畫畫

work from home梗係唔會全日 work，邊講電話邊執嘢，今日執咗 d畫具。

上堂畫嘅 4K size都唔少，已經儲咗一大疊，平時畫嘅 16K就更多。

呢度只係水彩畫，仲有木顏色、碳筆同marker，就嚟冇地方擺。

我畫嘅畫都唔捨得掉，畫得好要留低，畫得唔好一樣留低，用嚟試色、試筆觸，所以平時都係畫 16K，慳 d儲存地方。

喺角落搵返呢張超細嘅，係 wetcanvas嘅 monthly challenge，都唔記得點解會用咁細張紙，好笑，不過都畫得幾靚吖。

Cotman on Saunders Waterford 190g rough 5"x2"

睇返以前 d畫，都畫得幾好咁喎，

朵花係跟圖片畫，顏色太實，另外兩張都係自創嘅，雖然條彩虹粗糙咗 d，但整個景都好順眼。

嗰時好好心機，個火窩逐樣畫，而家睇番覺得唔錯。

以前畫畫比而家有耐心同創意，近年真係沉迷咗玩電話，做乜都唔夠投入，要改吓。

畫畫 – 小屋&樹（水彩）

又係唔使起稿嘅畫，畫幾個圈就得。

背景冇色好似蒼白咗 d，會唔會因為後面兩個山用咗灰色？

幾隻雀仔好似大隻咗，樹枝都大咗。

幾棵樹嘅顏色幾靚。

Schmincke Akademie on Baohong 300g hp 7"x5"

畫畫 – 聖誕樹（水彩）

本來想畫一棵好瘦嘅聖誕樹，然後就冇諗過背景會係點，瘦嘅聖誕樹要畫出枝幹，因為唔想亂畫一舊綠色，結果畫出嚟都唔瘦，不過都有好耐心咁逐枝畫，形態同顏色都自然，幾靚呀。

個背景都幾滿意，半圓形嘅窗係諗起 shape of water嗰隻窗，有諗過逐舊磚畫，因為我睇過人哋真係咁畫，但都見過人係咁意畫幾舊磚喎…😌，而家咁都幾好吖，白色牆本來想畫少少 detail，喺牆身縷花😂好fancy咁，不過懶搵 reference，都係算啦，而家好寒酸，真係一分耕耘一分收穫。

同樣道理，棵樹同 ornament我好耐心同小心咁一筆一筆畫，冇令自己失望，本來淨係掛波波就算，不過有 d blank，決定加條 ribbon，又唔想用 acrylic，所以唔係好畫到，我由底開始畫，好好心機咁想像佢嘅走勢，加上嗰層背景係白色，所以都算成功，上面幾層背景比較亂，開始冇心機跟住條 ribbon走，開始亂嚟。

樹下應該堆滿禮物先有節日氣氛，又係因為我…啦，
而且，而家咁低調 d都有憩靜閒適嘅氣氛吖。

呢幅畫有一個位係我最滿意（其實都唔可以用『滿意』呢個詞，因為只係唔覺意做到嘅，話滿意就好似係我努力過咁），就係個缸邊，虛虛實實好靚（可能路過嘅朋友會覺得我匪夷所思，但係呢一種就係我一向想做到嘅）。

最後呢，有諗過咁寧靜嘅畫面，好適合有一隻小貓蜷伏喺樹下瞓覺，不過，幅畫都畫完，我唔想再冒破壞成幅畫嘅險喇，小貓返房瞓啦。

咁長氣打咗咁多字，因為我幾滿意呢幅畫😁

Schmincke Akademie on Baohong 300g hp

hot press 真係比較難暈開，好容易就形成一條好實嘅邊，個缸邊可能都係咁出嚟，

但缸身都有一條我唔鍾意嘅痕，未乾嘅時候完全唔覺，激死人。

好彩呢幅畫全部都係細細碎碎嘅著色，問題唔多。hp 紙表面滑滑咁，畫嗰時筆觸感覺好舒服架，不過要學吓接受，或者克服水痕，anyway，你話我乜都好啦，我都唔係好鍾意大陸紙，我都係鍾意 waterford。

畫畫 – Christmas presents （水彩）

我以為畫一堆 box冇乜難度，但唔記得咗角度問題，
而家盒盒都唔同 perspective，笑死。

係唔係應該好認真咁起稿，但係…起完稿都係擦番晒先上色㗎啦，又係唔見晒 d線，上色時控制唔好支筆，畫歪咗、畫大咗、邊大邊細，乜都齊。

嗰時 miss ho笑我哋：『一上色遮咗 d線個個就喊晒咁，「我條線唔見咗呀~」、「我搵唔番條線呀~」，哈哈哈』，佢畫風豪邁，落筆精準，點會明白我哋吖。

有時我都唔知係我影得差，定張相先係真實，我睇幅畫本身顏色冇咁灰黯㗎…

Schmincke Akademie on Saunders Waterford 300g rough 7.5"x5.5"

畫畫 – 小屋 &聖誕樹（水彩）

就嚟又到聖誕喇，今年比舊年更加 depressed，

幾時我哋可以再有快樂聖誕？

今次我將顏色開到好淡好淡，似乎效果幾好，
不過唔知點解間屋仔顏色咁灰暗，
樹嘅綠色做唔出變化，都幾單調，
但又唔想幅畫太多其他色彩，同太鮮色，
我想有一種淡淡恬靜又 cozy嘅感覺。
mmm....，我諗係因為我唔記得咗黃加藍變綠，而只係用咗綠色，
下一幅要試吓自己調綠色。

今次用咗 arches紙，好多人都話係最好嘅紙，

但我覺得同 waterford分別唔大，

而且 arches紙有一陣騷味，😅真係奇怪。

Schmincke Akademie on Arches 190g rough 7.5"x5.5"

畫畫 – 小屋 &樹（水彩）

色彩總係唔夠鮮明，尤其係右邊嗰棵樹，點解會好似灰濛濛咁？

Schmincke Akademie on Canson Montval 300g cp 

呢張係水溶木顏色，well…

Albrecht Durer on Baohong 300g cp

呢張完全係自暴自棄嘅表現

第一幅嘅畫法係仿傚一位叫 iraville嘅德國畫家，

我初時每次 post畫去 social network都會 quote番佢個名，

但我又唔係畫嚟賣，是否有需要每次都話：『我係學佢架』咁呢？

畫畫 – 海芋花calla lily（水溶木顏色）

又係見到 tutorial跟住畫，我嘅 creativity去晒邊？唔上堂唔識畫，上咗堂唔識自己畫。

睇相先發現花瓣上面橙色太深色，定係影相有色差？原畫唔覺得係咁，幅畫唔上鏡😂

雖然用咗水溶木顏色，但都只係第一層加咗水，因為發現自己唔識點去加水😅，一切都荒廢晒，好似乜都唔記得晒咁。

Albrecht Durer on Baohong

我發覺好多花都好相似，唔知點分，

就算上網 check，都有好多唔同講法，畢竟網上資料都係人寫出嚟。

有一種花同海芋花好相似，叫馬蹄蓮，又叫馬蹄蘭，

有人話係兩種唔同嘅花，

但亦有人話係同一種花，

然後又搵到另一種叫白掌，又叫白鶴芋，又係好相似，

希望我畫呢種真係叫海芋，我唔想用錯 title😄

畫畫 – 水仙 Narcissus pseudonarcissus（水彩）

喺 instagram見到畫水仙嘅 tutorial，

呢幾日放假跟住試畫。

唔想用灰色畫白花嘅暗位，用咗藍同青綠，但效果唔係幾好，怪怪咁。

Schmincke Akademie on Saunders Waterford 190g rough 7.5"x5.5"

Schmincke Akademie on Saunders Waterford 190g rough 7.5"x5.5"

第二幅試吓用背景色襯 d花出嚟，

咁細幅畫都畫到出咗水痕，失敗。

schmincke嘅顏色真係好靚好清透。

Schmincke Akademie on Baohong 

呢張水痕仲嚴重，

畫乜都好，正面總係冇咁靚，下面嗰朵三七面自然好多。

綠色部份全部都唔自然。

水仙系列暫時最後一幅，畫嘅時候滿懷希望，畫完好失望。
今次用咗 canson montval，係偶然買咗一張，所以好少用，唔係好慣。

幾朵花嘅 perspective怪怪咁，

枝同葉又唔知想點咁，

唯一底色好似幾好。

本來諗住用木顏色執執佢，睇睇吓覺得都係保留番 pure水彩啦，遲吓有心機先再加多個 layer emphasize 吓d明暗位。

Schmincke Akademie on Canson Montval

畫畫 – 海港日落（水彩）

呢個 scene之前都畫過，係我日日都見到嘅景色。

今次個天冇跟老師教嘅畫法，冇喺藍同黃中間加紅色，效果都唔錯，冇變成綠色，
事實上，個天嘅藍色之下，我先上咗一層彩虹色嘅底色，其中有都有綠色，
嗰層綠色加咗藍，變得幾自然，比直接藍撞黃好好多。

落日嘅黃橙應該範圍大 d，不過而家都 ok，唔想再加。

本來我想用乾筆刷白嚟畫建築物，不過幅畫太細，用唔到。

結果用咗最細嘅 0號筆畫橫直線，畫畫吓冇晒留白，建築物冇咗燈光，表現唔到夕陽西下，華燈初上嘅景色。

建築物光影都畫唔到，每日睇到但畫唔到。

所有建築物都同真實唔同，但我都畫咗個摩天輪，不過畀我畫到變咗一片碌緊出海嘅蕃茄😄

海水，顏色同形態唔係好得。

 

Schmincke Akademie on Saunders Waterford 190g rough 7.5"x5.5"

畫多一幅，天色暗 d，畫法同上一幅一樣，整體感覺係更粗糙。

Schmincke Akademie on Saunders Waterford 190g rough 7.5"x5.5"

畫畫 – 蒲公英 Taraxacum（水彩）

又係蒲公英，藍天綠地，好多幅差不多嘅。

不過呢幅嘅葉唔同畫法架，專登用濃 d濕 d嘅顏色，未乾嘅時候用布索番 d，嘻嘻，別有一番風味，效果都幾好。

綠色部分好滿意，個天就唔係幾好，唔知點解一撻撻淺色，當係雲又唔似雲，都唔知畫嘅時候諗緊乜。

冇特登留白，用布索番花同種子個位，白色嘅種子都還可以，花嘅位留得唔係好成功，夾硬撻 d黃色上去，都算睇到。

如果個天靚 d就好，我幾鍾意呢幅畫。

Schmincke Akademie on Saunders Waterford 190g rough 7.5"x5.5"