吳哥窟的日出日落

遊吳哥窟睇日出同日落係其中一個重點，日出日落嘅天色變化總係好靚好吸引，尤其是喺香港環境同時間所限（仲有懶），唔係咁容易睇到，不過喺吳哥窟睇都唔係容易。

我哋披星戴月咁摸黑上山睇日出，落咗車，乜都睇唔到，衹係朝住司機指嘅方向行，行咗一陣，遇到同道中人，又跟住人行，終於行到好多人停留嘅地方，就知道：『哦，到喇。』

睇完日落仲得人驚，同兩個陌生人（船家，同司機，因為係第一日行程，同個司機非常陌生）坐隻好似就散嘅船，喺周圍一片陰黯嘅湖上行咗差不多一個鐘，再坐大半個鐘車先返到酒店，膽小嘅我哋其實好驚，完全唔明白點解自己會踏上一個咁嘅行程，喺船上一路諗：『點解嘅？點解嘅？點解我會喺呢度嘅？』

值唔值得？
雖然嗰兩日嘅日出日落都冇想像中咁絢麗，算係平淡，
過程唔算 pleasant，但小小驚都係因為自己細膽，其實乜事都冇，我會話值得，一場去到，當然要參與吓啦，
當日平淡嘅風光，喺回憶裏面會變得好絢麗，
唔去就唔會有回憶。

吳哥窟日出嘅經典角度，我都有影番張。
色調好似清冷咗 d，但我覺得，相對日落，日出嘅光係比較冷嘅，
但我畫得好平淡，好似太冷。

Cotman on Baohong 300g hp

呢幅用色暖咗，就變得似日落
低角度強調前景嘅荷花，宏偉嘅建築物做咗陪襯，
但我將佢哋畫矮咗、低咗，加上佢哋形態，而家似樹多過似廟宇。
荷花係生硬 d，但荷葉幾好吖，除咗前面嗰塊之外。

Cotman on Saunders Waterford 190g rough 11"x15"

洞里薩湖上嘅日落
當時我仲嫌前面枝樁破壞景觀，後來先知道有佢先有趣味。
呢位就係我哋嘅司機，停船後佢竟然走去坐喺船頭，擋住我哋用咗幾十蚊美金，搭咗一小時船嚟睇嘅日落，哈！佢以為自己係 titanic時期嘅 dicarpio咩？
不過佢都算提供咗個畫面畀我畫畫，算啦。
水面係唔係太啡？
太陽係唔係太白？
但人嘅剪影幾自然，畫得唔自然成幅畫就失敗喇。

Cotman on Baohong 300g hp

吳哥窟 hea幾日畫吓畫

柬埔寨 trip前後去咗8日，唔計頭尾都有整整6日，
行咗3日吳哥窟，後面3日完全冇 schedule，
全日hea，食吓零食，睇吓泳池，畫咗幾幅畫咁。

平時去旅行都會帶我嘅迷你 diy palette，今次改用 prima，
除咗顏料比較粗糙，都幾好用，woodland系列嘅顏色亦好啱我畫風景，
而且 mixing area比 diy palette大，係方便好多嘅。

我冇時間，亦冇膽量現場寫生，全部都係影相番去畫，
相比以前，而家比較容易畫到畫，記得第一次學人帶畫具去旅行，結果乜都畫唔到，連跟相畫都畫唔出。

（講到跟相畫，有 youtuber話咁都有3個 level：trace, copy, reference
trace - 用 tracing paper、燈箱一筆一畫照跟
copy - 就係好似我咁，畫番張相出嚟，畫到仲沾沾自喜
reference - 衹用個 concept，或者 colour scheme，總之唔係臨摹

其實喺學畫之前，我反而比較多自創嘅畫，跟 miss ho屬於靜物寫生，係跟符老師後漸漸習慣跟圖片，當然，老師唔係叫我哋照搬，佢嘅示範係用圖片做 reference，但到咗我哋就變成either抄圖片 or抄 demo。
或者真係應該停多一陣，從新開始我亂諗亂畫嘅方式。）

呢兩張，樹都畫到顏色變化，冇混埋變咗一種色，
建築物都表現到，雖然同原本有出入，但都算表現到嗰種感覺同氣氛。

Prima on Saunders Waterford 190g rough 7.5"x5.5"

呢張左右用唔同色想表現光暗冷暖，但好似變得格格不入，可能係變得太斬釘截鐵，應該漸變？下次再試啦。

Prima on Saunders Waterford 190g rough 7.5"x5.5"

睇完日出，天光行出嚟先發現呢度好靚，
晨光同和風之中，湖上面有幾簇荷花，
好彩我有影相，單靠呢幅畫，點都睇唔出現場有幾靚。

Prima on Saunders Waterford 190g rough 7.5"x5.5"

呢張低角度特寫前景山坡上嘅小野花，用後面嘅木屋做背景，屋後有一片小樹叢。

小花、屋、樹嘅關係同距離感我覺得係成功畫到，但樹頂就真係敗筆。

Prima on Saunders Waterford 190g rough 7.5"x5.5"

三日就衹係畫到呢幾幅，仲有好多好靚嘅景色，以後有時間再畫。

水彩花卉風景 Oct 2018-10 – 玫瑰

竟然唔記得 post最後呢堂嘅畫，雖然畫得唔好，唔係好想再見到佢。

其實，畫得都唔算好差，但整體有一種冷清嘅感覺，
後面幾片花瓣好唔自然，成朵花好似發光咁，因為我覺得：『畫緊白玫瑰，要保持佢白色』
我有記得白色要用多 d環境色去表現出嚟，但可能都係就住就住，結果唔夠色啦。
朵花太白，背景太冷，背後個花蕾硬繃繃企喺度唔知做乜咁，成幅畫感覺好唔舒服，
反而 d葉喺手足無措之間竟然都畫得幾好。

用咗同學買嘅寶虹紙，300g hot press
我唔係好鍾意，唔肯定係紙本身定 hot press嘅問題。

Cotman on Baohong 300g hot press

澳洲網球公開賽 The Australian Open (14-27 January, 2019)

到今日，rafa已經過咗 R3。
舊年us open之後佢好似受傷冇再比賽，通常佢休息一排再出嚟都會大殺四方，睇吓今年點？ao對佢嚟講可能係最難嘅一個 gs，可唔可以憑住久休復出嗰度氣贏多一次？
聽聞佢今年『又』enhance咗發球，速度快咗，唔知有冇幫助，
睇佢好似瘦咗，不過仍然動不動就出汗，點睇都唔係好現象，雖然佢一向比其他人大汗，但呢幾年真係嚴重咗好多。

今年件衫！真係.....
使唔使綑晒花邊咁花俏？
仲要咁嘅色，
好彩頭帶唔係同色。
究竟 nike係用心定 hae？

Murray 已經非正式咁宣佈咗退休，
nole 就氣勢如虹咁贏咗 2018 Wimbledon同 us open 番上 no.1。
到目前為止，Federer - rafa - nole 嘅 gs數係 20 - 17 - 14，
Federer仲可以堅持幾耐？已經 37歲，實際情況我唔識，但睇起嚟佢係打得比 rafa輕鬆，冇咁 exhausting；
Djokovic 身體靱度好高，冇咁容易受傷，而且佢比 rafa細一年，衹要佢保持到鬪志，好有可能追過 rafa；
總係覺得 rafa係最艱辛嘅一個，佢嘅最大 advantage嚟自 exhaust 自己，可能係體質問題，亦可能係唔肯放棄既知嘅 killer skill去走另一條唔肯定嘅路，anyway，而家就係有幾多 achievement就有幾多 damage，睇佢嘅意志同身體可以承受到幾時，希望新教練可以有新嘅 enlightment啦。

Vamos Rafa ！！


~*~*~*~*~*~*~*~*~*~*~
頭3 round都係對澳洲嘅本土球員，係巧合定係某種制度之下嘅必然？

R1 - J. Duckworth，64 63 75
攞 wildcard喎，咩背景呢？最後個 game打咗成10分鐘，deuce咗好幾次。
R2 - M. Ebden，63 62 62
R3 - A. de Minaur(rank 27 )，61 62 64

嚟到 R3，仲有 Djokovic, shapovalov, nishikori, zverev, cilic, verdasco, Federer, dimitriv, schwartzman（不過畀 berdych elim咗，good job）。


~*~*~*~*~*~*~*~*~*~

R4 - Tomas Berdych

19 - 4 嘅 head to head，最近一次贏 rafa係 2015 ao。

60 61 76 頭兩局咁嘅比數，第三局先嚟發力呢？太遲喇。估計berdych都就快退休。
第三局 tie break嘅時候，serve time count down個鐘壞咗，berdych有 d勞氣，佢同好多人一樣不滿 rafa takes too long to serve，但新例之後，rafa已經快咗好多，at least唔會超時，仲特登著返 sleeveless慳埋拉衫袖嘅時間。唔知點解淨係針對佢，Djokovic拍 n次波唔耐咩？
每次話佢發球有改變，我總係睇唔出，well.....

每場比賽後都有 on court interview，訪問贏嘅球員，輸嗰個要早 d離場，我總係覺得好慘，輸咗就要人裙拉褲甩咁急急執嘢走，留多陣都好似阻住咁，相反，final呢，輸咗嘅球員會好想即刻匿入更衣室喊吓，撫慰吓自己，但到呢陣就唔畀人走，要留喺球場等 set台頒獎，仲要上台講嘢，真係好唔人道。

rafa頭髮真係越嚟越少，唉，脫髮真係絕症嚟架，連 prince william都束手無策就知道，所有生髮藥 is just a lie, if not a joke。

下半打先，cilic, Federer（點解打呢個名會自動capital letter？）, dimitrov都輸咗，

上半得 zverev打完，16 16 67輸咗，佢一打 gs就係咁，咁輸法，同支持唔到5盤冇關。
呢個小朋友 eq好有問題，又整爛枝拍，嘖嘖嘖....，每次見到 d球員咁做，都令我更 admire rafa嘅修養。
nishikori同 careno busta打得好緊湊，真係爭到最後一分，或者係幾分？喺第五局 tie break個 linesman 嘅一個錯誤，令佢失咗一球，個裁判拒絕重打呢分，佢就開始 break down...
我都覺得唔公平，但如果重打，都會對對手唔公平，呢個情況都唔係第一次發生，但喺一場咁重要嘅比賽，咁 critical嘅時刻，係影響好大，影響到一個球員能否第一次打入 gs qf，難怪佢賽後咁激動。
djokovic 係 r4最後一場，希望佢都輸（唔可以咁架，rafa要自己贏佢架....），不過佢都係贏咗。

今年換代好明顯，不過呢一代都已經霸多咗一輪，可以話係跨代交棒喇。
federer宣佈咗今年會去 rg，感覺佢開始緊佢嘅退休巡迴賽，定係因為如傳聞，今年rolex 會sponsor，作為代言人一定要出場？如果係咁，佢應該打兩場就走，唔會咁搏去到 semi 畀rafa拉開 h2h，let's see。

最後8人：
Djokovic vs nishikori
raonic vs pouille
bautista agut vs tsitsipas
nadal vs Tiafoe

如無意外，sf 會係
Djokovic vs raonic
tsitsitpas vs nadal

final就梗係 Djokovic vs nadal啦，不過咁，體育競技臨場發揮先係最重要，如果唔係都唔使實戰，憑狀態往跡推算出嚟就得啦。

~*~*~*~*~*~*~*~
quarter final

Frances Tiafoe
>< 好醜樣，一d都唔似啱啱先過咗21歲生日。

63 64 62，rafa贏咗，冇乜好講，

等sf 對tsitsipas，等睇 nole會唔會爆冷，不過機會唔大，nishikori打咗三場五盤大戰，佢上場個樣都已經好攰，就算唔攰都唔會贏到djokovic。
AH-OH-OH.....nishikori打到 16 14 medical timeout，跟住 retire埋添，hmmph….

我估錯咗，raonic輸咗，pouille入 sf。

??? vs pouille
nadal vs tsitsipas

~*~*~*~*~*~*~*~
semi final

stefeno tsitsipas
0-2 嘅head to head，兩次都係2018，一次clay，一次hard。
佢話自己喺硬地有信心贏，就算上次都衹係輸少少咁話，
佢衹得20歲，事隔半年，真係可以有好大進步，
不過，佢上場對 bautista agut都打到75 46 64 7(7)6(2)，真係咁有信心贏 rafa？拭目以待。

62 64 60 都輸得幾清脆，冇法啦，佢單手反手，連 Federer嘅單反都打唔贏 rafa，佢又點會得呢？仲要佢大賽經驗唔夠，賽事發展不如預期，好容易崩潰，最後嗰局佢簡直好似唔識打波嘅人咁，手腳唔協調，接波又唔到位，所以吞蛋。

rafa今年狀態好好，又有兩日休息，希望今年可以再贏多次，紀念十週年啦。
如果nole贏，gs就會縮窄到 17-15，h2h會拉開到25-28，no way！

Djokovic 贏得仲清脆，60 62 62，新一代實在唔掂。


~*~*~*~*~*~*~*~
final

Novak Djokovic
已經贏咗 6次 ao，舊年連續贏咗 Wimbledon同 usopen，即刻搶咗 rafa嘅 no.1，唉，真係冤孽。
就好似 rafa總係剋住 Federer一樣，不過仲未見到有邊個可以剋制到 nole，可能唯有係佢自己嘅心魔啦。
我唔識分析佢嘅打法，但觀感上同 Federer一樣都好輕鬆，唔似 rafa場場都打到披頭散髮大汗淋漓咁。
當然咁睇係好片面，但都可能係因為佢以往嘅防守性打法，令佢處於被動狀態，攻嘅一方自然會將佢打到左打到右啦。不過鑑於年紀漸大，冇咁跑得，佢開始改變打法，變得比較主動，睇 statistics，有時佢都比對手跑少咗；好多評論話佢發球改善咗，比較容易靠發球攞 easy point，我真係睇唔出有分別，ace亦都唔係比以前多，唔係好明。不過發球改善就算唔 ace都可以影響對手回球質素，都會令佢嘅比賽容易咗。
hmmph…. 希望 rafa今日有好狀態啦，盡力而為，如果對手真係咁強，輸都冇辦法。

聽旁述話Melbourne 四十幾度（雖然我睇網上天氣話得28度），熱成咁，atp真係應該考慮 ao同 usopen掉轉，兩面都唔使咁辛苦，係唔係大家都要爭取暑假多 d觀眾呢？

V A M O S    R A F A ！！

呢場比賽輸我唔會好意外，但真係冇諗過會輸得咁乾脆，36 26 36！
同佢掃前6輪對手一樣咁乾脆，究竟發生乜事？
一開局係 rafa先發球，即刻畀人破咗，why？！

仲未見到rafa方面有 news或是 rumor，唔知乜事....

~*~*~*~*~*~*~
oh.....衹知道佢受過傷，唔知原來咁嚴重。
如果11月仲係咁嘅狀態，1月 打到 ao final已經係非常好嘅成績，唔怪得唔覺佢好 depressed嘅樣啦。
然後赫然發現，新一代係幾咁不堪一擊，咁嘅 rafa都可以輕鬆掃走佢哋，
所以一路以為佢狀態好好，到遇上 nole就原形畢露。

不過呢張相一出，就有人話佢輸親都賴傷病，
hmmph....well....，我以一個粉絲嘅立場嚟講，佢冇傷病係無敵嘅，所以佢輸一定真係有傷病，no？

吳哥窟

決定去吳哥窟都經過一番掙扎，因為plan緊個旅程時，發現柬埔寨治安唔係幾好。最後決定去，因為有人話治安唔好嘅係金邊，唔係我哋要去嘅 siem reap，好多女仔一個人去都冇問題，我哋兩個，小心 d就可以。而且我哋 book咗個好多香港人用嘅當地司機，接送我哋去三日吳哥窟，其他時間，可以叫酒店幫我哋安排車，感覺安全好多。

我哋一到酒店，就同個司機聯絡，佢一直到好夜我哋瞓都冇回覆，咁我諗住如果佢甩底，都可以叫酒店同我搵過個。點知，第二朝，佢覆咗，簡單嘅：okay
結果，嚟嘅係另一個司機，佢自我介紹係本來嗰個嘅 cousin，哈，甩我底求其搵個人嚟？網上對佢嘅評價幾好，點解我咁唔好彩？後來睇佢 fb，佢嗰兩日去咗親戚嘅婚禮，即係一早知都唔講清楚，唔知係唔係 last minute搵到替工先覆我，搵唔到就唔覆呢？

呢個司機比我哋更自閉，乜都唔講，去到每個點都衹係講個名，就走嚟開門趕我哋落車。
呢種 tour service收嘅費用衹係接送，定係連埋導遊？
我唔知人哋係點，不過，其實，自閉嘅我哋唔想有人跟住，亦都唔係好關心吳哥窟嘅歷史，唔需要佢講故仔，衹係想去睇吓影吓相，所以，我哋自己行仲開心。

天氣好熱，好彩我哋三日都揀咗用汽車，行到熱番上車有冷氣，又有冰毛巾同冰水，路上見到好多人搭 tuk tuk，路程咁長，咁大風沙，雖然我鍾意 tuk tuk，但都唔會想喺呢個時候搭，而且比較慢，逛嘅時間會少咗。

如是者，去咗三日，行咗好多廟宇狀建築，有學校，有醫院，更多唔知係乜。

終於親身嚟到呢個地方，我覺得夢幻程度僅次於第一次去 disneyland，好似去咗一個傳說中嘅地方咁。
天空好藍，周圍空間好廣闊，憑剩餘嘅輪廓想像佢金碧輝煌嘅模樣，我都衹能 recall到電影嘅場景，感覺唔到我想像中嘅莊嚴或者神秘，可能係因為好多遊人、因為個天太藍、因為空氣太清新喇！
終於去到有一處，太陽晒唔到，有 d風吹起地上嘅沙塵，即刻神秘詭異起上嚟。

度度都有女人同小朋友兜售絲巾同 badges，對於唔慣講價嘅人，簡直係陷阱，一條絲巾開價 usd6，我講到 usd10/3，以為已經好叻，後來發現有地方賣 usd3/2，應該仲可以講價添喎！

原來酒店每晚 6點起有免費 shuttle去 pub street，其他時間都可以安排，不過要另外畀錢，但其實都係酒店嘅車同司機，酒店話因為嗰個時間唔係司機嘅 working hour，好特別，借埋車畀員工做私伙生意。咁樣仲好啦，我哋仲放心，晚晚搭，不單止個司機都搭到熟，連 shuttle站頭 asia market門口指揮交通個守衛都認得我哋，司機到咗會指畀我話 "your driver"😄

呢個 trip衹係去咗吳哥窟，行咗三日，之後三日淨係出去食飯，行一陣 old market或者 duty free，然後番酒店 hae，寫吓 postcard畫吓畫，夜晚又再出去食晚飯咁，我去旅行一定要hae架，不過hae足三日就少 d。其實日頭街上唔係好多人，因為好熱，夜晚先會熱鬧起嚟。

初時仲擔心冇嘢好食，原來呢度好多好好嘅餐廳，兩個人晚飯平均要 usd45，以呢度其他消費比較，算係貴，但係真係好好食。

交通都好平，除咗免費酒店車，連免稅店都可以派免費tuk tuk嚟接，衹要買少少嘢，又可以免費送返酒店，我哋住得好近，就算搭街車，都衹係 usd1，重點係公司車，感覺安全。tuk tuk收費計距離，每公里 usd1，我好鍾意搭 tuk tuk，感覺同呢個地方接近 d，而且好舒服，唔算顛簸，雖然幾熱，但有風吹住都好涼快。尤其是搭慣咗酒店嘅司機，好放心，唔使擔心佢係壞人，又唔使擔心自己講錯地方，而且佢揸車好穩陣，有一晚可能佢放假，另一個司機揸得驚心動魄😝，不過我都唔係真係好驚，因為嗰度衹有最旺嘅地方有交通燈，度度都冇班馬線，但正因為咁，d車都好謹慎，大家都會睇住大家，可以話係亂中有序。我哋初時過馬路都好驚，但過多兩次已經可以從容咁喺車前行過，最緊要係 determine and calm，畀個司機知道你想點行，佢會就住，講過馬路，我覺得台灣仲比較得人驚，就算有交通燈都係咁得人驚。

我諗，有唔少外國人喺呢度做緊一d扶助性質嘅工作，去過嘅餐廳都有幾間專門幫女性就業，等佢哋可以自立，有 d印晒單張提醒旅客唔好畀錢小朋友，因為咁變相煽動咗佢哋家人唔畀小朋友返學，要佢哋出嚟搵錢。又見到有日本學生喺景點搵人做訪問，不過我唔知道佢哋嘅 subject係乜。

市面好多中文字，店鋪招牌都用中文，路上兜售嘅大人小朋友都講普通話，我心諗：『邊個用廣東話同我兜售我就買晒佢。』無奈，係冇嘅。個個都當我哋係大陸人，唉。

大陸人去到邊都咁喧嘩，有一團影團體相之前，仲要一齊嗌口號，唉。

又見到有大媽用膠袋帶住個杯麵行吳哥窟，唉😆

可能我哋衹係喺旅遊區活動啦，見到嘅人一般都好 nice，又或者呢度嘅民風就係咁，我見好多 tuk tuk司機冇客嘅時候都喺車上瞓覺，冇乜擔心冇生意咁，酒店個司機都係咁，次次都要我叫醒佢。

又好似酒店附近有間 café，我諗住清清哋飲杯 green tea，點知原來係 green tea latte，我冇飲，個唔知店主定店員望咗我幾次，最後攞咗杯冰水畀我，好似覺得我唔鍾意杯飲品，要補償吓我咁。
我為咗唔令佢太失望，飲咗兩啖，好甜😑

呢間酒店嘅員工多數都係年輕靚仔靚女，笑容甜美，連司機都係。

酒店個女仔，好靚女同helpful，唔知佢乜嘢 post，佢話係由佢 take care of us during our stay，我哋 check out咗，佢送我哋上車去機場前，同我哋道別，仲送咗圍巾畀我哋，話係一種祝福，佢嘅表情同語氣有少少 emotional，我覺得佢哋都係純真嘅民族，我會相信佢哋真係會對人有真誠，why not？雖然係工作，都係生活，都係人與人嘅接觸。（純真嘅會唔會係我自己？但我都係會相信佢對我係真心嘅😆，基本上我相信所有人都係善良嘅，係呀，我係幾傻氣，但咁樣睇個世界可愛好多。）

呢個旅程好開心，好舒服，嚟之前擔心嘅問題一 d都唔係問題。
我相信我會再去，有人玩7日，應該仲有好多嘢未睇過，日出日落都係值得再睇，每次都會唔同，又可以去唔同地方睇，今次去湖中睇日落，仲睇到好耐冇見嘅水平線，

睇日出嗰間唔知係唔係廟，好靚，應該留耐 d睇真 d，我哋睇完日出就走，好可惜。

say goodbye to our room，
除咗留低 tips（日日花盡心思買嘢等人找多d 1蚊畀我哋畀tips），仲留低咗特別為吳哥窟買嘅草帽同袋，冇草帽真係會晒死呀，但番香港又用唔著，我叫佢哋 pass to someone who will use them，唔知佢哋會唔會掉咗佢呢？

Prima watercolour confections

呢盒水彩係我今年嘅其中一份聖誕禮物，細細盒，12色，好可愛。
可愛在佢仲要係金屬盒，我鍾意金屬盒多過膠盒，重重哋有質感。
（well，佢嘅可愛點就到此為止喇。）
不過手工唔係好好，較位小小鋒利，一開就刮花咗個蓋，甩咗層漆就有機會生鏽啊！
唯有用透明指甲油塗住佢啦。

聽聞一般 pan paint都好硬，難出色，但呢隻就好似 tube paint咁容易攞到色，prima係韓國牌子，我覺得佢嘅軟度同 shinhan一樣，連顏色嘅艷麗度都似，唔知係唔係韓國顏料嘅特性，定係其實就係 shinhan嘅 product？因為呢間 prima 本身唔係做畫具顏料，衹係 suddenly出咗呢系列水彩盒，搵其他廠造內容都唔出奇，就好似 lady m嘅月餅係奇華造一樣。不過都係唔似，prima嘅質地好 grainny、粉粉哋、透明度低，shinhan質地幾幼細，透明度好好多。
（睇真，其實透明度都不弱喎）

就係因為佢粉粉哋，剩喺 mixing area嘅顏料好似有一層沈澱咁洗唔甩，我初時好失望，染晒色以後點調色？
擺咗一陣乾咗，我嘗試用 tissue捽，竟然捽甩晒！
argh.....好奇怪嘅顏料啊…

雖然我第一次用 pan paint，調色著色都還好，
唔同嘅係 pan paint嘅盒裏面顏料同 mixing area完全分開，唔可以好似用 palette咁揩到 d顏色亂七八糟，顏料畀水浸住晒咁，會冇咁容易清理。

佢有幾種唔同嘅顏色組合，我呢盒係 woodland，係適合畫風景嘅顏色，藍綠同 earth colour，有一隻幾含蓄嘅紅，仲有黃、泥黃同橙，同兩藍兩綠，可以混出好多唔同嘅綠。

不過呢，除咗質地粉之外，仲好 grainny（唔知係唔係粉= grainny），畫筆揩上去都感覺到嗰種摩擦感，唔係好舒服，
我忽然有個 idea💡💡，可以將 d顏料攞晒出嚟，填番 Cotman入去，
但係…咁咪即係二百幾蚊買個盒？！雖然唔係我買啫……

用耐 d再算啦，畢竟唔係用唔到嘅….，畫咗幾張畫都 ok。

我嘅結論係：二百蚊，唔值，純粹賣可愛。
單講粉粉嘅質地，已經唔係好嘅水彩。
不過，帶去旅行畫吓細幅嘅畫都好方便。


~*~*~*~*~*~
19 February, 2019

用咗一陣，
畫咗好幾幅畫，
發覺同一色塊嘅顏色唔似 cotman 同shinhan咁容易混埋一齊，
差不多係隻色落筆喺邊佢就留喺邊，
同佢質地『鞋鞋哋』有冇關係呢？
咁令佢『流動性』低 d？


～*～*～*～*～*～*～

1 September，2021

網上有 blogger同 youtuber判斷呢款水彩係一個叫 Mungyo嘅韓國牌子出產嘅，有 d顏料生產商會賣畀人做 private label，就好似呢個 prima咁。

佢哋都覺得呢款水彩畫吓 journal同 sketch係幾好嘅，不過認真畫水彩畫就唔係咁啱用，因為佢嘅質地唔適合重疊，而且 lightfastness唔高，咁點解佢會 label自己做 "professional"呢？

包裝盒上註明呢款顏料只係 "made of purest pigment and Kordofan gum arabic with no fillers"，fillers 通常係一種澱粉質，用嚟將顏料凝成膏狀甚至固體，但佢冇喎，好 pure嘅顏料，所以因此自稱 "professional"都唔定。

further review in March 2019 :
https://iceefaery.blogspot.com/2019/03/prima-watercolour-confection.html

水彩花卉風景 Oct 2018-9 - 鄉郊

又係上唔到嘅一堂，同學仲拍咗 d片段畀我睇，有同學真係好💝
不過睇片點都唔同現場，拍片視點得一個，現場可以睇埋老師嘅palette，睇佢點調色都好重要。

我估幅圖嘅焦點應該係樹，屋只係陪襯，而我畫到間屋都幾大吓，睇落空間好似細咗，冇咗圖片本來嘅廣闊感。
呢種樹好有特色，都算容易畫，不過我畫到 d葉耷耷哋，好似冇乜精神咁，當我醒覺時，已經畫斜咗冇得改，後加又會同畫咗嘅打晒交叉咁，well…
心裏面知道唔同方向嘅葉要唔同色彩明暗，但唔係好調到，其實應該試好色先開始畫，下次啦，下次啦😃

樹幹表現得幾好，立體感同距離都表現到。

天空嘅藍色應該暈染得低 d，都係因為缺乏計畫，以為後面 d樹會去到咁高，而家白咗，天氣唔係幾好咁。其實就算會有樹都應該加埋藍色，反正遠嘅樹都帶藍嘛，真係蠢。

老師加咗好多嘢，成塊田、牛、仲有稻草人，我....都加大咗塊地嘅面積，但結果乜都冇加，跟 d唔跟 d，搞到空咗一大片。
同學畫咗幾隻雞，成幅畫都生動咗，我係唔係都應該養番幾隻雞呢…？
我連飛鳥都唔記得加，……

以一幅臨摹嚟睇，我自己覺得滿意嘅，冇修補痕跡，好乾淨，
不過都係好呆，冇生氣，呢種冇生氣我唔識形容，唔係加隻雞加隻飛鳥可以幫到，基本上我幅幅畫都係咁，可能係用色呆板？水份唔夠？冇水彩感？冇光影？
應該係因為冇光影！

Cotman on Saunders Waterford 190g rough 11"x15"

本來想叫幅畫做馬來風光，但感覺畫唔出馬來味，算啦。
三幅畫都追番晒，仲有最後一堂補堂，畫一大朵唔知白定黃嘅玫瑰，都唔知點起稿好。