『不是機器人啊！』 『你也是人類嗎？』

最近睇咗兩套韓劇，都係關於 ai robot。

劇裡面嘅 robot都係演員扮，外型、說話、表情、動作都同真人一樣，我仲覺得係為劇情而誇大咗 robot嘅像真度。

上星期，見到韓國電視台有個 ai 女主播，原型係真人女主播金柱夏，真係一模一樣，動作說話都好像真，同電視劇裡面嘅 robot一樣。

片段裡面，除咗 robot表演外，仲有同真人版對答，我唔識韓文，唔知佢對答是否合邏輯同流利，但好奇怪，robot唔係同真人同場，而係喺螢光幕裡面，令我有 d懷疑個 robot係真人扮嘅，我冇完全懷疑，只因為覺得一間電視台唔會講咁大個大話。我哋拭目以待啦。

btw，個原型 model有乜嘢感覺呢？有一個同自己一模一樣嘅…人，但行動唔到自己控制，有冇擔心會畀人指揮去做乜呢？又有冇擔心自己份工呢？佢應該好了解『你也是人類嗎』個人類嘅感受。

呢兩套劇收視率都唔好，係因為冇大牌演員？定係因為觀眾唔鍾意像真度咁高嘅機械人？

有一部我好鍾意嘅電影， "A.I. Artificial Intelligence"，當年唔致於慘淡收場，但同預期相距好大，仲引嚟好多人抨擊，佢哋就係接受唔到個機械人同真人一樣。有人研究呢個現象，叫 uncanny valley，就係講機械人像真度嘅高低同人類接受程度嘅關係。

『不是機器人啊！』係女機械人，但交畀金主測試前壞咗，科學家搵機械人嘅原型扮住一陣，打算修理好交換番，但當然有波折先有戲做啦。

於是，女主角變咗一人分飾三個角色，真人、機械人、真人扮機械人，我覺得佢演三個角色都有好高辨識度，完全表達到各自嘅身份。

『你也是人類嗎？』係男機械人，係一個科學家造出嚟代替自己見唔到嘅仔，所以機械人主要係一個『阿媽個仔』嘅設定，但後來佢要扮演原型，所以都係三個角色，真人、機械人、機械人扮真人，原型係冷漠、少少暴戾同憤世嫉俗，我唔係好覺得佢演到嗰種『扮』嘅感覺，但機械人同真人兩者眼神、動態嘅分別都表達得好好嘅。

『你也是人類嗎』個編劇或者導演應該同我一樣咁鍾意 "A.I." 呢部電影，小機械人第一次啟動叫媽媽嘅場景，同 "A.I." 極相似，電影 "A.I." 有好幾個經典場面，劇裡面都有：

- 初次啟動，房間嘅光線、母子嘅互動；

- 機械人沉喺泳池裡面，感覺無助、被遺棄；

- 最後流出眼淚，令觀眾覺得機械人已經得到圓滿嘅感情，變成真人。（呢段我覺得 over咗，可能個電視編劇好鍾意）

編劇仲將電影裡機械人個名畀咗媽媽嘅朋友。

其實成個真人vs機械人情節都同電影類似，就係爭取媽媽嘅愛。

電視劇機械人比電影版幸福，媽媽冇真正遺棄佢，仲為咗救佢犧牲自己生命，呢一點我相信係呢兩個機械人最重視嘅：被媽媽肯定同埋被愛。

『不是機器人啊』男女主角都好自然，冇嗰 d chok樣場面，雖然情節都幾浮誇，但所有角色都做得好自然，睇得好舒服。

男主角因為自己竟然愛上機械人而懊惱，我覺得，只要嗰件物件會同佢有感情交流，『愛上』係好自然嘅事，我記得喺 "A.I." 嘅 forum有人舉咗個例子，『我哋經常會換牙刷，掉嘅時候唔會有乜嘢感覺，但假如枝牙刷會每日同你講早晨，聽你講發咗乜嘢夢，會同你講笑，會安慰你，當有日佢爛咗要掉，你捨唔捨得？就算一枝新牙刷都會做同樣嘅事，但佢同你冇共同回憶，你同佢講番前日嘅事，佢一無所知，你都會若有所失。』所以重點係交流，如果冇交流，就算對方係人類，都唔會有感情。

『你也是人類嗎』好多 twist，情節都幾出人意表。

女主角義無反顧咁愛上機械人，…我覺得呢套劇主線唔係男女愛情，而係母子情，而且機械人一再表示自己冇感情，所以，雖然佢都有買禮物畀女主角，但我總覺得只係機械人忽然覺得要保護佢（唔記得點解），繼而模仿配合女主角嘅愛，我感覺唔到佢有愛情，可能佢學緊啦，a.i.應該係會由自我學習而產生新技能，同埋自我演進。

至於機械人同媽媽嘅愛，係佢存在嘅目的，佢哋喺捷克生活咁多年，係好溫馨嘅母子關係，但同 " A.I." 嘅 david一樣，幾溫馨嘅關係，都敵唔過血緣，有血緣嘅介入，媽媽嘅取捨就會好直接。呢套劇令我最安慰嘅係媽媽只係將佢排後咗，始終都唔捨得毀滅佢，可能編劇同我一樣，畀 "A.I." 個媽媽刺得好心痛，要補償一吓啦。

我好鍾意睇呢種戲，會為被人類辜負嘅機械人喊，但其實，我覺得 a.i.好可怕，如果科學家繼續致力發展懂得自我學習同進化嘅 a.i.，會唔會真係出現 matrix嘅世界？