畫畫 - 靜物 （wetcanvas nov 2017 challenge）（水彩）

畫嘅時候覺得幾好，畫完覺得畫面好悶。
係咪因為背景太大片同色？
提子已經加番小小黃色，希望色彩豐富d，
應該係因為成串提子冇深色位，表現唔到深度，我估應該係咁。
原圖係有嘅，我將提子畫得太密，冇位加深色，以為就咁都得添。
不過我幾滿意呢串提子，起碼粒粒圓潤有光澤。


個壺.....
壺身ok，壺蓋唔啱視角，壺柄低咗，壺咀......😒


背景右上係咪唔應該帶黃色？

Cotman on Saunders Waterford 190g rough 5.5"x7.5"

後來諗：串提子嘅黃色係咪係應該反映喺個壺度呢？
加完反映，諗住加深埋個壺背光位，點知冇整乾淨枝筆，整到個壺黃咗，完全破壞晒！

射鵰如何英譯？

原文刊登於蘋果日報，本來諗住淨係擺條link，但想方便d睇番，就抄埋過嚟，我諗作者唔會太介意，反正呢度冇乜人睇。


「射鵰」如何英譯？ - 陶傑

英國有新進女漢學家出版「射鵰英雄傳」英譯本，在英語世界發行。「射鵰」以前曾有局部英譯，因為中西文化巨大差異，難有全書。而且「射鵰三部曲」，若窺全豹氣象，譯完「射鵰」，還有「神鵰」和「倚天」，考驗翻譯家意志學養，且非一人可以全功。
翻譯此書，必須有「射鵰翻譯小組」，如中共政治局常委須為單數，以三人最佳。其中一名為精通英文與中西文化之華人，一名為精通中文與中西文化之英人，若因譯事發生爭執，另由一英中混血、牛津劍橋畢業，中西文化由拉丁文至中國古典皆跨界粗通的組長來仲裁。
此一小組，組長的理想人選，本來可以是已故殖民地精英羅德丞。英人組員，當今唯已隱居澳洲的閔德福。至於華人一職，即使三十年前，亦無理想人選，因即使錢鍾書，英文程度不夠譯此書；反而香港的鄧永鏘是最佳人選，但須閉關五年，不要做生意，停止與皇室人員社交，專心Go academic，因為以鄧爵士之生性頑皮，愛看老夫子漫畫，射鵰英雄傳的情節、人物、招式，只能由此君擔譯，但這樣一來，「三人組」因為盡皆強人，恐譯不夠十回，就會爆發內戰。
金庸武俠小說的中國倫理結構、政治結構、社會結構，令西方大眾明白，已是一難。金庸小說想像與歷史相融，不同「哈利波特」，知道一點英國寄宿學校文化，絕不困難，但要明白中國甚至亞洲蒙古史的背景方可欣賞「射鵰」，此為二難。其中的武俠招武，缺乏科學依據，全憑天馬行空的意會，此為三難。
「九陰白骨爪」的「骨」，到底是Bone還是Skeleton？這位漢學家用了Skeleton，而梅超風練此功，是用一堆共九個髑髏，此骨是「頭骨」，不是成副，當是Skull。
由此可見英譯金庸之難。「射鵰」情節充滿童趣，已經是最容易的一部，但即使「西毒」歐陽鋒的「蛤蟆功」，此三字已經考功夫。蛤蟆成精，是中國民間神話，古代有「劉海戲金蟾」，連今日大陸，還有所謂「蛤粉」，即懷念中國前一位領導人的網民，致使「蛤蟆」一字遭禁，蛤蟆、蟾蜍、青蛙，均屬同科動物，但在英美加澳，因為氣候不同，大眾最多只見過青蛙，還加上動物園爬蟲館裏各種細小的阿馬遜河箭蛙毒蛙。
蛤蟆可成邪功，而且叫「西毒」──陰陽五行，東木西金，所以東邪黃藥師，用草木製藥；而煉金製毒，在西域或西南。金庸設計人物早就深思熟慮，要品味這一切，須同時註解中國文化百科。今日西方下一代一樣是手機低頭族，中國知識，限於Made in China襯衣，哪裏有這等閒工夫。
廿一世紀英譯金庸，難於英譯紅樓夢十倍，難於梁實秋戰時中譯莎劇全集百倍不止。


~*~*~*~*~*~*


想翻譯到表達晒所有內中意義同意思當然好難，但當一個故事咁譯就冇咁難啦。

其實就算香港人睇（我唔知中國人會點睇），多數都係睇故事，幾多人真係理解得晒裡面嘅歷史、武功諸如此類？

講難，淨係郭靖楊康個名都有歷史，都有對人物背景嘅表達，更莫講其他漁樵耕讀，李莫愁係唔係譯 don't worry？楊不悔係唔係 no regret？

中譯嘅名著，亦都未必翻譯得晒作者想表達嘅背景歷史同思想，文化唔同，好難睇到文字直接意思以外所表達嘅種種氣氛，呢種氣氛都會影響讀者對書中人物情緒行為嘅理解同代入感。

陶傑話只要知道英國寄宿學校文化就會睇明哈利波特，但我都聽過人講呢本書有影射官場，又有人話有暗示宗教，所以你明乜就睇到乜囉。乜都唔知就單睇故事，到增加咗對其他事情嘅認識先去理解番故事裡面嘅細節，又有另一番體會，咁都唔錯吖。

我唔覺得譯金庸會難過紅樓夢十倍，紅樓夢裡面淨係詩詞要譯到字義俱存已經唔易啦，仲有佢嘅人名大部份都有隱藏意思，點將元春迎春探春惜春呢幾個名譯到表達到『原應歎息』？『千紅一窟』、『萬艷同杯』又點譯呢？有冇保留到原意？都係睇點譯啦，單純當一個豪門沒落嘅故事又唔難，正如當射鵰係少年男女闖江湖歷險故事咁譯亦唔見得好難。

究竟會翻譯邊個版本呢？

金庸再次改寫故事，唔知係唔係想將自己著作嘅地位提升到紅樓夢嘅層次？等讀者將來討論起上嚟會有版本嘅紛擾，當知道另一版本有唔同結局，就會討論，會想去揾番本來係點，一本小說好多年後都有人去揾去討論就成為經典喇。當然金庸小就而家已經好多人討論，都算係經典，但真係未到紅樓夢嘅層次。

其實我知道我睇到嘅射鵰、天龍八部都已經係第二個版本，但好少人去揾番舊版（係咪因為咁所以再改多一版出嚟呢？），可能舊版唔係流通咗好耐，執好d再出版都算正常，但而家呢版已經廣泛流傳，拍過咁多劇集同電影，就唔好搞佢啦，咁即係刪改我哋嘅集體回憶啊！

畫畫 - 花蓮 （水彩）

上色技巧真係唔得，面積稍為大小小就出現水痕。
天嘅最高處想深色d，明明都用咗深藍，仲上多咗幾層，點解都係同下面一樣色？
本來想畫個好明澄嘅天，但而家天色好唔平均，係咪一定要左右拖勻佢呢？但樹梢嗰度拖唔過喎，有凹凸位就要用筆點落去，一點d顏色就會聚喺嗰個位，好難平均。
下次試吓拉緊d張紙，今次卷膠紙貼得唔夠實，濕咗會離，唔知有冇關係。（畫得唔好賴三賴四😁）

Cotman on Saunders Waterford 190g rough 5.5"x7.5"

最近畫畫盡量唔翻來覆去咁修正，
一、可以令自己落筆小心d，
二、畫面睇落輕鬆d
三、顏色自然融合，乾淨d，似番水彩，以前成日反覆上色塗嚟塗去，畫到好厚實。


~*~*~*~*~*~*
9 February 2018


早兩日花蓮7級地震，冧咗幾座樓，
台灣都算係多天災人禍嘅地方，
咁靚嘅寶島，希望佢哋快d復原，亦希望日後能夠繼續莊敬自強啦。

畫畫 - 伽路蘭休憩區 （水彩）

呢個地方好得意，好夢幻咁。
天嘅層次斜斜哋應該靚d，仲可以強調到遠近，更有空間感。
紅藍過渡得唔自然，混合嗰層好似深色咗暗咗，點解呢？係唔係隻紅色嘅問題？我用咗一種暗d嘅紅，定係我重疊多咗而唔係等兩種色自己走埋一齊？
豎起嘅一枝枝畫到好岩巉，幅畫細有時都有局限，畫細節就要畫得更細。好彩顏色都畫到深淺唔同。
草地嘅綠色幾靚，但天嘅黃色就太濃，令到幅畫好唔真實，個場景本身都已經好夢幻，加上個咁實嘅黃就更似繪本插圖。
我本來只係想畫黃昏，一直都以為自己朝住寫實咁畫，但係咪當我決定用呢隻黃色嘅時候，其實我已經走向超現實呢？
下次畫番幅藍天白雲睇吓咩效果。

Cotman on Saunders Waterford 190g rough 5.5"x7.5"

.

畫畫- 宜蘭風景 （水彩）

畫咗成個月inktober，覺得畫畫進步咗，講唔到具體點進步，但感覺畫得流暢咗，真係要多練習，成個月日日畫都幾攰，不過一年一次係一個幾好嘅鍛鍊。

呢幅係用cotman畫，顏色好柔和，唔知係cotman本身柔和定係原畫嘅顏色導致我調得柔和呢？
d雲同我預期嘅效果有小小唔同，不過我成日睇個天，真嘅雲好多時都唔係一定好自然協調嘅狀態架。上個月睇水彩畫展領悟到嘅經驗係：盡量唔好改，自己感覺唔自然，睇畫嘅唔係咁睇，表達到就得。

幅畫我自己都幾滿意，
山嘅顏色，山上嘅雲霧，
樹群，表現到遠，但又睇到一棵棵，
水，最滿意，顏色同光線。

如果冇咗水面嘅光，呢幅畫，又係好平淡。

Cotman on Saunders Waterford 190g rough 5.5"x7.5"

畫畫 - 櫻花 （水彩）

喺instagram見到阿sir po咗張課堂示範，好靚，跟住畫吓。

建築物還可以，
但櫻花太大塊同太實，

Shinhan on Saunders Waterford 190g rough 5.5"x7.5"

阿sir d 顏色融合得好輕盈，冇硬嘅邊緣，我諗我應該多d水，淡色d，落筆細d。

係咪應該用白d嘅紙畫櫻花呢？我張紙偏黃，粉紅色唔夠清同純。

今次用咗新買嘅sable brush，.....好似同其他cheap cheap brush差不多，可能畫大幅先感受到分別啦。不過細嗰枝幾好，但咁細嘅我又冇用過其他，冇得比較。

唔敢post上instagram，冇上佢堂又跟佢畫，唔係幾好咁。

inktober day 31 #mask

我哋需要一個正義嘅力量。

左右唔對稱得緊要，記得miss ho話，通常畫人像都會似咗自己，果然係好似...

左邊應該係好黑嘅，但始終都係唔放膽黑落去，一深色就好驚救唔番。

Copic Marker on paper

inktober day 30 #found

畫完day29，決定最後三日都用同一個概念。
found, 梗係 courage啦！

個人畫肥咗，
背景煙霧係用火酒加小小墨水，效果唔錯呀。

Copic Marker on paper

inktober day 29 #united

諗過畫united states、united kingdom、manchester united，後來諗起雨傘運動，有乜嘢更能表達united？

雨傘嘅形態同明暗都唔係幾好，好彩仲表現到遠近，黃傘暗位唔知算唔算用錯色？

Copic Marker on paper

inktober day 28 #fall

貓貓鍾意魚呢個概念，我想像中係好可愛架，唔知點解畫完變咗咁dark，哈哈，可能我內心太陰暗喇。
唔知係concept 唔好定係畫得差，好少like。
我覺得幾靚吖，
貓貓個pose幾自然，光線好有氣氛。

Copic Marker on paper

inktober day 27 #climb

畫得比我預期中好。

用黑白都分得出三個雪糕球同sauce，杯底嘅sauce都幾sauce樣，garnish都畫得似樣。

當時冇諗到，d sauce流多d、雪糕溶少少會似d，而家有少少生硬，不過都不失為一杯好靚嘅parfait。

個人仔嘅姿勢都ok自然，條繩嘅鉛筆稿自然好多，正式畫冇得改就緊張，隻手硬畫到條繩都硬埋。

Copic Marker on paper

inktober day 26 #squeak

竟然畫老鼠！
仲要一群老鼠！

除咗d腿小小怪，仲有個A字畫到變咗R...
個造型好ok吖，
表情都唔錯，
用色重手咗，深色d精神d。
我自己幾滿意。

Copic Marker on paper

inktober day 25 #ship

今日幅畫有小小作斃，背景用咗水彩，因為冇信心用marker填咁大面積。

左上嗰堆圈圈係突然心血來潮加上去，都唔知做乜，阻住寫字....

唔知人哋明唔明我係釣緊魚預備煮嚟食呢？
有冇人知道嗰隻係太空八爪魚？

條喉唔記得要畫番玻璃罩折射。

Copic Marker on paper

~*~*~*~*~*~*~*

原來我想像中嘅太空八爪魚已經登陸咗澳洲。

inktober day 24 #blind

借用咗我隻杯嘅圖，我一直都好鍾意呢幅圖畫。

今次都用咗彩色，
羽毛好似應該再密d，
個羽毛球d毛長短不一，少少怪。

Staedler Triplus fineliner and Copic Marker on paper

inktober day 23 #juicy

橙汁醃八爪魚，唔知好唔好食呢？當係青檸都得。
d橙汁杰咗小小，唔知點先表現到液體。

八爪魚小姐塊面黑好似太黑，黑咗收唔番。

Copic Marker on paper

inktober day 22 #trail

一直都唔係好肯定呢個字點解，最後用咗呢個方法。😅

呢兩日都難畫，畫咗三個星期，真係有小小攰，不過好開心可以支持到而家。

個表情都畫得幾好咁喎，日日畫真係會有進步㗎。
頭髮應該整體深色，遲d改改佢。

Copic Marker on paper

inktober day 21 #furious

呢幅用咗唔同畫法，淨係用線條，我見好多人都係咁，全用線條嚟表達。其實我都唔識分各種唔同畫法，唔知係咪有專有名稱呢？anyway...

本來想畫埋個盛怒嘅媽媽，但安排唔到位，而且都好難畫得似，本著less is more嘅精神，希望圖畫同文字交代到啦，不過唔知會唔會冇人誤會個細路女係媽咪啦。

Copic Marker on paper

inktober day 20 #deep

覺得呢個concept好dark，魚仔好似游緊水，但其實係俾人油炸緊。係咪現實嘅投射呢？

字畫得幾靚，
個玻璃炸鍋都幾玻璃吖，
火焰整齊咗小小。

Copic Marker on paper

inktober day 19 #cloud

忽然覺得人體都唔算太難畫，係個頭難啫，完全掌握唔到比例。小朋友個姿勢都幾自然吖，但一到頸就怪怪哋。

舊雲好似一綑『冷』咁.....😓本來似雲多d，但影完相見太淡色，輕率咁加咗幾筆，就搞到咁，我平時畫畫左諗右諗真係需要㗎，唔係大師唔好扮揮灑啊....！

個網都幾好，係咪？

Copic Marker on paper

inktober day 18 #filthy

呢張都係參考natgeo嘅相，簡單又寧靜，以本來嘅approach，畫完再決定用邊個prompt，諗咗好耐，好夾硬咁用咗climb。

過咗一陣，真好太夾硬喇，自己都唔記得呢個prompt已經用咗，有個idea畫climb於是又畫咗幅climb，後來睇番先發現到，咁梗係夾硬嗰幅改prompt啦，左度右度，用好相反嘅filthy啦，狠狠咁用黑色塗咗d字，用白筆寫新字上去，混亂中都唔記得個prompt要attractive一d，但費事改完又改喇，就咁啦。

唉，明明好清爽寧靜嘅環境，變咗烏雲蓋頂。😰

Copic Marker on paper

inktober day 17 #graceful

係參考instagram上面一張相，應該係natgeo嘅相，貪佢容易畫，又有氣氛，不過用好多墨。
咁大範圍上色唔容易平滑，好在係山，筆觸就當係樹同山嘅陰影都ok。
隻鷹細細隻，都畫到個形態。
其實遠山應該模糊d，顯得高遠。
我就係咁，唔識分輕重，浪費氣力之餘仲要壞事。

Copic Marker on paper

inktober day 16 #fat

一講到肥，我就諗到嗰隻著芭蕾舞裙嘅豬仔，佢叫『肉丁』，好可愛，不過只係曇花一現，喺書展見過兩年，就揾唔番喇。唔係個個character都會一直受歡迎做得落去嘅，不過肉丁咁可愛....，而且佢哋除咗肉丁，仲有其他characters都好得意架。

我畫得差好遠，唔可愛，仲有小小唔開心咁添。

第一次畫呢種花環，好生硬。

Copic Marker on paper

呢幅畫冇人鍾意，暫時得兩個like，連最hae嘅swift都有3個like。

inktober day 15 #mysterious

畫咗我好鍾意嘅蒲公英帶我飛翔。
地面嘅topshot都算畫到，以前完全掌握唔到呢種角度。
畫完後發現....串錯咗mysterious，唉！😓
成幅畫嘅明暗唔夠分明，係咪應該畀件黑衫佢著呢...？

我真係加咗顏色，本來加黃色，其實都幾好，但睇睇吓覺得唔夠明顯，又加咗層淺藍，於是變咗呢隻塑膠綠色.....

Copic Marker on paper

inktober day 14 #fierce

個太陽畫唔到想要嘅效果，太黑喇，不過就當係佢黑面啦。

畫完見兩朵花都灰灰咁，輪廓模糊，本來想直接用staedtler fineliner 上色，但顏色太實同鮮艷，諗起youtube見過有人加水暈開，就試吓。

畢竟佢唔係水彩，好快乾，要好快加水先暈開到少少，如果張紙靚d效果可能會好d，而家張紙濕咗霉霉哋，效果唔係幾好。

個太陽係參考pokemon嘅Haunter。
d熱焰係咪唔應該全部都內則深色？而家好似個cone包住粒黑波咁，而且太多黃色，應該多番d橙色，不過唔改喇，張紙會受唔住。

後來我加咗小小工先post上instagram，字啦，同埋太陽個口裡面加咗色。

Staedler triplus fineliner and Copic Marker on paper

inktober day 13 #teeming

背景菇應該fade out 小小，而家太實

Copic Marker on paper

用gel pen加咗少少白色，好似係破壞咗...

inktober day 12 #shattered

Shattered，只諗到玻璃，同埋心。

碎片我一定畫到冇神采，一堆嘢咁，終於決定用幸福玻璃球嘅概念，大心碎成小心，跌落嚟畀人執。

Copic Marker on paper

inktober day 11 #run

本來呢幅漢堡包只係試畫，但忽然諗到佢可以同run拉上關係，反正又未諗到畫乜，就由佢出場啦。

日日都抽時間畫少少，下半個月仲有11日未畫，希望月底去旅行前畫好啦，雖然個event係叫人按日畫，但都係鼓勵人每日都畫啫，我都係日日畫架。

Copic Marker on paper

inktober day 10 #gigantic

一條好大嘅魚經常出現喺我思維裡面。

小學美術堂，老師出咗個題目：『一條好大嘅魚』，
我好蠢咁用盡張紙畫咗條魚，仲以為自己好鬼醒。後來見到有同學畫咗隻好細嘅鑊，煮緊一條好大嘅魚，從比例上睇出條魚嘅大。
（小學二年班，點解同學咁叻嘅？）

呢件事我一直都冇忘記，原來事情可以咁樣睇，道理明白咗，亦記住咗，但我都唔知自己有冇曾經運用到呢個經驗，anyway，今次用啦。

影相都係唔夠光，白色底影出嚟唔係黃就灰。

Copic Marker on paper

inktober day 9 #screech

玩inktober都學識好多字，好似呢個 screech，同 day 26嘅squeak差不多意思，但screech係屬於unpleasant嘅，squeak就係小動物尖銳叫聲。

唔識嘅字梗係google吓啦，搜到全部都係貓頭鷹，見造型幾可愛，而且我一路都想畫吓貓頭鷹，咁我就住screech呢個字，畫咗個貓頭鷹合唱團，應該都幾噪音吓。

後來再查吓，原來係一個叫screech owl嘅品種，我都唔肯定自己畫出嚟仲係唔係呢個品種添...

Copic Marker on paper

inktober day 8 #crooked

上網搜尋crooked，充斥住一幅樹林嘅相，每棵樹都係彎曲嘅，好神怪。

我喺呢個彎曲樹林起咗一間彎曲嘅屋，真係襯晒。

Copic Marker on paper

inktober day 7 #shy

第七日，個prompt係：shy，點shy好呢？
畫咗條蟲仔匿喺蘋果裡面，都幾shy吖...
係幾粗製濫造....

Copic Marker on paper

#shy

inktober day 6 #sword

乏善足陳。

劍柄護手個位perspective錯咗，改唔返，愈畫愈大仲塗到黑晒。

Copic Marker on paper

#sword

inktober day 5 #long

深色同大面積好難畫，畫到個天咁鬼樣，OMG
個月光成隻蕉咁....
object週圍又唔均勻，
個人嘅影應該直畫會自然d。

我見人哋用chisel tip畫到好直好平均，而我就一頭平一頭尖，一頭濃一頭淡....

Staedler triplus fineliner and Copic Marker on paper

#long

inktober day 4 #underwater

呢條魚仔我都幾滿意。

總係畫d咁簡單嘅嘢，其實算唔算畫畫呢？

Staedler triplus fineliner and Copic Marker on paper

#underwater


江啟明老師話：『塗鴉唔係藝術』.....咁算唔算畫畫？
江老師好似對塗鴉好不滿，但我相信好多人都要經過呢個階段，雖然有人早有人遲，我三四歲就開始塗鴉，幼稚園老師仲嚟屋企叫媽咪畀我學畫畫，當時仲未係個個都有課外活動嘅年代，媽咪話畫家個個都窮死，唔畀我學。我又唔似王冕咁有天份，於是就一直停留喺塗鴉階段。
點分塗鴉同畫畫？
點分畫畫同藝術？
當然我都想自己有小小藝術氣息，但冇都冇辦法，我覺得江老師對我呢種鍾意畫畫但冇天份同機會嘅人太harsh喇。

係唔係藝術都唔緊要，我只係想將想像中嘅場景畫出嚟，好似今年inktober我d畫多數都係有小小fantasy嘅感覺，修為有限，只係畫到好簡單嘅構圖，但比起以前完全表現唔到角度距離立體，我覺得已經進步好多。

我平時睇書會喺腦裡面浮現出情節中形容嘅畫面，
有d會令我好想睇到佢變成實景，但點可能？退一步想，我會想睇畫出嚟係點樣。
第一個係『最後的精靈』條龍住嘅山洞，
第二個係『魔幻城堡』中豪爾搬城堡嘅場景，呢個會更難，因為係動態，
仲有一個都係『魔幻城堡』，蘇菲同馬克喺避難港捉流星。
希望好快可以畫到啦，暫時都係塗住鴉先。

inktober day 3 #poison

本來想畫深色背景，但覺得用marker畫大面積難過水彩好多（可能只係我唔識啦），所以都係畫個花碌碌背景算喇。

d有毒物質畀我畫到成張氈咁....，不過，毒就係咁實在架啦！
背景d小旋渦大小同位置太工整，
個甕好平板，甕身同底好似太黑實，但冇理由嗰度光喎....冇referecne唔知點算。

Staedler triplus fineliner and Copic Marker on paper

#poison

inktober day 2 #divided

第一個prompt唔知點畫，第二個仍然唔知，divided，有諗過畫個切開嘅pizza，諗諗吓對住對拖鞋畫起上嚟，難得咁有mood，畫完至算。

畫完見到對鞋一隻左一隻右，唔係divided咩？
於是寫幾個美術字，將幅畫同個prompt拉上關係。

嘩好開心呀，跟住嗰d都可以用呢個approach。

對拖鞋幾靚吖！

Staedler triplus fineliner and Copic Marker on paper

#divided