好多年前去過海德堡一次，午夜上機，落機時間係當地大清早，我喺飛機上冇瞓過，我嘅唯一瞓覺死穴就係飛機，從來冇喺飛機好好瞓過，好羨慕有 d人可以未起飛已經瞓著😂。雖然我可以玩通宵唔瞓，但飛機會熄燈俾大家瞓覺，瞓唔到但又要瞓其實好攰。
親戚揸車接我哋，唔記得點解要去一去海德堡，扮瞓扮咗幾個鐘嘅我一舊雲咁，完全唔記得喺嗰度做過乜、去過邊，只記得嗰度好靚。
唔知點解，連相都冇影過😂。呢張圖都係喺網上搵到，係唔係 Neuschweinstein（係 Heidelberg Castle先啱，而且完全唔係我畫咁樣）？anyway都係畫得唔似㗎喇，係胡亂上 d色，反覆加吓加吓就出咗嚟嘅一堆建築物😁，似建築物就好，都唔敢想佢似指定建築物喇，不過睇落都幾有質感吖。
今次個天嘅黃同橙冇咁突兀，因為加咗少少紫色 tone down咗，早就應該咁，總係唔識得調色，畫咁耐畫都仲係將顏色直接搬落畫紙，唉😌。中間個太陽唔夠光，因為留白失敗咗？
 |
| Schmincke on Saunders Waterford 190g rough 7.5"x5.5" |
睇一個電視節目，裡面提到有一樣嘢叫『葬冊』，落葬登記冊，記錄每一個落葬人士嘅資料，日期、位置、生前居所、買位嘅人同價錢，唔知仲有冇其他，唔知係唔係包括晒全香港，定只係公營墓地。
anyway，我想講嘅係，睇到其中一頁，竟然見到年份係『昭和』（節目裡，冇提到呢個年份嘅事情，但我相信係刻意嘅，otherwise，成百年嘅記錄，點解係要揭呢一頁？），初時大惑不解，後來諗到應該係關三年零八個月嘅事，雖然我冇親身經歷過，但唔知點解，我一直都好有感覺，可能係細個時聽婆婆講過，呢段時間對婆婆一家有好大影響。
好多人都係自從一部電影之後先知道 731嘅事，但我更早已經喺書度睇到，裡面敍述嘅事情太過不合常態，當時太細，亦未知道戰爭嘅事，所以都係當奇幻故事咁睇，後來，當然仲睇到其他記載啦，hmph⋯
過咗咁耐，生活上都買咗好多日本產品，近年都有去日本旅行，但次數係寥寥可數，一向都冇好鍾意日本。
好多人鍾意佢有儀式感，喜歡嗰種氣氛，覺得有文化，亦有人鍾意佢禪意嗰種閒適恬靜，但諗到三年八個月裡面嘅事情，我覺得好分裂。
我又冇憎恨日本嘅，只係冇好似大多數人咁鍾意，仲要鍾意到叫『鄉下』😂咁啫（我嘅鄉下係香港呀！），同埋唔會無條件咁覺得日本人一定係好人囉。
無論咩情況、幾唔開心，到咗瞓覺嘅時間，都可以毫無困難咁瞓著（但需要嘅時候，又可以玩通宵唔瞓跟住直踩返工都得，係咪好神奇呢），就算喺街都會好安心咁瞓（以前成日去夜街，一班朋友唔想返屋企，周圍流浪，瞓麥當勞試過、瞓酒店 lobby又試過，唉，都幾曳），當然有瞓唔著嘅朋友喺身邊負責守衛啦，但我瞓嘅時候係唔知佢會瞓唔著㗎😁
曾經持續咗好多年，我每日都瞓十個鐘，而家唔得喇，主要係留戀電腦同電話，愈嚟愈夜瞓。
我瞓得最長嘅一次係 24小時。當時大概五、六歲，細個好早瞓，九點鐘左右，但屋企人仲睇緊電視，我記得瞓著前播緊一部電視劇，我日日都係咁喺電視聲中瞓著嘅。
當我瞓醒，仲係播緊同一部劇，我以為自己只係瞓咗一陣，但婆婆見到我坐起身，即時話：『哎，瞓醒嗱？』跟住媽咪都走埋嚟，仲攞咗條毛巾同我抹手抹面，抹完面婆婆攞咗碗熱辣辣嘅泡飯俾我食，我又真係好肚餓喎😂，飯上面有塊豬扒，係平時嘅煎豬扒，但又同 d泡飯一齊煮過，別有一番風味，我到而家仲記得嗰種味道😋。
佢哋冇同我講我瞓咗幾耐，但我大個 d諗番，既然播緊同一部電視劇，應該係瞓足成日啦。到再後來又大個 d，諗起呢件事真係覺得不可思議，佢哋見我一直係咁瞓，冇諗住叫醒我？唔會擔心嘅咩？如果唔係我瞓醒後佢哋嘅反應，我唔會相信我真係瞓咗一整日囉😂
我仲記得，我瞓醒嗰陣唔同平時咁喺被裡面，張床係舖番好床冚，我瞓喺床冚上面，身上係另一張被，俾人咁搞都仲唔醒，豬都比我醒😂
唔記得咗嗰晚有冇再瞓，如果冇，邊個陪我過漫漫長夜？而我都冇通宵冇瞓嘅記憶。但如果又再瞓，會唔會太犀利？😂
原畫個天好 watery，我畫到好乾，筆觸明顯，色彩混合唔到。
可能因為我反覆加色，唔知點解我深色唔到。加多少少水就變得好淡色，點先可以深色又 watery？咁細幅都控制唔到水量😌
 |
| Schmincke on Saunders Waterford 190g rough 7.5"x11.5" |
終於都畫咗一幅畫。
係跟 Joseph Stoddard嘅畫畫。我好鍾意佢嘅用色，不過佢係 urban sketcher，d畫多數有建築物，我覺得好難畫。今日搵到呢張淨係樹，所以試畫吓。
好鍾意橙色嗰堆樹，顏色好靚。
d雲怪怪咁😅。
整體顏色好 vibrant，好滿意。
 |
| Schmincke Akademie on Saunders Waterford 190g rough 7.5"x11.5" |
