第一次買高級顏料 - daniel smith, sennelier, maimeri

早幾日去台北，當然要行吓美術社啦，去咗誠格同文生。

誠格間店比較有美術社氣氛，不過我搵唔到我想睇嘅daniel smith水彩，可能擺喺d架後面，我又唔好意思拉嚟拉去睇，行咗一陣就過去文生。

文生真係好多嘢賣，但店面好似好陳舊咁。終於搵到我想睇嘅daniel smith，不過搵到都係睇吓（真係好笑，睇枝水彩睇到乜？又冇得試用，有色版都係印刷出嚟，只可以睇住枝鋁管），啱啱先轉咗cotman，唔想咁快又轉。但一場去到，買枝當手信啦，揀咗枝好特別嘅名，希望唔會同我現有嘅太接近。

又見到maimeri有隻色標示住係用po49 pigment，呢種pigment已經停產，停產前所有存貨都畀daniel smith買晒，就係佢嘅quinacridone gold，不過都已經賣晒，我諗：會唔會大家唔為意原來maimeri仲有舊存貨呢？見咁啱遇上legendary pigment，就買一枝試吓啦。

臨走，sl見到一枝佢好鍾意嘅turquoise色，係sennelier，又買埋囉，最後都只係買咗3枝顏料，總共650+台幣，比我用緊嘅貴，但牌子唔同，水彩貴起上嚟都可以幾貴，呢幾枝都唔算好貴喇。

jane blundell 嘅maimeri colour swatches

https://janeblundellart.blogspot.com/search?q=maimeri

標示golden lake嘅pigment 唔係po49，係py42，佢解釋話以前係po49，新產品已經轉咗，咁我諗只係文生用舊label冇改到啦，

但後來再睇另一個blogger講maimeri嘅lacca d'oro同po49
http://watercolourfanatic.blogspot.com/2011/07/quinacridone-gold-pigment-po49-2.html

hmph....maimeri咁樣做，完全係誤導，話佢呃人都得啊！意大利人都係一個狡猾嘅民族。

Daniel smith 嘅 duochrome green pearl 係珍珠色，閃閃令架，本來諗唔到可以用嚟畫乜 。後來我喺ds網頁睇到，話大自然都有好多珠光色嘅事物，好似蝸牛殼、鳥類嘅羽毛咁，又係喎，我可以用嚟畫最後的精靈裡面條龍erbrow艾爾伯洛身上嘅麟片。

Sennelier 嘅 vert turquoise 好鮮明，仲有granulation添，不過暫時諗唔到畫乜嘢啱用，或者teton mountains都可以，加少少添d色彩。

maimeri嘅 lacca d'oro雖然唔係po49，但都好靚，我都唔知原裝嘅po49會係幾靚。不過呢隻色同yellow orchre, raw sienna好接近。

畫畫 - teton trail （Wetcanvas June 2018 Challenge）（水彩）

This is a wetcanvas challenge.
井底之蛙真係冇見到幾多世面，喺wetcanvas見到人哋講自己個studio，好多人都afford到一間房做drawing room，有人個studio窗外仲有好多花、有蜂鳥、有大樹、鹿、各種昆蟲鳥類同動物，唉。
好似今期challenge嘅圖片，係teton trail，喺美國wyoming，上網睇先知有個咁嘅山脈，好雄偉，應該冇機會親身去睇。

forum有人教，無論寫生定用圖片做reference，都先畫一張sketch，定好value，然後就唔好再睇番個景或者圖，跟住自己張sketch去畫。
我覺得都幾好喎，或者咁可以畫出少少自己風格都唔定。

　

我見人哋畫value sketch係好簡略，而我畫畫吓變咗好似畫素描咁，畫咗個幾鐘。

人哋個幾鐘成幅畫都畫完，我仲sketch緊，真係笑死。

不過唔緊要啦，都係畫畫啫。

sketch完，我仲用螢光筆填埋色，費事畫畫吓唔記得用咩色。

好似都幾靚喎。

上下截各自為政添。

樹係生硬咗，不過都好樹樣，都算有層次。

打算用灰紫色畫山，打底時唔記得應該加小小唔同顏色，而家好平板，唯有試吓後加啦，希望可以增加少少深度，同埋可以同前面有小小呼應。

最近山嗰塊綠色係唔係應該暗色d？

畫埋個山同山路上嘅樹，山路沿途d樹顏色幾啱層次；

我喺灰色area加咗少少綠色，又喺綠色area加少少灰色，睇落冇咁各不相干；

個山畫完好單調，已經局部加咗cerulean blue，好似唔夠明顯；

d雲係唔係應加少少層次？我一向畫天都係咁，今次忽然覺得d雲咁樣好plain。

Cotman on Saunders Waterford rough 11"x11"

同學話個山太深色，係喎，原來我不知不覺咁將焦點擺咗喺個山度，可能因為個山令我好impressed啦，

同學提我，老師教遠景好淡色同模糊。

但如果我真係想focus落遠景呢？係唔係前景要模糊？

而家我前後都清楚，所以睇落唔舒服？

用magic sponge捽咗個山，顏色淡咗，細節模糊咗，有冇好d？

我覺得視覺上舒服咗，但我心目中嘅焦點退咗去後面，真係要諗吓點解決。

前邊絛路同小山坡仲加咗少少 maimeriblu 嘅 lacca d'oro，好似更吸引視線。

Cotman on Saunders Waterford rough 11"x11"

今次用咗唔同嘅approach，的確係冇咁似，但真係非常dull，

可能影相光線令幅畫黃黃哋，但始終顏色變化少，明暗差異係冇咁滯，所以幅畫好悶。

好客氣嘅comment

今期好多人畫，第2行第2幅，同第3行第4幅我都好鍾意，希望我都畫到咁寫意但有力嘅畫。

其他人可能畫得個形態比我生硬，技巧比我更差，但佢哋用色比我奔放，明暗清晰，幅畫感覺有神好多。

而我係唔係仍然太拘泥於似唔似，忽略咗光線同色彩？

水彩花卉風景 2018-10 - gondola

最後一堂，畫一隻gondola，呢個scene我畫木顏色時畫過，不過好多隻船。



Polychromos on Saunders Waterford 300g hp 12"x16"　

畫到個邊咁都得嘅？真係求其。

個海做乜呢？突然就冇咗色，應該轉色 fade out嘛，用色亦都太單調。

個稿唔係自己描嘅，當時個course有教『移印』，如果畫畫冇信心用移印真係幫助好大，但就會誤會自己好畫得，因為相比用木顏色上色，移印呢部分佔好少時間，用好少effort，感覺對幅畫冇幾多impact，但我成日都覺得，臨摹圖片已經唔可以算畫畫，仲要移印，只係自製填色畫冊，雖然填色都有技巧，hmph....各適其適啦，有人鍾意填色嗰種技巧，但描繪技巧差d，咁借助移印都好嘅，畢竟畫畫又好填色又好，都係一種興趣啫。（講咁多，係唔係暗地裡都係睇唔起移印？）
多咗兩年經驗，未必畫得好咗，但起碼識睇咗。


老師先全幅渲染一層底色，個天一邊黃黃哋，上邊藍色，老師經常教用紅色嚟緩衝，因為黃色遇上藍色會變成綠色嘅天空，但我今次試吓唔用紅色，我唔想次次畫天都有齊紅黃藍，我好小心咁唔畀黃同藍掂到，好似都冇問題。色彩少咗的確係平淡咗，但我諗住背景嗰堆建築物本身都好粉紅，畫好都唔會太冇色彩。....定係....背景就由得佢同個天差不多，唔好咁搶呢？ just wait and see。

畫完個天，我唔記得咗個海都要上底色，直接去畫波紋，畫完先補番個底色，唔知效果有冇分別，又係wait and see啦，不過老師話我個海太淺色，咁再疊多次色應該都睇唔出先後lu~

對岸嗰列建築物唔需要仔細畫，但要分色塊，同明暗。我覺得我用色幾好，後來老師都係咁話。

隻船船身ok，我仲好小心咁留白，係綁船嘅繩，老師話呢條繩係圖中唯一細節，一定要畫好咁幅畫先有細緻嘅感覺。木顏色版本好粗心咁忘記咗，後來出貓用acrylic加番上去。

今堂畫得好慢，木樁完全未上色。

番屋企 strengthen咗對岸建築物嘅明暗，
跟住畫木樁，唉，好蠢，應該畫好個海先加木樁吖嘛，
等木樁乾透，加深色個海，
唔知點解天色淡晒，加咗少少藍色，但又唔記得加埋黃色。

畫得都算ok啦，好乾淨嘅感覺，唔知係唔係呢幅圖有咁嘅特性，我哋三個畫出嚟都好乾淨，連平時畫風唔係咁嘅同學都畫出明淨感。



Cotman on Saunders Waterford 190g rough 11"x15"　

。。。。

水彩花卉風景 2018-9 - 紫玫瑰

好論盡，唔記得帶畫具，好彩個mini palette喺office，有顏料其他就容易喇，

lunch去春記買畫簿，但畫簿好貴買唔落手，忽然見到原來佢都有原張畫紙賣，雖然只得canson 300g，都好吖，買咗一張$25。

攞個膠盒蓋當調色盤，美心嘅超厚紙餐巾做抹布，問同學借枝畫筆，妥妥上堂冇問題！

畫玫瑰最難係層次，都唔知點落筆，不過老師話我哋覺得亂只係因為我哋視力太好，睇得太清楚，佢叫我哋咪咪眼咁睇，朦朦朧朧就容易畫。

但我覺得唔係，唔清楚朵花嘅結構，畫得朦朧只會更混亂，只有當你好了解件物件，你先可以喺朦朧中表現到佢嘅形態。

我冇跟幅圖畫，根本都跟唔到，唯有自己發揮啦，花心比較混亂，因為我對花真係認識唔多，平時睇花好少睇到花心，唔知佢實際係點。到冇咁密集嘅花瓣就容易好多，主要係用negative painting將上一圈嘅花瓣畫出嚟，再化開成為呢一圈嘅暗位。所以兩朵花都幾似花，不過就畫唔番圖片嘅樣，本來有一朵角度唔同，而家兩朵排排坐，少少悶。

左邊已經重點加強咗暗位，因為趕住畀老師睇，老師話我太多留白，水彩留白千金難買啊老師~

底色....都唔知算係污糟定artistic，可能cold press紙係咁，anyway，會再加深色d，

兩個花蕾，而家少少奇怪，會再加工。

專心一意畫花瓣，已經唔記得咗光源問題，好彩大致光影都跟到圖，唔算太怪異。

堂上就係畫到咁，近幾堂畫得快咗，以前應該只能夠畫到一朵花。

我哋幾個都覺得自己進步咗，落筆冇咁猶豫，我睇同學d畫，畫功都進步咗，至於自己....，睇自己一向都覺得唔係幾好，因為好清楚邊度有問題，但畫嘅時候都覺得有信心咗，知道想要，需要乜嘢色，冇咁忐忑，不枉上咗咁多個course。

老師提咗我唔好淨係用紅加藍嘅紫，都要用d紫，咁我就用紫色嚟強調左邊嗰朵嘅暗位。

右邊就用咗紫加紫紅，豔d。中間一堆花瓣效果唔錯，兩個花蕾經過加工立體咗好多，都幾靚。

加底色前我先鋪一層水，上色等佢自己化開，唔想擦太多留太多筆痕水痕，效果幾好。

趁未乾透加枝葉，想要朦朧效果，但唔知係紙定係冷氣嘅關係，乾得比平時快好多，畫到右邊伸上嚟嗰枝已經乾咗，算啦，有虛有實係唔係仲好？

shinhan on canson montval 200g cp 11"x15"

黃玫瑰
https://iceefaery.blogspot.com/2017/08/4.html

粉紅玫瑰
https://iceefaery.blogspot.com/2018/02/2018-5.html