畫畫 – 朱纓花 Calliandra haematocephala （素描）

又係喺我嘅 urban hiking途上遇到嘅不知名花朵，想叫佢『小花』，可愛 d，但唔得，佢都唔小，大過雪米糍。
（21 Apr, 2021 喺 google打『紅色球狀花』，第一張圖就係佢😄）

通常呢 d種喺路旁嘅花，都唔係好能夠分得清楚佢哋嘅結構，因為多數都唔係種單一品種，好多有心無意嘅生埋一齊，試過想睇清楚佢點生，幾多塊葉，點分枝，睇完就唔記得咗，就算影咗相，睇番都係一堆咁。唔通真係要寫生先得？

好少見人寫生，見過幾次，都好多人圍觀，有次有兩個外國人，又係九龍公園，佢哋坐喺路邊長櫈畫水彩，我行過見兩個都停晒手，身後圍滿人，感覺到佢哋 feeling uneasy，但人群冇散去，可能覺得佢哋隨時會再開始。身為路人，寫生真係好好睇，但自己寫生嘅時候，我就會唔想人睇。試過幾次跟老師同同學一齊寫生，因為人多，路人見人多反而唔會迫近嚟睇，係好 relax嘅寫生經驗。有一次 lunch去咗九龍公園單人 picnic，食完飯坐喺朵花旁邊同佢造像，不過我都係用咗 15分鐘畫一朵好簡單嘅花，仲係用鉛筆添，冇道具唔會引人注意。

😅點解講到咁遠嘅？

現場、影相都睇唔清楚，又唔知佢個名，想上網搵都唔得。所以有時都驚會將唔同品種嘅花同葉畫成一棵，哈哈哈……

主枝後面嗰幾塊晃晃忽忽嘅葉，係特登畫喺呢個位，托枝幹嘅光位出嚟。

嚟個近鏡，朵花都有層次架。