摩星嶺四號我冇跟次序聽，不過都聽晒咁滯，最初覺得阿祖乜都唔識，雲海問佢有冇聽過乜佢都冇，而且乜都唔表態，好似好驚得罪人咁。但係聽聽吓又覺得，呢個係佢性格，感覺佢有d軟弱、怕事，但係善良。相信雲海好鍾意佢，成日送嘢畀佢，唔係錢嘅問題，係心思，聽阿祖形容每份都好精美同貼心。
(究竟呢個政權暗地裡做咗幾多嘢？)🤔
好多人鍾意雲海加Rosa，Rosa係識好多嘢，口才又好過阿祖，但我比較鍾意雲海加阿祖嘅氣氛。
5 May, 2017
*~ *~ *~ *~ *~ *~ *~ *~
5 June, 2017
聽咗十幾集卓飛嘅area51，普普通通咁，三個主持冇乜火花，其實我expect乜嘢火花？我唔知，只感覺好平淡，或者我鍾意宗教多d？
唔入題現象同雲海一樣咁多。
三個主持都話自己試過靈魂離體，我有小小懷疑囉，咁易嘅咩？
我聽咗十一、二集啩，已經三次話現場有鬼，雖然摩星嶺都試過，但冇咁密囉...
感覺三個主持係好敬業咁做好一個節目，但雲海就係熱愛呢d主題，所以內容充實好多，雖然佢講嘅資料好多都係網上有，但佢有熱情就算轉述都有火花，而且邊有咁多第一手資料唧，個個都係聽番嚟架啦。
未聽到卓飛講宗教，但雲海嘅宗教知識好豐富，加埋阿祖（加唔加得？佢乜都唔知...）真係無敵。
點解？！點解卓飛同雲海都叫『百慕達三角』做『百慕達三角洲』？
Form 1地理已經教架啦，三角洲delta係河流沖積形成，唔係你搵三點拉個三角形就叫三角洲架！！
係Bermuda triangle，唔係delta呀！
~*~*~*~*~*~*~*
14 August, 2017
又聽咗一陣薛高嘅試圖解密，我鍾意呢個多過area 51，但始終都係摩星嶺4號有feel d。
雖然雲海講好多題外話，但就好似朋友傾偈咁，有時講廢話，有時又爆d 秘聞，薛高同卓飛就好似....節目主持囉。
摩4我番聽又番聽，尋日聽到講教宗，雲海問阿祖知唔知點解 John Paul I 只係叫 John Paul，阿祖話因為佢係第一個 John Paul，點知雲海話唔係，唔係你就講點解啦，又係要繼續迫問，阿祖唯有話唔知，當然又被恥笑啦，我覺得阿祖其實係話唔知佢想問乜囉！咁我都好有興趣知道John Paul 唔叫John Paul I 嘅原因（if any），但一路聽落去，完全唔覺佢有解釋過。
雲海就好似一個朋友，有時有d 囂張，硬係鍾意蝦某個朋友，但通常又談笑風生，最重要係佢時不時會有有趣嘅事情講畀我哋聽，所以有佢嘅聚會大家都會有興趣，反正佢唔會蝦我，但睇到佢蝦人又會好討厭佢，不過唔知點解畀佢蝦嗰個又會冇事咁，於是又覺得自己瞎操心。
我真係鍾意佢哋早期嘅感覺，友愛，阿祖有時係令人歎息，可能佢知識領域比較狹窄，唔識嘅嘢就真係聽都未聽過，理解能力同邏輯思考都有別常人，其實佢真係幾奇怪架。
我講咁多批評雲海，唔係因為我憎佢，相反我好鍾意佢，覺得佢有好多同我相似嘅地方（當然唔包括有錢有時間，仗義豪氣敢言啦），有好多小細節佢鍾意乜嘢討厭乜嘢，佢講出嚟我都會諗：我都係呀！我只係唔明點解佢要做到自己咁，我覺得如果冇呢d瑕疵就好喇，當然我知道佢會話唔鍾意咪聽。
唔知邊個話佢係現實生活中嘅衛斯理，真係好似呀。
有一點真係好神奇，佢話倪匡係佢偶像，但係佢竟然冇睇過衛斯理......。
*~ *~ *~ *~ *~ *~ *~ *~
~*~*~*~*~*~*~*~*~*~*~*
29 November, 2017
雲海最近健康好差，其實佢都仲好年輕，40幾歲之嘛，又唔使為口奔馳，點解會咁呢？
不過我一向都覺得佢有d老氣，可能佢做電台接觸嘅人都好年青，令佢覺得自己老啦。
估計近期都唔會有新節目喇，其實而家格羅茲尼冇乜嘢聽，或者可以講嘅都講過（好多次），畢竟宗教唔係日新月異嘅事物，ufo又冇乜發現，邊有新嘢？
好鍾意聽佢講宗教，佢未必係識最多嘅人，但佢講得最好聽。
我記得有一集佢哋話阿祖喺胡振中主教嘅喪禮上負責捧十字架，如果係嘅話，阿祖當年冇咁瘦喎，baby fat？
27 May, 2019
再聽格羅茲尼 11公里，真係感慨良多。
世界青年節係唔係阿祖被盯上嘅開始？
2016，雲海話阿祖吸咗毒3 年，即係當時已經係一個有毒癮嘅人？
…唉……
~*~*~*~*~*~*~*~*~
22 July, 2019
我個blog寫咗兩年，二百幾個post，但其實冇乜人睇，我當日記咁寫。唯獨是呢一篇就戲劇性地多view，（令其他post好尷尬，…好彩d post唔識呢d高層次嘢，），可想而知，真係好多人鍾意雲海，好多人會search佢d嘢。
有網友鼓勵我繼續update，但應該冇乜可以update喇，格羅茲尼內容愈見鬆散，喺佢開始收費前嗰d我都已經冇能力聽完成集，要收費我就唔奉陪喇。
佢係我聽過嘅電台、網台主持中，表達最有條理+聲線最清晰+說話最俐落嘅一個，我對於自己未能跟隨佢演進都覺得好可惜，可能係我嘅損失。
希望佢嘅 die hard fans真係會一直支持佢，我唔希望佢到最後眾叛親離（可能咁講嚴重咗，但都差不多）。
我真係鍾意佢架，不過佢係一個 public figure，我鍾意嘅衹係佢某一時期 project出嚟嘅形象，同做嘅嘢咁囉，唔係佢口中嘅 die hard fans，因為我認識佢嘅時間短，喺youtube聽舊節目，仲未累積到感情就睇住佢變，同追隨十幾年嘅fans唔同。
~*~*~*~*~*~*
18 May, 2020
上星期，youtube推咗一條雲海嘅片畀我，好短，得分幾鐘。
事緣佢較早前喺 youtube出咗一條新屋嶺（定沙嶺？）嘅片，佢話好多人留言話佢咁耐唔出片，於是佢又嬲嘞，怪 d人竟然唔知佢去咗 patreon，又怪人哋幾十蚊美金都唔畀，說話酸溜溜咁。
唉，都唔知點講好，咁大個男人（雖然我成日都覺得男女係平等，但並唔係唔需要分性別，男同女始終係兩種人，會有唔同嘅性格同表現），行為語氣好似一個失寵嘅老女人。
佢忽然出條 youtube片，分明係想撩吓人啫，想人關注好好哋講囉，鬧人有乜用？只會更令人知道佢在意，一向唔鍾意佢嘅人會睇得好開心。至於我，唔係鍾意佢，但亦對佢冇反感，畢竟佢提供咗好多娛樂畀我，到今日我都仲會番聽佢 d節目，我只係覺得婉惜，明明有條件瀟灑一世，點解嚟到最需要灑脫面對好多事嘅年紀先嚟表現得咁在乎呢？真係一世英名…
片裡面，佢個樣同語氣老咗好多，五十歲都未夠，已經有阿伯 feel，真係唔明點解。
~*~*~*~*~*~*~*~*~
喺一個網台嘅 telegram group，見到以下對話，
唉，何必呢.........，究竟佢受過乜嘢刺激？連我都為佢婉惜，可想而知佢 d fans幾傷心（當然，冇課過金嘅都唔係真 fans，唔鍾意可以唔聽）。
上網唔用真名好普遍啦，點可以怪人用假名呢？
唔課金都可以支持嘅係嘛？人哋可能係窮學生，一個月五蚊美金都係一個負擔。
patreon好似要畀錢先聽到，咁佢冇畀錢，你都冇蝕底畀佢吖，免費收咗佢句支持，仲要鬧人？
點解佢愈嚟愈偏激嘅呢，唔會真係為錢啩？
當時我想回佢：『你以為你係雲海？』
我唔記得雲海喺咩情況下咁講，好似係關於立場同原則嘅事。雲海都成日畀阿祖批評有懶音，但同呢位相比，雲海嘅懶音幾乎不存在，而且雲海每次都有認真更正。真係要讚多次，雲海係我聽咁多主持中，說話最流利，聲線最清晰嘅。
我唔知留言批評嗰位有冇繼續聽，但我就即時 quit咗佢個直播，仲 unsubscribe埋。
~*~*~*~*~*~*~
睇左你個blog先知發生咩事！
回覆刪除我都係網上睇番嚟，唔好盡信，希望有機會知道真相。
刪除網誌管理員已經移除這則留言。
回覆刪除刪除呢則留言係因為太多粗口喇，我唔想再睇到。
刪除匿名君話雲海扮正義，我唔知佢真定扮，反正我唔係鍾意佢個人，我只係鍾意佢講嘅題材。
匿名君又話，陰謀論、外星人都係亂嗡，我諗，陰謀論一向都只係一種揣測，喺得電台廣播，都係當娛樂。聽吓會知道事情可以有好多原因同睇法咁啫，無論乜都好，真正知道真相嘅人係唔會四圍講嘅，係知d唔知d嘅人先至會諸多揣測借題發揮。至於外星人，其實雲海都好少講外星人，就算講，都係引述各種報導，唔係作出嚟，我亦唔會以為佢見過囉。總而言之，都係娛樂，唔需要動氣，啱聽先聽就好喇。
好神奇，你對雲海同阿祖嘅觀感同我嘅好相似，唔同嘅係我係雲海嘅十幾年粉絲，對於佢哋絕交感到可惜。近年嘅雲海確實變得方丈，感覺粉絲們都在擦鞋討好，小心翼翼將佢捧在手心，我討厭咁樣，雖然仲係好鍾意佢，但依家又真心怕佢
回覆刪除『感覺粉絲們都在擦鞋討好，小心翼翼將佢捧在手心』
刪除極同意，佢而家樂在其中，開口埋口"die hard fans"，最近一集我實在聽唔落去....
希望佢班die hard fans能夠一直支持佢（或者支持得佢住），我都唔想見到佢最後變得人見人怕，畢竟我好欣賞佢嘅見識同做嘅節目，亦欣賞佢嘅正義。
好開心遇到知音人，好認同你所講，佢而家樂在其中，不斷自我膨脹，郁D就話人係偽粉。格羅茲尼轉為要付費收看，佢最近常常掛喺口邊話「只有2xx個人比咗錢，其他自稱粉絲嘅根本就吹水...」其實有麝自然香，要睇就自然會比錢；唔肯比錢睇嘅，你日日怨都冇用。以前嘅雲海唔係咁㗎，以前嘅佢人如其名，瀟灑、淡泊名利，可能真係遇得太多衰人，變得越來越計較。雖然好似講佢壞話咁，但其實我係愛之深責之切，唔想佢越走越歪，走火入魔。
回覆刪除幫佢賣下廣告，天地圖書同佢攪咗個talk show，講D咪後唔出得街嘅秘聞，應該會好有趣。我賣咗11月2日嘅飛，有緣嘅到時見^_^
你有興趣可以去以下天地fb link望下
https://www.facebook.com/314769825735/posts/10155621785055736/
『但其實我係愛之深責之切，唔想佢越走越歪，走火入魔。』
刪除Exactly！
個talk show我都有興趣，可能會去，多謝推介。
Same feeling! Please continue to update the post :)
回覆刪除應該冇乜可以update喇，格羅茲尼內容愈見鬆散，喺佢開始收費前嗰d我都已經冇能力聽完成集，要收費我就唔奉陪喇。
刪除如果你有嘢講都可以嚟交流吓，好似fans都鍾意討論吓個idol咁。
我其實幾喜歡阿祖,有時會覺得雲海對阿祖信仰challenge過咗火少少,換著第2個真係隨時會發火,係阿祖咁林善先頂得住佢。想當年阿祖二話不說就跟雲海一同出走,今時今日,阿祖或者真係有不良嗜好,但作為朋友,雲海第一件做嘅事竟然係即時割席,冇諗過想辦法幫佢,而且仲揚哂比所有人知,阿祖其實只係需要人幫一把,人人都有需要人幫忙嘅時候,講真我對雲海有啲心寒。
回覆刪除BYW我已經轉聽恐懼鳥了,要比錢我寧願聽卓飛同恐懼鳥都唔聽雲海。
刪除雲海同好多人絕交，但同阿祖絕交我真係覺得惋惜，可能我惋惜嘅係阿祖本人啦，因為佢嘅變化太誇張，好似直接由天使變成……唔係，唔係魔鬼，佢冇魔鬼嘅能量，總之係由超正面變成超負面啦。
刪除好困難係網上揾齊料知清楚件事既來龍去脈
回覆刪除唔會搵得齊啦，可能連雲海都唔清楚得晒，畢竟重點喺阿祖嗰邊。
刪除搵搵下雲海入左黎，Thanks for sharing
回覆刪除我係search阿祖嘅野搵到你呢個blog, 見到Blog主橫跨幾年咁去update同一篇, 我都想留言鼓勵下。 Blog主嘅感想，我都好有同感! 我係由2002左右認識到雲海本錯體聖經，繼而follow佢-我唔配做佢口中嘅fans，只patreon 左幾個月我就停左。 一來唔夠時間聽佢patreon，二來真係好可惜雲海近來嘅patreon嘅post不是我預期。 反而無奇不有Gary 我有繼續patreon，淨係聽無奇不有已經用晒我d空餘時間 。
回覆刪除雲海病後可能體會多左啦，年紀又大左咁啩，好似老人家咁好小器，正如Blog主你上面網友K Cheng君所講咁。
我都唔係特別鍾意阿祖，但我鍾意Papajay/阿祖/Rosa＋雲海嘅火花。 fb我del 左acc，都冇點follow雲海，唔知佢近況了
嘩，你比我早認識佢十幾年啊！
刪除我呢年幾都冇再番聽佢d節目喇，亦冇聽聞佢近況，希望佢安好啦，畢竟我曾經好鍾意佢嘅節目，佢係一個好正義嘅人，係性格太執著啫，可能就係咁執著嘅人先會仗義執言，挑戰政府同大機構啦。
其實佢唔老，五十歲都未夠，就算真係老人家都未必會小器，唔係話會睇化、睇開嘅咩，都係性格問題啦。總之，希望佢過得開心啦。（如果佢睇到，可能會話：『關你乜事！』）
無意中揾到呢個Post，發現原來有人同我一樣，係最鍾意雲海加呀祖呢個組合。
回覆刪除交代一下我認識雲海嘅經歷先，當年仲係中學生，某一夜臨急抱佛腳，深夜先黎溫書，咁由於當時仲係用緊Nokia嘅傳統手機，連上網都無，唯有插住耳機聽下電台有咩節目，可以聽住黎溫書，咁岩就無意中聽到「摩星嶺4號」呢個節目，一聽就入哂迷，從此成係呢個節目嘅聽眾，亦都慢慢成為雲海嘅粉絲。
就算後黎摩4完咗，我都一直有重聽返摩4同其他雲海主持過嘅節目。無論係跑步個陣、做野做陣、搭車個陣、去旅行個陣，都會下載定啲節目，用黎解悶，即使同一集已經聽過十幾次，都係會再聽返，有時真係變成咗一種習慣。
講返呀祖，我都同你一樣，覺得雲海拍住呀祖係最有火花。佢拍住呀祖，真係有種大家老友係到吹水嘅感覺，令到成個氣氛好輕鬆。呢種感覺真係其他同類節目俾唔到我。見證住一對好拍擋就咁消失，作為聽眾當然覺得可惜。我印象中絕交後雲海好少再提起呀祖，我感覺佢係唔想再踩多呀祖一腳，念在佢地曾經都老友過。雲海曾經講過，每當同朋友絕交，佢會送一份絕交禮物俾對方，唔知佢對呀祖有無咁做呢？相信只有佢地會知…
不過作為雲海粉絲，我都有繼續買佢嘅書，去佢書展講座，俾錢入佢Patreon，每月$5美金就當係多年黎免費聽節目嘅費用，回報返雲海。我都同意雲海啲性格變得更奇怪，可能人年紀大咗都係會咁，有啲野睇得太過主觀，同埋覺得佢做「格羅茲尼」個陣都無以前咁開心，始終無咗一個咁有火花嘅拍擋，又太過不定期更新，集集主持都唔一樣，但無一個同雲海夾到，所以我聽一次就唔會再聽返，同以前摩4真係無得比…
不過人就要向前看，變咗就變咗，如果係平衡時空入面，雲海仲係同緊呀祖係老友，我相信「格羅茲尼」會超越摩4，同樣成為我會重聽再重聽嘅節目，FF完畢…
我都覺得如果『格羅茲尼』一直有阿祖，應該會超越摩4，聽頭十幾集已經有咁嘅感覺，因為雲海對事情查根究底嘅執著，同不吐不快嘅習慣，冇大氣電波嘅規限應該會更淋漓盡致，可能有人會話咁同阿祖冇關係，但我覺得雲海做節目就好似同朋友傾偈，傾偈對象唔啱key 就唔會盡興，佢係要對住阿祖先會無拘無束咁講嘢，就算同期嘅『音音濕濕』，都感覺佢就住就住。
刪除不過天下無不散之筵席，係時候散就要散，可能咁散法仲留咗個懸疑，日久成為一代嘅都市傳說，咁都幾配合佢兩個嘅屬性吖。
我真心覺得阿祖都幾傳奇㗎，相信雲海都係因為咁畀佢迷倒 0^0