並唔係每晚都發同一個夢，而係隔一段時間發吓咁啦。
最初，彷彿係有人約我一齊去一個地方，但詳細唔記得，可能因為太耐，或者因為呢一幕冇重覆出現好多次。
維持最長時間嘅情節，係深夜，感覺係有月光，我同幾個人一齊朝住目的地行，
雖然一齊，但又各有各，分開少少距離咁行。
我唔知自己著乜，但其他人都著住黑衫黑褲，黑玫瑰咁。
最有趣係，維持咗…應該有好幾年，都係行緊同一段路，嗰條路就係當時屋企樓下一個好大嘅空地，有個好簡陋嘅足球場，有兒童遊樂場，我最記得隔開行人路一級級由矮到高用紅磚砌嘅矮圍牆，我每次都行得好近圍牆，其實每次畫面都係一樣，夢境中都只係行一陣，大概幾十步，嗰種深夜嘅黝黯，同埋半夜特別涼嘅空氣，對細細個嘅我嚟講，真係好刺激。
同我一齊行嘅大概有4、5個人，其中兩個係明星嚟架，不過喺我咁細個嗰時佢哋都已經唔再拍戲（我唔想用『過氣』，畢竟我哋係一齊大冒險過嘅 team mate呀😄），呀…，記起喇，就係佢哋約我一齊去嘅。
係咁行咗好幾年，終於行咗一段距離，其實就係漸漸行到個空地嘅盡頭，現實中係另一橦樓，呢橦樓嘅地下係冇單位嘅，得幾條柱，即係又係空地狀態，但夢裡面就變成一間類似古堡或者古老莊園，地下嗰層冇乜印象，一樓有一個好大嘅露台，我哋就係要上去。
我見有人好好身手，打個跟斗就上咗去，但都有人試咗好多次，而我…我好似係想助跑、跳起、翻跟斗，或者攀爬上去，但唔成功，於是，夢境又喺呢幕重覆咗一段日子，我好似有做各種嘗試，同行嘅人都好似有試過幫手拉我，終於有一晚…我唔記得我點上去，只知道上咗去。
上面係一個好大嘅『走馬露台』，大家都四處查探，唔知要搵乜，如是者又搵咗唔知幾耐。
有一晚，唔知係我定係其他人，發現咗一盆盆栽，種住一棵番茄樹，樹上結咗幾個大番茄，好大個，我伸手去番茄底部想托住佢，我唔係想摘落嚟，只係見到咁大個蕃茄好得意想揸吓喺手，點知，個番茄就喺我掂到佢預備揸住嘅時候，喺我掌心開始收縮，好似氣球放氣咁，我再去試攞另一個，但都係咁，我有 d失望同不解，咁就醒咗。
呢一幕夢境可能冇重覆過，或者最多兩三次，之後，我就冇再發呢個夢。
但個蕃茄喺手上漏氣縮細嘅感覺，同埋嗰種不解、失落嘅心情一直都冇忘記。
一個吏詩式嘅長篇夢境，我唔介意有個 tragic ending，但竟然就咁草草收場真係好令我失望，連一個 decent d嘅 ending都冇。
難道係預示我嘅人生？逐步行過漫長嘅路，千方百計接近目標，最後都係一無所得？
好 sad嘅夢，好彩當時唔明，如果唔係點做人？
沒有留言:
發佈留言