五個傳心師都各自同到龜龜溝通，得到五個唔同嘅故事，咁邊個版本先係事實呢？
事實係，五個都唔係事實，布歐係隻假龜，亦冇離家出走。
世界咁大，可能真係有人能夠同動物溝通，但肯定唔係呢幾個囉。
而家好多人當寵物係仔女，呢行應該有得做，不過落d本啦，唔整個office都花小小時間親身見吓隻動物，走失嘅都要攞件玩具嚟做媒介，同個主人面對面，衰咗容易兜，要踢爆你都冇咁容易，而家whatsapp張相就得，等你同假動物都話溝通到，幾瘀呢。。？
呃人嗰d為搵錢作故仔唔出奇，但唔明點解有人會相信睇相就溝通到，假到咁。
最令我我詫異嘅係有個專欄作家，我一向都覺得佢有見地，估唔到佢都信。
唔通心裡有愛就令人純真？
寵物死咗都仲會去搵傳心師同佢溝通，就梗係好錫隻寵物，好唔捨得啦，咁話知道主人傷心實冇錯；見得男主人去女主人冇去，估男主人比較在乎好正常，煽情說話針對男主人亦好正常，所以就話龜龜特別擔心男主人；咁就算寵物係老死，主人都會覺得自己照顧得唔夠，話寵物知道佢自責好擔心，就更係溫柔咁擊中佢死穴。個個主人都以為自己同隻寵物嘅感情係世上獨一無二，傳心師一定係傳到心先會知。
我估去搵傳心師嘅人，都係想有人編個故事畀佢，同佢講吓隻寵物，根本唔在乎真定假。三幾百，當買寵物用品。而家有線咁樣樣，以後人哋搵邊個玩？所以網上有唔少人抨擊有線，話佢哋用假龜係有心setup d傳心師，冇道德。
呢個社會好病，思想紊亂，本末倒置，拆穿騙局都畀人鬧，呢班傳心師以為呃人真係唔洗本，whatsapp睇相就作故仔。如果佢哋真係能夠同動物傳心，係可以即時踢爆番有線玩嘢噃，咁就紅咗，其門如市啦。
呀....諗番好多年前，我第一次喺roadshow見到有個前女藝人同埋佢隻狗，話佢學咗動物心理學，（可能比動物傳心術實在d，起碼係觀察了解，唔係傳心術咁玄），所以知道隻狗有個心願，就係『出。鏡』，所以就帶佢出鏡接受訪問......哈哈哈哈哈.....
~*~*~*~*~*~*~*~*
31 July, 2017
究竟係我陰謀論、對人冇信心、定鍾意唱反調？
邊個狗主冇畀過雪糕狗狗食？
就算冇，都可以話狗狗見過人食，所以都想食。
相信狗狗就算點悶悶不樂冇胃口，畀雪糕佢食點都會開心番一陣嘅，係嘛？
咁又算傳到心嗱？！
仲要係『應該沒有甚麼漏洞』....
唔明點解咁多人對有線呢一個action咁不滿，其實有線踢爆嘅唔係動物傳心術，而係嗰幾個所謂嘅動物傳心師，....就算相信動物傳心術，都唔會想畀人呃啫係咪？d人唔感激有線仲要鬧，真係....
定係....d人根本就覺得 / 知道 / 認同動物傳心只係一種自欺欺人嘅事，都冇諗過真係會傳到心，所以有線一踢爆，佢哋就覺得係踢爆咗整件事？
唉....我總係覺得，對寵物咁痴嘅人（注意：唔係講緊一般愛寵物嘅人，只係指寵愛去到超越尋常嘅人），本身就係有一定程度嘅痴、一定程度嘅自欺、一定程度嘅不可理喻。
~*~*~*~*~*~
10 December, 2021
今日仲聽到人講呢件事，話 cable tv咁做『好黑心』。又係我幾鍾意嘅人，以有正義感見稱。佢話（其實一路都有人咁講）件玩具唔會憑空做出嚟，一定有個原型，人哋係同個原型傳到心。
well，五個唔同故事出咗嚟，已經證明起碼有四個係假。
就算有原型，都唔係專門為嗰隻真龜造像，一定有改動，能夠代表嗰隻龜？一堆黏土就有埋嗰隻龜嘅精魂？咁啱嗰隻龜又離家出走咗？interesting😊
沒有留言:
發佈留言