水彩班 – 聖誕老人

聖誕節喇！

呢幅聖誕老人係近期我對自己比較滿意嘅👏👏👏

今次用咗 Daniel Smith，因為我覺得佢隻 perylene red幾聖誕。

因為第一次用 Daniel Smith，開始畫嘅時候好似同 d顏料好陌生咁，唔知點落手。

而且我得十隻色，偏偏阿 sir叫我哋用嘅橙色同塑膠綠我係冇嘅，買嗰陣諗住橙色可以自己溝，塑膠綠就⋯阿sir係經常用，不過我本來都冇諗住用 Daniel Smith上堂㗎嘛😄

不過我都覺得不枉學咗咁多年，阿 sir叫我哋用 a＋b溝一隻色，或者要用邊隻色，我揸住有限嘅十隻色，都亂七八糟咁溝咗出嚟，都幾開心。

Daniel Smith on Saunders Waterford 11" x 15"

唔知點解阿 sir教我哋用橙色＋朱紅嚟畫件衫，我覺得太橙，我都係用番我鍾意嘅正紅色，睇吓，件衫係唔係好靚？好有質感？

我覺得自己畫得個樹林幾有氣氛，不過雪地就好似爭 d乜咁，會唔會係太乾淨？

畫水彩真係唔可以太乾淨，無端端都要撻 d顏色落去整污糟佢😂，感覺會比較有層次。雪地個紅影都係太乾淨。

阿 sir已經習慣咗我嘅孤僻，同埋剛愎自用😂，佢行過都唔會主動話我應該點點點⋯，如果有一日阿 sir睇到呢個 blog，希望佢知道我只係想幅畫好定唔好都完全係自己畫，阿 sir修改過係靚好多，但第時睇番會誤會自己畫得好好，睇唔到自己邊度唔掂。我聽有位同學講，佢話跟阿 sir學畫好好，學到嘢之餘，上完堂仲有一幅俾阿 sir修改到好靚嘅畫帶走。真係人各有志啦😁

睇睇吓，幅畫係唔係有少少陰森😟😂

晝晝 – 小小聖誕樹（水彩）

聖誕節喇！！！

無論世界變成點，我哋都可以過一個開心嘅聖誕。

Schmincke on Saunders Waterford 190g rough 7.5"x5.5"

無論世界變成點，都有人淨係坐喺度等救世者。我，唉，係其中之一。

救世者啊，你可以最後先救我，甚至唔救我，但係請你現身啦，有值得你拯救嘅人㗎！

畫畫 – 南瓜（水彩）

又到咗畫南瓜嘅季節。

呢幾個南瓜本來畫得幾好，但覺得淺色，加吓加吓走咗樣，冇晒氣質😂

背景本來覺得唔好，影咗相又好似都唔錯。

Schmincke on Sauders Waterford 190g rough 7.5"x5.5"

畫畫 – 雪人（水彩）

及時畫咗個雪人過聖誕😁

想像中顏色比較輕盈，不過都 ok啦，係後面棵聖誕樹畫到妖火咁啫😂

仲有枝 stick偏偏要篤咗喺個波波中間😖

Schmincke Akademie on Saunders Waterford 190g rough 7.5" x 5.5"

 

畫畫 – 復活蛋（procreate）

我畫水彩、木顏色都畫到好淡色，估唔到連用 procreate都係咁。

水彩班 06 Dec 2021 – Christmas wreath

又開始上阿 sir嘅水彩班喇，距離上一個 course已經兩年幾，點解時間過得咁快？

呢堂阿 sir畀嘅參考圖片好伏，😂佢幾時變成咁㗎？張圖係聖誕花環，有白色裝飾，松針尾白色，仲話要用 masking fluid，有好勤力嘅同學跟圖上晒膠。

原來 masking fluid只係用少少喺燈光位，而且唔會跟圖畫，冇晒白色，變做松果。好彩我懶😂，我都覺奇怪，阿 sir風格唔鍾意 masking fluid，點解突然用咁多？其實以阿 sir嘅畫法，連呢少少都唔使用，可能係驚我哋留唔到燈光先為我哋而用。

Well，咁即係今次幅畫係冇參考圖片嘅😏，但有阿 sir示範（係示範呀，好耐冇睇過），仲分咗三節，一定係知道我哋記唔住步驟😆

Cotman on Saunders Waterford 300g rough 15"x11"

首先，

1. 用 lemon yellow做燈光，一層綠色做花環底色，我用咗 sap green加少少 lemon yellow，
2. 花用 vermilion，但我冇，用咗 cad red加少少 perm rose，其實都唔係幾似，我記得之前畫過嘅聖誕花顏色好啱，想搵番當時點調色，結果係：我當時冇記低，唉，明知道自己調啱色好似中六合彩咁罕有，點解會唔 record一吓呢😔
3. 松果用 burnt umber加⋯咩都好啦，調灰d，
4. 紅色小果實都係vermilion，淡淡哋一撻就得，唔使球形。

第二節，用 phthalo green加 burnt umber勾所有嘢出嚟，加松枝；用紅色，正紅色，都係冇😟，加花嘅細節，我繼續用 cad red加 perm rose，再加 alizarin crimson，真係差d。

第三節，emphasize所有需要清楚嘅嘢，綠色唔夠深，我加咗 Prussian blue。老師用灰紫做底色，紫加藍加紫紅，咁就可以灰紫之中有變化，但我一係太紫，一係太灰，中間填到又平又實，諗住加少少鹽有d嘢睇，但係⋯（灑鹽都灑得咁悶，死未😵）

我嘅深色總係唔夠深，夠深嗰時又變到平晒，唔知點算。
燈光仲似唔似燈光？

d花，一d美感都冇；

中間底色同上下唔同，真係有d礙眼。
不過整幅畫嚟睇，都算 ok啦。

畫畫 – Halloween（木顏色）

好鍾意 Halloween 嗰種 creepy嘅感覺，我畫畫用色又成日都會搞到好 creepy，所以好啱我畫😁。

真係要黑嘅時候，就發現張紙唔夠黑，似係 charcoal色多 d，mi teintes會唔會有真黑色呢。

可能我上色太細力，無論用白紙定黑紙，顏色都係淡淡咁。

畫畫 – 聖誕樹（水彩）

本來想畫一棵好瘦嘅聖誕樹，然後就冇諗過背景會係點，瘦嘅聖誕樹要畫出枝幹，因為唔想亂畫一舊綠色，結果畫出嚟都唔瘦，不過都有好耐心咁逐枝畫，形態同顏色都自然，幾靚呀。

個背景都幾滿意，半圓形嘅窗係諗起 shape of water嗰隻窗，有諗過逐舊磚畫，因為我睇過人哋真係咁畫，但都見過人係咁意畫幾舊磚喎…😌，而家咁都幾好吖，白色牆本來想畫少少 detail，喺牆身縷花😂好fancy咁，不過懶搵 reference，都係算啦，而家好寒酸，真係一分耕耘一分收穫。

同樣道理，棵樹同 ornament我好耐心同小心咁一筆一筆畫，冇令自己失望，本來淨係掛波波就算，不過有 d blank，決定加條 ribbon，又唔想用 acrylic，所以唔係好畫到，我由底開始畫，好好心機咁想像佢嘅走勢，加上嗰層背景係白色，所以都算成功，上面幾層背景比較亂，開始冇心機跟住條 ribbon走，開始亂嚟。

樹下應該堆滿禮物先有節日氣氛，又係因為我…啦，
而且，而家咁低調 d都有憩靜閒適嘅氣氛吖。

呢幅畫有一個位係我最滿意（其實都唔可以用『滿意』呢個詞，因為只係唔覺意做到嘅，話滿意就好似係我努力過咁），就係個缸邊，虛虛實實好靚（可能路過嘅朋友會覺得我匪夷所思，但係呢一種就係我一向想做到嘅）。

最後呢，有諗過咁寧靜嘅畫面，好適合有一隻小貓蜷伏喺樹下瞓覺，不過，幅畫都畫完，我唔想再冒破壞成幅畫嘅險喇，小貓返房瞓啦。

咁長氣打咗咁多字，因為我幾滿意呢幅畫😁

Schmincke Akademie on Baohong 300g hp

hot press 真係比較難暈開，好容易就形成一條好實嘅邊，個缸邊可能都係咁出嚟，

但缸身都有一條我唔鍾意嘅痕，未乾嘅時候完全唔覺，激死人。

好彩呢幅畫全部都係細細碎碎嘅著色，問題唔多。hp 紙表面滑滑咁，畫嗰時筆觸感覺好舒服架，不過要學吓接受，或者克服水痕，anyway，你話我乜都好啦，我都唔係好鍾意大陸紙，我都係鍾意 waterford。

畫畫 – Christmas presents （水彩）

我以為畫一堆 box冇乜難度，但唔記得咗角度問題，
而家盒盒都唔同 perspective，笑死。

係唔係應該好認真咁起稿，但係…起完稿都係擦番晒先上色㗎啦，又係唔見晒 d線，上色時控制唔好支筆，畫歪咗、畫大咗、邊大邊細，乜都齊。

嗰時 miss ho笑我哋：『一上色遮咗 d線個個就喊晒咁，「我條線唔見咗呀~」、「我搵唔番條線呀~」，哈哈哈』，佢畫風豪邁，落筆精準，點會明白我哋吖。

有時我都唔知係我影得差，定張相先係真實，我睇幅畫本身顏色冇咁灰黯㗎…

Schmincke Akademie on Saunders Waterford 300g rough 7.5"x5.5"

畫畫 – 小屋 &聖誕樹（水彩）

就嚟又到聖誕喇，今年比舊年更加 depressed，

幾時我哋可以再有快樂聖誕？

今次我將顏色開到好淡好淡，似乎效果幾好，
不過唔知點解間屋仔顏色咁灰暗，
樹嘅綠色做唔出變化，都幾單調，
但又唔想幅畫太多其他色彩，同太鮮色，
我想有一種淡淡恬靜又 cozy嘅感覺。
mmm....，我諗係因為我唔記得咗黃加藍變綠，而只係用咗綠色，
下一幅要試吓自己調綠色。

今次用咗 arches紙，好多人都話係最好嘅紙，

但我覺得同 waterford分別唔大，

而且 arches紙有一陣騷味，😅真係奇怪。

Schmincke Akademie on Arches 190g rough 7.5"x5.5"

畫畫 – Christmas 2（水彩）

底色係唔係太平淡？定係太鮮艷？可能應該 tone down少少、冷少少，而家好似搶咗 fo；

唔記得擦番火焰嘅鉛筆線先開始上色，濕咗水就再擦唔到😣😣😣；

枝蠟燭身同頂嘅顏色好似唔係好夾咁…，不過蠟燭身環境色反映都幾好吖；

個聖誕球顏色我覺得好靚，schmincke真係幾清透，疊咗好多層色都唔覺好厚；

松果有少少亂，形狀少少怪，但都幾似，都表現到松果一瓣瓣之間嘅距離感；

兩枝 cinnamon同珠鏈位置錯咗，好彩唔多覺。

Schmincke Akademie on Saunders Waterford 190g rough 7.5"x5.5"

畫畫 – Christmas 1（水彩）

一個唔為意，就到聖誕，市面上冇乜節日氣氛，…

聖誕？
仲信唔信有上帝？
讀咗十幾年天主教學校，我間學校好有宗教氣氛，學校有修院、有教堂，幼稚園到中學，校長都係修女，校舍裡面成日有修女行嚟行去，每日上堂前念經唱聖詩。中學年年都有修女做 subject teacher，好似唔止係 religious knowledge，有教…domestic science，english literature…唔肯定，anyway，咁樣過咗我人生頭嗰十幾年嘅生活，我始終都冇信教。
primary 1 嘅時候，老師話每個小朋友都有守護天使，我諗我信咗一陣啦，雖然都有諗過：『咁多小朋友，真係有咁多天使？』『天使真係會跟住我？』
然後嗰年我喺操場跌咗好幾次，跌到損晒流血，痛到死，我就諗：『天使呢？點解會畀我跌咁多次？』我就唔再相信有守護天使，亦冇再生過信有天主嘅念頭，上聖經堂都一直當故事咁聽。

後來大個咗，見到聽到世上咁多事，更加令我唔相信有天主，就算有，我覺得佢已經放棄咗我哋，好耐。

雖然唔信有天主，聖誕對我嚟講，都係重要同期待嘅，因為係一個節日，一個假期，係大家以一個共同主題玩吓開心吓嘅日子，大家心裡面都諗住同一件事，感覺好cozy。
今年，大家心裡面都有同一件更具體嘅事，唔開心，但都係一種 cozy嘅感覺，a sense of belonging。

Schmincke Akademie on Saunders Waterford 190g rough 7.5"x5.5"

畫畫 - 雪人gathering

之前嗰張雪人咁冷清，想畫番張開心d嘅，幾個雪人gathering。

諗住個個唔同造型氣質畫面先豐富，於是畫個嬌俏d，另一個就粗線條d，點知畫完個個有晒角色咁，變咗好似個男仔見未來外父咁。

仍然係營造唔出歡樂溫馨嘅氣氛，
不過我幾滿意雪人身上嘅反射色。

Shinhan on Saunders Waterford 190g rough 5.5"x7.5"

畫畫 - 聖誕花

心裡面有概念，但點去表達？
活生生眼高手低嘅例子。

本來d花上咗一次紅色就宣佈失敗，一片紅咁平晒。
後來睇到老師post咗佢幅聖誕花，學到加暗色表達層次，算係起死回生，仲驚喜地係幾啱色添。
但隻綠色好似太冷，襯唔出節日嘅喜氣。
d字.....唉。

Shinhan on Saunders Waterford 190g rough 5.5"x7.5"

畫畫 - 報佳音

19號開始放假，但係日日都好懶散，乜都冇做，終於聖誕日先畫到一幅應應節。

連畫雪人都唔想畫樣，心理問題好嚴重。
幾個天使...唔似天使囉，似花枝招展嘅大嬸，唯有畫埋對翼同光環啦。
（係咪唔應該用咁細張紙？一點已經係成隻眼，手重咗就血盤大口。）
本來想佢哋企喺雲上，failed。
個天顏色ok，但鹽花灑太多，好似暴風雪咁。

孤單嘅雪人，面對一片冰冷雪地，
或者只有色彩繽紛嘅天使先能帶嚟遙遠嘅溫暖感。

Shinhan on Saunders Waterford 190g rough 5.5"x7.5"