水彩花卉風景 2017-2 - 罌粟花

嚴重感冒，冇去上堂，成二百幾蚊一堂，好心痛....

同學whatsapp咗幾張示範嘅相畀我，仲簡略講咗重點，都算望梅止渴啦😄😃

第一次見阿sir打濕晒張畫紙，真可惜睇唔到，以前Miss Ho次次都係咁畫，d顏色四圍走搞到我哋好沮喪，而家經驗多咗，先知道佢走開都冇問題。
我畫得好慢，次次張紙都乾咗暈唔開，我今次連底都整濕埋，真係保濕好多喎。

主體兩朵花比較堆砌，有d厚，完全冇水彩嘅輕靈飄逸，但總算似朵花。
幾個罌粟果淡淡得嚟又有色彩同立體感，我自己好滿意。
除咗右上嗰四個色塊整齊咗d之外，成個背景都好好，都係因為張紙保濕得夠耐。
其實背後嗰朵花都幾敗筆，畫實咗，冇得改，又唔可以加筆，除非洗啦，但我唔想冒險，洗完可能仲實，算啦。
朵花用多咗ultramarine blue，瘀瘀哋，淨係加紫又唔係好夠暗，....或者淨係底下加？唔應該將有藍色嘅位置拉到咁高....

Shinhan on Saunders Waterford 190g rough 11"x15"

試吓畫一幅顏色鮮明d嘅，用咗橙色喺底，盡量唔用藍色。
顏色係比較明亮，不過毫不意外地畫得比上次差，朵花仲生硬過上一幅。