呢個星期終於再去上堂
 |
| Cotman on Saunders Waterford 300g cp 8.5" x 11" |
前面個山太黑，光位唔夠，中間嗰層山又唔夠深色。點解畫嗰時睇唔到嘅呢？
呢幅畫最難係水面暗位同光位嘅接合。我本來都做得幾好，但後來再加波紋加到一塌糊塗。
我哋個個都將水上面嗰 d屋畫得太清楚，連透視都做埋😂。阿 sir三幾筆就畫到好有深度。阿 sir提我哋，屋簷下要深色，屋頂要淺色，⋯打字到呢度，我發現我唔記得咗屋簷下嘅深色😒。
我雖然自己幅畫都未畫完，但都走去睇吓阿 sir幫同學修改，阿 sir而家改畫唔係點講嘢，手起筆落就改，有時睇住都領悟唔到改嘅重點係乜😪，淨係睇到佢好揮灑咁改到幅畫好靚😂，⋯或者，畫嘅主人都心中有數嘅，唔係都問咗啦。
跟阿 sir畫過再畫呢幅好有幫助，不過我都畫咗幾個鐘，冇人 guide住左諗右諗先敢落筆。
今次唔畫到咁黃，但係天空嘅黃色都係太黃，幾時先會記得 tone down個黃色嚟畫天呢？次次都畫完先後悔。
畫唔到好光嘅陽光，明明都留咗白😒
d水畫到好似雲霧咁，唔應該對樹冠嘅倒影咁認真，已經擦過，但救唔到喇。
淨睇上半都唔錯，成幅嚟睇都係冇重點。
 |
| Cotman on Saunders Waterford 190g rough 15" x 11" |
原來猴麵包樹又叫猢猻木。
我係睇小王子知道猴麵包樹，所以曾經以為呢種樹係虛構嘅。
早排睇 Mill Milk Madagascar嘅片，見猴麵包樹大道個 view好靚，已經 cap咗圖諗住畫，咁啱阿 sir呢個星期都係畫猴麵包樹啊 ～👏👏👏
首先係畫咗個天先，好少用到咁多黃色㗎，畫完個天就要換水，因為水都黃晒，再落去畫天驚會變綠，佩服唔使換水嘅同學👍
講到個天，我又失敗咗喇。橙黃嘅落日餘暉接住藍色嘅天，阿 sir嘅習慣係加一層紅色嚟緩衝，唔俾黃加藍變綠。我用藍色打橫由高掃到低，掃掃吓就掃埋層紅色😨，爭 d收唔切手掃到黃色😱
然後⋯仲加咗幾粒雲⋯，唉，唔好講喇😅
幾棵樹又俾我畫到站在同一陣線咁，其實佢哋唔同遠近㗎😖
 |
| Cotman on Saunders Waterford 300g cp 15" x 11" |
呢幅係畫班嘅圖片，我冇上嗰堂，自己試吓畫，所以色彩冇乜層次。
起完稿冇再睇圖，糊哩糊塗將幾棵樹畫咗去後面😂，而家成個構圖好似重量唔均勻咁。幾棵樹本來應該喺矮樹叢前面，咁前面兩重山坡就唔會好似而家咁無聊😂
個亭用咗留白膠，又係有 d捽唔甩😥，係唔係因為太薄？
 |
| Schmincke on Saunders Waterford 190g rough 7.5" x 5.5" |
erm.....呢幅.....，唔知講咩好，畫咗十年畫，都仲係畫到咁，未至於要沮喪咁誇張，但的確係對自己失望嘅。
成幅畫最滿意係划船人嗰枝桿。
 |
| Cotman on Saunders Waterford 300g CP 11" x 15" |
呢幅畫喺堂上畫到一塌糊塗，因為，雖然我好認真咁起稿，但後面嗰 n重山坡令我畫畫吓都唔知自己畫緊第幾層，又控制唔到每一層嘅高度，畫到自己好迷失😕
未畫完我就走咗，本來走之前諗住俾阿 sir睇吓有乜要注意，攞住幅畫埋到去，阿 sir幫同學改緊畫，但見佢好豪邁咁撻咗一大撻深色喺幅畫度，我睇到好驚，我真係愈嚟愈驚，愈嚟愈當自己幅畫係寶咁😂，係唔係太自戀？當下我決定唔俾佢睇，收埋幅畫執嘢走。其實都可以睇埋佢點改同學幅畫吖，使乜即刻行開？真係黐咗線😂
幅畫俾我畫得近咗，本來視覺好廣闊，應該係我畫大咗最遠嗰個山，上兩堂阿 sir都講咗，遠嘅山唔要有起伏，但我畫成咁。樹都係，樹頂過唔到遠山，出唔到遠到變細嘅感覺。（呢個係我估嘅）
呢幅畫重點係一層層嘅山坡，用唔同顏色分層，由最遠嘅紫色 tone到最近嘅黃色 tone，彩虹嘅原理。
樹主要係 Prussian blue ＋ burnt umber
我要記低，因為我發覺自己唔識決定顏色，唔識調出需要嘅顏色，😅咁都學人畫畫。
幅畫返屋企先完成，千錘百煉修完又修，幾層山坡已經同上面講嘅顏色配搭唔係好同。
倒影用錯色，其實都跟阿 sir教咁調色，但可能比例唔啱啦，乾咗黃咗好多。
 |
| Cotman on Saunders Waterford 300g cp 11" x 15" |
阿 sir下個月又放兩個星期假去旅行，真係逍遙。
哎，今堂成堂都聞到煙味，我估係看門口嗰個喺房食煙。hmph，聞咗三個鍾，好辛苦，以後佢會唔會繼續食煙？叫佢唔好食會唔會好冇禮貌？同阿 sir講會唔會令佢為難？😕
個天一開始就壞咗，出咗水痕，爆咗水花，不過我冇 attempt去番筆，多一事不如少一事😂
今次 d雲嘅顏色自然咗，但形態都係怪怪咁。
成幅畫都係得幾種色：ultramarine blue, cerulean blue, yellow orchre, permanent rose, brown
d樹畫得幾好，但失敗在於我畫天嘅時候無端端俾個天食咗一啖雲，嗰個位深色咗，本來啡黃嘅樹去到嗰 part要用深色，唯有當佢係另一棵樹啦。但整體都算唔錯。
可能構圖同用色比較平淡，今堂畫得都算淡定。不過畫得慢咗，唔得閒去睇阿 sir改同學 d畫。
我次次都會同阿 sir講：『阿 sir你話俾我知有乜問題，我想自己改。』但次次係咁唔知佢會唔會覺得我唔尊重佢，今次我覺得自己都畫得 ok，應該唔會大改，所以少少忐忑咁擺低幅畫，乜都冇講。阿 sir一拎起枝筆，我個心就揪住😂，睇住佢喺前景加深咗、樹影加深咗（本來的確係唔夠深）、最遠嘅山冚咗我 d紫藍色（佢話太紫），我有 d心痛，雖然阿 sir潤飾過係精神咗，但係都⋯⋯
 |
| Cotman on Saunders Waterford 190g rough 11" x 15" |
同學話我 d雲好似個瞓喺度嘅外星人，原圖都似㗎，但我手多加咗隻眼俾佢，更加似😂
我多數都係用 rough水彩紙，尤其係畫風景，因為 n年前喺 miss Ho嘅指引之下，認定咗 rough適合畫風景（但其實佢又冇話畫乜都啱），然後漸漸又鍾意咗佢嘅紋理，於是一直義無反顧咁成為我嘅指定用紙😂。今日，聽到阿 sir話，而家 d rough紙紋理愈嚟愈粗，佢鍾意用 cold press。😮，我登時『叮』一聲，係喎，好似都未試過上堂用 cold press喎，即刻決定下堂要試吓！不過要去買，希望呢幾日唔好落雨🙏
😞😞😞😞😞😞😞😞
呢幅畫喺起稿前，阿 sir已經預先提咗我哋要注意幾點：
睇第一點就知道，個天喺呢幅畫佔幾重嘅比例，然而！我畫壞咗個天呀⋯唉，天呀！
我哋第一步就係畫個天，用 cerulean blue ＋ 少少 ultramarine blue，由最高逐 d畫出每朵雲之間嘅天空，因為好多雲，所以天嘅部分只有好少。由最高用最濃嘅顏料，邊畫邊稀釋畫到最低。
只見阿 sir呢度嗰度一筆筆咁畫，亦冇整濕畫紙，於是就出現咗一堆硬邊嘅不規則色塊；然後，用任何藍色 ＋ 玫瑰紅色調成偏灰紫色畫雲。
anyway，阿 sir教咁畫，我返埋位就照樣咁畫，阿 sir教嘅畫法，冇信心都會跟住做，如果唔係就學唔到呢個畫法。
猶豫咗一下，好勇敢咁落筆，不過一落筆就知道自己唔係勇敢而係魯莽😀，雖然起咗稿，但因為係畫雲，所以已經將線條擦到好淡，緊張嘅我，自己都變咗一舊雲，完全唔知道自己要畫乜，但都開始咗喇，繼續畫啦。
係唔係寧願上完色仲睇到個稿，都好過畫到離晒譜？
睇番幅畫，最失敗都係 d雲嘅顏色，偏紅咗。返屋企想將中間兩朵雲變番一舊，咁會順眼 d，因為雲應該係上面嘅最大，愈低愈細。但我愈改愈差，水彩真係 very unforgiving，仲要畫嘅係雲，真係冇得執。
主要都係用 yellow orchre＋sap green，遠方嘅樹用 ultramarine blue＋yellow orchre。
 |
| Cotman on Saunders Waterford 190g rough 15" x 11" |
我鍾意上畫班，係因為鍾意同大家一齊畫畫，雖然上堂各有各畫，又冇時間傾偈，但感覺好好。又可以睇吓同一樣嘢人哋點畫、畫成點，最重要仲係可以聽吓阿 sir指出各人嘅錯誤。佢示範時我哋只係睇到一個『啱』嘅示範，睇大家嘅畫先可以睇到『錯』嘅示範，好多時阿 sir都唔會知我哋會點錯，冇得預先講。不過好可惜啊，呢堂我趕住走，連自己幅畫都冇時間俾阿 sir睇就走咗喇⋯
 |
| Cotman on Saunders Waterford 190g rough 7.5" x 5.5" |
右邊 d樹加咗 100次色都係唔夠深色😄
 |
| Schmincke on Saunders Waterford 190g rough 7.5"x5.5" |
不過我喺天空嘅用色都好輕手，因為前景顏色濃烈，唔想成幅畫變得好雜亂，而家雖然山同天都比較淡，但我覺得幾好。
落日嘅光都係唔夠光，佢前面個山係唔係唔應該光到山腳？
中間嗰層橙色樹幾好呀，畫得到想要嘅顏色，同埋有光嘅感覺。不過右邊嗰棵高樹真係敗筆，好似左邊咁畫咪好囉，明明都已經畫咗左邊先，右邊照畫就好，無端端去染咗一撻橙色，搞到成個位暗晒、樹型都怪咗。😠
不過，前面塊地先係最失敗。本來係鋪滿蓬鬆落葉嘅地，我畫到似踩實咗嘅泥地。
前景嘅樹算夠深色，整體都分到前中後三層。👏
 |
| Schmincke on Saunders Waterford 190g rough 7.5"x5.5" |
今次刻意用淡 d色，但係會唔會太多筆觸痕跡呢？可能⋯應該 dilute咗顏料先落筆，應該係。
d雲太深色，尤其係左下嗰舊，修吓修吓變咗魔鬼魚咁😂
今次記得太陽留白，但都係唔夠光，於是周圍加 d深色，好似好 d，但又變咗好唔 logical，陽光周圍竟然深色過外圍，是但啦😄
 |
| Schmincke on Saunders Waterford 190g rough 7.5"x5.5" |
畫嘅時候總係唔覺得咁嘅用色會好唔自然😄，係要畫完先知。加番 d雲可能會好 d嘅，下次啦😁
下次仲要記得太陽要留白呀呀呀！！！
海水同沙灘都幾靚吖，⋯唔記得畫個山嘅倒影添😝
左下係樹叢嚟㗎，我畫到變咗草叢😵
 |
| Schmincke on Saunders Waterford 190g rough 7.5"x5.5" |
都係淡淡咁😒，起筆畫橙色樹嘅時候諗住可以好繽紛，但為咗加 d層次，加多咗藍色，個 tone變沉咗。
畫到遠處嘅山時淡咗落嚟，🤔遠山可唔可以用濃烈嘅顏色呢？
🤔倒影可唔可以比本體濃烈？
despite of顏色平淡，我都幾鍾意遠山嘅顏色，近陽光嗰度都過渡得滿意。
 |
| Schmincke on Saunders Waterford 190g rough 7.5"x5.5" |
好多年前去過海德堡一次，午夜上機，落機時間係當地大清早，我喺飛機上冇瞓過，我嘅唯一瞓覺死穴就係飛機，從來冇喺飛機好好瞓過，好羨慕有 d人可以未起飛已經瞓著😂。雖然我可以玩通宵唔瞓，但飛機會熄燈俾大家瞓覺，瞓唔到但又要瞓其實好攰。
親戚揸車去 Frankfurt接我哋，唔記得點解要去一去海德堡，扮瞓扮咗幾個鐘嘅我一舊雲咁，完全唔記得喺嗰度做過乜、去過邊，只記得嗰度好靚。
唔知點解，連相都冇影過😂。呢張圖都係喺網上搵到，係唔係 Neuschweinstein（係 Heidelberg Castle先啱，而且完全唔係我畫咁樣）？anyway都係畫得唔似㗎喇，係胡亂上 d色，反覆加吓加吓就出咗嚟嘅一堆建築物😁，似建築物就好，都唔敢想佢似指定建築物喇，不過睇落都幾有質感吖。
今次個天嘅黃同橙冇咁突兀，因為加咗少少紫色 tone down咗，早就應該咁，總係唔識得調色，畫咁耐畫都仲係將顏色直接搬落畫紙，唉😌。中間個太陽唔夠光，因為留白失敗咗？
 |
| Schmincke on Saunders Waterford 190g rough 7.5"x5.5" |
原畫個天好 watery，我畫到好乾，筆觸明顯，色彩混合唔到。
可能因為我反覆加色，唔知點解我深色唔到。加多少少水就變得好淡色，點先可以深色又 watery？咁細幅都控制唔到水量😌
 |
| Schmincke on Saunders Waterford 190g rough 7.5"x11.5" |
終於都畫咗一幅畫。
係跟 Joseph Stoddard嘅畫畫。我好鍾意佢嘅用色，不過佢係 urban sketcher，d畫多數有建築物，我覺得好難畫。今日搵到呢張淨係樹，所以試畫吓。
好鍾意橙色嗰堆樹，顏色好靚。
d雲怪怪咁😅。
整體顏色好 vibrant，好滿意。
 |
| Schmincke Akademie on Saunders Waterford 190g rough 7.5"x11.5" |
天空先掃兩筆橙色，再加深嘅紫藍。天同浪嘅接合位要盡快掃鬆佢，如果唔係就會有個實邊嘅浪😂。我又係淡色咗，如果深色 d會托得 d浪花明顯 d。不過我覺得 d色混得幾靚，阿 sir而家個 rundown唔知係唔係針對我哋一般都花好多時間喺一個位度雕琢，佢示範完個天就叫同學埋位畫，但好快又開始第二個 step，每個 step都俾好少時間我哋，所以我落完色都冇時間再做 d乜，😁效果似乎仲自然。
跟住畫岩石。我畫唔好直線嘅問題又出現，畫到 d石圓碌碌，唔襯呢個大浪嘅氣氛，而家已經係修正過，我盡量拉直咗 d線，但都係唔夠直。
至於個浪，除咗要小心留白之外，同其他白色嘅嘢一樣，都要用深色嘅暗位嚟營造佢嘅形態同 volume。阿 sir教暗位用灰紫色，不過我後來再加咗少少藍色。
個大浪同石接觸嗰個位都要捽番鬆佢，咁先似個浪冚埋舊石度。
畫石嘅時候都要留白，表示石上流落嚟嘅水。阿 sir話我嘅留白太幼，喺無可挽回嘅情況下，我用咗 acrylic，反正都要用嚟灑浪花嘅水點。阿 sir用白色水彩㗎，但我試嘅時候已經發現顏色太淡，🤔點解？所以最後都用咗 acrylic。
近處嘅海水太平靜，應該多 d留白同擦乾筆，營造海水撞擊完留喺水面嘅泡泡。
綠色嘅海水用塑膠綠加藍，呢隻塑膠綠咁假，以為用途唔多，但阿 sir都用得唔少，好彩買咗。
 |
| Cotman on Saunders Waterford 300g CP 15"x11" |
咁耐無上堂，之前一齊嘅同學已經進步咗好多喇。
今次特登用平頭筆畫石，唔再畫到圓碌碌，但有 d太平整，睇落更唔自然😞。
外面嘅海係唔係應該少 d留白？
石堆裡面嘅海我已經少咗白，原圖係一片白色起晒泡嗰種。不過而家睇起嚟都係應該多番 d色。
個浪⋯似爆水管多 d😂，而且後面個海太淺色，唔係好托到個浪灑出嚟嘅水點，更加冇氣勢。
 |
| Cotman on Saunders Waterford 300g CP 11"x15" |
😂怪怪嘅天空，黃色太 vibrant唔使講，分佈亦莫名其妙。
背景嘅樹主要係濕染，用 brown, ultramarine blue, orange, vermilion。嗰度有好多層次嘅樹，各種形態同大細，但我將最遠嗰層畫到變咗山，後來同學話我另一層似一堆屋，我自己睇番真係愈睇愈似😂，不過都唔緊要，都夾到個環境嘅。
我 d樹畫得深色咗、清楚咗，顯得好近，表現唔到景物嘅深遠。而且應該藍 d，加強距離感，因為遠嘅景物都係帶藍或者紫。（其實阿 sir示範都偏藍，但我用同一堆顏色調到咖啡色，畫緊嗰時仲覺得好配合黃昏嘅色彩添😄）
另一個令幅畫顯得唔夠深遠嘅原因，就係最遠嗰幾塊田，原圖田上嘅阡陌只見幾條貼近嘅橫線，但唔知乜嘢驅使我間咗幾塊田出嚟，睇得咁清楚又變近咗。阿 sir教用 sap green加橙，我以為調出嚟顏色應該沉 d，點解咁鮮明呢？阿 sir嗰幅都係咁嘅色㗎⋯
中間幾格水稻田可能係畫得最好嘅部份。
最近嗰幾塊田呢⋯，阿 sir教各用唔同嘅綠色，後來我見佢幫同學修改時再喺上面畫粗間表示一行行嘅農作物，因為呢幾塊田面積大，裡面冇嘢會顯得空洞。我加咗嘅效果都 ok。但呢幾塊田之間我都跟阿 sir加咗 d草，同學話 d草太直，唔夠亂，我就覺得仲可能係太深色。睇起嚟仲有小小恐怖感添，同後面嘅寧靜柔和好唔夾，早知唔加草。唔知道種好嘅田嘅阡陌上面係唔係都長滿草呢⋯？
真係，近景呢幾塊綠色田無論顏色同感覺都同後面格格不入。
 |
| Cotman on Saunders Waterford 300g rough 11" x 15" |
第二堂寫生都係去排頭村。
今次要畫幾間小小建築物，重點係間妝扮得好嬌俏嘅屋仔，門上有門神 poster，兩邊有對聯，門頂有橫額（？），畫畫吓先醒覺原來佢唔係屋仔，係門嚟㗎😂，開門入去係空地，再入去就係後面間屋。
畫畫過程仍然係手足無措，阿 sir示範時，好多唔同位置唔同用色、畫法，到自己畫時唔記得咗大半，最記得係兩邊唔重要嘅景物模糊交代，但幾把太陽遮都係重點，兩層遮身尤其重要。
我哋畫畫吓，村民逐漸將景物變身，晾曬嘅衫收咗、太陽遮收咗、附近食店搬咗幾個招倈嘅廣告牌出嚟遮住咗，我諗，除非畫自然風景，如果唔係，以我哋畫得咁慢，景觀好難持續咁耐。
加上當日下午氣溫急降，由中午因為著咗羽絨有少少熱，到開始畫時慶幸自己著咗羽絨，再到畫畫吓懊惱冇戴頸巾手套。於是，冇毅力嘅我決定走先😝，其他同學仲繼續努力。
臨走俾阿 sir睇，佢提醒我：
1.) 呢堆層層疊嘅建築物要深淺色相間，咁先可以突出主體，尤其是前面嘅重點。
2.)兩旁非重點喺模糊之中都要有層次，咁先可以營造出『有d嘢』嘅錯覺，如果唔係就好似空咗咁。
3.)仲有佢叫我落色要大膽 d，深色地方顏料要濃，一筆過，咁就唔會乾後變淡，然後又要一再番筆。
我覺得自己個稿已經起得好差，perspective唔係幾啱，加上返屋企繼續時我冇睇返張 reference相，又冇睇阿 sir嘅 demo相，只係跟住阿 sir講嗰幾點畫，畫畫吓都忘記咗 d建築物嘅關係同結構，結果係有少少奇怪嘅😄
我試吓大膽用深色畫後面嘅樹，結果真係好夠色，然後覺得，⋯嗰個位應該淡番 d，因為佢唔係主角😑😂
左上角建築物係唔係太簡陋呢，可能局部都要多番 d details，而家好似太 clear cut，少少突兀。
其實我咁樣睇咗阿 sir示範先再自己畫仲算唔算真寫生呢？我諗只可以話係學寫生啦，比跟圖畫會好少少，因為會學到點取捨景物，點 adjust景物去滿足構圖需要。
 |
| Cotman on Saunders Waterford 300g rough 15" x 11" |
拖咗幾個月，終於完成呢幅櫻花。
d山正正犯咗阿 sir講嘅禁忌，前後角度一致、前面兩個小山黐埋咗。
兩個建築物都 ok呀。不過前面嗰個我模糊處理咗唔知啱唔啱，但我覺得個屋頂畫得幾好。個塔我都畫到立體感，雖然有少少歪咗。
最失敗應該係前面嘅牆😒，但我覺得成幅畫算 ok啦，冇平時畫嗰 d咁 blank，有重點，色彩都算有輕重之分，⋯nicht wahr？
 |
| Cotman on Saunders Waterford 190g rough 11" x 15" |
