畫畫 – mushrooms（木顏色）

用 koh-i-noor magic pencil起嘅稿。
呢種筆要一次過完成，重覆上色好難就番同色，一疊色就變得糊混。

我根據稿嘅顏色再用 polychromos上色，
初稿都幾清新吖，點解畀我畫到咁詭異？
下次要記得，唔好用對比色做暗位，我有 120色架，試吓搵番隻暗色出嚟做暗位，應該唔會變到咁詭異，我記得以前畫花朵瓜菜都唔會咁。
我今次彷彿做到 focusing嘅效果，我強調咗中間幾粒，旁邊嘅少少 blur，
…可能唔係好明顯，得我自己先睇得出。

faber castel polychromos & Koh-i-noor magic pencil

木顏色同素描一筆筆描吓描吓，慢條斯理咁畫出明暗深度真係幾 soothing & relieving，水彩，對我嚟講，真係比較緊張刺激。
木顏色，唔知係唔係被覺得係小朋友都識用，除非像真度極高，如果唔係，就不值一晒，不過呢，我自己都覺得係比較冇咁藝術性同技術性，但係係一種好好嘅減壓遊戲。

通常畫木顏色攞起本普通 sketch book就畫，次次都係畫畫吓先諗起應該用 fabriano，btw，當我畫得唔好，滿載負能量嘅時候，我會諗：『靚紙靚顏料畫埋 d低能嘢，even the best art tools won't make you an artist。』如果幅畫過得去，我就會諗：『用好 d嘅畫具唔好畀自己有畫得唔好嘅藉口吖嘛。』哈哈。

畫畫 – 士多啤梨（木顏色）

木顏色畫最花時間，呢幅斷斷續續畫咗大半日。

諗住全用 koh-i-noor magic pencil，但畫嚟畫去都冇一枝畫到 士多啤梨嘅顏色，唯有用埋 polychromos。

留白留光位對我嚟講真係幾難，我用咗白色 gel pen加光位同種子，不過整體嚟講都好立體；
隻叉真係幾差；
隻杯唔對稱，唔應該懶，明知自己畫乜都唔平衡唔對稱，應該要度吓距離嘅；
其實我都唔知畫唔畫得出玻璃嘅質感。

我冇好細緻咁畫，冇諗住畫到像真，形似同埋有立體感就 ok，真係辜負咗我嗰240枝名牌木顏色。

原圖背景係富士山，喺 hoshinoya住嗰幾日，雖然好凍，但我哋基本上整日都喺露台，坐喺暖桌對住富士山渡過，影乜都用富士山做背景。
不過我估我畫唔出遠近景嘅佈局，只會畫到亂成一團，都係算啦。

Faber Castel Polychromos & Koh-i-noor magic on sketch book

畫畫 – 企鵝（水彩、木顏色）

當我想畫動物，多數會畫企鵝，因為身體線條簡單，姿勢少，同埋冇表情，但又好可愛。

今次我用咗唔同嘅顏色打底，因為我想畫到幅畫好多色彩，但…係唔係太張揚呢？
我諗係因為冇因應身體線條上深色，畫到一撻撻，
色彩冇層次，只覺五顏六色好混亂。

本來諗住宣佈失敗就算，睇睇吓都係想救吓佢，但唔想再疊水彩，於是用咗木顏色，都冇諗住用水溶再暈染，用咗 polychromos。
木顏色突顯咗張紙嘅紋，變得好似有少少 texture咁，睇落冇咁 blank。
但如果我唔係呢個方向畫，紙紋變咗打橫會唔會好奇怪？

加深咗色幅畫睇起嚟『精神』咗，但我見人哋畫得淡淡咁好乾淨清雅…，well…

單睇顏色，我覺得都幾好，只係前面嗰隻深色部分太多，上身應該淺色返 d，下面嘅淺藍好靚。
頭部畫大咗，顯得好笨拙又唔可愛，sorry呀…

Schmincke & Polychromos on Saunders Waterford rough 5.5" x 7.5"