水彩班 – 星河

從來都冇 attempt過畫 galaxy，呢個 topic亦唔係阿 sir嘅風格，但呢堂竟然就係畫 galaxy，一定係同學嘅提議，阿 sir而家堂堂都問大家想畫乜，可能佢教咗咁耐各種題材都畫到悶，想同學俾 d新意佢。

一塗大面積就顯露我太 dry嘅缺點，好難控制到唔起 streaks。本來第一層都算 ok，顏色漸變都算做到，但好正常地，乾咗顏色會淡咗灰咗。

第二層掛住反覆加到夠深色，忽略咗顏色要融合漸變😌

galaxy係唔係太白？形態係唔係太規矩？
（事實係我完全捉摸唔到佢嘅形態，睇極都唔明佢究竟係點）

本來諗住畫多一幅，畫緊㗎喇，但同平時一樣，我做第二次嘅事總係會差過第一次，係唔係我有 d乜嘢性格缺陷？唉，總之就係第二幅比第一幅仲差，差到我要毁滅咗幅畫，我一向當自己 d畫係寶㗎嘛，連第一幅畫到一塌糊塗嘅兩個球體都仲留住，但呢幅真係一個 disaster。

我諗我會再試嘅，等我忘記咗今次點畫先。
（好似張無忌學太極劍法咁，勁唔勁😁）

Cotman on Saunders Waterford 300g cp 14" x 9"

水彩班 – 仙人掌

呢幾堂我都放棄咗喺堂上完成幅畫，因為畫得慢啦，而且一幅畫畫到最後先係最享受嘅部分，我唔想喺堂上匆匆忙忙咁畫完。我總係左睇右睇左執右執（我知道畫水彩唔應該咁，但我放唔低啊😂），反正我又唔諗住畀阿 sir改，我就索性早 d收筆去參觀阿 sir改畫，但而家阿 sir改畫唔多講嘢，我主要都係觀摩吓同學點畫啦。

不過返屋企埋尾，對我嚟講都好有挑戰性，我通常都會唔記得晒要點畫，好似呢幅咁，明明右上話咗係光位，要淺色同左下嘅暗位做對比，我本來都畫咗淺色，第二日繼續畫時，為咗突出淺色嘅仙人掌刺，諗都冇諗咁撻咗深色落去，仲要明明平時想深色深唔到，今次一撻落去就深色，唉，人生⋯😂，我又唔敢洗，一定會洗到一塌糊塗，算啦。

 Cotman on Saunders Waterford 300g cp 8" x 14"

d磚好似畫得完整咗 d，好冇質感，成幅牆都算係失敗😔，磚同牆身嘅前後擺位好似掉轉咗咁，我諗係因為磚同牆嘅連接位明暗掉轉咗。

不過，好彩棵仙人掌，都算畫得唔錯。

用色係 sap green，深色 d加 ultramarine，再深色就加紅色。

ultramarine無處不在。