水彩花卉風景 Oct 2018-6 - 玉蘭

上呢個 course除咗學畫，仲可以認識花。
好似呢堂畫嘅，我本來以為係桃花，原來係玉蘭。
我知道嘅玉蘭從來都係白色，原來仲有其他色。

老師先用 pink, red, cerulean blue, 青綠上底色，勾出花嘅輪廓，趁濕加上背景枝葉。
我睇老師示範覺得少少疑惑，點解顏色分佈同圖片完全唔同？
後來老師話，唔好理圖片係點，因為朵花係偏白色，背景同花連接嘅地方要深色，咁先可以『托』到朵花出嚟。

上完底色逐片花瓣用少少紅加水暈開，
枝幹用青綠加少少紅同啡。

花瓣陰影位用藍色。

每次睇示範嗰陣，我都覺得胸有成竹，一埋位就知道點畫咁，但其實每次都係一落筆就迷失。花…我又唔記得咗老師用乜嘢色，於是用咗 permenant pink，加小小 cadmium red，效果唔係幾好…

忽然覺得 cadmium red好似偏朱紅，係唔係應該買番枝正紅色？
暗位用番花瓣嘅色，加塑．膠．綠，係唔係應該買埋塑膠綠？

上底色我已經刻意濃d，但乾咗都係太淡，唯有上多一層。上多一層嘅結果就係灰晒，因為我冇諗到要跟番第一層嘅顏色，於是變咗混色，顏色唔再單純，冇全部變咗一樣色已經算好彩。
兩朵花唔係幾好，不過仍然有得挽救，第二層要諗清楚先好落筆。
近來已經完全回歸重疊，好耐冇用縫合法，連老師示範都係重疊多，可能發現縫合對我哋嚟講都係太深奧啦。

唔知點解最近影 d相咁黃。
畫第二層繼續錯，唉，真係要買多兩隻色。
左邊嗰朵片片花瓣都唔同色，有一塊仲燶咗添。
今次調色好失敗，畫到朵花好污糟。
不過花幹好似幾好，尤其是右邊嗰個花冧。

Cotman on Saunders Waterford 190g rough 11"x15"