畫畫 – mushroom house （素描、水彩）

mushroom house真係好可愛，mushrooms又有好多品種，不過到想畫又諗極都諗唔到可以點畫，真係冇創意。

先畫一張素描，練習吓，順便當 value study。

水彩版，顏色開得淡咗，試吓會唔會好 d，平時好似一上色就實晒咁。hmph…，真係奇怪，明明一向都係乾咗淡晒色喎…，我究竟講緊乜？究竟有乜問題？

今次想畫背景先，

顏色幾滿意。

都算做到我想要嘅不規則邊線，原來落筆要猶猶豫豫咁，不過，內容都係好似冇乜變化，係唔係張紙太濕，顏色混合得太好呢？

係唔係一定會咁嘅呢？

谷起到咁，d顏料好容易走晒去中間，有次上堂畫個天，顏料流晒落中間，搞到個天有直紋。（不過乾咗好似一度光由雲層照落嚟咁，又幾有 feel。或者就係水彩好玩嘅地方，好多unexpected，可以破壞，亦可以 enchance幅畫）無論張紙大定細，橫畫定直畫，個凹位總係垂直，點解呢？

不過今次中間又保持到清白喎，真係奇怪。

畫到呢度都仲幾有水彩感。

我好鍾意下面嗰 part綠色，接近我想要嘅樣，好開心。

梯級好似有少少 halloween嘅感覺，畫嘅時候失去方向，唔知自己想點。

成張畫都算幾有水彩 feel，同埋幾舒服。

Schmincke Akademie on Saunders Waterford 190g rough 7.5"x5.5"

今次刻意加好多水調色，因為我睇到 iraville都係咁，佢每一層顏色都好淡，有時佢會疊好多層，效果依然好透，唔會厚實。

但都可能因為佢用 schmincke horadam，所以特別透？咁我用 akademie效果都唔錯。

post喺 group度，同學睇完話我今次畫單色系，我先記番起，我本來諗住個身用淡咖啡色，唔係單色呀…，離晒譜。

睇真 d，個頂畫細咗，冇咁可愛。

法國網球公開賽 The French Open 2020 （21 September - 11 October, 2020)

 今年乜都亂晒，french open調咗嚟十月。

我一直都覺得 us open 同 australian open都喺炎夏，成 40度，點解唔互換日期，等 d球員唔使咁辛苦？

原來凍仲唔好，rafa話好唔習慣，因為佢哋雖然係運動中，身體會發熱唔覺凍，但到 break同埋準備接發球時係比較靜態，會好凍。

我諗，成身汗，會更凍。

今日稍後就係 semi final，

djokovic vs tsitsipas

rafa vs schwartzman

thiem 喺 QF輸咗畀 schwartzman，唔知係唔係喺 us open exhaust咗，兩個 gs好似只隔兩星期。

hmph...，我唔係覺得 schwartzman會贏到 rafa，但係...hmph...rafa每次贏完佢都會損耗好大，今次final對手係 djokovic喎（tsitsipas會贏到 nole？ someday, but not today囉），半個 rafa夠唔夠贏？雖然係 clay啫.....

Vamos Rafa ！！

~*~*~*~*~*~*~*~

djokovic 嘅教練，ivanisevic，話 "rafa has no chance against djokovic in these conditions"，咩 condition？就係凍、濕、天陰，同埋閂咗頂棚，係真，我都覺得唔係 rafa鍾意嘅場地條件，但講到 no chance好似過火咗。

結果，rafa第一局就送蛋，and then，60 62 75贏咗佢第100場 rg victory，第13個 fo champion，第20個 gs，it's amazing！！

最後一分係個 ace，毫無準備之下就贏咗，結果，贏嗰一刻 kinetic energy唔夠，冇奔跑中掉拍、冇大字型融入泥地、冇掩面翻滾，只係跪地傻笑，勝利嘅激情渲洩唔到啊~~

觀眾太少都係一個因素，現場感覺冷清，冇萬人哄動嘅歡呼聲，真係欠咗 d激情。

呢套衫…，成套天藍色，無論顏色同款式，都好似幼稚園運動衫咁，配合埋佢今年咁特色嘅慶祝動作，真係天衣無縫。

唉，終於，gs數同 federer一樣，我一直都相信佢會超過 federer，始終佢比 federer細五年，只要冇傷到要退役，一定可以。djokovic先係最大對手，雖然 rafa有 rg，但 djokovic喺 ao都好無敵喎，仲未見有人對佢有威脅，反而，thiem係好有 potential挑戰 rafa嘅 clay。

我覺得 rafa總係唔好彩，佢頭十年要挑戰 peak嘅 roger，到 roger開始放慢，djokovic又愈嚟愈強大，仲要好似好克制到 rafa咁，所以畀人話佢冇一個統治時代，唔算係 goat，但我就覺得，佢簡直係一個承先啟後嘅存在，冇佢，未必有咁熱烈嘅十幾年，federer可能早就退休，djokovic未必會被啟發到原來球員係冇極限，well，anyway啦。

djokovic係唔係同 line judge有仇？佢4th round接波時又撥咗個波打到個 line judge，呢次好明顯係失誤，個 judge話冇事，好似冇罰到。唉，小心 d啦，我成日都覺得場邊嘅工作人員好危險，尤其是係 wimbledon嗰兩個網邊 standby嘅小朋友（我唔肯定係唔係 wimbledon先有呢個位），其實係唔係應該加少少防護呢？起碼加個眼罩吖，打到眼都唔知點算。

今年轉咗個波，多數球員都唔鍾意，重咗又慢咗，djokovic都係咁話, 不過佢好理性咁補充：『都可能係天氣因素影響。』佢講嘢總係咁得體，點解都好似成日畀人針對嘅呢，定係因為成日畀人針對，所以講嘢盡量小心？不過，佢講得有道理，nytimes問過熱力學教授，溫度係會影響個波嘅 performance。wilson話呢款新波係特別為 rg場地設計，哈哈，真係唔好彩，當時都唔會諗到比賽會推遲半年，天氣完全唔同晒。咁多人唔鍾意，但 zverev就話好鍾意，仲話之前用開嘅 babolat係 worst of all times添😖

今年，真係特別，wimbledon取消咗，us open 同french open改期改到接住打，atp final暫時冇變，rafa會唔會參加？其實我只睇過佢一次打 atp final，究竟佢係唔係年年都去，定係真係冇去？ 我覺得呢個 final係 atp為咗賺多一輪錢諗出嚟，經過一年比賽，ranking score已經係 final啦，點解前八仲要比多一次？排第八嗰個贏咗係唔係代表佢係呢年嘅 best？可能佢一個 gs都冇喎，可能佢呢年贏得最少，只係呢場贏呢？it's ridiculus！

anyway，希望明年一切 on track，如無意外，七個月後，又有另一次 french open，真係奇妙😂

V A M O S    R A F A ！！

~*~*~*~*~*~*~*~

FO 結束後冇幾耐，出現咗一個笑話，

federer : novak, I tell you a joke

djokovic : what?

federer : roland garros

djokovic : i didn't get it

federer : yes, you didn't get it

使唔使咁 mean？

改名改名改 blog名

試吓 google自己個 blog，發現個 blog名好唔得😆😆😆

好似話人哋無聊隨便咁😆😆😆

不如改個名啦。

雖然個新名娘娘哋，用住先，因為忽然都好想改名😆😆😆

截個圖留念。

其實都想換張新圖，但搵唔到點換，都唔知自己當時點 setup，的確係幾隨便。

（都係舊名有 feel d）

畫畫 – mushroom house （素描、水彩）

畫班同學好勸力，隔幾日就 post幅畫畀大家睇，令我都覺得想畫番吓水彩。

第一樣諗到嘅都係 mushroom house。

諗住先畫張鉛筆稿做 value study（煞有介事咁），

畫畫吓變咗素描（其實素描幾好玩，單色，唔使分心諗用色，心無旁騖咁堆砌 3D效果，好 relieving）。

呢排好似乜都唔識咁，連影張相都影到咁暗，較唔到光，唉。

跟住畫水彩版，拎起枝畫筆都有少少陌生，都唔知要點咁。

Schmincke Akademie on Saunders Waterford 190g rough 7.5"x5.5"

冇乜好講，

第一層唔滿意，

希望第二層修正到，

修正唔到又寄望第三層，

終於畫咗幾多層我都唔記得喇。

Schmincke Akademie on Saunders Waterford 190g rough 7.5"x5.5"

畫嘅時候係知道咁畫唔得，

畫完又好似明白咗應該點畫，

於是，又畫多張試吓，

結果…好似仲 flat，

次次都係咁。

最近 blogger轉咗樣，我覺得好難用，圖片同文字都好似不受控制咁，hmph！

『我的大叔』

『我的大叔』真係一部獨特嘅韓劇（可能我少睇韓劇啦），

裡面冇一個開心嘅角色，除咗飲醉，冇人笑，冇好事發生。

~*~*~*~*~*~*~*~*~*~

生命有乜嘢意義？

無論活得好唔好，

做咗偉大嘅事，

定係卑劣嘅事，

如果根本冇『生命』呢回事，偉大定卑劣都不能成為一回事。

本來無一物，何處惹塵埃？

定係，生命同生活係兩回事，

生命嘅意義，就單純係『活著』，

活著，先至構成『生活』，

有生活，先至有偉大同卑劣，先至有開心同唔開心，

咁，如果冇生命存在，

一切都唔會存在，

咁，活著到底為乜呢？

我，冇厭世，只係唔明，

就係因為唔明生命有乜意義，

又既然已經活著，

唯有活得開心d，

所以，活得無無聊聊，隨隨便便。

其實，人生真係唔開心同煩惱多過開心事，

不過，將人生分開段落嚟睇，就可以有淨係開心而冇煩惱嘅時候。

所以，我成日都諗，

如果，有人問我：『你日子過得點？』

我會話：『如果唔諗唔開心嘅事，我係開心嘅。』

~*~*~*~*~*~*~*~

雖然套劇係咁，但以我一個連睇冰河世紀都可以一開場就喊嘅人睇嚟，

都搵唔到幾多喊位，

原來，真實嘅人生好少令人喊，

更多嘅係感到荒謬、無奈同抑鬱。

所以，開心嘅時候要盡情開心呀。

畫畫 – mushrooms （水彩）

就嚟一年喇，好少好少畫畫，畫具都有少少塵。
畫嚟畫去都係 mushroom，仲要唔知有冇呢個品種添，不過唔緊要啦，mushroom嘅世界千奇百怪，有都唔定。

呢幅畫，好大突破㗎，主要用縫合法，好少重疊，
而且畫得比較 relax，唔強求漸變過渡（其實漸變唔一定適合，只係唔知點解認為咁先係水彩嘅最高境界），亦唔強求色塊邊緣完整（呢點又係莫名其妙嘅想法）。

冇 reference嘅關係，光影好似唔係好 make sense，
兩粒一組唔同顏色明暗，愈睇愈奇怪
anyway，我好鍾意粒菰嘅顏色，schmincke果然好清透。

畫完覺得畫面好 blank，灑咗幾點顏色上去，即時好似豐富咗咁，真係好用。

Schmincke Akademie on Saunders Waterford rough 5.5" x 7.5"

希望疫情快 d過去啦，我見 d course都開始 enrol，但我想等情況穩定 d先，仲係未放心十幾人喺一個課室。

但係，疫情過去又點？
有 d嘢，唔過得去，又返唔到轉頭…

Djokovic disqualified from US Open

今年 federer同 rafa都唔參加 us open，我仲以為Djokovic攞第18個 grand slam應該冇乜疑問，點知佢竟然喺 round 4被 DQ。

對手係 carreno busta，打到第一set 5-6 djokovic落後緊，而且被破發球局，
佢行去底線準備下一局，期間將袋住嗰個波攞出嚟，用球拍拍向後，其實用『撥』嚟形容可能更接近，我唔覺得有『發洩』或者『發脾氣』嘅意味，不過拍出嘅位係高咗，我見多數都係掉落地，近地撥落底線。
咁…呢吓唔同係唔係就係發洩…？
我覺得係被情緒影響而發生嘅錯失啦，冇打到人就好難話佢發脾氣，
問題係佢又真係打到個司線員，咁就好大件事。

atp對裁判、司線員同球僮都好保護，球員對佢哋有任何 abuse嘅行為都唔會有好下場，
其實都唔係第一次有球員打到司線員，不過如果係意外都唔會有乜處罰嘅，
要罰都係罰錢，最多罰分，但直接 disqualify就好嚴重喇。
所以，呢次佢哋應該係認定係蓄意，唔係意外。
佢落後緊，剛被破發球局，輸多一局就輸一set，唔通咁就認為佢係處於一個會發脾氣嘅形勢？
佢又唔係未輸過，會因為咁發脾氣打人咩？
而且，如果真係發脾氣，佢可以 smash racket呀，又唔係未試過，使乜拍波呢？要就住就住咁。
（我真係感同身受架，細個時，媽咪叫我洗碗，我唔想，俾佢鬧完都係要洗，唔小心跣手打爛隻碗，佢就一口咬定我係發脾氣，好無奈）

Nevertheless, rules are rules, 佢亦唔係第一個因為咁被 DQ嘅球員，只能怪自己太輕率，嗰一刻專注咗喺自己嘅情緒，冇留意週圍嘅人。

不過咁，19 French Open， federer vs nadal，
federer輸到第三 set，將球向觀眾席打出，好明顯係刻意，雖然係下手，但力度唔細，嚇到前排觀眾縮埋咗。
聽聞佢冇被 DQ，連罰款都冇，只係口頭警告，點解嘅？
因為冇打到人？
因為被攻擊嘅唔係 officials？
規則呢？規則呢？

rules are for ordinary people only, not for the king。

djokovic呢半年好多是非，聽聞 adria tour爆出武漢肺炎感染事件，然後佢又籌組緊一個新嘅球員工會，幫 low ranking球員爭取福利，但唔係好受歡迎，rafa同 federer都唔支持，atp就更加唔會支持啦，即係利潤要分多份俾冇號召力嘅球員喎。

我唔知佢個新工會實際係點，但佢話係幫低層爭取福利，都算係有心人，因為以佢嘅地位，atp唔會虧待佢，有新工會仲可能會分薄咗佢嘅既得利益添。

對於 rafa 同federer嘅冷待，我覺得有 d…唔可以話係失望嘅，but raised my eyebrow when I heard this，『點解佢哋唔支持呢？』

要既得利益者出嚟為底層嘅同業發聲，係多麼難嘅一件事，hmph，佢哋仲話要 "unity, not separation"，我覺得係轉移重心囉，ok，你只係唔想造成分裂，咁是否認同為低層爭取呢？可以提出 alternative嗎？定只係簡單咁用 unity嚟擋開一個尷尬場面？

世事，總係咁相似，都係依住一個利害關係發展，既得利益者總係企喺掌控者嗰邊，就算旁人睇起嚟佢都已經賺到盡，甚至同掌控者嘅從屬關係其實已經逆轉，佢哋都係唔想發生任何變化，因為佢哋想繼續賺，而提出改變嘅人就會被視作罪人。

其實，atp同其他利益集團唔同，商業利益可以無止境咁賺落去，但fedal仲可以喺 atp體制內賺幾多年錢呢？都就退休啦。

本來我都高興佢攞唔到第18個 grand slam同 rafa拉近距離，但講到嚟呢度，I'm not so sure。

我變咗 nolefans？唔係，我對佢冇反感，但始終有保留，我都唔知乜嘢原因。

~*~*~*~*~*~*~

今年final 係 zverev vs thiem，



終於有個 90後攞到 grand slam，thiem係有實力嘅，不過喺今年咁嘅情況下贏到，冇 rafa、冇 federer，djokovic被 dq，運氣佔咗唔少部份。
zverev 先贏兩 set都輸，佢打唔到五盤呢個問題真係冇解決，打唔到五盤點贏 grand slam？除非好似 rafa咁 dominate啦。