阿 sir前幾日去完短 trip，尋日又出發咗，仲要去兩個月添。好彩我有時間上到佢旅程前嘅最後一堂👏👏👏，今堂畫嘅係撲上岩石嘅海浪。
天空先掃兩筆橙色，再加深嘅紫藍。天同浪嘅接合位要盡快掃鬆佢，如果唔係就會有個實邊嘅浪😂。我又係淡色咗，如果深色 d會托得 d浪花明顯 d。不過我覺得 d色混得幾靚，阿 sir而家個 rundown唔知係唔係針對我哋一般都花好多時間喺一個位度雕琢，佢示範完個天就叫同學埋位畫，但好快又開始第二個 step，每個 step都俾好少時間我哋，所以我落完色都冇時間再做 d乜，😁效果似乎仲自然。
跟住畫岩石。我畫唔好直線嘅問題又出現，畫到 d石圓碌碌，唔襯呢個大浪嘅氣氛，而家已經係修正過，我盡量拉直咗 d線，但都係唔夠直。
至於個浪，除咗要小心留白之外，同其他白色嘅嘢一樣，都要用深色嘅暗位嚟營造佢嘅形態同 volume。阿 sir教暗位用灰紫色，不過我後來再加咗少少藍色。
個大浪同石接觸嗰個位都要捽番鬆佢，咁先似個浪冚埋舊石度。
畫石嘅時候都要留白，表示石上流落嚟嘅水。阿 sir話我嘅留白太幼，喺無可挽回嘅情況下，我用咗 acrylic，反正都要用嚟灑浪花嘅水點。阿 sir用白色水彩㗎，但我試嘅時候已經發現顏色太淡，🤔點解？所以最後都用咗 acrylic。
近處嘅海水太平靜，應該多 d留白同擦乾筆，營造海水撞擊完留喺水面嘅泡泡。
綠色嘅海水用塑膠綠加藍，呢隻塑膠綠咁假，以為用途唔多，但阿 sir都用得唔少，好彩買咗。
 |
| Cotman on Saunders Waterford 300g CP 15"x11" |
攞畫紙去上堂先發現冇晒上堂用嘅 300g rough，但又發現⋯咦？我有 CP嘅？幾時買㗎？應該耐到唔記得咗，所以擺到變咗喇。一上水，見到左上角發黃，上埋色仲出咗奇怪效果添，hmph⋯😒
咁耐無上堂，之前一齊嘅同學已經進步咗好多喇。
～*～*～*～*～
10 May，2024
自己再畫一張。（真係勤奮）
今次特登用平頭筆畫石，唔再畫到圓碌碌，但有 d太平整，睇落更唔自然😞。
外面嘅海係唔係應該少 d留白？
石堆裡面嘅海我已經少咗白，原圖係一片白色起晒泡嗰種。不過而家睇起嚟都係應該多番 d色。
個浪⋯像爆水管多 d😂，而且後面個海太淺色，唔係好托到個浪灑出嚟嘅水點，更加冇氣勢。
 |
| Cotman on Saunders Waterford 300g CP 11"x15" |
沒有留言:
發佈留言