水彩班 – 草原上嘅雲朵

😞😞😞😞😞😞😞😞

呢幅畫喺起稿前，阿 sir已經預先提咗我哋要注意幾點：

1. 地平線要低於中線

2. 人嘅比例同高度
3. 房屋嘅位置

4. 草堆頂點要過地平線

睇第一點就知道，個天喺呢幅畫佔幾重嘅比例，然而！我畫壞咗個天呀⋯唉，天呀！

我哋第一步就係畫個天，用 cerulean blue ＋ 少少 ultramarine blue，由最高逐 d畫出每朵雲之間嘅天空，因為好多雲，所以天嘅部分只有好少。由最高用最濃嘅顏料，邊畫邊稀釋畫到最低。

只見阿 sir呢度嗰度一筆筆咁畫，亦冇整濕畫紙，於是就出現咗一堆硬邊嘅不規則色塊；然後，用任何藍色 ＋ 玫瑰紅色調成偏灰紫色畫雲。

我對呢種畫法，真係一 d信心都冇，我一邊睇示範，一邊滿頭問號，

『咁？』

『咁樣？』
『咁樣樣？』

『呢種究竟係乜嘢色？』（雖然睇住示範，但顏色乾咗會唔同色）

『我調唔調到呢種色？』

『我畫出嚟會變咩樣？』

anyway，阿 sir教咁畫，我返埋位就照樣咁畫，阿 sir教嘅畫法，冇信心都會跟住做，如果唔係就學唔到呢個畫法。

猶豫咗一下，好勇敢咁落筆，不過一落筆就知道自己唔係勇敢而係魯莽😀，雖然起咗稿，但因為係畫雲，所以已經將線條擦到好淡，緊張嘅我，自己都變咗一舊雲，完全唔知道自己要畫乜，但都開始咗喇，繼續畫啦。

位置唔啱、筆觸唔啱、顏色都調得唔啱，示範時阿 sir d雲顏色明明偏紫，但後來乾咗再睇，係偏灰，點解喺我幅畫唔會變灰？😂well........

我諗⋯，重點係我對顏色嘅感覺太差，好多時都掌握唔到調色嘅比例，同埋對要畫嘅嘢唔肯定。

係唔係寧願上完色仲睇到個稿，都好過畫到離晒譜？

睇番幅畫，最失敗都係 d雲嘅顏色，偏紅咗。返屋企想將中間兩朵雲變番一舊，咁會順眼 d，因為雲應該係上面嘅最大，愈低愈細。但我愈改愈差，水彩真係 very unforgiving，仲要畫嘅係雲，真係冇得執。

不過天以下嘅部分我覺得係 ok嘅，草地同踩單車個人都畫得好啱比例。
（但今堂重點係畫雲呀！！）

主要都係用 yellow orchre＋sap green，遠方嘅樹用 ultramarine blue＋yellow orchre。 

Cotman on Saunders Waterford 190g rough 15" x 11"

阿 sir而家嘅教法，係逐部分示範，然後各自返位完成，push到我哋畫得快 d，唔會喺一個位蹉跎太耐，基本上喺堂上已經完成，仲俾埋阿 sir review同修改。不過我唔想俾佢改，自己畫得幾差都想成幅畫係自己畫嘅，而且，阿 sir幫我修改到好靚，但我睇番，會忘記咗當時自己畫到幾差，錯咗乜，然後以為自己『都畫得幾好吖』。

我鍾意上畫班，係因為鍾意同大家一齊畫畫，雖然上堂各有各畫，又冇時間傾偈，但感覺好好。又可以睇吓同一樣嘢人哋點畫、畫成點，最重要仲係可以聽吓阿 sir指出各人嘅錯誤。佢示範時我哋只係睇到一個『啱』嘅示範，睇大家嘅畫先可以睇到『錯』嘅示範，好多時阿 sir都唔會知我哋會點錯，冇得預先講。不過好可惜啊，呢堂我趕住走，連自己幅畫都冇時間俾阿 sir睇就走咗喇⋯

～*～*～*～*～*～*～*～*

好有熱誠咁再畫一次。

雲嘅顏色自然咗，但好似太淡，而且效果反而冇上次咁好，上次亂亂哋比較似雲。

Cotman on Saunders Waterford 190g rough 7.5" x 5.5"