水彩班 7 - 東坡肉

上堂前有小小忐忑，唔知自己今晚畫唔畫到，見到自己每一筆落色都平晒嗰種感覺真係好挫折，喺老師面前仲會好難為情，「上咁耐堂仲畫到咁？」

畫食物一樣要用對比色降低彩度，但係好容易令畫面污糟，食物顯得唔新鮮美味。我平時畫畫都好少用對比色，就係唔鍾意畫面唔夠明亮 (所以我d畫都感覺幼稚，好表面咁，但我鍾意明亮嘅色調），不過今堂老師示範用咗紅、橙同綠，咁我梗係跟住做。

畫水彩「留白」真係好緊要，留唔到就點畫都冇神采，呢舊東坡肉有好多留白位，我都算順利留到。👏🏻
肥肉層用咗yellow orchre ，調色真係幾有趣，如果唔係老師教，冇諗過用土黃，😆泥土同肥肉都拉唔上關係。

正前面個位有d亂，畫嘅時候個心都亂亂哋😅，不過幅圖都係亂亂哋，照畫出嚟都ok啦，真實嘅嘢都唔係一定規規矩矩嘅，煮咗嘅肉又點會線條分明呢？

示範前老師特登同我哋confirm舊肉旁邊兩片淺色係乜，原來有人以為係火腿😳，其實係醬汁反光嘛，所以老師話了解畫緊嘅嘢好重要。點知，我認到反光嘅醬汁，但就誤會咗暗位嘅菜係醬汁😓，仲咁深色，救唔到，唯有由得佢⋯😌

舊肉嘅投影太實，冇變化，醬汁表面應該都有番小小光線反射。

條繩係一直留白最後加，因為佢淺色，一路驚過界，結果留多咗，條繩變咗好粗。

Shinhan on Saunders Waterford 190g rough 11"x15"

舊肉加綠色，伴碟嘅菜本身綠色，但暗位就要加藍色，舊肉加咗綠色都冇霉瘀嘅感覺，唔跟老師真係唔識，以前畫蘋果淨係識用紅色，最多都係用唔同嘅紅色，點會諗到要加藍同綠？仲奇怪點解人哋可以畫到咁生動，但我就得一撻紅色 😁😁😁

每堂畫完都有種奇妙嘅感覺，『嘩，原來我畫到架！』自己畫係唔會揀呢d object，覺得佢好難畫，所以係要上堂，有老師嘅推動先會走出自己嘅框框。