OMG！真係一個我經常疑慮嘅問題！
屋企有兩個到天花板嘅上牆書櫃，塞到滿滿，我成日好擔心會扯塌度牆，
窗臺都一樣堆滿咗書，我就快睇唔到窗外喇，一直都擔心個窗臺會冧，
啱啱換咗張新床，床嘅底板貼住地面，所以床底嘅書即係直接放地面，如果我相信樓宇嘅樓層結構，都唔會太擔心，但張舊床都唔知係唔係畀堆書壓爛嘅。
雖然係日本書，估計佢都係講日本屋，平房嗰種，樓層之間唔係鋼筋三合土，會更fragile，但無論如何，發現有人有同我一樣嘅疑慮感覺非常良好。
而家好多書都好重，整到咁重做乜呢？畫冊都情有可原，唔係sell圖像嘅書都用d小小反光嘅紙嚟印，懶係靚咁，其實重不特止，本書仲反光添，睇得好辛苦囉.....
以為自己同作者感同身受，但只係睇序言，就知道係小巫見大巫，寫序嘅黃鎮南，佢有30,000本書！ well....，我得嗰千零本，真係過慮喇🤣🤣🤣🤣
不過本書講書，無論如何都係啱睇，而且內容講到好多日常生活，好有趣味。
如我所料，作者住嘅係木建築，樓層之間都係木，三十年已經好老舊，會被白蟻蛀、老鼠咬，天氣侵蝕，變得好脆弱。更甚嘅係，原來日本都有豆腐渣工程，佢哋叫『姉齒建物』，源自建築師姉齒秀次，佢偽造文件偷工減料，建築物耐震度不足。（不過佢起嘅單幢住屋，同大陸香港連公用基建都偷工減料始終唔同）
作者兩個書櫃冇上牆，分別貼住兩幅對面嘅牆擺，最近有冧落嚟嘅跡象，於是用伸縮桿撐住天花板。我覺得，其實咁會增加咗對地板嘅壓力，畀我就會將伸縮桿打橫撑住左右兩邊嘅書櫃，互相扶持。
睇緊，待續
金
沒有留言:
發佈留言