水彩班 5 - 蕃茄

今堂畫蕃茄，超難！

每一個都有有唔同嘅顏色同明暗度，紅橙黃加綠同青綠，我調唔出各種微妙分別嘅蕃茄紅….加綠變暗又變得瘀咗….

我巡視過班房，個個都唔係好畫到，同學話老師都話呢幅係好難嘅。我覺得呢類物品好難掌握，好似上一期嘅蘋果同提子咁，我都畫唔到。

縫合法要調色快，唔夠快上一筆乾咗就接唔上。老師話要用枝大d嘅筆，細筆畫得慢，老師一向都用平頭，以前Miss Ho叫買圓頭，就一直用，冇諗過可以轉，或者應該試吓平頭，畢竟唔同筆頭效果都唔同。
（原來老師嗰枝都係圓頭，只係枝筆好得意，濕咗可以壓到平頭咁，但又冇真平頭咁扁）

筆嘅水份又唔可以差太多，唔係就會滲過去，出一朵水花咁樣，Miss Ho都講過要熟習枝筆，拎上手就要知道佢有幾多水。唉，控制水量仲難過調色！….或者應該話，顏色都冇水量對幅畫嘅影響大，因為顏色係有彈性嘅，可以用其他色襯托，或者配合番，爆咗水花就好難救，至少畫寫實就破壞畫面囉，個蕃茄上面多咗朵花….

堂上縫合失敗，番屋企重疊一番，都見得吓人嘅，尤其是左邊最細嗰個，縫合都ok，重疊埋暗位，出嚟成個靚蕃茄樣。 🆗


今次最成功係留白，個個都留到白，唔似平時畫畫吓就唔記得，填滿晒。
其次，d枝同葉都幾自然同立體。

Shinhan on Saunders Waterford 190g rough 11"x15"

今次真係好失敗，上幾幅我畫完post上instagram，老師會like，今次佢唔like。😢

尋日決定再畫一幅，心諗：想進步梗係要練習，點知（其實早知），一落筆仲衰過上一幅，但繼續畫，老師話：『畫衰咗怕乜唧？有五個咁多。』但係….第二個仲衰….😢，唉，算喇....




2018 再上水彩初階（二），畫切開咗嘅蕃茄
https://iceefaery.blogspot.com/2018/02/2018-6.html