畫畫 – tea at Tiffin 13/13 - tea（水彩）

成個 tea set最好嘅應該係佢嘅茶，有好多好多種選擇，我揀咗我最熟悉嘅 earl grey，唔想喺呢個時候試新嘢，因為好可能破壞成個 tea time。記得有一次旅途中，見有 chamomile tea，聽得多但冇試過，於是揀咗佢，嘩…！原來就係我覺得好難聞嘅 fruit and passion嗰種味，好可怕！！好彩係晚餐後嘅一杯茶，唔飲都唔緊要，唔似得 tea time由頭飲到尾。

tiffin中文名叫『茶園』，可能真係因為茶靚啦，呢個 outlet以前主要做下午茶，枱櫈都係矮矮嘅 cafe風格，食正餐坐得唔係好舒服。

呢壺 earl grey由頭到尾加咗三次水，沖到最後都仲係好香茶味，浸咁耐都唔會苦澀，而開頭第一壺又唔會太濃喎，真係超好飲。

Schmincke Akademie on Saunders Waterford 190g rough 7.5"x5.5"

茶具係銀器，但畫唔出銀器嘅顏色，而家似不鏽鋼，係唔係應該用暖灰？

希望茶具上面嘅反映表現到金屬感，我自己判斷唔到。

三件茶具上面，因距離同形狀唔同，而反映出唔同形態嘅杯碟，我好開心我夠小心畫到出嚟。

畫到最後呢幅，終於認真咁畫埋餐具上嘅花紋，其實實物係更精緻嘅，我都仲係簡化咗。

好開心畫到碟嘅荷葉邊，不過右邊留多咗條白邊，怪怪咁。

本來諗住羹柄 fade out，但最後喺碟底加咗陰影，隻羹變咗爛尾。（點解唔畫番好羹柄呢？？我都唔記得點解…）

茶嘅部分…，都算 ok，係唔係？

右上嘅杯緣又係畫爛咗，竟然又係留多咗白，隻杯畸咗形。

咁多問題，好唔好加番幾筆塊執執佢呢…？

anyway，畫完我都好開心，畫到好多 detail，outcome都幾好吖。咁細張紙畫咁多嘢都唔係容易，有諗過呢幅用大紙，但想成系列都同 size。用大紙畫細節容易 d，但又到乾濕難控制。

tea at Tiffin全部完成！

~*~*~*~*~*~

終於畫到似老師教嗰種效果，開心！