畫畫 - 魔鬼魚、菊花 （水彩）

又係呢種唔洗點起稿嘅畫。

大嗰隻（覺得唔可以叫一『條』魚）魚身明暗對比唔夠，
有小小覺得左右唔對稱，但原圖都係咁，我就當距離同動作所以顯得細咗啦。
背景色漸變得幾滿意，條尾都幾好。
但個影畫壞咗， 太大，感覺隻魚離地好近，冇咗喺深海嗰種氣氛。
而且糊開咗，好似海水好混濁咁。

Shinhan on Saunders Waterford 190g rough 5.5"x7.5"

想試吓negative painting，起咗稿，今次我特登每片花瓣都畫好。
打濕張紙暈染背景色，然後每片花瓣圍番出嚟。
明明起好朵花嘅稿，上色嗰陣都係手忙腳亂，畫到d花瓣亂晒，尤其是最高嗰朵，主角嚟架嘛....
下面加陰影又污糟咗....
呢幅其實算未完成，睇吓下星期有冇靈感畫番好d啦。

Shinhan on Saunders Waterford 190g rough 5.5"x7.5"

雲海同拍檔

最近聽緊談談靈說說怪，好多人喺comment鬧阿meow，話佢作狀淨係識笑咁。無疑佢語氣係有小小過份而無為嘅溫柔，但都唔算不能接受，我覺得佢嘅溫柔cutie語氣係一種表演風格，幾好玩。我反而最反感佢扮標點符號，不停咁係係係扮豆點，煩到喊，仲不時扮exclamation mark，爆晒咪。不過好多集佢都只係靜靜聆聽嘅，但唔知邊d先邊d 後，應該係見到feedback改善咗啦。

我覺得阿meow把聲同rosa好似，而兩個把聲都好似杜如風，我一直都想像佢哋係杜如風咁嘅樣😃。（聽耐咗一d都唔似，仲幾極端添，我唔單止面盲，仲係音盲）

好多人鐘意Rosa，佢見識多，說話流利，語氣自然，但我就感覺平淡咗d，就好似聽卓飛覺得冇火花咁囉。其實『平淡』、『火花』呢兩個唔係合適嘅詞彙，但諗唔到點講。

同阿meow比起嚟，我比較唔鍾意彭晴，佢嗰種dj聲好難頂，好彩佢唔係講好多嘢，可能佢唔想同嘉賓主持搶咪，多數負責笑，嘻嘻嘻、哈哈哈，最討厭有d女仔笑嗰陣仲要嗌，呀~哈哈~呀哈哈哈~，佢就係咁，人哋戴住earphone好辛苦你知唔知？
彭晴負責笑，另一個主持 jason就負責搶咪同爛gag，而且佢把聲有小小老餅😐

仲有森美小儀，森美大大聲講，小儀大大聲笑，可能做dj唔可以唔發聲啩。

呢幾個都係早期嘅節目，有d仲只係嘉賓主持，雲海對佢d拍檔好友善，態度好正常。

到咗陰陰濕濕，拍檔叫 bosco，聽佢講嘢態度同內容，相信係青年才俊型，做主持都係為咗阿祖嘅交情，有一種專業人士嘅pride，亦懂得保護自己，唔會肯，亦唔需要做細嚟secure自己位置（好似小儀咁），邊個蝦得邊個唔蝦得係好明顯嘅，所以雲海從冇點嘗試欺壓佢。可能佢嘅正業係要對客，好懂得歡快地和應，婉轉地提出異議，佢都有好多不以為然嘅時候，都係哈哈哈咁笑咗過去，所以同雲海相處得好好，。

至於阿祖，上星期聽到三藩市電臺好舊嘅節目，雲海長途電話做嘉賓主持，嗰時阿祖好靈俐，能夠掌握到節目嘅節奏，講嘢亦冇後來嗰d 咦咦哦哦。
除咗因為其他工作忙，同埋傳說中佢吸毒而致經常魂遊，我估佢喺摩星嶺四號中嘅冇用係『扮』嘅，雲海想好似森美咁，做大哥，我冇正式聽過森美嘅節目，但都知道佢係好權威咁，成日鬧人。佢哋都講過，一對拍檔總會有人喺『下把位』，所以佢哋係咁都唔奇，阿祖亦樂得唔洗準備，乜都唔知咁做節目。
不過我唔鍾意呢種風格，唔鍾意見到有人畀人蝦，唔鍾意雲海吊起聲線迫問，尤其唔鍾意佢對住阿祖發出嘲弄嘅竊笑。唔明點解雲海會喜歡扮演咁嘅角色。

摩星嶺四號之後嘅格羅茲尼我都有聽，初期都還好，後來冇咗阿祖，或者唔洗向電臺同聽眾交代嘅關係，內容漸漸鬆散，感覺冇咗光彩，定係我聽得太多厭咗？唔係吖，聽番舊節目都仲好好聽呃。

畫畫 - 樹林小屋 （水彩）

上完水彩初階二，進階冇再開，轉而報咗花卉風景。都係我好少畫嘅題材（咁究竟我成日畫乜嘅呢？），諗住試吓先。
搵咗張雜誌圖片，想試吓學人簡化，或者變吓色調，最後梗係照足咁畫，但又畫唔似咁囉😁


間屋都幾靚，光影都算有，不過凌亂咗小小啫。

Shinhan on Saunders Waterford 190g rough 5.5"x7.5"

水彩班10 - 靜物寫生

呢個course最後一堂。


好失敗，手忙腳亂，d 光位全部留唔到白.....壺蓋邊嗰兩條係gel pen😃
堂上淨係畫咗兩隻椒，同碟邊，仲唔知點解左邊波浪畫到咁密添....隻碟係白色，但又要加好多色做碟底，其實都唔知道人哋睇唔睇得出佢係白色。
黃椒冇留白，唔『令』冇質感，紅椒有倖存嘅一線留白，好驕傲咁閃晒。


個壺....好似凹咗咁，留到小小白，但留得好滑稽，好怪相。本來好滿意個壺蓋，但後來發現角度唔啱，而家變咗俯視角度.....，同埋壺身唔知點解冇用番壺蓋嘅藍色，小小奇怪咁。
不過其他部分我都滿意，尤其是壺嘴，加咗紅同黃，顏色唔單一，仲有壺蓋粒頂都好好吖。


前景個影污糟咗，背景塊布本來幾好，可惜紅椒後面嗰撻畫壞咗。

Shinhan on Saunders Waterford 190g rough 11"x15"

阿sir set咗兩組靜物，另一組好複雜，唔知同學畫成點呢？都冇時間睇吓其他人。
堂上梗係示範複雜組啦，阿sir話唔洗乜都畫得一清二楚，模模糊糊有個影就得，但我覺得模糊而唔求其都有d 難度。

畫畫 - Rafa Nadal （marker、水彩）

星期日係french open final，畫張 vamos rafa 打吓氣。

極少畫人物，因為五官好難，多一分少一分都唔似。

基本全用 marker，水彩只係背景。第一次用marker做主力，畫畫吓容易咗少少。

面部唔係好敢落筆，所以白白咁冇輪廓....
後來大贍d加深d，好似真係好d，其實都仲係唔夠，但好擔心破壞成幅畫。

肌肉ok，眼神都唔錯吖。🆗

Copic Marker on paper

水彩班 9 - 三色椒

三個燈籠椒睇老師示範時，諗住好容易，三個椒都分晒面咁，範圍唔大，冇接合唔到嘅壓力。
點知畫嘅時候首先已經調唔到綠色，冇晒睇老師用色嘅記憶，畫極都唔似，一格格仲要分開咁，畫到好沮喪。但因為係堂上嘅關係，畫得唔好都要繼續畫，唔靚都要完成佢，唔通喺老師面前留白咗佢咩？好歹都要上色嘛。
畫到紅色就好番小小，掌握到一瓣瓣同明暗，紅色又比較簡單。
綠色乾咗就番去用重疊大法補救，疊完梗會好d...

不過呢個位點都畫唔到個效果，張圖明明係咁，但喺紙上就好硬好平。老師話我太跟幅圖走，佢幫我小小柔化咗深色個邊，即係唔洗咁sharp cut嚟表示凹陷。老師講咗我又記番起，應該知道固喎...畫畫吓唔記得都有嘅....？

今堂畫得好慢，成個黃色都係番屋企畫。
黃色最容易，亦最順利，可能呢隻結構簡單，黃色又直接唔洗點調色啦。不過覺得都係暗位用色太沉，小小污糟咁。

個投影幾滿意，運氣嚟，枝筆含水量影響好大，今次啱啱好。

Shinhan on Saunders Waterford 190g rough 11"x15"

有時有d object個結構明明好簡單，但邊條線向左邊條線向右，好似睇極都唔明咁。有時仲會睇唔出條線究竟係彎向上定向下，要好stupid咁擺張紙埋去用條直線嚟鑑定條線嘅走向，會唔會係我嘅乜乜思維有問題呢？

呢幅都係得唔到老師嘅blessing.....，佢冇畀like。 😞

畫畫 - 屋仔 （水彩、木顏色）

好多時都只係想『玩顏色』，冇耐性慢慢起稿細心安排，就會畫呢種一舊舊嘅樹同屋。

呢幅濕染上一層色，乾咗重疊暈染，最後用木顏色finish。

Shinhan and Polychromos on Fabriano Artistico

我成日畫呢種屋仔，都好少窗，心理學嚟講係咪即係自閉呢？

😆其實係因為窗難畫啫。

畫畫- 星河 (水彩、marker、acrylic)

畫天空係好好玩嘅，唔洗花時間起稿，可以有好多顏色變化，有時仲會有驚喜添．
呢幅只係用咗cotman嘅冷暖三原色，6 colours，我唔識混色，好死板咁。
最後用acrylic灑星星仲多得滯，又唔記得加多小小水分幾層，而家好似粒粒都係咁光咁。

平時用開 Shinhan，有時用吓Cotman，將顏色唧喺個士多啤梨膠碟度，當palette咁用，好方便，估唔到仲唔會染色添，真係開心大發現。

水彩班 8 - 陶瓷甕

呢幅最難係個形態，全部都圓，形狀畫唔靚，線條唔流暢，左突右突咁，最差係個甕口，成個離開咗咁，邊緣唔平均，扭歪咗。

個碗同甕口接合位畫唔到，一撻黑晒😁

瓶身裝飾線都畫到平咗，跟唔番個形狀，壓住個甕咁，最差係呢度。

咁多個圓形，好難保持同一個perspective，

不過粗略咁睇又唔算太突兀嘅.....

老師提過我甕身中間加深色表現立體感，但我加到一pat咁，又勻唔開.....

好多留白位呀，好小心咁大部份都留到，到甕身學老師大筆咁畫，唔小心將大撻留白位填咗，嚇死死，即刻用毛巾索番，但已經唔夠白喇，好彩一撻咁啱係裝飾線上，另一撻就有下面留白分散注意，好險！留唔到白就total lost喇......

本來覺得個雕花木座好難，放棄狀態咁求其畫，點知效果竟然唔錯喎😁

我最鍾意隻碗，形狀同反光都幾好，碗身紋理都表現到出嚟，好開心。

寫標題猶豫咗一下，想用『桂林辣椒醬』，吸引d，因為老師話呢甕係桂林辣椒醬，但點睇都係得個甕，算啦....

。。。。