水彩班 1 & 2 - 合掌瓜，煲與爐

四月開始上番水彩班，重上水彩初階二，雖說重上，但我覺得一個course嘅練習係唔夠嘅，自己畫又梗會避開唔好畫嘅題材，上堂老師叫畫乜都要畫，咁先發揮到小宇宙呀 ~ LOL，所以其實重上就係練習，仲未可以學新嘢呀。

第一堂畫番上期畫過嘅合掌瓜，雖然畫過，明暗掌握比上次好咗，但係調色好失敗，

Shinhan on Saunders Waterford 190g rough 11"x15"

第二堂畫瓦煲同爐，如果自己畫實唔會揀咁難又冇美感嘅題材，初時都好迷惘，個爐一pat咁，點畫呀？
老師示範完自己畫，個煲都仲ok，到個爐，猶豫咗一陣，點都要落筆呀，諗番老師嘅用色，教我哋唔洗溝勻d色，將要用嘅色各據一方，畫筆呢度點d、嗰度點d，出嚟先有層次，同示範時話：『你睇住上一筆冷色多，咁下一筆咪暖色多番d囉...』
就係咁，畫吓畫吓竟然幾似樣喎，再發揮以前學過嘅，加強埋立體感，嘩，我真係好開心呀，唔係上堂真係學唔到呢d技巧啊！

Shinhan on Saunders Waterford 190g rough 11"x15"

要多練習素描至得，因為起稿都唔容易，煲同爐嘅形態都歪歪哋，比例唔係幾好。


~*~*~*~*~*


2018 水彩班
https://iceefaery.blogspot.com/2018/01/2018-1.html

畫展 （19 Mar 2017 - 28 Mar 2017）

上個月同同學一齊開嘅畫展，係我無聊嘅人生中，一件比較實在嘅事。

喺班長提議之下，我印咗兩款書籤，每款60張，好快就畀人攞晒，好開心！

本 guest book都係班長加工造架，呢個畫展都係因為有佢先至咁順利。

我從舊年十月就開始投入畫畫，趕到最後deadline畫咗3幅。

另外兩小幅合作畫，不過，合作畫我畫得太馬虎喇，而且取材錯誤，顯得格格不入，有d破壞咗個 concept.

或者我一向唔係好合群，好似係第一次同人合作做事（其實合作部份唔算多），好開心，有一種歸屬感，希望以後仲會有機會一齊玩啦。

吳奇隆

呢個星期忽然追上咗吳奇隆嘅舊聞，事緣聽雲海舊節目（又係舊嘢）提起『阿郎的故事』首歌，上youtube聽， search result 出埋李國祥嘅『總有你鼓勵』，聽呢首又出現吳奇隆嘅『祝你一路順風』， 網上search嘢總係咁，總係帶你去咗唔知邊度。

係一個綜藝節目，小虎隊啱啱解散，首歌係佢填詞，講佢同朋友各自要走自己嘅路。佢單飛上節目，講心情講到想喊咁樣。跟住唱歌，唱咗兩段，蘇有朋忽然出現，佢即刻喊咗出嚟（我見親人喊就梗喊埋一份），之後search吓點解會咁慘，跟住就睇咗好多片啦。

佢同蔡少芬拍拖我覺得幾襯，當時都有睇到新聞，影婚紗廣告好sweet，佢兩個仲係我唯一遇到過嘅明星，嗰日兩個拍拖行海港城，幾開心。

睇番d片同新聞，要幫爸爸還成千萬，傷緊病緊都瞞住人照拍，一個二十歲嘅小朋友真係淒涼。

不過早幾年喺大陸拍劇忽然又再紅起上嚟(原來小虎隊當年好紅架），而家仲有自己生意，舊年結埋婚，婚禮仲好豪華添。

佢同蔡少芬都先苦後甜，都算係happy ending，兩個我都幾鍾意架，仲記得吳奇隆一喺tvb拍劇就講得唔錯嘅廣東話，我好impressed，覺得佢好努力同認真。

明星嘅數字都以億以千萬咁嚟講，我為佢哋淒涼好似有d....不自量?

再諗吓自己，聽舊電臺節目，翻舊娛樂新聞，都唔知自己做乜。