跟阿 sir畫過再畫呢幅好有幫助，不過我都畫咗幾個鐘，冇人 guide住左諗右諗先敢落筆。
今次唔畫到咁黃，但係天空嘅黃色都係太黃，幾時先會記得 tone down個黃色嚟畫天呢？次次都畫完先後悔。
畫唔到好光嘅陽光，明明都留咗白😒
d水畫到好似雲霧咁，唔應該對樹冠嘅倒影咁認真，已經擦過，但救唔到喇。
淨睇上半都唔錯，成幅嚟睇都係冇重點。
 |
| Cotman on Saunders Waterford 190g rough 15" x 11" |
原來猴麵包樹又叫猢猻木。
我係睇小王子知道猴麵包樹，所以曾經以為呢種樹係虛構嘅。
聖誕節喇！
呢幅聖誕老人係近期我對自己比較滿意嘅👏👏👏
今次用咗 Daniel Smith，因為我覺得佢隻 perylene red幾聖誕。
因為第一次用 Daniel Smith，開始畫嘅時候好似同 d顏料好陌生咁，唔知點落手。
而且我得十隻色，偏偏阿 sir叫我哋用嘅橙色同塑膠綠我係冇嘅，買嗰陣諗住橙色可以自己溝，塑膠綠就⋯阿sir係經常用，不過我本來都冇諗住用 Daniel Smith上堂㗎嘛😄
不過我都覺得不枉學咗咁多年，阿 sir叫我哋用 a＋b溝一隻色，或者要用邊隻色，我揸住有限嘅十隻色，都亂七八糟咁溝咗出嚟，都幾開心。
 |
| Daniel Smith on Saunders Waterford 11" x 15" |
唔知點解阿 sir教我哋用橙色＋朱紅嚟畫件衫，我覺得太橙，我都係用番我鍾意嘅正紅色，睇吓，件衫係唔係好靚？好有質感？
我覺得自己畫得個樹林幾有氣氛，不過雪地就好似爭 d乜咁，會唔會係太乾淨？
畫水彩真係唔可以太乾淨，無端端都要撻 d顏色落去整污糟佢😂，感覺會比較有層次。雪地個紅影都係太乾淨。
阿 sir已經習慣咗我嘅孤僻，同埋剛愎自用😂，佢行過都唔會主動話我應該點點點⋯，如果有一日阿 sir睇到呢個 blog，希望佢知道我只係想幅畫好定唔好都完全係自己畫，阿 sir修改過係靚好多，但第時睇番會誤會自己畫得好好，睇唔到自己邊度唔掂。我聽有位同學講，佢話跟阿 sir學畫好好，學到嘢之餘，上完堂仲有一幅俾阿 sir修改到好靚嘅畫帶走。真係人各有志啦😁
睇睇吓，幅畫係唔係有少少陰森😟😂
早排睇 Mill Milk Madagascar嘅片，見猴麵包樹大道個 view好靚，已經 cap咗圖諗住畫，咁啱阿 sir呢個星期都係畫猴麵包樹啊 ～👏👏👏
首先係畫咗個天先，好少用到咁多黃色㗎，畫完個天就要換水，因為水都黃晒，再落去畫天驚會變綠，佩服唔使換水嘅同學👍
講到個天，我又失敗咗喇。橙黃嘅落日餘暉接住藍色嘅天，阿 sir嘅習慣係加一層紅色嚟緩衝，唔俾黃加藍變綠。我用藍色打橫由高掃到低，掃掃吓就掃埋層紅色😨，爭 d收唔切手掃到黃色😱
然後⋯仲加咗幾粒雲⋯，唉，唔好講喇😅
幾棵樹又俾我畫到站在同一陣線咁，其實佢哋唔同遠近㗎😖
 |
| Cotman on Saunders Waterford 300g cp 15" x 11" |
呢幅係畫班嘅圖片，我冇上嗰堂，自己試吓畫，所以色彩冇乜層次。
起完稿冇再睇圖，糊哩糊塗將幾棵樹畫咗去後面😂，而家成個構圖好似重量唔均勻咁。幾棵樹本來應該喺矮樹叢前面，咁前面兩重山坡就唔會好似而家咁無聊😂
個亭用咗留白膠，又係有 d捽唔甩😥，係唔係因為太薄？
 |
| Schmincke on Saunders Waterford 190g rough 7.5" x 5.5" |
早排去咗 joy in arts，本來想買番粒 schmincke嘅紫色，同埋睇吓有冇一枝 black velvet畫筆。
不過買咗幾枝 Daniel Smith，只係買咗 5ml。
原來之前嗰枝閃閃係 15ml，呢種色買咁大枝做乜呢，擺到 binder分離咗😌
仲特登為佢哋買咗個新 palette。
13格幾啱數，本來有個細 d嘅，但細細個竟然有成 over 30格，咁細個 palette邊有人擺咁多色㗎😕，我好鍾意嗰個 size呀，好可愛㗎。
我揀呢幾個顏色，都算係 basic colours，淨係用過嚟畫 colour chart，呢個月冇乜心機畫畫。
呢兩個星期都冇心機去上堂，上星期六去咗 joy in arts諗住買枝水彩筆，但冇我想買嘅型號。想買 schmincke horadam嘅紫色，紫色好好用，成盒最快用完係佢，我諗住用完嘅色都會轉 horadam，不過都係冇，點解呢⋯，我仲以為紫色都算 basic colour添。
買咗幾枝 daniel smith試吓，不過連 colour chart都未有 mood整。
 |
| Schmincke on Baohung 300g HP 7.5" x 5.5" |
粉紅色同紫色部分好似多咗 d，我本來諗住右上加少少㗎咋，見顏色咁靚，愈加愈多😁
d花畫得冇乜精神咁，好彩鈴蘭嘅外型突出，求其有個形就似。
唔通係我唔識用留白膠？今次又係捽唔甩，朵朵花都有 d膠黐住，好彩 d膠顏色同我上嘅色一樣（😂又會咁啱嘅）。
今次呢枝留白膠都係筆形嘅，係為上一堂買嘅，呢類筆型留白膠都出得唔暢順，應該係因為膠質嘅關係啦，都係傳統嗰種最好嘅，不過又留唔到細位⋯，再要用先算啦。
erm.....呢幅.....，唔知講咩好，畫咗十年畫，都仲係畫到咁，未至於要沮喪咁誇張，但的確係對自己失望嘅。
成幅畫最滿意係划船人嗰枝桿。
 |
| Cotman on Saunders Waterford 300g CP 11" x 15" |
