再一次失敗嘅白鴿育兒事件

早幾日，冷氣機頂不時響起嚟，好似樓上跌嘢落嚟咁。走去窗前睇吓，見到有隻白鴿喺我對面住戶部冷氣機上面。

day 1

第二日，冷氣機仍然係咁響，原來對戶冷氣機上面嗰隻已經安安穩穩咁坐低咗，我估佢準備生蛋啊⋯，另外一隻係嚟探佢嘅，應該係準爸爸😄

過咗兩日，隻白鴿唔見咗，🤔唔通⋯生產唔順利？

但係，冷氣機仍然有聲，我再周圍睇吓，原來佢搬咗落樓下，可能因為樓下嗰部冷氣鋪咗地毯舒服 d啦，又或者樓上收衫嚇親佢，我諗佢本來應該因為樓上晾咗衫感覺有 shelter，但一隻雀仔點會明白人類要晾衫收衫呢 d嘢吖。

day 6

佢仲已經生咗蛋添喇，但好奇怪，佢冇坐住隻蛋，而係就咁擺咗喺度。一連幾日佢都坐住喺度，對住隻蛋，不過爸爸同媽媽會輪流坐㗎。

day 12

有一次俾我遇上換班儀式，喺換位嘅時候見到有另一隻蛋啊。🤔會唔會⋯佢哋搬屋時整爛咗隻蛋，所以淨係孵完整嗰隻呢？

佢哋冇築巢，只係好象徵式咁用兩條草圍咗個圈。

day 13

佢哋警覺性好高㗎，我一行近窗邊，佢就即刻矋住我😂，我都唔敢睇咁多，一日都係睇兩次咋。

咦，唔見咗一隻蛋！

day 13

上午見到佢哋兩個，下午我出完街番嚟，淨係得番隻蛋喺度，兩個去咗邊？

一直到夜晚，佢哋都冇再返嚟😟，唔通上午我見到佢哋一齊企喺度嗰時，係商量緊棄蛋？定已經決定咗棄蛋？

佢哋點解就咁掉低隻蛋唔理呢？另外嗰隻蛋究竟去咗邊？

佢哋整到好污糟，好彩佢哋揀咗有地毯呢部冷氣咋，整污糟地毯好過直接跌入冷氣機裡面。可能遲 d落場大雨可以洗吓啦，唔知會唔會有異味傳入室內呢⋯

有個螺絲圈呀，會唔會係佢哋嘅結婚戒指？

早幾年都試過有白鴿喺度生蛋，仲成功孵化咗鴿 bb，但嗰對父母經常獨留子女在家。終於有一次，聽到佢哋撲嚟撲去，但只見爸爸媽媽喺度，我估 bb可能跌咗落街😞

窗外黑鼆鼆、靜嚶嚶，一隻蛋孤零零咁過一晚真係令人傷心，佢裡面係一個小 bb嚟㗎😭

唔知聽日佢哋會唔會返嚟呢。

day 14

佢哋返咗嚟呀！不過都係唔理嗰隻蛋，走咗去另外一部冷氣機度。

可能⋯，應該係⋯，佢哋已經斷定嗰隻蛋孵唔到 bb，今朝返嚟係哀悼同憑弔。

唉，雖然白鴿已經過度繁殖，周圍都係，但面對生命嘅消失、父母失去子女，始終都係令人傷感。

～*～*～*～*～

30 Mar，2024

呢兩個星期間，佢哋都輪流返過嚟，我知道係因為佢哋每次都撥到我部冷氣機，有聲。

今日，冷氣機又有聲，去窗邊望吓，佢又對住隻蛋發呆。

過咗⋯一段時間，都有個幾鐘，又聽到聲，我以為係佢走，原來係另一隻都嚟埋。但係⋯！隻蛋唔見咗！上次我都估係佢自己食咗，今次⋯我睇唔到佢食，但隻蛋頭先仲喺度，而家唔見咗，而佢呢，喺度啄緊蛋殼。都聽過動物係會咁，好彩我冇親眼見到。

唔知佢哋係唔係好似人咁嘅感情？定係物種嘅本能？

我估呢次應該係佢哋最後一次返嚟喇。bye-bye喇，記住學吓築巢，搵個好地方先再生蛋啊！