但都記得08 Wimbledon落後兩局一路追到平手，到第五局仍然一路下風，仍然一直堅持，但我認為嗰次係因為 Wimbledon 同 rafa激起佢嘅鬥志，佢唔想畀rafa喺佢最有把握嘅地方贏到佢。），覺得佢再贏到 gs嘅機會唔大。

水彩花卉風景 Jul 2019 - 6. 瀑布

第六堂嘅畫拖到課程完咗先畫，因為一路都想畫得色彩繽紛 d，throughout個 course都有呢個想法，尤其是呢一幅，上次畫到好悶，monotone咁滯，但又諗唔到點畫，一直拖住。
終於，連最後一堂嘅畫都畫好，趁假期畫埋佢做齊功課，決定用本來用嚟畫燈塔嘅 colour scheme。

天空好好啊，出到我想要嘅效果，我估，係因為我預先濕咗張紙，差不多乾再鋪一次水，於是張紙應該係濕透，顏料就會乾得慢，有時間慢慢鬆開，出到似雲嘅 fluffy感覺。
咁係唔係要厚紙先得呢？應該唔係嘅，用 190紙可以連底都上水，鋪喺唔吸水嘅 surface，有一次畫 poppy都係咁畫，效果一樣。

我嘅 colour scheme同老師差不多，衹係多咗啡同棕黃，內容好豐富，有 raw sienna, burnt sienna同 lacca d'oro，但似乎唔係好睇得出，可能我過度混和咗，變咗一種色啦…

遠處紫灰色部分我都唔肯定係乜，似係最遠嗰層瀑布後再遠嘅樹，如果係樹好似畫得硬咗，不過單睇顏色都算可以，橫向去另一邊顏色同清晰度變化都幾好。

綠色部分最滿意，三組植物顏色分到遠近，不過畫最前嗰組淨係睇住樹，畫到個瀑布塌咗，影響晒成個結構，唉，好失敗…

啡棕色部分重點係水氣，我覺得還可以啦，但 d水好似實咗，似塊布多 d，畫嗰時仲以為好似添…
正中間嗰舊好多色彩架，不過影咗相睇唔到。

畫咗兩次都唔知係咩瀑布，上網一搵就見到，原來就係好出名嘅 iguazu falls，仲有另一幅都係呢個瀑布，it's really magnificent！

Cotman on Saunders Waterford 300g rough 11" x 15"

舊年畫過，顏色單調

https://iceefaery.blogspot.com/2018/05/2018-7.html

水彩花卉風景 Jul 2019 - 10. 划艇

呢班最後一堂，真係快。
圖片中嘅背景混沌一片，原來係山，山上有樹林。老師用偏藍嘅紫藍，我唔係好鍾意，用咗灰紫同綠，乾咗又係變到好淺色，但我覺得睇起嚟迷迷離離咁都幾好，就咁算，唔再加色。

呢幅畫有幾種唔同樣、唔同距離嘅樹，我最鍾意後排左右兩堆，黃黃哋、矇矇哋咁，冇畫到太清楚同硬。
正中兩棵應該係第一配角，老師畫得比較濕，上完色仲灑埋水，我畫就用咗乾筆，唔係刻意，我都唔知點解會咁畫，但既然隻手決定咁畫就咁畫囉，都幾好吖。老師提我哋一定要有留白，如果唔係就會兩舊咁冇生氣，不過我留白多咗，啱啱睇相先發現。
其他 d樹唔係幾好，不過都可以啦…

老師畫水嘅時候，講解畫水嘅技巧，其實都講過好多次，係我自己冇跟住做所以畫唔好，今次我好留心佢點落筆，自己畫時都有跟老師嘅畫法，果然係似咗好多，雖然感覺有d凌亂，但係好咗好多。
因為構圖嘅關係，左下感覺空虛，老師話要加幾筆深色平衡番，我諗我加多咗，唔應該加到填滿個角，顏色都調得唔好，太綠。

上咗咁多個 course，第一次畫人，擔心畫唔好比例，或者姿勢唔自然，所以我起稿好認真。
鉛筆稿畫得幾自然，上色都好小心跟住鉛筆線畫，明暗都睇清楚先落筆，因為面積太細，明暗唔啱位就會爭好遠。
本來覺得最難係兩隻手臂，因為小小嘅範圍有三種明暗，要靠明暗嚟顯示手臂嘅形態，我好小心咁上色，唔知點解三種色唔融合，睇得出一層層，不過我唔敢騷擾佢，分層就分層啦，最緊要分到明暗，如果再搞就一定會更差。
畫完再睇，其實都幾好，好多時我太想顏色自然過渡，會加水或加色修補，結果多數愈修愈唔自然。睇多咗畫展就會發現，原來有d小問題只係自己先會介意，係唔會影響幅畫嘅。（好似係自我安慰咁…）
覺得手臂難畫，所以好小心，結果畫得ok，以為個頭乜都冇好容易，反而畫得唔好，起稿明明都冇問題，上色先覺得唔啱位，但係都冇辨法，改唔到，唯有照畫，好彩都唔算好礙眼。
雖然有d問題，但成個人嘅形態出乎我意料咁係好自然，原來我畫人都唔錯喎，上次畫 wetcanvas都有畫人，都係幾自然，不過同今次一樣，只係背面。

隻船都ok，船蓬裡面都掙扎過，唔啱明暗，好彩結果都自然；
船身邊緣要留白，表示厚度；
枝船杖要留白留出嚟，今次我認真咁留白，冇求其畫成深色，真係乖😊，不過畫完先發現下截幼咗，唉…

成幅畫整體嚟睇都幾好呀，都係因為我有認真起稿，起稿真係好重要。

Cotman on Saunders Waterford 300g rough 15" x 11"

倪匡

今日蘋果日報嘅訪問

【序】

倪匡寫衛斯理慣用第一人稱：「我寫嗰啲嘢太怪誕喇，第一人稱畀人有現實感，到而家仲有傻仔嚟問我真定假！」打了個哈哈。畢竟從小接受衛斯理小說嚴格訓練，我喝了一口烈酒，勉力使自己鎮定下來，做了個無可無不可的表情，倪老再說：「小說梗係假㗎啦！」又再哈哈大笑。我霍地站起來，心想，人類太自大了，自大成這樣，倒是我生平見過最奇怪的事。

我苦笑了一下，攤了攤手，又斟了一杯酒，過了半晌才道：「其實，我都曾經係嗰個傻仔！」
＿＿＿＿＿＿＿＿＿＿＿＿＿＿＿＿＿＿＿＿＿＿

【前言：衛斯理12事】
十多年前，倪匡在街口遇到一對母女，女兒約12歲左右。母親喜孜孜向她介紹：「呢個就係衛斯理喇！」
「我從來冇喺一個細路女臉上見過咁豐富嘅表情，交集住失望、難過、憤怒同難以置信……」倪匡說。「衛斯理點解會係一個又老又肥、衣衫襤褸、撐住枴杖嘅伯爺公？我當場向嗰位母親抗議：『你太殘忍喇！竟然要自己個女咁細個就經歷憧憬幻滅！』」

1.倪匡寫作速度最高紀錄一小時4,500字，看書一樣高速，最高紀錄一天看20萬字，說話速度則比寫字快10倍，最高記錄5秒3句（正常人速度約為每秒3個字）：「太慢我講唔到。」

2.常用字不超過1,500個，自稱用字「接近文盲程度」。金庸的常用字則約4,000個。

3.金庸掌《明報》時，稿費低是出了名。「要加，大家一齊加。」他說要公平，綑綁式一齊加，條數會好大。
一次倪匡喝多了，乘酒意向金庸大呼：「查良鏞，你《明報》賺咁多錢，應該加稿費啦！」金庸只加了百分之五，倪匡氣得怪叫，金庸無奈，說會給他解釋。兩日後倪匡收到金庸來信，詳列清單，說報館開支大、經濟不景，如加稿費勢必引起連鎖反應云云。倪匡不忍，就不再提。

iceefaery :『金庸夾硬將『加人工』同『大家』綑綁，估唔到倪匡會妥協。『大家一齊』呢個講法其實係假公平，付出同收穫成正比先係真正嘅公平，金庸其實係一個韋小寶，有勇無謀嘅衛斯理真係唔係對手。』

4.衛斯理首篇小說《鑽石花》，1963年3月11日刊於《明報》副刊，沿襲《女黑俠木蘭花》套路，屬現代武俠小說，稱不上科幻。

5.衛斯理小說於《明報》發表，「明窗」出版社想出單行本，向倪匡索稿——他攤攤手說：「冇留底喎！」倪匡把原稿全交《明報》，排字房和編輯部沒有人留底，幸一名叫溫乃堅的年青人，致函倪匡稱有齊全套衛斯理小說剪報。感謝上帝。

iceefaery：『所以溫寶裕姓溫？』

6.衛斯理系列有144冊，分別由明窗、利文和勤+緣出版。每本書約9萬字，稿費約為20萬元一本。92年，金庸向于品海出售《明報》股權，之後《明報》拒絕刊登倪匡一篇批評中共的文章，倪匡就說：「既然不願意登，就統統別登吧。」最後的《禍根》只連載了一半，單行本也改由「勤+緣」出版。

7.05年出版的《只限老友》是衛斯理系列最後一部，也是倪匡封筆作。小說寫到一半，倪匡覺得寫作配額已用光，寫不下去，但出版社堅持出版，故改名《只限老友》——讀者看完會咒罵，但朋友便不會。

8.衛斯理在《明報》連載期間，某報向倪匡邀稿，要他創造一個「像衛斯理又不是衛斯理」的人物，這就是原振俠。91年，倪匡移民美國之前把原振俠做個了斷——在浩瀚的宇宙中消失（《天皇巨星》）。新傳奇系列是倪匡授權沈西城撰寫。

9.倪震創辦《YES!》，邀請老父出山寫衛斯理少年時代，催生了「少年衛斯理」。

10.每問倪匡最滿意衛斯理哪本，他總說「本本都鍾意」。這個問題多年前曾有確實答案：《尋夢》，倪匡稱其故事曲折離奇，結局出人意表。書中開場的夢境亦是他從小常做的夢。

11.「明窗」出版的作者簡介，戒酒是真的，「對貝殼的認識已達專家境界」是真的，不懂駕駛也是真的。至於「曾經獨個兒把一部汽車化整為零後再裝嵌為原狀」，求證於倪匡，他說：「冇啲咁嘅事！」「咁係邊個寫？」他笑：「好似係我寫。」

12.民建聯成功爭取北極有企鵝，倪匡早於1965年《地心洪爐》已成功在南極培育白熊。有讀者寫信投訴，倪匡不理；這讀者就天天給他一封信，還越寫越長，倪匡火了，在專欄以特大字體回覆：XX先生：1.南極沒有白熊；2.世上也沒有衛斯理。讀者回兩字：「無賴！」

後來出版商重印，詢倪匡能否改回北極，他不肯：「我鍾意南極，南極比北極神秘！」改為企鵝可以嗎？「企鵝唔過癮嘛！」
＿＿＿＿＿＿＿＿＿＿＿＿＿＿＿＿＿＿＿＿＿＿

【倪匡說】

【衛斯理點搵食？】
冇呀，佢唔使搵食，自然有人畀錢佢，又識得有錢佬多，上至帝王下至巨賈，冇一個佢唔識，哈哈！郭靖黃蓉靠乜嘢搵食？喬峰靠乜嘢搵食？哈哈哈哈哈哈！呢啲根本係屬於武俠小說嘅範疇。冇一樣嘢係合理嘅，冇一樣嘢係現實嘅，因為全部都係幻想。衛斯理根本係一個武俠小說人物嚟㗎嘛，佢有一句說話成日掛喺口唇邊，「我係一個受過嚴格中國武術訓練嘅人」，唔知去邊度受嘅，哈哈哈哈！大家都知道睇呢啲小說冇辦法深究。

佢有一間出入口行，有人幫佢打理，小郭都係出入行嘅職員嚟嘅（係咩？）你睇衛斯理書睇得唔熟囉！白素更加唔使做生意啦，佢老竇係黑社會大佬。

iceefaery：『「我係一個受過嚴格中國武術訓練嘅人」，頭幾次讀到呢句覺得好老土，但佢堅持每本書都講住，就變成一種諷刺咁，襯托咗人物氣質出嚟，所以我一直都覺得衛斯理係一個有勇無謀、自以為好勁嘅八卦老土男人，從來對佢冇幻想。我成日都形住，無論幾無聊冇意義嘅事，堅持做落去都係一種藝術。
如果有人覺得我膚淺，由得我啦；萬一有人覺得我詆毀咗藝術，sorly囉…』

【原振俠與衛斯理】
原振俠同衛斯理好似未試過一齊冒險，好唔容易想到隻故事，梗係分開嚟用啦，拍埋一齊咁嘥，哈哈哈！我靠寫稿搵食㗎嘛！
有人話原振俠同衛斯理，加埋女黑俠木蘭花、浪子高達、高翔、亞洲之鷹羅開，所有人加埋一齊（《復仇者聯盟》？）哈哈哈哈！冇呢個精力，寫得太多。

原振俠嗌衛斯理、白素做「那位先生」、「那位夫人」，點解？好玩囉，故作神秘之嘛。我如果開名嘅話，你哋就唔會問我呢個問題啦！哈哈哈！呢啲完全係故弄玄虛，玩下小花樣，一啲意義都冇。

【衛斯理結局】
衛斯理同白素最後隱居邊度？我都唔知，亦舒講去咗外星（《朝花夕拾》交代衛氏移居到了月球寧靜海）月球有乜嘢好住呀？咁荒涼，應該係去咗一個好美麗嘅外星。

【最喜歡與最不喜歡】
我鍾意嘅角色叫做水葒（於《蜂后》初次出場）佢好聰明伶俐，大話連篇，成日呃人，善解人意，嬌小玲瓏。

最唔鍾意衛斯理，諸事八卦嘅人，唔關你事嘅你都去查，而且查咗毀滅證據，死無對證。

【第一人稱】
因我寫嗰啲嘢太怪誕喇，第一人稱畀人有現實感。到而家仲有傻仔嚟問我真定假，小說梗係假㗎啦。

【男主角叫年輕人】
古龍以前話我，寫武俠小說，寫到主角連個名都冇。我話：『邊一套呀？』佢話：『你好多小說有個主角叫做年輕人！』我話：『冇㗎，姓年，叫做輕人。』古龍傻咗！我寫嗰陣冇諗呢啲，俾佢一講，我至靈機一動。姓年叫輕人有乜問題？好似有啲人問我白老大叫乜嘢名，我話姓白叫老大囉！咁簡單都唔知！後嚟古龍叫我寫兩兄妹，一個叫牛肉湯，一個叫牛肉麵！

【著作等身容乜易！】
我朋友話我有一個怪行為，全世界作家唯一一個唔存自己嘅作品嘅就（只得）你，哈哈哈，出版社攞啲書嚟，俾人攞晒，《老貓》我攞咗幾多本都冇喇，打個電話畀蘇總（明報出版社總經理蘇惠良先生），「畀我5本《老貓》啦！」（哀求聲）一下又俾人攞晒。

出版社攞嚟畀我簽名，淨係衛斯理已經係我作品嘅一小部份，小部份嘅一半，81本攞嚟畀我簽，放滿晒我啲枱。啲人話「著作等身」，其實容乜易吖，我個人又唔高，哈哈！

【鹹濕小說封性學啟蒙】
半鹹濕嘅有，全鹹濕嘅冇喇。筆名都係倪匡。你哋太後生喇！我啲鹹濕小說係而家五、六十歲嗰啲人十五、六歲當係性學啟蒙㗎，個個都睇到嘩嘩聲。

我總共寫咗11本，俾法庭告咗6次。法庭告我太鹹濕囉。我一本收佢 1,000蚊稿費，俾法庭告一告罰咗6,000蚊。我唔好意思寫落去，佢話寫啦寫啦有人睇，哈哈！後尾我冇再寫落去。

我有啲鹹濕小說係大電影嘅鹹濕，而家嘅鹹濕小說係小電影嘅鹹濕。大電影嘅鹹濕比較好睇啲、多啲情節描寫，而家嗰啲完全係動作嚟嘅，色情動作片嚟。

【自揭三大蠢事之一】
重寫還珠樓主《蜀山劍俠傳》係我畢生三大蠢事之一（結集成書名為《紫青雙劍錄》），逐句加標點，廢話刪咗佢，俾我刪咗二分一以上。呢本書真係好睇，對我影響最大。（三大蠢事仲有邊兩件？）點可以講畀你聽㗎？咁冇面子。呢兩件蠢事唔講得，太冇面喇。

我改《紫青雙劍錄》，非但改，佢未完㗎嘛，寫咗幾百萬字都未完。我勉強幫佢續咗二、三十萬字，俾人鬧到狗血噴頭。所有鍾意《蜀山劍俠傳》嘅冇一個唔鬧我。

【與胞妹亦舒失聯22年】
佢寫到而家仲喺度寫，幾本事呀！其實佢寫嗰啲男男女女嘅故事，冇變化㗎！唔係一男兩女就係兩男一女、一男一女、ABC三個輪流鍾意唔鍾意，但真係可以寫落去，讀者又睇得落去，真係古怪！

iceefaery：『係真，我追佢哋兩兄妹小說追咗半生，買完一本等下一本，倪匡我睇到佢最後一本衛斯理，但亦舒…，我以為都會咁，但發現自己越嚟越快睇完一本書，又冇意慾再睇一次（所有書我最少會睇兩次，因為知道咗結局，同知道咗人物真正設定再睇會有另一種感受），我就冇再買佢嘅小說。

講開又講，佢d書嘅釘裝好唔 make sense，可能係為女性讀者啦，封面同內頁用紙都好靚，整到本書好重，咁都唔係大問題，最大問題係唔明點解釘得好實，攤唔開，對好鍾意睇住書食飯嘅我嚟講真係好唔方便，倪匡都冇點名講過。』

（同亦舒有冇聯絡？）佢50歲嗰年打過一個電話畀我，「『二哥呀（哭音），我都50歲喇！」 我話有乜嘢出奇？好快60歲。而家佢72歲，22年前通過個電話，從此冇聯絡。

嗰時想睇佢消息，可以睇《明報周刊》，佢有篇散文（專欄），而家散文都取消咗喇，音訊全無，冇聯絡。佢個女廿幾歲都冇見過。我打畀佢，都係去錄音機。（想唔想打畀佢？）我有乜嘢講啫？冇偈傾。佢有佢鍾意啲嘢我唔明，我鍾意啲嘢佢又唔明。

【帶牛肉等外星人】
我試過好多次喇，我以前住25樓，得閒無事就上天棚，坐喺度，等，至少睇吓有冇飛碟經過。嗰陣我住寶馬山賽西湖。等唔到外星人，你估我等到乜嘢？寶馬山原來好多麻鷹㗎，胡胡聲，仲以為我就嚟死落嚟啄我，嚇到我呢（拍拍心口定驚）……

我喺蒙古草原我都等飛碟㗎。我堅決相信（有外星人），因為星球太多喇。我哋想像嘅所有生命都係有頭有腳會郁嘅會呼吸會食嘢，你外星人嘅生命可以係唔同嘅形態，可以係唔郁，可能完全冇頭。

你上到火星，你話上頭冇生物，你點知你隔籬嗰嚿石頭係咪生物？佢喺隔籬睇住你你都唔知啦。你覺得佢怪，佢覺得你怪。
iceefaery：『衛斯理都去過一個冇人嘅星球，佢以為冇人，原來係所有人都冇晒身體，全部得番腦電波，可能火星人都係咁。』

所以我哋信教，信上帝就係外星人。有個女士話佢有個問題令佢好困擾，乜嘢問題？佢話佢信主耶穌，但係又信外星人。我話有乜嘢問題？根本乜嘢問題都冇，上帝就係外星人。

https://hk.entertainment.appledaily.com/enews/realtime/article/20190913/59984385


～*～*～*～*～*～*～

3 July，2022

佢今日下午走咗喇，應該係外星親人嚟接佢返去。

⋯其實冇乜嘢想講，

⋯佢嘅小說畀咗我好多娛樂，好多謝佢，

呢個時代，返外星可能都係一個好去處，

多謝，拜拜👋