畫畫 – 捲捲葉（素描）

單色素描好 relaxing，唔使理顏色，可以心無旁鶩咁堆砌立體感，係咁捽捽捽，慢慢睇到立立哋體，好有滿足感。

其實我唔係好肯定佢係乜，

可能係一塊爛咗嘅葉？定係呢個品種就係咁？

不過我覺得佢幾可愛，而且張相明暗好分明，形態又簡單，好啱我畫😄

最近多咗出去，見到好多唔同嘅花草樹木，以前都冇留意過。

有一日落咗少少雨，我去到個公園，聞到一陣好似樟木嘅香氣，平時都冇留意，唔知係唔係落過雨，空氣濕濕哋令 d香氣明顯咗呢。

樹香真係好好聞，聖誕樹都好香架，以前 office樓下大堂每年聖誕都會擺一棵好大嘅真聖誕樹，我日日都會特登落去聞吓陣味。

而家講究環保，好少用真樹，都幾失落，好掛住嗰種香氣。不過運一棵大樹嚟又真係幾無為嘅…，棵樹長到咁大斬落嚟擺一個月，然後會點處置？唔係喎…，新年仍然擺大大棵桃花…

咁唔通係運送問題？桃花係本地嘅，聖誕樹唔記得邊度嚟，但有一次見到張單，運費仲貴過樹本身。

會唔會係原產地因環保關係唔再賣？😄諗咁多，因為真係好掛住。唯有多 d去聞吓樟木味啦。