水彩花卉風景 2017-3 - 黃昏沙灘

尋晚又係傾向於水氣淋漓、大筆揮灑嘅畫法。
首先用濕畫法渲染所有底色，最緊要就係光位留白。
主要用黃、紫紅、紅、ultramarine blue，小小橙、紫同深啡。


唔知係唔係我個樣生得剛愎自用呢....，唔講日常生活，就算學畫，Miss Ho又好，符sir又好，都唔會主動話我畫得點點點，或者話你呢度唔可以咁要咁咁咁....
而我又唔識點問，有次我問蘇sir，『咁畫得唔得呀？』佢話：『得啦，你畫到咁靚點會唔得？』........
今次都係，阿sir行嚟行去，都冇同我講過乜，最後佢坐番喺位，我拎幅畫去問佢：『阿sir有邊度要改呀？』好似表示自己覺得冇問題咁...，不過唔理咁多喇，應該係我自己多心啫。
阿sir即刻就指出咗幾樣嘢，
1.  沙灘要暗d，黃昏嘅沙灘係好暗嘅，只有夕陽嘅光
2.  大礁石同水面接位要平整
3.  水平線要平
4.  海面要加番d橫線表示水波盪漾
而我自己就覺得左邊天空唔夠暗而且顏色太鮮，唔知加紫藍得唔得....，定會更加鮮色....？應該溝隻污糟嘅灰紫....，紫加黃....？

畫畫，尤其是寫實畫都係用d灰蒙蒙曖曖昧昧嘅顏色，喺呢種色調中表現顏色真係好大學問，符sir就最拿手，佢成日話：『灰得嚟綠綠哋，藍藍哋，好微妙嘅...』『呢塊灰之中有小小紅，呢塊灰之中帶綠...』好生動嘅事物就喺各種灰之中出咗嚟，less is more，就好似呢幅畫，阿sir用好多灰調映襯出夕陽嘅絢爛，我知道我用色係單純咗d，就好似我做人一樣。


整體都加深咗，突顯到落日嘅光，
沙灘都係多咗小小刷白，唔知點解枝筆好似汲唔到水咁，....定係我調色份量唔夠呢....？我見阿sir調色盤水汪汪咁，而我總係得幾個水珠....，嗯...所以唔好怪枝筆。
仲有落日嘅光照落海面，應該有反射上礁石度，如果加埋，光線應該會比較活潑。

Shinhan on Saunders Waterford 190g rough 11"x15"

幅畫係跟阿sir示範咁畫，張圖唔同色調，而且冇咁多色彩。如果冇人示範，我諗我會跟足張圖，以前Miss Ho話『唔好追色』，但佢自己示範都係手到拿來咁調出一樣嘅顏色，我一直唔知唔追色應該點去變化，希望以後我能夠擺脫到原圖嘅規限啦。