我諗我 d畫好唔水彩樣係因為經常反覆咁疊色同修正，所以今次我好認真咁起稿，同諗清楚先落筆。
我都唔知算唔算做到，不過幅畫好似冇平時咁悶，整體都好滿意。
建築物暗位加咗 magenta，幅畫多咗色彩。
河水揀啱色，畫少咗橫線，冇之前嗰 d咁似張氈。咁大嘅範圍有冇需要有顏色變化呢？好彩有個倒影調劑吓，不過係唔係太多留白呢？
而個天呢…，如果我冇將深色嗰一塊擺喺兩個尖頂中間就好嘞，畫嗰陣完全冇留意，畫完先發現。
明暗都係唔夠，我總係唔敢用太深色，驚深咗唔好睇就救唔返，然而前面棵樹似乎深色咗，有 d搶 fo。
建築物都係歪斜，點解人哋可以畫到好啱比例、線條好俐落嘅？喺 instagram見有位畫家畫建築物，徒手畫直線弧線，乾淨俐落，高手總係令事情睇起嚟好容易咁嘅。
堅持用細紙，因為冇地方擺，有機會再上堂先用 A3啦。唔知我會唔會有一日畫兩開紙呢？呀…，其實我畫過喎，小學時用過咁大嘅紙畫咗一隻鴨（應該係）送畀人，都唔知當時點用枝細細嘅 cheap cheap水彩筆畫咁大幅畫。
 |
| Schmincke Akademie on Saunders Waterford 190g rough 7.5"x5.5" |
沒有留言:
發佈留言