the Day will come: 吳哥窟一日三餐

本來對呢個 trip嘅食不寄厚望，oh…，實在係見識太少喇。柬埔寨同越南一樣曾經係法國殖民地，又係咁 hit嘅旅遊地區，點會冇好嘢食呢？

我哋去咁多日，除咗參觀吳哥窟，就衹係食，所以食係行程好重要嘅部分。我哋都係去 d普通餐廳，但都好好食，午餐消費大概係 usd20-25/per，晚餐 usd40-50/per。

第一晚去到酒店，第一件事就係請佢幫我哋訂枱食飯，呢間餐廳叫 Chanrey Tree，喺河邊，本來酒店 shuttle唔到，但可能司機見我哋第一晚到唔熟地方，特別車我哋到餐廳門口。

門口嘅燈光已經覺得好有氣氛，如果唔係怕熱同蚊，我會想坐花園嘅枱。佢唔係賣柬埔寨菜，應該係 fusion偏西式咁啦。

第一樣擺上枱嘅就係冰毛巾，好耐都冇喺屋企以外有濕毛巾呢樣嘢，細個去飲茶埋單會有熱毛巾，有時仲會有花露水味；長途機都有，又係好似冇咗，唔知係唔係國泰先有，感覺派熱毛巾呢個動作係好東方。

香蕉乾，幾好味，唔太乾，少少軟糯，好香甜，

我估柬埔寨嘅香蕉乾唔係用我哋嗰種香蕉，佢哋 d蕉好細隻，質地軟糯，唔知同唔同皇帝蕉。不過一上菜就收走咗😐

過咗咁耐，已經唔係好記得食咗乜嘢，就算睇相都面目模糊😄，淨係記得炸海鮮同炒飯，杯飲品用一截香蕉裝飾好得意，呢度應該盛產香蕉同菠蘿，度度都見到。

炸海鮮，外面好鬆脆，裡面蝦有蝦味，魷魚有魷魚味，一d都唔油膩。

dipping sauce似係魚露加...香茅？

好好彩調到炸海鮮嘅顏色，加埋蝦尾，成個菜就似模似樣。呢張係第一張畫，因為好少畫食物，所以諗住用明線嘅畫法，估會容易 d。

呢個甜品好似炸嘅糯米飯，或者糯米糍。

橙色係乜嘢呢....？應該係橙或者柑？passion fruit？總之酸酸甜甜，同個炸糯米球幾夾，配椰子雪糕，好好味！

第二日開始吳哥窟行程，一早喺酒店食早餐，係 semi-buffet，buffet枱有生果茶水果汁咁，唔係好多嘢，有嘅都好一般，不過有一杯雜果加乳酪，好好味😍，不過唔記得影番張相。

我要咗一份 pancake，唔算好食，

加埋牛油同蜜糖都係冇乜味，唔知點解。

隻蕉畫得好滑稽😄，一團牛油都唔似，總之我自己知道係牛油啦.....

中午我哋要喺途中食飯，本來都擔心唔知會唔會有啱口味嘅食物，又擔心地方唔乾淨，但都係過慮喇。

一路經過嘅地方都好似好荒僻，衹見路邊擺張枱賣水，完全唔見有餐廳或者稍有規模嘅店舖，所以當我哋話想食飯嘅時候，以為至少要開半個鐘車先有餐廳，點知，三分鐘我哋就到咗餐廳，我諗可能沿途有好多餐廳，衹不過唔喺我哋行車線上。

間餐廳叫 rom chang，好有熱帶風味，好似係用竹搭出嚟咁，亦可能衹係用竹裝飾，因為都幾有規模。
有好高嘅上蓋，但四邊冇牆，天氣雖然都幾熱，但喺裏面都好舒服喎。

呢度嘅 menu比較地道，有各式高棉 cuisine，但我哋冇乜興趣，衹係叫咗甜酸魚同炒飯，哈哈哈，外國人食中菜都係咁，而家明白係因為咁點菜比較穩陣，呢兩樣菜唔會有太大出事機會。

事實真係穩穩陣陣，安全系數好高。

香港所有菠蘿菜式都用罐頭，但呢度全部都用真菠蘿，好香，好清新。

仲叫咗好多人推介嘅 cashew nut shake，好香，飲幾啖就好好味，多咗會小小油膩，因為腰果好油架。

夜晚睇完日落番到酒店都七點幾，叫酒店幫我哋訂枱，洗面換衫又出去食飯，行咗一日真係風塵僕僕。

間餐廳我哋喺網上搵嘅，喺 pub street嘅橫街，去到先知道原來係酒吧，d枱擺晒出街，不過條街感覺好 cozy，坐路邊都覺得好舒服。

table setting同 menu都幾法式風味，噢，其實睇店名 le malraux都應該知道係法式，😃😆

個 refreshment係薯仔粒粒，加咗香料同 olive oil，都幾得意，不過我唔想食太多，想保留饑餓感去享用我哋揀嘅食物，因為肚餓食嘢寧舍好味 👍

我哋 order咗 grill sea bass，carbonara同埋 brie on baguette，魚冇我想像中咁鮮甜同 juicy，不過都算好食，carbonara…，冇令我失望咁啦，baguette最好食。

brie cheese喺 baguette上面烤過，再灑少少香草，好好味！

真係好蠢，個 baguette尾巴咁尖唔靚，我畫畫竟然跟住畫。

可能要加番小小地道風味，呢度有好唔搭調嘅椰青。

我從來都唔覺得椰青好飲，味道好奇怪😝

第三日，早餐都係喺酒店食，都係咁，冇乜好講。

早餐食得少，我哋11點幾就餓，叫司機車我哋去食飯。

可能司機冇預我哋咁早想食飯，附近冇乜好餐廳，去咗一間好似 canteen咁嘅餐廳，好細，枱擺得好密，感覺係中國人開嘅，有大陸團喺度食緊飯。

去 d冇乜信心嘅餐廳，梗係叫簡單嘅餸啦，我哋叫咗肉碎炒蛋同炒飯，sl又叫咗 cashew nut shake。

除咗我嗰杯 mango shake，其他嘢都麻麻地，但唔算難食，食得落咁啦。

唔知係唔係因為環境問題，趕時間或者坐得唔舒服我會冇 mood食嘢，不過好彩食物賣相都好靚，同埋我真係好肚餓，所以都好好咁食咗呢一餐。

（其實咁講會唔會對佢唔公平呢？可能完全係因為間餐廳唔靚😆）

哈哈，唔知點畫 d肉碎，變咗淨炒蛋。

晚飯去一間叫 blue pumpkin嘅....唔知應該叫餐廳定快餐店，佢似雪糕店兼賣熱食咁。

sl嘅 lasagne，幾好味，

我呢個係炸雞同 mango salsa，炸雞好香，唔算油膩，同杧果好夾。

炸雞係唔係疊得太實呢？

畫唔出 d杧果粒，而家似炒蛋，因為懶，冇心機勾出 d cubes，最論盡係暗位用唔啱色。

不過炸雞都幾似炸雞😄

第三日天未光出發，因為去睇日出，相信每個遊客都會有一日披星戴月上路，食唔到早餐，所以我哋 check in時 front desk已經提我哋前1晚 book定 breakfast box。

佢話 "breakfast box"，話係三文治，咁我諗住係一份用紙盒裝住嘅三文治。

點知嗰朝早，佢哋畀咗個手提籃我，wa-ha，好似去野餐咁啊！

裏面除咗有 butter and jam三文治，
仲有 croissant、水、紙包飲品，同埋好多隻呢度好多嘅迷係蕉。

雖然裏面都係好普通嘅食物，但都幾有心思，
令我哋嘅行程有趣 d。

呢張畫得好求其，籐籃畫唔到紋理，籐織嘅紋理好規律，但我越睇越捉摸唔到，睇到眼都花，算喇，唔畫喇！

個牛角包畀我畫『瘦』咗，sl 話三文治好好味，d 蕉我當下午茶咁食晒。

我哋錯過咗呢場本來好愉快嘅野餐。

因為個籐籃都唔細，我哋又唔知道落咗車要行幾耐，亦唔知道現場情況同環境係點，一直以為睇完日出就會返上車去下一個景點，所以冇諗過帶埋個籃，衹係攞咗牛角包同三文治就落車。

其實真係摸黑行咗一大段路，去到現場漆黑一片，睇唔到週圍係點，不知所措咁攬住 d麵包企喺度，我覺得唔帶個籃簡直係『明智』。

睇完日出，行出嚟先發現嗰度好靚，本身都係一個景點，而我哋傻傻咁太陽出咗嚟就走，白白錯過咗一場美妙嘅觀光同野餐。

如果以後真係再去，一定要補番。

嗰日我哋 skip咗呢個 angkor wat main temple，令行程大大縮短，唉，愈諗愈覺得自己蠢…，結果11點幾已經完成當日行程，好早返到酒店。（個司機只係做司機，一 d導遊嘅責任都冇做過，連我哋去嘅係乜嘢地方都冇講，佢英文又唔好，真係遇人不淑）

嗰日比前兩日熱，而且已經累積三日嘅 fatique，我哋返到酒店唔係食午飯，而係沖涼，再好好泡一個浴，嘩好舒服…

泡完浴，我哋決定食埋早餐籃淨低嘅嘢，晏 d先出去食個 early dinner。4點幾，我哋唔等 free shuttle，叫咗 tuk tuk出去食飯。

呢間 mama shop係做 italian cuisine，

starter 要咗caprese同 carpaccio。

Caprese 係mozarella配蕃茄，好清新、鮮甜，仲有淡淡奶香。

以前曾經好鍾意食 Carpaccio，但好耐都冇食，因為有小小驚有蟲或者菌，好奇怪，食魚生壽司又冇諗呢個問題。

今次咁啱遇上，決定要食吓。mama shop配咗大量火箭菜，火箭菜同 cheese多到睇唔到牛肉，味道同生牛肉夾到天衣無縫，好好味，真係好好味！

牛肉畫得都似，菜就唔係好似，隻义拗平咗，有畫 cheese架，不過唔明顯，唔係好想用 masking fluid，次次買咗用一次擺到乾晒。又唔想喺水彩畫用 acrylic，再諗吓有冇其他辦法。

個 pizza有好多好多 parma ham，

實在太多喇，咸咗少少，carbonara 濕咗 d，不過 homemade tagliatelle好好食。
每碟嘅份量都好多，但我哋都食晒，加上麵包，真係飽到呢…

雖然飽，都係要食埋甜品先算完整，唔知點解，而家 d tiramisu都冇酒，真係不是味兒，但都不失為一份好味嘅甜品。

第四日，開始冇行程嘅日子，唔使早起身，大把時間搵嘢食，當然唔會再食酒店早餐啦。以後幾日，我哋冇 breakfast冇 lunch，得番 brunch。

呢日去嗰間叫 sister srey，

french toast，賣相麻麻，一向覺得咁樣搞 d sauce好奇怪，toast本身都煎得黑咗。

我嗰份係 rosti，with bacon and spinach, poach egg, 我加咗 feta cheese，好好味，好好味！

隻蛋畫細咗，菜畫平咗，實實咁，畫唔出 d feta cheese，畫咗架喇，但穩咗形😬

rosti幾好吖，睇到一條條薯仔絲，仲睇得出煎到金黃色。

呢度好環保咁用竹飲筒，
我總係好擔心環保飲筒唔乾淨，
無論係竹定不鏽鋼，或甚麼粟米芯，
我自己平時用玻璃飲筒，
每次用完都要用刷嚟刷乾淨裡面，
餐廳會咁小心洗？
而且竹係會吸收水份嘛…

我個位對住水吧，個 staff喺一堆飲筒度抽出一枝，向裡面『裝』吓先擺落杯飲品度，
即係佢都對枝飲管嘅清潔度有懷疑啦，
anyway，我都係照用，
呢個 situation，就算我有帶住自己枝飲筒，喺呢個時候先攞出嚟用都好尷尬啦，
好多嘢唔諗就唔存在。

食完嘢，喺河邊行一陣，順便去踏勘晚飯嘅餐廳，本來想去食 stone grill，不過見到間餐廳好似唔係幾 neat，都係算喇。去到另外一間見有個 menu喺門口，French cuisine幾吸引，決定夜晚去呢間，就係 Olive。
我好鍾意佢嘅佈置，紅磚牆木地板，舒服同乾淨。

餐廳叫 olive，所以一坐低就攞咗碗 olive畀我哋，其實我唔係鍾意又唔係唔鍾意，不過擺咗喺我枱面，我都會食。呢種食物好得意，無論喺邊個國家都係咁嘅外觀、質感同味道，連麥當勞都度度唔同味道唔同樣啦，真係好神奇。

個籃都幾似，
麵包怪怪哋，上面嗰個凹入位畫得太硬，似咗 scone。

橄欖太暗啞，反光位留唔到白，係用 gel pen加上去。

blue cheese soufflé，唔夠芝士味，
asparagus soup，已經唔記得乜嘢味，可能呢類湯味道太低調😀

pasta，炸蝦柚子沙律
well, 冇乜印象，而家睇番唔明點解會 order呢兩樣。

crepe suzette
好耐冇食過，而家唔係好多地方有得食，基本上而家唔係咁多西餐廳，遑論法式餐廳。

差不多度度都有嘅 molten lava cake同雪糕。

第六日，瞓夠先出去食 brunch，前一日就決定呢日去 T galleria。

請front office幫我哋 call tuk tuk，問幾多錢，佢話係免費，原來 T galleria會派免費車去酒店接遊客，wow，咁好嘅？！都見過佢哋嘅旅遊車週街遊走接人去買嘢，冇諗到可以 call車去酒店接咁殷勤。

間餐廳喺 T galleria，叫 jones the grocer，唔知係唔係連鎖店，世界各地都有。
我哋坐喺外面，好寛敞嘅地方，冇乜人食嘢，風和日麗，真係好舒服，
不過後來有一堆大陸人走嚟坐喺我哋旁邊 d枱，有 d仲伏喺枱度瞓，應該係跟團嚟但又唔買嘢啦，其實仲有好多枱，可能我哋嗰邊有上蓋所以佢哋走晒嚟…hmph

mushroom omelette，塊 toast烤得好靚，個樣好吸引，

order 嘅時候好貪心，一人一份餐之外，仲加咗一份薯條。
點知食物一攞嚟，sl就開始胃痛，食唔落。
d薯條好好味，但我食完我份 French toast都好飽，都食唔到幾多，真係可惜，浪費咗咁好嘅食物。

食物全部都好好，但橙汁就好假，唔知點解，難道係因為呢度冇種橙？都好有可能，呢類地方，地道嘢好新鮮好靚，要入口嘅就又貴又唔靚。

我嘅 French toast，好多 blueberries同 strawberries。

blueberries嘅紫色好似略鮮艷咗，但我唔想畫到咁沉色。
初時畫到一堆咁，仲以為失敗喇、畫唔到喇，點知局部加少少色，又再加少少色，竟然都營造到一粒粒嘅效果，好開心。

呢排發現畫完灑 d顏色灑 d水就可以令畫面豐富起上嚟，算唔算旁門左道？

食完入去 dfs行咗一陣，發現原來衹要買少少嘢又有免費 tuk tuk送返酒店，咁我哋就買咗小小嘢，攞住張單，就有人安排車，仲會 check埋正確地址寫低畀司機，確保唔會送錯地方。唔係為咗慳一蚊美金，而係膽小嘅我唔想隨便喺街截一架車，公司車梗係令人安心好多啦。

呢度竟然有翡翠拉麵小籠包！

夜晚本來 sl搵咗一間食 french crepes嘅，但去到發現佢變咗身，叫 trattoria（唔係好肯定係唔係店名，好似好多呢種餐廳都叫 trattoria），變咗賣意大利菜，但又好神奇咁都有 crepe賣，咁仲好啦，我覺得 crepe衹適合做甜品。

當然要食 crepe啦，
裡面有芝士、蛋、mushroom同 bacon有 d格格不入，
crepe本身比較乾同硬，其實唔好食。

又試吓佢嘅 carpaccio，感覺牛肉解凍得唔好，少少出水，配料都好普通，真係珠玉在前…

仲有 angus rib eye，都係普普通通咁，不過薯條好香好新鮮，可能係成餐最好食嘅嘢。

所以畫出嚟都靚 d，塊牛扒畫得比真實差，實物好少少嘅。

第七日，一如過去兩日，瞓醒擾攘一番，差不多11點，叫車出去食 brunch。

呢日去嘅叫 the little red fox，都係一間小小嘅 café，有兩層，我哋坐咗樓上。

有個小露台，雖然對住嘅都係建築物，但條街好清靜，陽光明媚，感覺都係好舒服，anyway，我哋都係坐室內，有乜嘢舒服得過歎住冷氣欣賞陽光？

我好鍾意食 bagel，加上菠菜、煙肉同煎蛋，完全將我鍾意嘅食物擺埋晒一齊。

呢度用不鏽鋼飲筒，唉，我都豁出去喇，呢個 trip我好隨便，將好多去旅行嘅堅持都放開咗。

退一步，海闊天空…
（咁用啱咩？！）

sl嘅係 deconstructed smoked salmon bagel，呢種一盆上面擺幾碟細嘅總係顯得好豐富，睇起嚟好吸引，其實都衹不過係常見嘅 cream cheese salmon bagel。

不過呢度特別 d，有青檸，同埋紫洋蔥，除咗味道香 d，顏色仲好靚添，

而佢最 impress我嘅就係竟然有 caper，而家已經好少餐廳有 caper跟 smoked salmon喇，最近一次係喺 grand hyatt，香港而家米線同水餃就多，西餐越嚟越少，越嚟越粗糙，哎，都係唔好講呢 d咁掃興！

隻碟有埋店名同 logo，摸落似手製陶瓷，簡樸中顯得細緻。