畫畫 – Koh-i-noor magic pencils（木顏色）

終於為本寶虹 block搵到好位置，我決定用嚟畫木顏色！
點解買過嘅 300g紙都係貢獻畀木顏色？叫我點同水彩交代？

喺台北買嘅呢set magic pencil雖然係一場誤會，但都係一套好好嘅顏色筆，一枝筆有3種neighbour colour，其實我唔知會唔會靚 d，或者有深度d，不過用嚟配合我真正想要嗰套 magic pencil就非常好，因為佢哋係同一家族，唔會排斥。

咁耐我都分唔到兩種 magic pencil喺名稱上點分辨，search "magic pencil" 兩種都出晒嚟，就算喺 official site都一樣。

anyway，我終於都得到呢套筆，係舊年嘅其中一份聖誕禮物。

呢一套…
唔係枝枝都係對比色，但 contrast都好大，所以效果好繽紛。

呢張仙人掌，先用 high contrast打底，再用 neighbour colour好似平時咁上色。然後，畫畫吓底色漸漸唔見晒，blend咗入後加嘅顏色裡面，不過，細心咁睇係會睇到裡面有變化。

木顏色唔用力疊多幾層就會鬆鬆哋好似毛公仔嘅感覺。

跟住呢張想畫到 monotone咁，但揀呢隻色唔係幾啱。

呢張畫法唔同，筆畫拉長 d，每筆都拉到出到唔同色，得到 colourful嘅效果，然後用 neighbour colour 嚟強調，終於畫到想要嘅效果。

呢張好似上面咁畫，本來想畫燈，但太懶冇搵reference，
自己想像唔到細節，結果畫咗隻杯😄，不過出到繽紛色彩就好開心。

有時間搵個reference，試吓救番佢啦。

畫畫 – 蒲公英 Taraxacum、酢醬草 Oxalis corniculata（水彩）

今朝好健康咁去跑步，遇上好耐冇見嘅蒲公英，同埋不知名小野花（後來知道係叫酢醬草，久聞其名），佢哋都有好特色嘅葉。

好似唔係好畫到葉嘅形狀，底層深唔到色，加藍又驚會太冷太沉；
花嘅顏色唔夠鮮明，從來冇留意花莖有咁嘅嘢，唔知係乜，不過睇到毛骨悚然，唔想去瞭解，所以冇畫出嚟；
種子ok，網上有人教用alcohol，我滴水再用布索都得，今次用hp，如果係rough效果會唔會一樣？我上次唔知係水大滴咗，定紙質唔同，滴水不受控咁推開晒d顏色；
最大嗰棵手多畫大咗個芯，成日都係想畫好d結果畫壞咗；
本來灑咗鹽，可能今日天氣乾燥，藍色部分已經乾咗，出唔到效果，反而唔覺意落咗綠色部分就得咗。

Shinhan on Baohong 300g hp 7.5"x5" 

呢幅都係畫唔出葉嘅形狀，不過我諗起可以加紫色，所以層次都畫到，

今次我刻意由得d葉混沌一片就算，逐塊描可能仲生硬，反正我都冇咁嘅耐性，
不過我好高興堆葉留到白，都可以算疏落有致呀；
花都畫得好隨意，正面幾朵諗住認真d描畫吓，結果都幾失望；
anyway，成幅都算有層次，幾好吖！

Shinhan on Baohong 300g hp 7.5'x5"

尋日執嘢見到好耐冇用嘅shinhan，可能顏料有蜜糖，個palette有小昆蟲嘅痕跡……urgh

呢排多咗用寶虹畫紙，乾得仲快過Waterford，點解老師用都唔係咁嘅？可能佢用rough？
因為係300g嘅關係，濕畫都唔會buckle，或者用晒手上嘅Waterford，改用300g？
但紙厚咗儲存會嘥地方，我畫過咁多畫都冇掉過，就算第一幅畫兩個球體都仲喺度，而家儲咗好多畫唔知點好。

畫畫 – 鬱金香（水彩）

又畫鬱金香。
睡眼惺忪就喺Instagram睇到永山裕子嘅post，佢啱啱post咗一幅幾impressionism嘅花，令我想即刻試吓咁畫。
當然我畫唔到啦，因為越簡約嘅畫法越難畫，無論筆觸、色彩、明暗都畫唔到，不過，我會朝呢個方向試嘅。

用咗儘量少嘅筆觸，自己覺得都算乾淨，
但唔知點解，我畫花顏色總係唔夠鮮明，瘀瘀哋咁，係唔係調色嘅問題呢？
我加咗ultramarine，畫花係唔係應該用近似色嚟強調而唔應該用藍或者綠呢？
花莖手多反覆畫，污糟咗。
個背景我畫得好loose，不過左下越畫越喧鬧，感覺失咗平衡。

Shinhan on Baohong 300g hp 7.5"x5"

prima watercolour confections – 用後感

見到呢 set水彩一段時間，有一刻係畀佢電到，但立即就決定唔會買，首先梗係因為我話過唔會亂買畫具啦，第二就係佢 naming好自成一格，分明就係小朋友顏料嘅命名。

但呢 d嘢總係會吸引到某 d人，有人都畀佢電到，買咗嚟送畀我。😃

唔知點去形容我對呢 set水彩嘅感覺，佢容易控制，色彩鮮明，顏色亮麗，係混色少少 muddy，但係，有 d我不能接受嘅問題，令我唔係好鍾意佢。

例如，畫出嚟總係有 opague嘅感覺，雖然 swatch test睇到係透明。

例如，佢嘅質地咁 grainny，好唔舒服。

呢 set水彩早幾年已經喺 wetcanvas好多人討論，好多人都話買咗，或者準備買。
大部分人嘅 review都同我差不多，好 positive，覺得佢顏色好靚，個盒好實用。
但又有 d hold back，不過同我嘅理由好唔一樣，佢哋都好介意佢冇列出用邊種 pigment，同懷疑佢嘅耐光度。

好多人都係畀佢嘅包裝吸引，我覺得，畫具都有一種吸引力，令人好想擁有，彷彿擁有咗就會連帶擁有佢所 hinting，implying嘅一種文藝氣息、一個優雅環境、一個超然維度咁，而呢盒水彩仲要細細盒，有 12種命名得好優美嘅顏色，會令人覺得可以將嗰種感覺 carry around。

喺實際方面嚟講，好多人都想搵一個咁細而又實用嘅   palette，我自己覺得個盒真係ok嘅，不過同 forum好多人都有同樣問題，就係個盒一開就刮花咗，同埋 staining。

佢話自己係 artist grade，呢個完全係指另一種觀點嘅  artist，
people who creates art is an artist，
but what is art？
廣義嚟講，生活，都可以係一種藝術，
喺我嘅世畀，我嘅畫就係我嘅藝術，
用呢盒水彩畫出任何嘢都係藝術，
everyone is an artist，
所以，…

其實從佢嘅顏色命名都可以睇出prima對自己嘅定位，
sea dream, paradise, pool party, disco, ......

係畀可愛（或自以為可愛）嘅少女（或資深少女）坐喺cafe（或亂七八糟嘅房）畫吓 greeting card、畫吓   journal用，wetcanvas好多 professional artist去關注佢嘅 colourfastness同 pigment根本係自尋煩惱，有少少抬舉咗喇，有人仲出 email去問，當然冇答案啦，人哋心諗：『咩唧....，又唔係出畀你用…』😆

畫畫 – 鬱金香（水彩）

一向都覺得自己 d畫好死板，規規矩矩咁，見人哋畫得好揮灑，少少朦朧，輪廓若隱若現。
今日我都試吓咁畫，

我先整濕張紙，花嘅位置上粉紅色，枝葉青綠色；

乾少少，用深色加暗位，其實咁畫要比平時更清楚要畫嘅物件，因為呢種畫法要筆觸俐落先靚，儘量一筆落去就畫到，但我平時總係落筆唔啱位，要加多幾筆嚟修正，呢張都係咁，好多筆畫歪咗，修正後成朵花大咗、輪廓唔啱、顏色都濁咗。

最大問題係我冇好好睇清楚朵花嘅形態先畫，所以效果…真係好差。

Cotman on Saunders Waterford 190g rough 7.5"x5.5"

hmmph，呢種畫法，睇同諗多過畫，考慮好明暗位置，一兩筆完成。

網上見到有 artist話仲要畫好線稿，think>draw>paint，我最鍾意嘅上色，重要性係最低，不過，係講緊構圖比較複雜嘅畫。

我決定再挑戰鬱金香，結構同形態較簡單，我初畫畫時都鍾意畫佢攞成功感。

今次畫遠少少，我唔知算易 d定難 d，因為唔使畫咁細緻，但又要喺更少嘅面積表現到適當嘅明暗，位置歪少少就會完全走晒樣。

呢幅我有好好咁睇清楚花瓣嘅形態同明暗，雖然都有畫錯要變成兩朵嚟補救，但總算朵朵都似鬱金香，仲分到方向添，好開心呀。

枝葉都幾好，尤其是花樽裡面，畫到層次。

花樽邊條白線係用 gel pen畫，好唔小心咁畫錯咗，唯有加色遮住，好失敗！

Cotman on Baohong 300g hp 5"x7.5"

畫畫 – nightfall-venice by Thomas W Schaller（水彩）

係我喺 office畫嘅畫中最複雜嘅一張，臨摹一位大師嘅作品。

分咗好多日畫，所以有時 pickup唔番之前嘅用色、筆法同感覺，唔能夠一氣呵成真係有 d影響。

背景同建築物都還好，我尤其鍾意個天，但前景嘅水完全畫唔出暮色，係唔係倒影太白？

原畫構圖複雜 d，我簡化咗。亦畫唔出原畫嘅距離感，我總係畫到好近，或者應該用 a3或者4開。

明明試過佢係透明，但始終覺得顏色粉粉哋，難道衹係我錯覺？

Prima on Saunders Waterford 190g rough 7.5"x5.5"

忽然發現幅畫未畫完，😆離晒譜，有時間先加番啦。

一向都唔清楚開數，office人淨係知 a3 a4，特登查一查，
原張係30"x22"，叫 full imperial，即係全開，
我上堂用嘅 15"x11"，quarter imperial係4開，
平時細細張亂畫用嘅，即係呢張，係16開。

畫畫 – 小鳥（水彩）

呢隻雀仔起稿好容易，身體衹係一個波😀，
嘴、爪、尾線條都好簡單，係翅膀難小小，唔啱比例會唔可愛，
但以生物嚟講，算係容易。

我諗住用 wet on wet，等個波波身體化開，好 fluffy咁樣。
但唔知係紙、顏料，定係我嘅技巧關係，化唔到我預期嘅樣，
不過效果都唔錯，起碼胸前唔同顏色嘅羽毛都融合得好自然。

我好鍾意呢幅畫嘅背景，樹幹同葉都好自然，
葉嘅顏色調得好清新，好似用咗 sap green, cerulean blue, perm pink，
第一次加紅色系嚟調綠色，其實紅綠係 complimentary colour，應該多用。


Cotman on Saunders Waterford 190g rough 7.5"x5.5"　

畫畫 – 薰衣草田（水彩）

perspective 唔係好啱，
棵樹嘅綠飄得太遠，但又唔想再加大棵樹，因為本身已經畫大咗。


Cotman on Saunders Waterford 190g rough 7.5"x5.5"　　　

本來畫到咁就算完，睇睇吓覺得太淡，色彩太單調。
加色後顏色係唔再淡，但單調依舊。其實我有局部加咗綠同粉紅架，唔知去晒邊….


其實呢個樣更有水彩感。

　

畫畫 – 十分鐘畫到乜？（水彩）

雖然冇上堂，但我都有 keep住畫畫，前幾日食完飯得 10分鐘，我都忍唔住要畫一陣。

印象中見過呢種花，但唔肯定係乜。


　Prima on Baohong 300g hp 7.5"x5"　　

prima 真係比較冇咁容易擴散，容易控制。
藍色嗰枝差不多冇加工過，衹係落筆有輕重，顏色就好乖咁留喺原位。
帶紅嗰枝本來好好多，淡淡咁做陪襯仍不失自己嘅明暗，
但唔小心滴咗少少水落最下面，乾咗發覺：『都幾靚喎~』
於是灑咗幾點去上面，唉，刻意總係冇好結果，又加兩筆補番，修補一番變咗一 pad。

平時畫葉我會由花莖向外畫出去，今次我掉轉由葉尖開始畫，原來咁仲容易控制。

10分鐘畫到出嚟，我自己好滿意。
唔係多手會仲快 d靚 d添。