水彩班 – 小溪

呢幅畫喺堂上畫到一塌糊塗，因為，雖然我好認真咁起稿，但後面嗰 n重山坡令我畫畫吓都唔知自己畫緊第幾層，又控制唔到每一層嘅高度，畫到自己好迷失😕

未畫完我就走咗，本來走之前諗住俾阿 sir睇吓有乜要注意，攞住幅畫埋到去，阿 sir幫同學改緊畫，但見佢好豪邁咁撻咗一大撻深色喺幅畫度，我睇到好驚，我真係愈嚟愈驚，愈嚟愈當自己幅畫係寶咁😂，係唔係太自戀？當下我決定唔俾佢睇，收埋幅畫執嘢走。其實都可以睇埋佢點改同學幅畫吖，使乜即刻行開？真係黐咗線😂

幅畫俾我畫得近咗，本來視覺好廣闊，應該係我畫大咗最遠嗰個山，上兩堂阿 sir都講咗，遠嘅山唔要有起伏，但我畫成咁。樹都係，樹頂過唔到遠山，出唔到遠到變細嘅感覺。（呢個係我估嘅）

呢幅畫重點係一層層嘅山坡，用唔同顏色分層，由最遠嘅紫色 tone到最近嘅黃色 tone，彩虹嘅原理。

各層嘅山坡

ultramarine ＋ 紅

ultramarine ＋ Prussian blue ＋ yellow orchre
Prussian blue ＋ yellow orchre
Prussian blue ＋ orange / yellow orchre
cerulean blue ＋ yellow orchre
調出唔同溫度嘅綠

樹主要係 Prussian blue ＋ burnt umber

我要記低，因為我發覺自己唔識決定顏色，唔識調出需要嘅顏色，😅咁都學人畫畫。

幅畫返屋企先完成，千錘百煉修完又修，幾層山坡已經同上面講嘅顏色配搭唔係好同。

倒影用錯色，其實都跟阿 sir教咁調色，但可能比例唔啱啦，乾咗黃咗好多。

Cotman on Saunders Waterford 300g cp 11" x 15"

阿 sir下個月又放兩個星期假去旅行，真係逍遙。

哎，今堂成堂都聞到煙味，我估係看門口嗰個喺房食煙。hmph，聞咗三個鍾，好辛苦，以後佢會唔會繼續食煙？叫佢唔好食會唔會好冇禮貌？同阿 sir講會唔會令佢為難？😕

水彩班 – 玻璃杯

😰直到呢刻先醒覺，點解我竟然會唔填滿個背景？！黐咗咩線？！
但係已經加咗好多層，唔想再加，⋯⋯定係都係加番好？

今堂原圖係一幅畫，我真係唔鍾意臨摹，一幅畫實有 d實際唔存在嘅色塊，原畫作者撻低呢個色塊一定有佢嘅原因同目的，但臨摹嘅就只係為咗跟住畫，尤其是我呢種低手。好似呢幅裡面，張枱左邊嗰塊藍色係乜呢？我上色時都有 d心虛，究竟我畫緊乜？雖然經常都有呢種疑問，但今次呢個疑問好真實😂。我估原作者應該係因為想 balance個畫面，或者要托出一 d嘢，但點解會係呢個藍色？點解係呢個形狀？well，anyways⋯⋯

畫透明嘅玻璃，要用最深嘅顏色。阿 sir特別提我哋要帶黑色，我喺唔肯定屋企有冇黑色嘅情況下，反正人在廣益，唔理咁多買咗先，然而結果唔記得帶去上堂😂，終於問咗阿 sir借😅

畫玻璃，最緊要留白，同埋應該深色嘅地方要夠深色，仲有玻璃同投影唔好有飛白。好彩呢堂改咗用 cold pressed✌ 

杯身花紋太生硬，應該係因為太實在，若隱若現會自然 d。但畫嗰時只擔心 d刻痕留唔到白，都冇理自唔自然。

我用 8K紙，但又唔想畫到個杯太大，變咗令到個投影大咗，起稿時諗住投影 fade out唔畫咁長，都唔知點解會諗住可以咁😌，而家畫面唔係好 balance。

投影裡面嘅色塊唔夠水，唔似係液體嘅投影。我 d畫成日都有『乾』嘅感覺。我都唔知點先可以夠水但顏料又唔變淡色。阿 sir話係因為我 palette裡面 d顏料乾咗，出唔到色，呢兩堂我都預先噴水濕咗 d顏料先，感覺顏色都真係容易咗深到落去。下次再整濕 d睇吓點。

杯邊幾粒反光位形狀怪怪哋，但杯底嗰塊都幾好😁

背景平塗，但點解都咁難？塗到起晒筆痕，係唔係唔夠顏料？係唔係應該開定一大碟夠濃嘅顏料先塗，而唔係逐筆攞色？

呢幅圖好似好簡單，但裡面好多細碎色塊，我畫咗好耐，耐到冇時間去睇阿 sir點評同學，返到屋企埋尾嘅時間同上堂差唔多咁耐，以為畫完，企起身睇吓又搵到地方要執。不過都唔係話而家 perfect，正如唔記得係 miss ho定蘇 sir講，一幅畫係冇畫完㗎，要執一定有得執，唔⋯應該係蘇 sir講嘅，miss ho畫風豪邁，蘇 sir教木顏色，適合執到地老天荒😂，唉，我今次都真係好似畫緊木顏色咁逐 part執㗎😆

Saunders Waterford 300g cp 15" x 11"

~*~*~*~*~*~*~*~*~*~*~*~

局部加咗一層好濃郁嘅黑色，好似好咗，冇咁突兀。橙色部分俾我冚咗，幅畫真身都仲 ok睇到，影相就唔見咗，好似同杯嘅橙色冇咗呼應咁，不過唔加喇，就咁啦。

Saunders Waterford 300g cp 15" x 11"

水彩班 – erm...風景

個天一開始就壞咗，出咗水痕，爆咗水花，不過我冇 attempt去番筆，多一事不如少一事😂

今次 d雲嘅顏色自然咗，但形態都係怪怪咁。

成幅畫都係得幾種色：ultramarine blue, cerulean blue, yellow orchre, permanent rose, brown

阿 sir話呢幅畫唔好用綠色，可能係因為成個 tone都好 blue啦😄；
另一樣就係：遠嘅山唔好有起伏，一有起伏就會感覺近咗。（哦⋯原來係咁）

仲有，畫雲，條邊要鬆，唔好實邊。

d樹畫得幾好，但失敗在於我畫天嘅時候無端端俾個天食咗一啖雲，嗰個位深色咗，本來啡黃嘅樹去到嗰 part要用深色，唯有當佢係另一棵樹啦。但整體都算唔錯。

可能構圖同用色比較平淡，今堂畫得都算淡定。不過畫得慢咗，唔得閒去睇阿 sir改同學 d畫。

我次次都會同阿 sir講：『阿 sir你話俾我知有乜問題，我想自己改。』但次次係咁唔知佢會唔會覺得我唔尊重佢，今次我覺得自己都畫得 ok，應該唔會大改，所以少少忐忑咁擺低幅畫，乜都冇講。阿 sir一拎起枝筆，我個心就揪住😂，睇住佢喺前景加深咗、樹影加深咗（本來的確係唔夠深）、最遠嘅山冚咗我 d紫藍色（佢話太紫），我有 d心痛，雖然阿 sir潤飾過係精神咗，但係都⋯⋯

Cotman on Saunders Waterford 190g rough 11" x 15"

同學話我 d雲好似個瞓喺度嘅外星人，原圖都似㗎，但我手多加咗隻眼俾佢，更加似😂

我多數都係用 rough水彩紙，尤其係畫風景，因為 n年前喺 miss Ho嘅指引之下，認定咗 rough適合畫風景（但其實佢又冇話畫乜都啱），然後漸漸又鍾意咗佢嘅紋理，於是一直義無反顧咁成為我嘅指定用紙😂。今日，聽到阿 sir話，而家 d rough紙紋理愈嚟愈粗，佢鍾意用 cold press。😮，我登時『叮』一聲，係喎，好似都未試過上堂用 cold press喎，即刻決定下堂要試吓！不過要去買，希望呢幾日唔好落雨🙏