畫班 Jul 2021 – 5. lady bird and dew drop（木顏色）

仍然係木顏色，仲要構圖好複雜，甲蟲同水珠都有好多唔同色嘅反光，睇顏色都睇到眼花。

畫咗上紙嘅顏色又成日甩，上幾多層都係咁淺色，究竟係紙嘅問題定木顏色嘅問題？以前用 Waterford紙都係咁，後來轉用 Fabriano先至冇事。

應該一早用水彩紙，用水溶先上一層底色，咁會易上色好多。畫咗兩日，尋日仲由起身畫到傍晚，先至叫做畫完隻甲蟲，咁多個鐘不停咁畫，究竟 layer咗幾多顏料上去？然而顏色仲係好薄咁，可能普通 sketch book紙質 hold唔到咁多顏料，好容易甩番落嚟，hmph。。。。

呢兩日好多同學陸續喺 group交功課，佢哋用 oil paint同水彩快好多，我估我下堂都應該交唔到。

～*～*～*～*～*～

我喺堂上真係畫唔到畫，不過我都會繼續上堂，因為報班都係為咗等老師畀功課，然後批評吓咁啫，而家就係咁樣啦，而且同同學熟咗 d，有得交流吓，都幾開心。

今日攞張 wip畀老師睇，佢話我上色唔均勻，畫咗少少畀我睇，佢上嘅色一層已經深色過我之前嘅 n層，應該係我太輕手，諗番以前，好似真係好用力咁捽落去㗎，少用木顏色唔記得咗添。

～*～*～*～*～*～

終於都畫完喇。

底色用咗乾粉彩，除咗上次阿sir叫我用嚟做咗少少底色，今次都算係第一次用，阿sir教我用紙巾揩d粉彩捽落畫紙，但我覺得咁好難上色。

我用刀削d粉彩，然後用 blending stump捽開，效果好好多，不過唔係幾均勻，最後我都係用手捽，唉，好污糟，我唔係好鍾意玩粉彩。
削吓捽吓，隔一陣又要洗吓手咁，都花唔少時間，但都係容易過木顏色逐筆畫嘅。

今日仲冒雨去中南買白色筆，因為polychromos太透明，阿 sir話 caran d'ache比較夠白，一定要買番枝，不過其實我諗住買 Derwent，唉，中南嘅 Derwent open stock都好多色，但偏偏冇白色，又唔想去廣益，因為都唔知佢有冇，唯有買 caran d'ache，仲買咗 koh-i-noor嘅 white charcoal，仲有 caran d'ache嘅 pencil blender，為咗呢幅畫買咗好多嘢。

堂上用 caran d'ache明明幾夠白，自己買嘅又好似同 polychromos差唔多咁，好彩買咗 white charcoal，真係好白，不過同粉彩一樣，捽出好多粉，有d污糟。

最後，用 pencil blender將部分木顏色捽勻，成幅畫感覺『實淨』晒，咁當然，我之前已經好用力咁上色，已經遮咗好多白色點點，但 blender令顏色更加融合，我記得以前好似係用相近嘅最淺色嚟 blend，定係用 blending stump？唔係好肯定。

幾粒水珠光影都好靚，好夠光咁樣，留白好重要。

甲蟲底下嗰兩粒若隱若現，我反而唔知點表達，逢係睇唔清楚嘅嘢我都唔知點處理，唯有下堂問阿 sir，but to be honest，我唔想佢畫我張畫，一向 d老師都係講，然後我哋自己修改，但呢位阿 sir會落手喺畫上示範，隻甲蟲都畀佢畫咗少少，效果同我想要嘅唔係好夾，但我唔知點拒絕。

粉彩底色同木顏色好夾，我以為可以再喺上面加木顏色，但原來後加嘅會將層粉彩推走，加完木顏色推咗一堆粉出嚟😝，係唔係我唔識用？

甲蟲壳勉強算畫到反光，但都係唔夠『令』，點解呢？

成幅畫嘅顏色唔夠鮮明，係唔係我揀嘅色唔啱？

畫呢幅畫好似好暴力咁，吓吓要用力捽，又污糟，不過都算幾好玩，可能因為有加入新嘅 medium，試新嘢，同埋內容對我嚟講算係複雜，畫到都好開心。

畫畫 – head phones （木顏色）

呢張 head phones係舊年 wfh畫，一直冇 post，因為諗唔到點表現到白色，前兩日忽然想用白色嚟畫畫，於是又畫 head phone睇吓會唔會白 d，結果⋯😅

我枝 polychromos白色都係唔夠白，用咗 faber castel嘅白色 pastel pencil做 hi-light，gelly roll做 super hi-light😄

睇相 contrast好似大咗，polychromos cover唔到嘅地方仲可以當暗位，但睇畫本身就覺得隻白色唔夠白。

幾個 youtuber嘅 review都話 derwent嘅白色最好，我都打算試吓。

畫之前以為 head phone線成堆咁混亂好難畫，但原來隨便畫幾個圈，大致跟番明顯嘅來龍去脈，就會幾似。

畫班 Jul 2021 – 4. 金屬髮型（marker）

呢張係油畫組嘅功課，我畫完自己嗰兩幅，試吓畫金屬，仲因為金屬頭髮嘅形態，決定用 marker。（諗住 chisel tip一筆畫落去就係😄）

Copic marker on Canson XL marker paper

估唔到面部畫得幾自然，尤其係顏色 blend得幾好，今次用咗 marker paper，但我冇喺紙上面 blend，而係將淺色筆頭喺深色筆頭沾 d墨水，畫喺紙上自然由深變淺，呢個方法幾好用，尤其係 marker paper一畫落去就乾 blend唔到。（完全唔明點解 marker paper可以係咁，係唔係我唔識用？）

頭髮嘅金屬色都 ok嘅，但唔知點解後面嗰 part反光睇落好似棚牙咁，我修補過希望冇咁似，點知修極都係一棚牙，後加嗰 part仲似埋嘴唇添，唉。

個身畫唔到，原圖都好奇怪嘅，不過我將佢畫得更奇怪。

畫班 Jul 2021 – 3. 蓮花（木顏色）

失敗咗，都係變唔到做水彩班。我畀張水珠老師睇，問意見，佢話：『你有畫開水彩？以後有機會都可以教吓你。』言下之意，暫時唔想教水彩住。可能同期同學都未可以畫水彩住，老師有 schedule，咁我都無為自成一國咁自己玩。

課堂時間得個半鐘，基本上我喺堂上畫唔到幾多筆，每張畫都係喺屋企畫，去上堂好似為咗去上堂😂

Faber Castel Polychromos on sketch book

呢朵蓮花構圖同顏色都好簡單，冇乜嘢畫，好快畫完。最難都係花瓣嘅脈絡，要畫得流暢。

最重要係左邊花瓣嘅透光，同畀旁邊遮住嘅暗位，呢兩個位畫得自然就會似。

朵花畀我畫肥咗，顏色加上花瓣上嘅線，好似紫洋蔥。

畫班 Jul 2021 - 2. 水珠（水彩）

我決定將素描班變做水彩班，用水彩畫水珠。

我估呢個 course嘅畫好難定係第幾堂，好似呢幅咁，係老師喺 group send出嚟畀我哋嘅功課，我都係唔跟第幾堂，改用第幾幅畫嚟編號。

網上有好多水珠 tutorial，其實唔難畫，重點係明暗要明顯，注意顏色 gradation，同光線方向。

畫到尾已經好攰冇乜心機，背景都冇再理，用 whatsapp交咗功課，老師好快就有 feedback，佢提我深色背景會好 d。呢個都係我對呢個 course嘅 expectation，能夠有人畀 advice，既然老師提咗出嚟，我就加番深個背景。

Cotman on Saunders Waterford 190g rough 15"x11"

因為呢張主題係水珠，我都冇太強調花瓣細節，但用色我有認真調配過。

紫色花瓣除咗紫色，加咗 cerulean blue同 perm rose調節佢偏藍或紅，我覺得效果幾好。
我成日以為紫色應該同 ultramarine blue最夾，點知唔係囉。

淺藍花瓣用咗 cobalt blue加 sennelier嘅 turquoise green，紫色做暗位，最近發現紫色好好用，係最好嘅暗位用色。

右下嗰片花瓣，本來冇畫，但後來又覺得個位太空，唉，加得太倉卒，冇好好調色。

本來諗住重點喺中間，四邊 fade out就算，但後來因為要加底色，底下就被遺忘，然後影相都唔識 crop咗佢👉👈😒

事實上，加咗深嘅底色係靚好多，之前懶啫，畫到好攰只想快 d完成交功課。

初時畫水珠好開心，因為加加吓色就立體起嚟，好似真係睇到光同水影咁，但畫多咗，尤其是畫唔大唔細嗰 d，又唔夠位做漸層，又唔係細到可以蒙混過去，畫得唔開心。
反而最細嗰 d用枝 gel pen點落去，再用深色括番個底就可以。
係啦，我初時用白色水彩，見都好似好 opaque，點知乾咗就唔夠白，後來都係用咗 gel pen。

紫色花瓣 d水珠係唔係太深色？
藍色花瓣 d水珠分佈得唔好睇，因為有幾片水珠太大太多，好似唔平衡咁。

不過第一次畫水珠，我覺得 ok啦，紫色花瓣混色幾靚。

~*~*~*~*~*~

上堂嘅畫用番 A3 size，發覺盒 schmincke只適合畫細細張，我呢盒係 half pan，A3用大 d嘅筆，枝筆大過個 pan，所以要搵番個舊嘅 pallete同 cotman顏料出嚟。買咗 schmincke後都冇用過舊顏料，早排將 cotman同 shinhan兩個 pallete清咗收埋，而家可能又要用番。

然後發現有枝 senellier嘅 turquoise好啱色，但可能擺咗太耐冇用，binder（我相信係 binder）分離咗，唧咗一大灘出嚟，唔知會唔會影響顏料 performance呢？冇理由冇影響，冇都得一早就唔使加啦，不過試用一吓又覺得冇乜問題，顏色仲係好靚。cotman都有咁情況，不過冇咁嚴重，我離棄佢哋太耐喇。

畫班 Jul 2021 – 1. 橙色百合 lilium bulbiferum（木顏色）

冇上堂就懶，構圖稍為複雜嘅都唔想畫，所以都係去上吓堂。

我報嘅時候係叫『素描班』，諗住會好似 miss ho咁，實物又好，石膏又好，大家圍埋畫碳筆素描，然後老師指出有乜問題。

去到原來老師都唔知開咗新班😂，其他同學都跟佢學咗幾年，一組組咁玩緊唔同 medium，有 oil paint，粉彩、水溶木顏色，老師話我想學乜都得，咁我同另一個新同學都冇 preference，大家都係以為嚟學素描。

老師畀咗張橙色百合花圖片，叫我哋起稿，起完我以為開始碳筆素描，點知原來佢教我哋木顏色😅，哈哈，點解我又會學起木顏色上嚟㗎？？

呢個班好神奇，老師提供埋顏料同顏色筆，好似話連水彩紙都有，不過我諗帶自己嘅佢都唔會反對嘅。

其實，我連上堂時間都唔係好肯定，我去到，其他同學已經埋頭畫緊，得我同新同學跟 time table時間返。

以前上過木顏色班，雖然木顏色好花時間，但都係一星期完成一幅，今次，畫咗兩星期仲畫緊，我喺屋企好似冇乜動力完成佢咁，希望第四堂前畫完，可以學新嘢。

呢個班同我以前上過嘅好唔同，比較靈活，雖然係一班，但各有各畫，老師亦唔會示範，都幾好嘅，好似我平時畫水彩，有乜問題唔知點好，而家可以問老師；不過老師會問番我轉頭，我想畫乜，咁就唔係幾啱我，要我諗，我乜都擔心畫唔嚟，要老師出題目我先會硬著頭皮畫，好似以前好多次，我上堂畫完都會驚訝：『原來我畫到架！』

第三堂，終於畫到尾聲，老師叫我將葉嘅顏色推暗，咁我加完色，問佢跟住點，我以為會叫我加埋底色，因為原圖背景好黑，所以朵花先咁多暗位，點知佢話咁大幅畫，加背景要畫好耐，咁我諗住話局部加啦，因為要托番葉邊、花瓣邊嘅光位出嚟，啱啱開口，佢攞咗盒乾粉彩出嚟，攞咗枝灰色畀我，仲幫我上咗少少色做示範，咁我唯有繼續做啦，我第一次用乾粉彩，好難用。好唔容易先上到小部分色，細位更加上唔到，我用木顏色填，又幾夾喎。

其實我一開始畫就有個疑問，原圖好 artistic，背景全黑，朵花好似打咗光，葉只見輪廓，同少少反光，點解會用幅咁嘅圖做 reference？好難掌握明暗位，我哋 supposed係初學，用一張 typical 嘅圖會容易好多。

我本來都諗住呢堂要完成，但老師比我心急，粉彩背景只加咗少少，佢就話我畫完，叫我噴 fixative，於是我就乖乖咁當完成啦。
（老師連 fixative都包埋，佢教畫係唔係為興趣？）
（噴咗 fixative，想返屋企再加工都唔得…😅）

如果我知道唔用黑背景，唔會加咁多紫色，會畫得鮮艷 d。

完成咗呢幅，老師叫我試畫水珠，不過又冇示範點畫，可能佢知我唔係初學啦。

以前經常見人畫水珠，上網睇吓人點畫先，我諗我會用水彩，唔係好想畫木顏色。

~*~*~*~*~*~

八月尾，中心開放日，其中會展出興趣班嘅作品，我呢幅都畀老師攞咗準備展出。不過底色畫到一撻撻，有 d難睇，仲要畀人睇😥