畫畫 – The Burrow （水彩）

今次用 rough紙，畫鉛筆稿已經覺得錯錯哋，呢種畫法比教多線條，鉛筆畫喺 rough紙上面唔係好舒服，唔容易畫好 neat嘅線條，不過都開始咗就繼續啦。

今次畫 Weasley's嘅 Burrow，鉛筆稿好似太整齊，表現唔到 shabby嘅感覺，係唔係要唔流暢嘅線條？定係點呢⋯？

～*～*～*～*～*～

本來仲考慮要唔要畫黑線，但畫完鉛筆稿發現 d碳粉畀我糊開晒，張紙灰濛濛咁，擦又會擦埋鉛筆線，決定都係畫黑線，畫完先狠狠咁擦乾淨佢。

～*～*～*～*～*～

終於畫完！

Schmincke Akademie on Saunders Waterford 190g rough 15"x11"

大結構係根據一個玩具模型畫嘅，自己改同加咗少少，特別係門口幾對水靴，harry第一次去 the burrow嘅其中一個印象。

原圖冇乜光影同細節，諗過自己加，但想像唔到光線會曬到邊度曬唔到邊度，唔想亂加糟蹋咗辛苦畫嘅稿同線。

透視唔係好啱，不過呢間屋係靠魔法撐住㗎嘛，係怪怪哋㗎啦😂

竟然咁有耐性起個咁複雜嘅稿，畫咁多線😄

之前兩幅都係用 0.5mm，呢幅太多線，用咗 0.15mm，仲以為買錯咗用唔著添。

唔識 micron嘅號數，買咗 08同 05，以為隔咗三個號碼都算遠，點知原來只係差 0.05mm，我冇咁 pro睇得出分別。😆

我都係比較鍾意本來畫嗰種水彩畫，不過有時試吓第 d嘢都幾好嘅。之前報開嘅水彩班咁耐都冇再開，不過老師自己開素描班，但咁啱喺我唔得閒嘅時間，唉，唯有希望遲吓安排到啦。

參觀 – 香港水彩藝術學會 2021畫展

我去嗰日好多人，d人又大聲講嘢，好嘈，未試過睇畫展咁嘈。

今年老師嘅畫掛得好近門口，一入去就見到。

睇老師畫嘅水：
要有適當嘅留白，而且唔使好似我咁畫到一條條橫線，
遠近用色唔同，深淺水顏色有分別，
要顯示水嘅清澈唔係用乾淨嘅色，而係睇到水下面嘅泥土色😌

牽船嘅繩都要有虛實。
天，可以有唔同畫法。

呢幅我冇睇出 d乜嘢，可能因為我冇畫人像，唔識睇啦。

幅畫唔係好深色，但都托到好明亮嘅燈光，所以畫光重點唔係用色深淺，而係『明暗』（定係飽和度？），用晦暗嘅色彩襯出明亮燈光，老師好鍾意各種灰色。

如果 d花係我畫嘅，我會覺得好粗糙，會一再修飾結果畫到好厚實，但睇住老師呢幅畫，漸漸明白水彩唔係工筆畫，唔應該為咗精細放棄水彩嘅輕靈。

老師咁畫亦都係因為花唔係主角，如果太雕琢會喧賓奪主。

葉亦唔需要刻意畫出順滑嘅弧度（我就係咁畫😅😆），老師畫中冇一片係咁，但已經好表達到一片片荷葉。

同樣葉都唔係主角，呢幅畫嘅主角係氣氛。

老師講過，一幅畫唔係全部都要好細緻咁畫，需要有虛有實，幅畫先生動。

老師畫嘅水，真係靚到⋯

喺一片綠色中加番少少白色，畫面活潑好多；

葉叢嘅畫法，唔係渲染，唔識形容，辭窮😛

睇完老師嘅畫，更加肯定，畫得好唔好唔係睇落筆技巧，最重要都係點去處理構圖嘅明暗虛實，如果唔係畫得再似都冇用。

呢種效果係特別技巧定係濃淡造成？

用嘅紙係 Fabriano artistico，似係 cold press。

古舊建築物，暗位用灰藍同褐色，線條唔好太直，留少少白表現 weathering。

用色同一般遠暗近明相反，別有洞天嘅感覺。

鋼筆淡彩

色彩同明暗都好簡單，但又表現到人嘅姿勢同衣服嘅形態，留白好重要。

碳筆淡彩

究竟要點先做到咁有信心將顏色一撻撻咁嚟畫呢？我畫乜都淨係識暈染，以前以為暈染係水彩最高境界😂，追求順利過渡，唔要見到邊界。😅😅

唔係好識欣賞。可能就係我剛省覺嘅：『一幅畫最緊要處理好明暗濃淡』，唔識欣賞咪就係我未識囉。

又或者係：『創作最緊要係勇於面對自己、表達自己。』

今年唔見咗好特色嘅動感畫，係作者用咗唔同風格，我認唔出，定係移咗民？

睇完個畫展，我最鍾意都係老師嘅畫，咁多年嚟，佢每日都有畫 post出嚟，keep住都仲有連我都睇得出嘅進步，一向都覺得已經畫得好好，過一排，又變得更好。

畫畫 – Halloween（木顏色）

好鍾意 Halloween 嗰種 creepy嘅感覺，我畫畫用色又成日都會搞到好 creepy，所以好啱我畫😁。

真係要黑嘅時候，就發現張紙唔夠黑，似係 charcoal色多 d，mi teintes會唔會有真黑色呢。

可能我上色太細力，無論用白紙定黑紙，顏色都係淡淡咁。

畫班 Sep 2021 - 12. Japanese storefront - 麵包店（水彩）

畀我哋參考（臨模😄）嘅圖片愈發奇怪，今次都係一幅畫，朦朦朧朧咁，睇唔清楚內容，冇深度，冇明暗，😅唔通係一種鍛煉？

呢幅圖有部分係磚牆，阿 sir話要教我畫磚牆，但講完又冇教⋯，係唔係要我起完稿畫埋線，下堂先教？但我好心急㗎，如果有時間，我就會儘快畫完，等唔到下堂。

～*～*～*～*～

今次幅圖都係一個兩層建築物，地下係 bakery同 cafe，千辛萬苦睇到眼都澀，終於畫出個大概，但店舖正門完全睇唔明有 d乜，諗住自己作 d嘢上去，但屋企嘅美術書冇呢種場景，唯有上網搵吓，點知搵搵吓畀我搵到原圖😇，畫家係住喺日本嘅波蘭人，mateusz urbanowicz，佢仲係新海誠嘅創作團隊之一，參與街景創作，佢個姓好似生來就要畫呢 d咁😄。我畫嘅呢一幅，屬於佢嘅 "imaginary japanese storefront"系列，唔係 urban sketching，亦唔係速寫，睇佢嘅 YouTube片，佢話連店名同招牌都係創作出嚟。

我啱啱起完稿，唔知點解唔係好想加黑線，覺得呢幅畫唔係好適合，諗住用木顏色，仲未決定用配合嘅色，定全體用灰色，但都會係落咗水彩先，上好色後加線。同一晚，我睇畫家嘅 YouTube，片裡面佢上完色，話平時會用墨水筆或者 liner畫線，但今次唔想畫到太 detail，所以決定用 8B同 2B graphite pencil，😃咁啱嘅？不過我都唔諗住用鉛筆，我畫呢幅都係灰色夾 d。

～*～*～*～*～*～

今日八號風球，group嘅同學都好勤力畫畫，我都完成咗。

幅畫冇乜顏色變化，不過好多 details。

磚牆用咗 Naples yellow（以為係 beige）打底，然後 orange，sepia同 burnt umber混住嚟畫；
其他部份主要都係藍綠色，用 turquoise好似幾適合，不過我唔想太單一， 所以加咗塑膠綠 brilliant green，建築物部分加 cyan（一向以為係 cerulean blue），canopy部分加 Prussian blue。

線條用木顏色，磚牆用灰色，綠色部分用灰綠色，不過唔知係唔係我太細力，最後都要用水彩再畫一次、兩次⋯😂，數唔到幾多次，加到夠色為止。

canopy上面嘅字用咗 acrylic，原畫嘅畫家應該係留白㗎，我見佢畫其他都係留白。可能畫大 d可以留到白啦，但我覺得而家嘅 size啱我畫😁，哈哈哈，解釋唔到。

每幅畫都有一個位或者一筆覺得 "wow，好掂呀！"
呢幅就係個鐘黐住牆嗰個位，同埋個鐘喺牆同 canopy上面嘅 cast shadow，😁一幅畫有一個咁嘅位，就可以令我覺得 "畫呢幅畫有收穫"，百看不厭，沾沾自喜一番。

其實，鐘頂嘅裝飾物係唔係都應該有個影呢？不過原畫冇，我都唔敢隨便加上去。

我覺得畫畫過程中，最難係掌握比例，呢幅圖算係容易，比例唔差得太離譜都唔會影響構圖，而且，雖然係建築物，但好似⋯冇乜透視。阿 sir話下一幅教我畫多點透視，😟好擔心聽唔明阿 sir講乜。

Schmincke Akademie on Saunders Waterford 300g hp 11"x15"

～*～*～*～*～*

畫完 post去 group睇吓阿 sir有乜評語，點知佢又係就咁畀個 thumb up emoji就算，然後就將我幅畫 post去自己畫室 Instagram，話係學生作品，well，廣義嚟講，我都算係佢學生嘅😏，雖然佢冇教過我乜嘢。

決定唔再去上堂，呢個班唔係好啱我，都係想睇示範多 d，我比較蠢，要睇到人做先學到嘢，阿 sir淨係畀幅圖我畫，畫完又冇 comment，同我喺屋企自己畫冇分別。

本來都諗住學唔到嘢唔緊要，有同學一齊畫畫都好開心，但呢班又個個畫唔同嘢，好冇 feel😐。

Wetcanvas

wetcanvas將會喺今年尾或明年初停止營運喇，舊年無端端話我 password錯 login唔到，我都冇再 post過畫，但都 keep住有睇，唉，乜嘢都變晒，世上真係冇嘢係永恆嘅。

呢個 forum本來屬於 artists network，係免費嘅，停止營運又唔係話會消失，仲係 search到同睇到所有舊 post，只係唔可以再 post嘢同 respond，members想繼續 communicate嘅話，可以去 artists network嘅 forum，係收費嘅，不過佢哋會 offer free trial畀 wetcanvas members。

個 forum有好多活躍會員，佢哋一定好難過，雖然可以付費轉去第二度，但一定會流失一 d熟悉嘅人，氣氛都會唔同咗，不過慢慢就會習慣，玩玩吓又會熟番。

以前曾經經常去一個 website嘅 forum，又係忽然唔再營運，原來個 website係有人為興趣自費營運嘅，唔似 wetcanvas本來背後有間公司，可以轉過去，而市面上亦冇其他相同主題嘅 forum，所以一群平時一齊交流嘅人變得好似要各散東西咁，雖然大家可以繼續聯絡，好似用 email咁，但冇咗個可以一齊交流嘅 platform，好可惜。當時仲未流行社交媒體，如果係而家，開個 Facebook page就可以解決，唔知佢哋後來有冇咁做呢？我從來冇 respond過，但因為經常去睇，而且嗰個 website冇咗就真係冇咗，乜都唔會留低，真係幾傷感。

人生就係會經歷各種嘅失去，唯有希望前面會有更好嘅啦。

畫班 Sep 2021 – 11. 配匙刻印小店（水彩）

阿 sir可能見我今期又用咗水彩，終於 offer教我水彩，佢話要教我畫 galaxy，我話我唔想學（好唔聽教），佢問我想學傳統水彩定速寫，我話要學剛畫完呢種，然後佢 send咗張圖去 group。

阿 sir畀我哋嘅圖好多時都係d artistic圖片，呢種圖片一般 d光都唔自然，難畫之餘又好難學到天然光嘅走向同影響，學唔到點睇光線，有時就好似今次咁，係人哋嘅畫，hmph⋯畫人哋嘅畫，😒為乜呢。我哋畫畫時，會將景裡面唔重要嘅嘢 blur咗，一團色就交代咗，我自己知道係乜，會畀番相應嘅色調明暗佢，人哋睇嘅時候點會知道係乜，咁我睇人嘅畫嚟畫，我要點處理呢團顏色，作一樣嘢出嚟，定係照跟一團顏色？

anyway，老師叫畫我就畫啦，都係一種挑戰，報班都係為咁。

呢幅畫嘅作者係一位台灣 urban sketcher，佢叫鄭開翔 Cheng Kai Hsiang。

～*～*～*～*～

呢種畫法係咪即係好似一幅認真嘅 value study？

睇畫勾番 d線出嚟真係唔容易，睇相或者實景會唔會更難？我自己覺得畫畫最難都係起稿，對住一張白紙，無中生有，到上咗第一層色就開始容易，最好玩就係最後嘅 enhancement，每一筆都睇到效果，好有成功感。

我畫好個 outline，但落唔到筆畫暗位嘅斜線，諗到跟住會加水彩，顏色都會表現出嚟，如果有埋斜線，會唔會過咗呢？我決定唔畫暗位嘅線，加咗色先，再畀阿 sir睇吓點。有同學都畫呢幅，post咗鉛筆稿問阿 sir，點知阿 sir好似睇唔到咁，覆晒其他人都冇覆佢，上一幅都係咁，佢 remind咗阿 sir一次，然而都係冇 feedback，點解呢？兩次我都諗住黐住學吓嘢，hmph⋯😒

加完色一睇，我好 surprised，點解顏色可以咁 vibrant嘅？都唔似我平時嘅畫，唔通同畫嘅嘢有關？今次係我第一次畫呢個題材。

Schmincke Akademie on Saunders Waterford 300g hp

呢種畫法比傳統水彩容易好多，好似填色畫冊咁，每一個色塊都好細，唔需要擔心水嘅問題，唔驚乾咗融合唔到，畫得好輕鬆。

我最滿意樓上嘅窗，畫到裡面嘅暗同外面窗簾嘅反映，不過呢，其實我唔係好明白呢個 area嘅結構，究竟嗰幾塊布係唔係窗簾？點解會喺窗外面？窗外嗰個得幾條鐵嘅框係乜？

有少少後悔太懶，冇留白，又懶得搵 acrylic出嚟😂，所有白色都係用 gel pen，唔夠白。😅

～*～*～*～*～

阿 sir睇到我幅畫，二話不說走去攞電話嚟影低，佢會擺我哋嘅畫喺佢畫室網頁，當作樣版畀人睇佢嘅學生畫作，其實我嘅畫算唔算係佢教出嚟？好似呢幅畫咁，佢一 d comment都冇😶，我問佢有冇嘢要修改或者加，佢話：好好喇，唔使喇。

如果話我冇學到嘢又唔公道嘅，佢介紹到新嘢畀我，好似粉彩，同埋 illustration，學埋呢期睇吓點啦。