Schmincke Horadam、畫筆

上星期去咗一間美術用品店 joy in art，佢哋除咗賣美術用品，仲有畫展同畫班，老師都有喺度開班。我想像中係一間好似藝林咁嘅店舖。

去到先知道，佢嘅美術用品部分好細，得一間房仔，可能畫展畫班場地分散喺其他單位。不過佢哋有好齊全嘅 Daniel Smith同 Schmincke，最好嘅係準備咗顏料同各種筆試用，都幾好吖，尤其係筆，要畫落去先感覺到枝筆係點（可能我用過嘅筆少，冇經驗啦），見過同學用⋯松鼠毛筆（？），完全冇彈性，好貴嘅一枝筆，但用唔到。

店員介紹咗一枝松鼠毛混合尼龍嘅筆，筆身攞上手好舒服，試畫感覺都好好，筆尖又夠細，所以本來冇諗住再買筆，都買咗。

咁本來諗住乜呢？

成日見到佢嘅廣告有一 set五枝 Daniel Smith granulating colour set，今日去開附近順便去睇吓。但連個店員都唔知有咁嘅嘢，可能太耐賣晒？⋯又可能根本唔係佢哋，或者係我都有 follow嘅一間台灣美術用品店都唔定⋯😂。

店員好有耐心同我介紹，睇睇吓睇到 schmincke horadam嘅 colour chart，又畀佢 d顏色吸引咗，真係目迷五色，有好幾隻好靚嘅綠色，我揀咗兩隻，又莫名其妙揀咗一隻啡色，反而唔記得買想要嘅紅色🤷

今次唔知算唔算係壓力之下嘅購物呢，我好怕畀人 sell，佢有耐心同我講得耐，我就會唔好意思唔買嘢，曾經因為一個好有禮貌好殷勤嘅細路女 sales而買咗一對唔係真係好啱嘅鞋😅。今日間店好特別，大廈裡面幾個單位，我搵到上去，個店員放低做緊嘅事，喺一間房特登開門去另一間陳列咗各種貨品嘅房，陪住我逐樣介紹。當時我已經諗：『點好意思淨係參觀？』

買咗三粒 half pan，仲以為可以攝喺 akademie個盒中間嗰行，但原來唔夠位，唯有另外擺。

擺住先啦，再有多先算。

schmincke嘅顏料真係好輕盈清透，最鍾意中間嗰隻綠色。

d顏色自帶層次感，唔知係筆嘅功勞定係顏料本身咁神奇，尤其呢隻綠色，局部泛少少黃，我未用過 horadam，唔知係唔係正常，不過我幾鍾意。

好鍾意 Waterford嘅質感，顏料散喺紙上面真係好靚。

不過我試完色就收埋咗，都係冇意慾畫畫🤷