畫畫 – 榴槤與山竹（水彩）

阿 sir搬咗新地方，改咗上堂時間，我終於上到堂😇

不過阿 sir搬好又放咗差唔多兩個月假啊，結果等到而家😁

榴槤殼用青綠加 yellow orchre，榴槤肉用 lemon yellow，⋯其他唔記得晒，堂上未畫完，返到屋企唯有自己左試右試😂

我咁耐冇上堂冇留意時間改咗，遲咗差不多半個鐘，一去到大家已經畫完個榴槤殼，我成堂都喺度努力趕上大家進度。平時畫畫已經手忙腳亂，嗰日更加心仔亂亂，畫完一 part就忘記咗上一 part😂

個榴槤殼畫得怪怪咁，雖然我唔食榴槤，都知道唔會開成咁，同學仲話顏色唔夠熟添。不過榴槤肉都算畫得 OK。

山竹都係我唔食嘅嘢，不過佢同榴槤一齊構圖真係幾靚。下面兩個冇留白，dull咗，不過開咗嗰兩個都算唔錯啦，雖然 d肉有 d奇怪，畫嗰陣唔覺，仲覺得畫得幾好，但直到打緊 post嘅現在，先發現肉嘅形狀有 d畸形。

Cotman on Saunders Waterford 300g cp 15" x 11"

今堂阿 sir用縫合法嚟畫，嗯⋯我喺堂上勉強都可以算用到縫合法嘅⋯，但返到屋企就免不了無限重疊，左修修右補補咁。

我諗要好好咁用到縫合法，最緊要都係調色準確，清楚下一筆要用乜嘢色。

希望下堂畫得好 d啦。