the Day will come: 5月 2018

2018年5月27日星期日

畫畫 - 亂畫（水彩）

見到人哋用水彩畫繡球花，用各種唔同顏色，好靚，仲好似唔難。
.....但自己畫起上嚟一d都唔靚，應該係sketching功力唔夠，稿起唔好，除咗中間嗰朵，側邊d花仔全部唔啱位，而且形態生硬，都係要練吓素描先得。
呢個course仲有兩堂，完咗會暫停一陣，畀d時間將學到嘅沈澱吓，自已練吓。

又畫吓鬱金香，因為簡單，呢兩日唔知做乜，好想畫畫但又唔想畫畫，哈哈哈...
開始試用唔同嘅背景畫法，邊緣始終收得唔靚，冇美感。

Cotman on Saunders Waterford 190g rough 5.5"x7.5"

2018年5月26日星期六

水彩花卉風景 2018-8 - 百合

好難介定一個物件難畫定易畫，因為唔同角度有唔同難度。
今堂畫兩朵百合花，其中一朵難啲，我點畫都畫唔啱個perspective。

上面嗰朵都ok，下面嗰朵就好古怪，尤其是枝stamen我唔應該畫到咁旁邊，中間係唔係應該加幾筆深色畫番啲pistils出嚟呢....

啲枝同葉好似畫細咗，初時仲畫錯咗添，動用咗粒sponge擦咗再畫過。
今次個背景我冇填滿，不過啲邊緣收得唔靚，好生硬。喺wetcanvas見人話呢種叫vignette。
其實啲花瓣都算幾好，但枝葉就好差，畫到冇心機。

Cotman on saunders Waterford 190g rough 11"x15"

用另一種紙再畫一朵，係cold press紙，效果有小小似hot press，都係容易有水痕，我諗用hot press 同cold press 畫樹會容易啲出我哋想嗰種效果，揾日試吓先。
第一次上水彩班嘅時候，唔知miss ho會教我哋買畫具，自己走去亂買，買咗呢本watercolour block，帶埋一盒pentel水彩同唔知乜嘢畫筆走去上堂，，當時以為水彩淨係得pentel同sakura，而家睇番覺得幾好笑，諗番中小學上咁多年美術堂，蠟筆、粉彩、水彩、廣告彩都用過，但冇一個老師真係教過點畫畫，甚至冇教過d顏料嘅用法，上堂畀個主題，就自己開始畫。
呢本畫簿都唔係差，但如果一開始就用呢種紙應該會更災難，記得有個同學冇用miss ho介紹嘅紙，畫到喊咁滯，因為每筆落去都有水痕，當時我好疑惑點解佢會咁，到而家我先知係紙嘅關係。

第二次畫仲差，花瓣角度怪怪咁，唉！

Cotman on canson montval 300g cold press 7.5"x9.5'

2018年5月22日星期二

畫畫 - 豬籠草 Nepenthes 02（水彩）

畫咗咁耐水彩，99.9%都係用 rough 嘅水彩紙，今次特別試吓用hp。係學木顏色嗰時買嘅，都唔知點解會買300g，可能係用開 Waterford，但佢又只得300g嘅block啦。

hot press紙同rough好唔同，最主要係好難化開，顏色好快蝕咗落去，形成一條硬邊，加好少水暈開都會有水痕。

我唯有唔用水暈染，而係每一筆都帶少少顏料，將底下嘅顏色帶開，所以畫畫吓就冇晒留白，幾個豬籠草都係用黃色收尾，用damp嘅筆輕輕掃開，所以唔均勻同有少少硬邊都唔覺，因為黃色本身係有咁嘅特性（我自小就發現到，不過唔知點解），如果唔係用黃色咁點好呢？

雖然有少少困難，但如果控制到水份，效果更有水彩感，加埋用縫合法，色塊之間嘅融合一定好靚，雖然我都算係用縫合法，但重疊係少不免，顏色有融合都畀下一層抹咗。

第二次畫，構圖仲差咗，後面塊葉好似突出咗，係唔係應該洗洗佢呢...，我驚洗咗仲突出喎....

唔知係唔係因為冇底色嘅關係，定係構圖有缺憾，畫面有 d空虛惑，我灑咗幾點顏色上去，遮遮醜😊

好幾次以為已經畫完，但睇睇吓又覺得仲未得，啱啱就覺得好淡色，所以又上多層色，上完都係覺得唔夠色彩，啲豬籠可以再綠 d，不過唔會再加喇，仲洗埋深色咗嗰塊葉，呢張紙好似比較經得起洗同擦，唔知係因為300g定係因為hot press呢？

cotman on saunders waterford 300g hot press 12"x16"

上次用rough 紙

https://iceefaery.blogspot.com/2018/05/blog-post_13.html

2018年5月20日星期日

水彩畫筆

忽然發現自己買咗好多畫筆，不過全部都唔係靚筆。

我一路都唔想亂買畫具，唔想話畫得唔好就賴工具唔好，點知唔覺唔覺都買埋一大堆，但每一套都有買佢嘅原因啊！

大掃、平頭、同其中兩枝紅身白頭係miss ho叫買嘅，後來自己買多兩種size，聽講係藝文出嘅。

枝木掃而家仲用緊，大面積上色或者水都用佢。

平頭掃，當時係用嚟畫acrylic，因為其中有一堂我哋用白色acrylic溝水彩嚟畫。而家就用嚟捽走唔要嘅色，尤其是d邊太硬，都可以捽番鬆。

紅色嗰套用咗都幾耐，有一日諗，『不如買枝好少少嘅筆啦』『試吓用唔同嘅筆會有乜嘢唔同』，不過都係唔識乜嘢係『好』嘅筆，傳說中嘅松鼠毛、貂毛.....應該好貴，買嚟畫我嗰d畫，好似不成比例。

去廣益睇，淨係見到尼龍筆，貴筆可能收埋唔係任睇，咁我唔肯定一定買，唔好意思叫人攞嚟睇，緣慳一面。

但去到，都係想買番枝，就買咗呢枝廣益自己出嘅，都係尼龍，但筆鋒順過舊嗰枝，比較柔軟同靈活。

不過用咗一兩次，細嗰枝嘅金屬furrel裂咗，好彩係上面，影響唔大。

粉紅色呢套好可愛，喺vancouver買。

去到一間好有氣質嘅美術用品店，同香港一樣，名貴貨品都係收埋，我亦一樣唔想問，費事問咗唔捨得買或者迫住買。

見到呢套好靚，又好平，於是當紀念品咁買咗，後來先知都算系出名門，係princeton嘅，生產好多靚畫筆。

我懷疑呢套筆唔係水彩用，包裝寫住for 各種用途，suit all就即係not best for all，因為佢唔hold到水，畫起嚟少少『啜』畫紙。

或者以後會發現到佢嘅真正用途啦。

有一日上堂前先發現唔記得帶畫筆，好彩附近有間『春記書局』，有美術用品賣，不過畫筆選擇唔多，見到呢套價錢幾啱，就買咗佢。

一套6枝，百幾蚊，佢話自己係black sable，少少懷疑係牌子嚟囉。

都幾好用，吸水力都幾好，可能係好劣質嘅black sable都唔定。

而家會用枝大嘅嚟鋪水，或者洗palette，係呀，洗嘢....

基本上，每次買咗新筆就會keep住用，本來見買咗一大堆，嗰d raphael, da vincci又咁貴，我已經暫時打消咗買筆嘅念頭。

但舊年去台北，有個去咗台中讀美術嘅畫班同學介紹我去睇師大附近嘅美術社。

台北嘅美術社比香港嘅有規模，好多嘢都擺晒出嚟，包括比較貴價嘅畫筆。

我見到呢枝macrowave，係純貂毛，12號都只係ntd800，唔會係最名貴嘅kolinsky，但都想試吓動物毛係唔係真係好好用，200+港幣價錢都好ok，旅途中購物慾又寧舍高漲，於是我啲筆又再增加嘞。

的確係比尼龍筆好用，吸水力強，hold到好多顏料，畫大面積唔會咁快冇色，筆鋒可以收到好尖，細節都畫到。

咁究竟raphael, da vincci會好用到乜嘢地步？

我以為暫時都唔會有新筆加入，就算同學個個都為老師示範用嗰枝又平又好用嘅筆傾倒，我都不為所動，因為我覺得我已經有好啱用嘅筆。

點知，好同學好到買埋嚟送畀我哋，真係好開心，有好筆又有好同學。

真係幾好用嘅，佢係圓頭筆，但又好容易壓扁到好似平頭咁，又比平頭多咗層次，係吸水弱d，但你唔係吓吓都要多水嘛。

用用吓貂毛筆覺得佢畫得太順，線條太流暢（欲加之罪，何患無詞），唔係畫乜嘢都啱，呢枝吸水少，筆鋒唔暢順，令你畫嘅時候疾吓疾吓咁仲自然（賤骨頭）。

有日，老師講開，先知佢『話』係狼毛，但咁嘅價錢，好大可能係狗毛……😨

呢套唔係水彩筆，都record埋啦，係唯一一套名牌筆（princeton嗰套咁cheap唔算啦），係holbien嘅，又係上miss ho堂要用，素描有幾堂acrylic，呢套好似係馬毛，...定豬毛？

不過我都係鍾意水彩，好少畫acrylic，上完堂都冇用過。

呢個大家庭暫時唔會有新成員喇，除非，kolinsky超級大減價啦。

btw，水彩筆洗完係要筆毛向下晾乾，點解生產商好似冇考慮呢點，冇一款筆係可以就咁掛起，要自己想辦法，用橡筋、用夾、用勾咁，如果跟中式毛筆設計，筆頭有個圈可以掛起，會方便好多。

水彩花卉風景 2018-7 - 瀑布

冇去上堂，好同學影咗video畀我睇，老師示範一個鐘有多，同學影咁耐，真係好攰。

畫過兩次瀑布，今次畫好似容易控制咗，點畫水流，點營造水氣，都冇咁不知所揩。
今次呢幅好多層次，同埋水氣，理智上知道用色點去調節，但實際畫嘅時候就失去咗理智，因為有時心諗藍加黃變綠，但出嚟嘅綠唔啱tone，試過色都係咁，因為正式畫嗰陣調色比例同水份都會唔同咗。
所以搞到左邊兩道山崖色調唔啱，前後個tone調轉咗。
山崖上嘅樹仍然係畫唔好。
最右邊遠方本來係平嘅，畫畫吓高出咗咁多，好彩線條仲係幾流暢，不過如果知道我畫緊邊度就會覺得礙眼。
同埋唔知點解畫畫吓變咗monotone咁，好似除咗ultramarine, alizarin crimson，少少yellow orchre之外，已經唔知道可以再用乜嘢色，愈畫愈單調。
畫完睇番老師嘅示範，原來佢喺前面兩道瀑布加咗唔少綠色，
但我接受唔到突然加到咁綠，只係輕輕加咗小小綠，哈哈...唔上唔落咁....

成幅畫基本上我覺得算成功，瀑布水流同水氣都幾好，
顏色係好單調，但總算層次都畫到出嚟，

Cotman on Saunders Waterford 190g rough 11"x15"

原本張圖片仲有條彩虹，老師冇畫到，
但我一路都想試畫彩虹，所以今次我想畫埋，開始畫嗰陣都預咗位。
唉，連老師都唔畫一定有原因，
畫完就知錯喇，唔夠明澄，彩虹位應該完全留白，
但最重要係彩虹同背景嘅銜接唔流暢。
破壞咗幅畫，好彩我加彩虹之前影咗相，起碼有美好回憶。😆😆😆😆

上次嘅瀑布
https://iceefaery.blogspot.com/2017/07/1.html

Sep 2019 再畫

https://iceefaery.blogspot.com/2019/09/jul-2019-6.html

2018年5月19日星期六

bon appetite 私房菜

呢間私房菜喺花園大廈9樓，叫 bon appetite 。
我對呢幢大廈總係有一種神秘高貴又溫馨嘅感覺，因為細個嗰時，去過好幾次，但當時細個懞盛盛，同埋去嘅時間原因都幾特別，同平時會去嘅地方，平時會發生嘅事好唔同，所以對細細個嘅我嚟講真係幾神秘。

今次係我 9歲後第一次踏入花園大廈，同所有bubble一樣，一接觸到現實就會burst。
花園大廈同海景大廈一樣，以前係外國人同有錢人住嘅地方，而家住咗唔少印巴籍人士（喂喂，印巴籍唔係外國人咩）（唔算！肯定有香港身份證囉），亦有唔少單位做咗商業用途，出咗電梯就見到非常簡樸嘅走廊同一道道同樣簡樸嘅木門鐵閘，地面牆身亦唔係太光潔，一點半點夢幻嘅感覺都冇，當然，神秘溫馨只係我自己幻想出嚟嘅啫。

餐廳門口冇任何標誌，同一般住家一樣，第一次去真係唔知有冇揾錯地方。
裡面燈光幽暗，擺咗幾張枱，大概有18個位，地方夠大，坐得幾舒服，
裡面仲有房，都有枱，不過唔好意思入去睇。

外面又曬又熱，入到去又暗又清涼，即刻舒服晒。
我哋張枱本來對住部冷氣，出風好猛，但佢掛咗塊薄紗簾隔開，啲風變得好柔和，仲見到塊紗畀陣陣風吹住，睇到都清涼。

私房菜一般訂位已經訂埋菜，所以坐低一陣就上菜。

第一道係海鮮濃湯，我覺得比較接近龍蝦湯。
湯好香濃，配蒜茸包，烤得好香，好好味，但唔知點解我哋飲完湯先上，唔能夠一齊食有小小可惜，其實佢唔需要急住上個湯，我哋都冇催佢，可能係我哋個樣太餓啦。

跟住就少少惡夢喇，係元貝沙律配荔枝醋，點知佢竟然用青醬拌元貝，後來知道佢個青醬仲係用芫茜做，天啊~，本來menu有個青醬焗大蝦，我哋要求改咗唔用青醬，佢竟然毫無預兆咁喺第道菜用咗青醬！！

好彩，第三道菜道係香煎鵝肝配魚子醬，塊鵝肝煎得好香，外脆內嫩，又唔油膩，魚子醬我已經忽略咗，芫茜嘅惡夢都可以暫時放低。

然後就係焗大蝦，本來係青醬焗大蝦，好彩佢冇唔記得同我哋改用蒜茸同芝士，好好味。

終於嚟到主菜，我哋都揀咗燒羊西冷，件羊西冷本身都幾好，但熟咗少少（諗起佢冇問我哋要幾成熟），同埋唔夠熱，冇燒烤肉類嘅香味，係唔係因為要擺一陣驚出血水嘅關係？
有個稀稀嘅汁，食唔出係乜嘢汁，我未試過扒類配咁嘅汁。
配菜有兩隻秋葵，好特別，唔係d人人都會食嘅嘢，我以前唔會食，而家隨便咗好多，食埋，但以前冇食過，都唔知應該係乜嘢味，連佢有冇煮過烤過都唔知。
有小小失望，唔可以話係差，只係唔算好咁囉。

食完主菜仲有海鮮天使麵，有蝦同蜆，個汁好香，幾好味。

甜品呢，我哋喺是日甜品cheesecake同火焰雪山之間揀咗火焰雪山，都係貪得意，而且cheesecake太普通。
不過呢個甜品除咗得意就冇其他，只係蛋白包住一個唔好味嘅雪糕球，同埋底下好似有小小冰...又好似刨冰，唔係好肯定，亦食唔出味道，希望唔係雪糕起咗冰啦。

飲品唔係咖啡奶茶，而係花茶，又係唔係人人都鍾意嘅嘢。雖然我時時飲玫瑰花茶，但其實係茶多過花，市面嘅花茶一般都有奇怪嘅濃香。佢嗰杯係桃味，好彩唔係好濃同埋比我飲過嘅自然，隻杯好靚，賞心悅目，都ok嘅。

呢個set $400 ，另收加一，都抵嘅，尤其是而家唔係好多地方食西餐，所以我係會再去嘅。

2018年5月15日星期二

法國網球公開賽 The French Open 2018 （21 May - 10 June 2018）

又嚟到 clay court season 嘅壓軸大賽。
（諗起細個曾經好想買嘅一對波鞋，型號就係 roland garros，當時唔知道係乜嘢意思，只係單純鍾意個款，寶藍色suede leather，粉藍色三間，不過好貴，唔捨得，no，唔係唔捨得，係根本冇錢，估唔到而家我年年follow 住roland garros，係唔係宿命？唔知有冇復刻版，或者應該買番對）

今個賽季算順利定唔順利呢？
畢竟以50win刷新咗單一場地最多連贏場數，way more than順利，
雖然畀 d. thiem 喺 madrid open 嘅 qf 終止咗；
但贏咗唔知第幾次 davis cup、第11次monte carlo、第11次barcelona、第8次羅馬，
淨係失落咗madrid啫，仲保番住第一位，咁都唔算順利點先算呢？

federer繼續唔打clay season，
djokovic暫時未恢復到，
murray....still suffering from hip injury，
nishikori好似未回復狀態，
del potro，唔知係唔係手腕嘅傷影響，咁多年都去唔番最好嘅狀態，不過呢，我覺得球員太高再加埋球拍，擊球點離指揮中心太遠，好似好難協調，又好似會好容易受傷咁。（我知道咁諗好無稽....）
wawrinka, 無聲無息咁，
tsonga, verdasco, berdych, monfils, ferrer, 都係唔似會再有突破嘅，
zverev, madrid open最後贏家，thiem贏咗rafa，但輸咗畀佢。唔知點解我覺得佢有小小似becker，覺得自己有天份，唔係好在乎咁，（i know nothing, 純粹感覺感覺感覺.....）
shapovalov, rublev暫時仲未成氣候，
dimitrov, kyrgios, schwartzmann, 對rafa有挑戰性，過到關都會消耗好大，
最大嘅對手我仍然覺得係thiem，啱啱先輸咗畀佢，被譽為 2nd man on clay，不過我覺得佢同在狀態嘅djokovic仲爭好遠，咁就second man，可想而知目前係幾咁青黃不接。
但rafa係一個可以贏任何人，又可以輸畀任何人嘅球員。

十幾年喇，仍然係rafa 同 roger爭頭兩位，中途有其他人出現過，但都唔長久，最有potential嘅djokovic竟然唔係因為身體原因而墮後，真係出人意表。

以上全部係我亳不專業，以睇娛樂新聞心態去睇atp嘅想法。

~*~*~*~*~*~*~*~*~
講吓而家打緊嘅italia open先，

thiem R32就輸咗畀fognini，
其他有威脅嘅 dimitrov, schwartzmann都出咗局
R16有下輪對手 shapovalov, fognini, nishikori, djokovic, cilic, delpo, goffin, zverev。

其實佢哋係唔係schedule咗要輸，養精蓄銳打fo？
rafa咁樣打落去會唔會太exhausted？贏一堆master輸個gs好唔抵，
madrid打完schwartzmann再打thiem已經支持唔到，
rome打到20/5，嗰邊fo 21/5就開始，雖然rafa唔使打R1啫，休息兩日就夠？
我唔信佢真係覺得 a match is a match，佢一定想gs數贏過federer，....
well，信佢嘅entourage啦。
（原來頭一個星期係qualifying round，tomic都去打喎，可能佢已經跌到太低，我以為佢退咗休添。）

終於，rafa第8次贏到羅馬站，但過程驚心動魄。
決賽對手係zverev，第一盤61贏咗，我以為第二盤都好容易，點知竟然以同樣比數輸咗，嘩，zverev真係咁犀利？聽聞係rafa體力有問題，咁好彩第三局打咗一陣，落雨暫停，可能真係回咗氣，跟住就以63贏咗。rafa今季唔係冇輸過，但輸到16就有少少不尋常。
fo緊接住開始，希望佢快d恢復啦。

~*~*~*~*~*~*~*~*~

the draw
1st quarter : rafa, schwartzmann, anderson
2nd quarter : cilic, fognini, berdych, del porto
3rd quarter : dimitrov, goffin, kyrgios, djokovic, verdasco
4th quarter : zverev, thiem, nishikori, wawrinka

總係覺得atp而家青黃不接，定只係因為rafa同roger實在太強呢？

qf 就會遇上專門消耗rafa體力嘅schwartzmann，
sf 會有cilic 同 delpo
至於暫時最有力嘅對手zverev同thiem就要final見。

~*~*~*~*~*~*~
R1
simone bolelli
r1 原本對手dolgopolov受傷退出，由佢補上，
喺qr已經淘汰咗，唔知以乜嘢基制揀咗佢。
唔係好明，都抽晒籤排好位，對手退出唔係直接晉級嘅咩？

星期日嘅比賽因為落雨，第3盤暫停咗，暫時比數係64 63 03，

乜事呢？呢個對手係連外圍賽都打唔贏架喎，rafa打gs頭兩圈硬係咁樣，...

下半已經打完，schwartzmann, djokovic, thiem, zverev斬瓜切菜咁晉咗級，
我仲以為rafa會打到61 60 61 咁添。

終於，64 63 7(11)6(9)，打到tie break，仲要打到11分，真係捏一把汗，希望跟住落嚟會漸入佳境啦。
如果冇落雨會點？打到5盤....或者仲會輸埋添？唔會嘅，he's on clay，只有09年咁嘅狀態先會輸，right？
phew....

ferrer同verdasco一樣，打足5盤，不過verdasco贏咗，ferrer就輸咗，36歲喇...

~*~*~*~*~*~*~*~*~*
round 2
guido pella

62 61 61 贏咗，下一場對gasquet。

shapovalov 1-3出咗局，原來佢排名已去到24，不過近呢一年好多上一、兩代都傷病，唔傷病嘅又無甚作為，所以新一代都升得好快，suddenly前十好多陌生嘅名。
如無意外r4就要對schwartzmann，不過佢R3對手係coric，雖然排名只係48，但同schwartzmann H2H 係2-0，2017先喺clay court 贏過，所以schwartzmann都唔係咁樂觀。

傳說中cilic都係有力嘅對手，
del potro, goffin, monfils, verdasco都3-0，thiem 3-1， nishikori 同 zverev 3-2 晉級。

~*~*~*~*~*~*~*~*~*~*~*~

R3
Richard gasquet
真係唔知講乜好，15-0嘅h2h，well, 話不能說太盡，nothing is impossible，大家都加油啦。

結果rafa贏咗63 62 62，h2h變成16-0，唔知係唔係最大比數呢。

zverev 爭d就R3止步，62 36 46 7(7)6(3) 75。
verdasco 3-0 dimitrov，我係略意外，或者西班牙球員一般都有clay court優勢啦。
Djokovic之前兩場好似好利落咁贏咗3-0，不過對手都係排名13x，15x，今輪對手agut排名13，用咗4盤先贏到，睇嚟狀態仲未係幾好。
nishikori 3-0 gilles simon，simon排名曾經一度去到第6，原來喺呢10年間已經跌到65，體育競技真係好殘酷。
thiem, goffin, delpo, cilic, schwartzmann都入咗r4。

~*~*~*~*~*~*~*~*~*~
R4
maximillan marterer
冇交手紀錄，最怕呢種，rafa對新對手總好似一籌莫展咁。

rafa頭兩局63 62，仲打緊第三局，marterer 43領先，哎呀，千祈唔好好似隔籬咁掉轉輸番。

wow，呢個排名70嘅小朋友居然喺clay court同rafa打到tie break，雖然輸咗，但tie break 4-7都可以想像到佢係可以鎮定應戰。反觀Anderson，tie break輸0-7，太緊張喇。
可能小朋友冇嘢輸啦，無論打成點都係賺突，gs R4應該係佢暫時最好成績喇。

zverev 除咗第一場輕輕鬆鬆3-0，跟住場場都係5盤，好似係好艱苦，但最緊要係贏到啫，相比舊年真係進步咗喎，都仲未嗌攰，仲支持到，而且刷新咗自己嘅gs成績添。
thiem 都係，第一場3-0，跟住三圈都係4盤。
qf就係zverev vs thiem，另一組係djokovic vs cecchinato，未聽過.....
djokovic好輕鬆咁3-0贏咗verdasco，係verdasco唔掂定係djokovic返咗嚟？
cecchinato ，排名72，25歲，但已經打咗8年職業賽，不過咁耐都只係今年贏過一個250 clay court title，以往gs最好成績都係過到外圍賽入R1，今年竟然贏咗排名10嘅carreno busta，同排名8嘅goffin，入到qf，好成績可唔可以繼續呢？不過應該贏唔到djokovic喇。
Schwartzman先輸兩局61 62都追番75 76 62，真係tough，見anderson開局咁好，以為佢可以幫rafa掃走一個強敵，點知最後都係輸。
cilic贏fognini，delpo贏isner，意料中嘅賽果。

Q1 : rafa vs schwartzman
Q2 : cilic vs del portro
Q3 : cecchinato vs djokovic
Q4 : thiem vs zverev

我嘅估計係
rafa vs del portro
djokovic vs thiem

~*~*~*~*~*~*~*~*~
qf

diego schwartzman
雖然h2h 5-0，但每次都好大消耗，最近兩次係ao同madrid，rafa最後都輸咗，好多rafafans都話係因為同佢打完，體力不繼。

rafa第一局輸咗64，係第一次有人贏到佢一局，睇嚟真係贏埋場比賽都唔係冇可能，因為第二局都好緊湊，但落雨暫停咗，希望過咗一日會好轉。呢排好奇怪，每次佢形勢不妙都會落雨暫停，然後復賽就扭轉形勢。
果然，復賽就直落三盤63 62 62贏咗，總比數係3-1 46 63 62 62。
schwartzman真係好犀利，輸在身型，以一般男仔嚟講都算矮，更何況atp個個都186以上，新嗰批接近200都有，不過體型單薄可能走位更靈活啦。

del potro 贏咗cilic， 76 57 63 75。
喺clay court上，thiem的確係好過zverev，64 62 61，比數每況愈下，好似係因為zverev拉傷咗。我估係前三場5盤疲勞過度，肌肉失去彈性容易拉傷。佢體能好似係差小小。
另一pair，wow，排名70嘅cecchinato竟然贏咗djokovic，63 7(7)6(4) 16 7(13)6(11)，又tie break 又long set，兩次都贏，據講係需要好穩定嘅心態先得。
究竟係cecchinato犀利，定係djokovic未復原？
cecchinato 25歲，17歲開始職業賽，都好早，但都係今年4月先攞到唯一一個atp title，budapest 250 clay court，突然就入埋gs semi final咁犀利？
2016，佢曾經因打假波被判停賽18個月，雖然後來判決被推番，但只係因為控方以不合法手段取得證據，所以判罪唔成立，咁即係佢係有罪嘅啦。

rafa vs del potro
cecchinato vs thiem

cecchinato有冇咁厲害贏埋thiem？
都唔係冇可能，畢竟佢都入到semi final，
不過thiem嘅clay court實力咁強，
但（我覺得）意大利人同西班牙人一樣，都有clay court優勢。
我唔會想佢贏到thiem囉，rafa怕陌生人架，佢好有potential贏rafa囉。

~*~*~*~*~*~*~*~*~
semi final

juan martin del potro
佢同rafa都係互有輸贏，唔算好一面倒，佢係小數喺fedal手上贏到gs嘅球員，2009贏咗us open，
如果佢唔係傷得比rafa更密，big4可能變big5，定係仍然係big4不過冇murray份？
佢贏rafa嘅5場全都係hard court，所以我都唔係好擔心。

除咗第一局比較緊湊，delpo第二局開始崩潰，唔意外，佢一向clay court都唔強，仲好似小小傷咁，結果 64 61 62。

cecchinato 同thiem頭兩局都仲係好夠力，第一局57，第二局tie break 打到10 12，但第三局急轉直下，16輸咗。

~*~*~*~*~*~*~*~*~
final

dominic thiem
佢哋咁多次交手都係clay court，最近一次交手係上個月madrid open，都係thiem 贏。
呢兩年得佢一個喺clay court贏過rafa，唔知rafa會唔會有陰影，
我就有嘞，雖然話好少球員可以第一次入final就贏到，而且clay court嘅rafa係會boosted嘅，但一個正值上升期嘅年輕球員，每一次都可能有你意想不到嘅進步。

64 63 62，rafa第11次贏到火槍手杯，係佢第17個major。

睇比數好似好輕鬆，但其實都有stressful moment ，第三局rafa忽然手指抽筋，要medical timeout。

後來佢話係因為纏喺手腕索汗嘅繃帶令佢血液循環唔到。真係奇怪，wrist band都索唔到汗要再加bandage？隊醫同物理治療師又會諗唔到會有乜嘢後果？一盤咁大嘅生意，一場咁重要嘅比賽都咁輕率，rafa叫timeout之前嗰球係接唔到放棄咗。好彩今次對手係gs新手，自己都緊張到不得了，分數都拉得好開，如果對手係nole 或者roger，分數好接近，咁樣損失一球會造成幾大影響？

rafa攬住個獎杯，好感觸，喊咗，唔係第一次喊，但今次喊得令人心酸，

我自己嘅理解係，攞埋今次同federer仍然爭3個，今次攞得好似順利，但投放咗太多時間，用爆錶嘅意志嚟支持，仲可以攞到幾次？究竟可唔可以超越federer？
傳聞federer會同uniqlo簽約，roger考慮中，
我有少少幻想係：佢打算退休，既然唔再打波，改簽時裝brand將來發展更大。
不過....，uniqlo好似level低咗d喎...

感覺federer仲唔退休其實係因為rafa，佢大rafa 5年，除非rafa傷病到唔能夠再比賽，otherwise，federer退咗休佢仲有幾年追gs數量，相差3 個，單係fo一年一個3年就追平，唔覺意攞多個us open就過頭，federer梗係打得就繼續打啦，roger唔退rafa就更唔會退。
得益嘅係atp，有兩個咁有號召力嘅球員在陣。
球迷有冇得益？其實我唔想睇到rafa喺roland garros畀人打敗，但又唔想佢好似borg咁仲係peak緊嘅時候走，係對自己冇信心，同埋冇面對失敗嘅勇氣。
仲有贊助商啦，贊助商有時都會左右到運動員嘅取態，好似劉翔，明知跑唔到都要出去on your mark，因為件衫要出席奧運決賽呀。
djokovic呢？簽咗lacoste冇幾耐，佢唔打得唔想打，都要繼續打。

V A M O S R A F A !!!!!

2018年5月13日星期日

畫畫 - 豬籠草 Nepenthes 01（水彩）

一直覺得豬籠草好得意，尋晚瞓前google咗一陣，想睇清楚佢乜嘢樣。
今朝食完飯，再google咗一張圖，就開始畫。
我冇跟足圖片，只係參考咗大致構圖，亦冇跟圖片用色，我覺得係一種進步。

我畫嘅時候都冇留心光源，希望效果唔太差啦。
我用cadmium red加raw sienna 同burnt sienna畫豬籠，畫到第二個忽然覺得：『permanent rose都得喎』.....
粉紅色豬籠草好靚，我應該試清楚決定用色先開始畫呀！總係唔會考慮周詳啲呢？

除咗構圖，用色都係自由發揮，但畫完一堆葉，發現分唔到層次。
本來每一片嘅顏色都好清新乾淨，為咗加番啲層次，又要重疊，顏色變得渾濁咗。
冇辦法啦，下次要做好colour scheme先畫，不過做還做，我諗我畫畫吓都係亂嚟，因為濃度都會影響明度，我對水份控制仍然係唔得啊。

整體嚟講，我覺得呢幅畫都幾成功，主要係冇再跟足圖片啦，
上色又冇糊嚟糊去，大部分顏色都幾清新，幾有水彩feel，
不過三個豬籠都唔記得留光位，都係用布印番出嚟。

Cotman on Saunders Waterford 190g rough 11"x15"

用 hot press再畫
https://iceefaery.blogspot.com/2018/05/blog-post_22.html

2018年5月12日星期六

水彩花卉風景 2018-6 - 康乃馨

今堂張圖一片朦朧，早知道愈朦朧愈難畫，因為掌握唔到物件形狀，點會畫到呢？
所以，老師示範前先畀咗好多康乃馨圖片我哋睇，教我哋留心花嘅形狀，係半球體，花瓣嘅形態同特徵，愈近中間愈深色，花瓣扭轉摺疊、邊緣鋸齒狀。
的確係有幫助，如果忽略咗上面講嘅特徵，我畫出嚟嘅會係一朵四不像花囉。

老師強調，要顏料少，水少，
逐瓣用少少顏料畫出鋸齒或者斷續嘅線，然後用好少嘅水化開，因為太多水會影響下一瓣，化成一堆。
但係我總係掌握唔到花嘅整體結構，瓣同瓣之間嘅位置距離角度都畫得好生硬，有時仲好奇怪添。
要畫到好畫，真係要多觀察了解。係唔係畫家都有好強嘅觀察能力，可以好快掌握到人或物嘅特徵同特性？有時我覺得，老師成日睇到我哋啲畫，多多少少都會了解我哋嘅性格，知道我哋係點嘅人。

都有少少似，係啲花瓣唔係好自然咁啫。
我覺得係要了解朵花嘅結構，知道花瓣會點生長，一路畫就知道下一片會點發展，咁先可以畫到好自然，如果靠睇，係會畫到眼花都畫得唔好，你總不能一筆一劃一個彎位都跟足。

最上面半開嗰朵畫得最好，可惜開頭啲花瓣方向唔係好啱。
成幅畫我最滿意係個花托，同埋右邊伸出嚟個花冧，因為最後調出咗一隻好啱嘅色，加咗上去嗰個位即刻生動咗。（Oct 2024：究竟講乜？最右邊嗰個花冧冇色喎😂）

其他部分，我覺得都係對比唔夠，但要加色...，我又冇乜信心可以enhence到，或者破壞仲更有可能。

Cotman on Saunders Waterford 190g rough 11"x15"

終於都係加咗少少，好似唔覺有乜效果。

同學送咗枝老師用開嘅筆畀我哋，好開心，終於有班有共同興趣嘅朋友，點解唔早啲諗到學畫呢？無無聊聊咁生活咗咁耐，唉。
枝筆係synthetic hair，圓頭，又可以壓到好似平頭咁用（我初時就係以為老師用平頭筆），但佢又比真正平頭多咗啲層次。
我即刻開嚟用，今堂用就好啱，因為人造毛carry唔到好多水，冇咁容易出事。
加上筆毛冇sable咁柔順整齊，化開顏料時顏色會自然地唔平均，好啱畫花。

2018年5月9日星期三

畫畫 - 茶具（WetCanvas May 2018 challenge）（水彩）

係wetcanvas嘅May challenge，我一向都冇諗過茶具英文點叫，原來係 tea service，嘩，如果單獨見到呢個詞，我會以為係serve 一個 tea 咁解。愈來愈覺得自己英文唔掂，識嘅都係辦公室英文，甚至香港英文，一同外國人對話就變咗唔識英文。

尋日sick leave，睇完醫生食完飯就開始畫畫，畫咗整個下午，都有四、五個鍾，我畫畫真係好慢，加上套茶具上面有花紋，我當然要細畫啦。

我發現，at this moment，我最大嘅問題係落筆唔準，同埋控制唔到筆觸。

落筆偏咗，物件型態會走晒樣，

筆觸唔似預期，影響更大，表達唔到質感、方向、明暗、、、
番筆想修正，事情就會一發不可收拾，嗰個位變得好clumsy，
所以，以後落筆前要諗清楚，或者試幾吓先。
係嘞，我上堂都唔覺同學有好似我咁有張紙試吓色咁嘅，除咗試色仲可以試濃度，以後仲可以試筆觸，唉，我好蠢，唔畫落紙唔識睇，可能人哋喺palette就判斷到啦。

因為成日畫到左右唔對稱，所以今次起稿先畫咗個十字（唔係求主保祐畫得啱），係好少少，但d彎位弧度都係唔得。