水彩花卉風景 2018-4 - 風景寫生

呢個course本來冇寫生，但因為學校有function冇課室用，課程順延。可能老師schedule咗course後去trip啦，佢提議用一堂寫生代替最後一堂。

好開心，一直都想去寫生，跟老師去仲可以睇示範，真係太好喇。雖然只係去九龍公園，但寫生同畫圖片係好唔同。

上次跟miss ho都係去九龍公園嘅中國花園，上次清靜好多，唔知係唔係取景地點唔同，今次好多人練武練劍，我哋喺度畫畫，身後面廿幾人舞劍踢腿，好嘈。不過，好得意，當投入咗睇示範同畫畫，就完全感覺唔到佢哋嘅活動。到稍晏，又有更大群嘅外傭嚟野餐。

我以為老師示範完大家就分頭搵地方畫，點知所有人都留喺原地，咁我都唔好意思走咗去，唯有喺度盡量搵嘢畫。但我見大家都畫番老師示範嗰個景，似乎只有我畫其他，又畫唔到喎，搞到老師後來要為我再示範一次，真係唔好意思。我唔係有心要特別d，只係因為跟miss ho嗰次係睇完示範各自搵景畫，我以為今次都係咁。唉，咁大個人都仲係咁。

睇實景同圖片好唔同，圖片已經分晒遠近色調明暗，人眼睇實景會自動調整，遠近嘅樹都知道係綠色，...咁係唔係思覺失調會畫到好畫呢.....

我幅畫，畫到平晒，成幅都差不多顏色，好悶。

總結老師所講，寫生最重要係決定到焦點，焦點要最突出，搵一兩樣次要做陪襯，其他低調處理。

突出唔係指顏色，而係value，主體嗰棵樹比初時加深咗好多，加加吓樹葉嘅顏色同形態都走晒樣....

略略強調咗幾棵陪襯嘅樹同小樹叢，遠中近都算有...喇啩？...

不過左上嗰幾枝樹幹好怪，同中景嗰棵樹織咗個網咁，棵樹係唔係應該深色d等佢同後面嘅樹枝分開？但咁前面棵樹係唔係又要再加深d？

畫出嚟成個景同我想像中要表達嘅好唔同，而且感覺好近，冇深度，冇空間感，我諗係因為遠景顏色太濃，應該淡番d好d。

Cotman on Saunders Waterford 190g rough 11"x15"

本來諗住再修補一吓，但睇到幅畫就冇mood，算喇，連instagram都唔想post，真係唔見得人，唉，失敗。

寫生同臨摹真係兩回事，仲以為自己已經畫得唔錯添，一去寫生就見底.......

反而平時畫得唔算好好嘅同學今次畫得幾好喎，可能平時畀張圖片規限咗啊。

水彩花卉風景 2018-3 - 茶花

又係自己預習咗，想試吓唔睇示範會畫成點，想睇吓老師示範後，我可以改進幾多。
雖然，到底都係模仿，但模仿之中都有高下，right？

喺好多地方都收到同一訊息，就係圖片只係參考，唔需要/ 唔好跟足，但係，我諗唔到有乜嘢可以改動。
譬如，花嘅顏色，老師經常都會加入其他顏色令畫面豐富，但係我真係諗唔到可以加乜嘢色。
黃色？加咗唔係變橙咩？唔會好睇喎，
啡色？好似殘花咁，
綠色？會黑咗，朵花唔鮮，
藍色？比較合適，但好似會冇咗花嘅嬌艷。

我只係改咗個背景，⋯其實係改咗自己嘅習慣，背景太雜亂，正常人都知道唔好跟住畫。

朵花用咗permanent rose 加小小 cadmium red，用好小alizarin crimson強調暗位。

左邊塊葉自己加，好似實咗，咁實在就顯得明暗唔夠。兩塊葉都算係自己發揮，冇跟圖，幾滿意，尤其下面嗰塊。

d畫影咗相，好多細節同筆觸都睇唔到，所以係應該多去睇畫展，先可以睇到人哋嘅筆觸同色彩。

事實係，冇需要為改而改，老師都淨係用咗紅色。
估計佢用嘅係rose madder，同我一樣加咗朱紅色，哎吔，我好叻呀......

平時老師都係一邊示範一邊講解，但今次我見老師畫中間d花瓣時，都係全神貫注，唔講嘢，我諗因為真係要好小心，如果唔係花瓣會錯位唔自然。

起第二次稿先醒覺到，『點解要跟足幅圖，點解唔將上面朵花畫番正d呢？』淨係諗用色，咁基本嘅構圖問題反而諗唔到。

畫過一次都冇用，堂上畫一樣手足無措。初時提自己：『唔好記住上次點畫，要睇住現狀去畫。』點知到畫唔到想諗返之前經驗時，一d都諗唔起係點做到。終於，效果差咗，花瓣位置、水量、顏色、暈染都控制得唔好，連幾塊葉都差咗好多。

我仲考慮緊好唔好再用alizarin crimson強調暗位，咁會立體d，但成日咁樣嚟補救，我覺得似畫acrylic多過似水彩，內心覺得小小沮喪。

Cotman on Saunders Waterford 190g rough 11"x15"

我覺得......

今次老師畫出嚟似玫瑰多d，係佢一向嘅筆觸，輕柔，
相反我一向畫到硬蹦蹦，反而比較接近茶花嘅質感。

參觀 - 香港台灣水彩精品交流展

呢個係香港同台灣畫家嘅聯展，唔係隨便可以參展，好似要經過甄選，所以展出嘅都有一定水準。

畫展喺視覺藝術中心展出，呢個建築物唔知係唔係所謂嘅殖民地色彩，成個畫展都好有氣氛咁，好過文化中心。

幾懶都要出去睇吓人哋嘅畫，除咗學人哋有乜嘢技巧，仲要學吓點樣接受不完美，因為好多時都會為咗修正一個問題而搞出更大嘅問題，最後spoil咗成幅畫。

其實我都唔係好識睇畫，亦唔夠耐性好仔細咁睇，主要都係睇我唔識處理嘅地方人哋會點做，點表達。

第一幅就見到我一直都畫唔好嘅樹，融合得咁好但又唔會混成一種色。

彷彿係簡單嘅幾筆，表現咗山脈，

用色好靚，應該係黃同紫。

object唔一定要好整齊咁完成，好似呢幅咁，不過我估我會畫出好規律嘅狗牙邊。

單色嘅位置唔想咁悶，但又唔想加第二種色破壞調子，可以加個水花。





繡球花顏色可以好多變化，要表達花嘅形態但又唔應該/需要每一朵都畫到咁細緻。

葉都重重疊疊，要用各種深淺明暗。

 

朦朧但又表現到層次，係唔係先要對個object，同顏色有準確認識？

 

　


向橫伸展嘅線條表達動感，
但一定要好似呢位畫家咁了解人體結構至得，人物嘅肢體比例同動作都好自然。

用短同實嘅線條表現船旁或岸邊迴盪嘅水波。

次要嘅線條唔需要太雕琢，好似地上嘅草，唔需要一棵棵畫。

藍色呢塊水痕會drive me crazy，我一定會嘗試洗走佢，或者再暈染多次，

又或者再鋪多層色，
縱使明知道咁只會搞到幅畫唔見得人，

總之唔會由得佢喺度，仲要喺個咁接近主體嘅位置。

但原來，睇人哋嘅畫，又唔覺得水痕係好大敗筆，
但當然，我仍然覺得冇水痕會好好多。

好似呢兩筆咁硬嘅，出自我手，我會覺得係敗筆，
但好多時望個天，雲真係會咁樣，
只係畫畫嘅時候會畀咗『雲』一個stereotype，覺得佢一定係軟同圓。

有時想旁邊畫昏暗光線下嘅物件，好似呢兩張咁，

我諗係背景同旁邊嘅物件明暗差距細，主體同背景差距大。

伸展嘅線唔一定要由頭到尾都一樣顏色明暗，

有時會畀光線影響。

如果我畫，一定會用深色托塊面出嚟，

因為我學素描嘅時候係咁教，但原來淺色一樣得。

呢兩幅處理建築物嘅方法可以參考，原來唔一定要畫到好直好清晰，
不過兩幅都係黃昏暮色，映映綽綽，同天清氣朗有分別。
氣氛好似，但唔係同一幅，作者都應該唔係同一人。

好迷離嘅畫法，想像唔到點畫，會唔會係紙嘅質地加特別嘅wash？

       

















呢片雲彩好靚，一定要影低參考，呢叢花都係，顏色好靚。

唔同嘅背景畫法

 呢幅嘅用色同明暗係唔係平咗呢？呢幅花瓣係咪硬咗同實咗？  

　

　

呢兩幅係水彩定gouache？如果係水彩，留白真係好犀利。　

主辦單位實在太唔小心，我一直睇唔明呢兩筆係乜嘢用意（雖然成幅畫我都睇唔明，不過呢兩劃筆觸好唔一樣），原來只係面頭塊玻璃/膠片有刮痕，映咗落幅畫度。

.

畫畫 - 荷花（水彩）

記起早年我曾經睇過教畫水墨荷花嘅書，嗰時試過用水彩嚟畫，都唔記得畫成點喇，今日見同學post水墨畫，又諗起畫荷花，我尤其鍾意畫花桿上面嘅....刺（係唔係刺？），左點右點好有feel。

上堂都畫過荷花，不過冇畫刺，唔知係唔係得水墨畫先會咁畫。

我冇起稿，因為覺得水墨畫都唔起稿，其實我點知呢，我又未學過水墨畫😆😆

又係想像中好有氣氛，畫出嚟變好幼稚。
可能係用色太單一，花嘅造型又生硬啦，
荷葉係學今日畫展睇到嘅畫法，好似幾好咁。

Cotman on Saunders Waterford 190g rough 5.5"x7.5"

舊年上堂畫好似靚好多，今次係唔係馬虎咗呢？主要係冇reference我唔識畫details，變得好平板。

https://iceefaery.blogspot.com/2017/09/10.html

畫畫 - 櫻花（水彩）

遠景嘅櫻花畫到個形態，但近嘅好似窄咗小小，櫻花樹好似應該伸展幅度大d，
原圖係jc去首爾旅行影嘅，或者本來前面幾棵係其他品種，但我畫畫吓變埋櫻花，都係因為事前冇認真規劃啦。
櫻花淨係用咗permanent rose，暗位加咗raw sienna，都幾櫻花色。
本來黃色嗰堆植物好靚架，畀前面d草遮咗，d草又畫得唔靚喎，早知唔畫啦，
不過唔畫又好似唔平衡咁....
右邊係唔係應該暗d？而家好似輕咗咁，或者樹之間唔應該係粉紅？
總之右側唔係幾好，又遇到想問老師嘅時候。

Cotman on Saunders Waterford 190g rough 5.5"x7.5"

..

小說裡嘅未來世界

似乎，我睇過描述未來嘅小說，未來都係一個極權世界，人類（一般人類）都係被控制，只係作為強權嘅生產力。

最經典嘅梗係 brave new world 啦，人類已經係受控制地 purposedly咁製造出嚟，仲一早洗好腦令佢哋覺得自己好滿足。

Scott Westerfeld 嘅uglies 系列，人類被嚴格管制，亦被洗腦只追求漂亮外表同享受。

Ally Condie 嘅 Matched trilogy，都係洗腦啦，強權管制，連婚姻都係由權力中心決定。

仲有冇？我諗到再補上。

無論點做，首要就係令人滿足，一般人一滿足就唔會諗其他，不過，其實人生就係咁架啦，可以愉快咁生活，好少人會自尋煩惱。

但係點解有種強權畀唔到富足嘅生活，但佢嘅人民仍然經常表示滿意？brave new world 裡面gemma階層係唔係可以解釋到呢種現象？

當然，每一本小說裡面都有一個英雄，醒覺咗，解救所有人，真實世界唔係小說，究竟有冇呢個人？

水彩花卉風景 2018-2 - 霧

老師派定第二堂嘅圖片，等我哋可以起定稿，堂上多d時間畫。
不過好多時，我哋起嘅稿未必啱，好似兩朵玫瑰，我哋個個都畫到好精細，冇諗到咁多鉛筆痕會破壞畫面，睇完老師示範，全體番埋位係咁擦。
今次呢張圖片好似唔使點起稿，只要幾條線就夠。

復活節假期得閒，我自己試畫咗。
暈染得唔夠，條邊實咗小小，我洗番淡，洗開咗d色，好似幾好。
後面嗰排樹畫大咗，太整齊，
中間4舊都係排得太硬，不過顏色幾好，係咪？
呢個星期假期冇堂上，要等再下星期先知道老師會點畫，好心急。

今次冇跟足老師嘅用色，覺得呢幅係畫光線同霧，可以容許更多顏色變化，所以大膽試吓其他配色，尤其是黃色嗰片山坡，主要係yellow orchre，但最光位用咗raw sienna，因為佢比較透明，會容易有光嘅效果，果然係work嘅，我好開心。
個天我第一幅畫得好素淡，老師話左邊有少少陽光，所以用黃色，而黃色唔可以碰上藍，中間要用紅色緩衝，我覺得我暈染得好好，可惜後來老師point out我好多地方都化得唔夠，有硬邊，我嘗試洗吓，但太魯莽，枝筆有小小紅色，冇洗乾淨，結果個天右下紅紅哋，唯有試吓再洗啦。
其他霧都係要洗，畫嘅時候覺得已經暈開咗，點知乾咗都仲係深咗色，條邊實晒。
中間幾棵樹畫低咗細咗，搞到中間多咗空位，老師叫我畫多一層中型嘅樹。
d樹好似畫得差過上次，除咗最前兩棵，
呢兩棵老師教畫高d，跨過上面山坡條線，
我畫第一次都覺得堆樹咁樣唔靚，但諗唔起老師以前都教過咁做。
畫高d成幅畫都生動晒。
老師話顏色唔重要，最重要係manage色塊 / 物體之間嘅明暗關係，幾片山坡我都係跟住呢個原則去畫，我唔知道啱唔啱，不過老師睇過冇話唔啱即係啱，係唔係？
呢幅畫我用咗好多raw sienna 同 burnt sienna，覺得呢兩隻色好靚，好好用。

洗咗一輪，勉勉強強咁啦，唔得都唔再洗喇，再洗會太污糟，而且堆主題樹同山坡嘅接合位已經洗過頭，唔敢再搞佢。喺空白位加咗幾棵樹，感覺唔錯。

Cotman on Saunders Waterford 190g rough 11"x15"

兩幅拼埋睇睇，睇完老師示範真係矛塞頓開架。

另一個 course再畫差不多嘅構圖，但結果都好似差幾多

https://iceefaery.blogspot.com/2018/11/oct-2018-5.html

水彩花卉風景 2018-1 - 桃花

第三次上呢個course，老師好細心同盡心，每次都會揀我哋未畫過嘅圖。

第一堂，畫兩朵桃花，我自己覺得，畫白色花，最緊要掌握到花嘅明暗，用陰影去表現花嘅形態，用色要淡，落位要準，色濃咗就唔似白花，落位唔準朵花會唔自然，但重疊去改就會實咗唔似陰影。

左邊嗰朵都還可以，尤其是上邊塊花瓣，形態同顏色明暗都幾好，右邊真係睇唔明花瓣結構，純粹跟圖嘅顏色分佈，但當然又跟唔足啦，於是朵花怪怪哋。反而我幾滿意花幹，用色好啱。

枝幹上嗰朵剛開嘅花幾靚吖，形態畫到，花瓣我冇跟圖，著色好輕，效果有小小透明感，顯得朵花好嫩。枝頭幾片新葉幾自然，右邊花後嗰幾片就太硬喇，顏色同排列都整齊咗d。

底色老師示範用紫藍，我諗住唔好次次跟到足，呢個綠色都好襯，我暈染得都唔錯，因為主體已經將背景分成幾份，唔係一大幅，容易控制咗。

老師用咗ultramarine，有granulation，自帶特別效果，背景會有小小變化。

Cotman on Saunders Waterford 190g rough 11"x15"

cotman呢幾種色暫時都夠用，初時兩種紅色都唔啱色，老師用rose madder，我諗住我有permanent rose都啱，點知顏色太鮮，嗰刻我有小小徬徨，點算？雖然成日話唔好追色，但花嘅色差太多我唔識畫，唯有試吓加小小cadmium red希望隻色沉番小小，效果都算ok啦。

至於綠色，初時我都係慣性去點現成嘅綠色，唔記得咗可以混色，後來....都唔記得自己邊隻混邊隻lu...。

其實成日跟圖片畫真係唔算畫畫，尤其是好似我咁唔識得用自己方法演繹嘅，不過今次有機會跟老師出去寫生，因為有一堂學校冇課室要postphone，老師有事唔想改期，就用一堂寫生嚟代替，真係好，一直想跟老師去寫生。