瞓覺

如果要講我有乜嘢強項，一定係瞓覺。

無論咩情況、幾唔開心，到咗瞓覺嘅時間，都可以毫無困難咁瞓著（但需要嘅時候，又可以玩通宵唔瞓跟住直踩返工都得，係咪好神奇呢），就算喺街都會好安心咁瞓（以前成日去夜街，一班朋友唔想返屋企，周圍流浪，瞓麥當勞試過、瞓酒店 lobby又試過，唉，都幾曳），當然有瞓唔著嘅朋友喺身邊負責守衛啦，但我瞓嘅時候係唔知佢會瞓唔著㗎😁

曾經持續咗好多年，我每日都瞓十個鐘，而家唔得喇，主要係留戀電腦同電話，愈嚟愈夜瞓。

我瞓得最長嘅一次係 24小時。當時大概五、六歲，細個好早瞓，九點鐘左右，但屋企人仲睇緊電視，我記得瞓著前播緊一部電視劇，我日日都係咁喺電視聲中瞓著嘅。

當我瞓醒，仲係播緊同一部劇，我以為自己只係瞓咗一陣，但婆婆見到我坐起身，即時話：『哎，瞓醒嗱？』跟住媽咪都走埋嚟，仲攞咗條毛巾同我抹手抹面，抹完面婆婆攞咗碗熱辣辣嘅泡飯俾我食，我又真係好肚餓喎😂，飯上面有塊豬扒，係平時嘅煎豬扒，但又同 d泡飯一齊煮過，別有一番風味，我到而家仲記得嗰種味道😋。

佢哋冇同我講我瞓咗幾耐，但我大個 d諗番，既然播緊同一部電視劇，應該係瞓足成日啦。到再後來又大個 d，諗起呢件事真係覺得不可思議，佢哋見我一直係咁瞓，冇諗住叫醒我？唔會擔心嘅咩？如果唔係我瞓醒後佢哋嘅反應，我唔會相信我真係瞓咗一整日囉😂

我仲記得，我瞓醒嗰陣唔同平時咁喺被裡面，張床係舖番好床冚，我瞓喺床冚上面，身上係另一張被，俾人咁搞都仲唔醒，豬都比我醒😂

唔記得咗嗰晚有冇再瞓，如果冇，邊個陪我過漫漫長夜？而我都冇通宵冇瞓嘅記憶。但如果又再瞓，會唔會太犀利？😂