水彩班 26 Dec 2023 – 黃昏稻田

😂怪怪嘅天空，黃色太 vibrant唔使講，分佈亦莫名其妙。

背景嘅樹主要係濕染，用 brown, ultramarine blue, orange, vermilion。嗰度有好多層次嘅樹，各種形態同大細，但我將最遠嗰層畫到變咗山，後來同學話我另一層似一堆屋，我自己睇番真係愈睇愈似😂，不過都唔緊要，都夾到個環境嘅。

我 d樹畫得深色咗、清楚咗，顯得好近，表現唔到景物嘅深遠。而且應該藍 d，加強距離感，因為遠嘅景物都係帶藍或者紫。（其實阿 sir示範都偏藍，但我用同一堆顏色調到咖啡色，畫緊嗰時仲覺得好配合黃昏嘅色彩添😄）

另一個令幅畫顯得唔夠深遠嘅原因，就係最遠嗰幾塊田，原圖田上嘅阡陌只見幾條貼近嘅橫線，但唔知乜嘢驅使我間咗幾塊田出嚟，睇得咁清楚又變近咗。阿 sir教用 sap green加橙，我以為調出嚟顏色應該沉 d，點解咁鮮明呢？阿 sir嗰幅都係咁嘅色㗎⋯

中間幾格水稻田可能係畫得最好嘅部份。

最近嗰幾塊田呢⋯，阿 sir教各用唔同嘅綠色，後來我見佢幫同學修改時再喺上面畫粗間表示一行行嘅農作物，因為呢幾塊田面積大，裡面冇嘢會顯得空洞。我加咗嘅效果都 ok。但呢幾塊田之間我都跟阿 sir加咗 d草，同學話 d草太直，唔夠亂，我就覺得仲可能係太深色。睇起嚟仲有小小恐怖感添，同後面嘅寧靜柔和好唔夾，早知唔加草。唔知道種好嘅田嘅阡陌上面係唔係都長滿草呢⋯？

真係，近景呢幾塊綠色田無論顏色同感覺都同後面格格不入。

Cotman on Saunders Waterford 300g rough 11" x 15"

畫畫 – 雪人（水彩）

及時畫咗個雪人過聖誕😁

想像中顏色比較輕盈，不過都 ok啦，係後面棵聖誕樹畫到妖火咁啫😂

仲有枝 stick偏偏要篤咗喺個波波中間😖

Schmincke Akademie on Saunders Waterford 190g rough 7.5" x 5.5"

 

寫生班 16 Dec 2023 – 沙田排頭村（水彩）

第二堂寫生都係去排頭村。

今次要畫幾間小小建築物，重點係間妝扮得好嬌俏嘅屋仔，門上有門神 poster，兩邊有對聯，門頂有橫額（？），畫畫吓先醒覺原來佢唔係屋仔，係門嚟㗎😂，開門入去係空地，再入去就係後面間屋。

畫畫過程仍然係手足無措，阿 sir示範時，好多唔同位置唔同用色、畫法，到自己畫時唔記得咗大半，最記得係兩邊唔重要嘅景物模糊交代，但幾把太陽遮都係重點，兩層遮身尤其重要。

我哋畫畫吓，村民逐漸將景物變身，晾曬嘅衫收咗、太陽遮收咗、附近食店搬咗幾個招倈嘅廣告牌出嚟遮住咗，我諗，除非畫自然風景，如果唔係，以我哋畫得咁慢，景觀好難持續咁耐。

加上當日下午氣溫急降，由中午因為著咗羽絨有少少熱，到開始畫時慶幸自己著咗羽絨，再到畫畫吓懊惱冇戴頸巾手套。於是，冇毅力嘅我決定走先😝，其他同學仲繼續努力。

臨走俾阿 sir睇，佢提醒我：

1.) 呢堆層層疊嘅建築物要深淺色相間，咁先可以突出主體，尤其是前面嘅重點。

2.)兩旁非重點喺模糊之中都要有層次，咁先可以營造出『有d嘢』嘅錯覺，如果唔係就好似空咗咁。

3.)仲有佢叫我落色要大膽 d，深色地方顏料要濃，一筆過，咁就唔會乾後變淡，然後又要一再番筆。

我覺得自己個稿已經起得好差，perspective唔係幾啱，加上返屋企繼續時我冇睇返張 reference相，又冇睇阿 sir嘅 demo相，只係跟住阿 sir講嗰幾點畫，畫畫吓都忘記咗 d建築物嘅關係同結構，結果係有少少奇怪嘅😄

我試吓大膽用深色畫後面嘅樹，結果真係好夠色，然後覺得，⋯嗰個位應該淡番 d，因為佢唔係主角😑😂

左上角建築物係唔係太簡陋呢，可能局部都要多番 d details，而家好似太 clear cut，少少突兀。

其實我咁樣睇咗阿 sir示範先再自己畫仲算唔算真寫生呢？我諗只可以話係學寫生啦，比跟圖畫會好少少，因為會學到點取捨景物，點 adjust景物去滿足構圖需要。

Cotman on Saunders Waterford 300g rough 15" x 11"

畫畫 – 京都櫻花（水彩）

拖咗幾個月，終於完成呢幅櫻花。

d山正正犯咗阿 sir講嘅禁忌，前後角度一致、前面兩個小山黐埋咗。

兩個建築物都 ok呀。不過前面嗰個我模糊處理咗唔知啱唔啱，但我覺得個屋頂畫得幾好。個塔我都畫到立體感，雖然有少少歪咗。

最失敗應該係前面嘅牆😒，但我覺得成幅畫算 ok啦，冇平時畫嗰 d咁 blank，有重點，色彩都算有輕重之分，⋯nicht wahr？

Cotman on Saunders Waterford 190g rough 11" x 15" 

寫生班 9 Dec 2023 – 沙田排頭村（水彩）

呢兩個月，阿 sir開期間限定寫生班，尋日去咗沙田。爭 d就一人成團，嚇死我，好彩最後多一個同學報名😂。

排頭村係一個都幾舊嘅村，尤其村口好多屋都好殘，或者都唔可以算屋，係一堆木板同鐵板搭嘅棚。我以為會行入去搵個清幽嘅地方，點知阿 sir就喺村口路上坐低開始講點畫。其實都唔可以用「點知」，一向都知阿 sir鍾意畫光影下嘅殘破混亂事物，佢鍾意嗰種意境。

我哋三個就咁坐咗喺小路上，都有行人㗎，仲有人搬貨添，但阿 sir冇理佢哋，佢哋又冇理我哋，搬貨嘅仲會繞個彎避開我哋，真係和諧。 

不時有人行埋嚟睇，仲有人問我係唔係畫嚟賣，我話如果你肯買我都會賣俾你嘅😂。我以為自己會好驚有人睇住，但原來又冇乜影響，照樣胡亂咁畫，一 d都冇心虛😂。

呢幅係我近期最似樣嘅一幅畫，話似樣，其實都係修修補補，尤其係畫得慢，現場完成唔到，返屋企睇相同阿 sir嘅 demo完成，唔係好算完全寫生。

首先舖一層底色。雖然嗰日都唔算陽光普照，但阿sir教用橙黃色營造陽光嘅氣氛，再用對比嘅紫藍色做陰影。其實上色都係用呢幾種色。

棚同屋都係用紫、啡同藍半混合上色，技巧就係冷暖交替咁上色，但我畫畫吓就忘記晒冷暖，只係盡量相鄰嘅唔同色，都 work嘅，唔專業啫😂

起稿好難，右邊嗰幾間黐埋一齊，睇都睇唔清楚，點畫😌，尤其係個頂，究竟邊個頂係邊間？而家d頂其實同真實唔係好同，整齊咗好多😂

最需要講究係中間路口第一間，嗰度係重點，亦係最光嘅地方，屋頂要留白，我畫得唔係好似，不過都白啦。仲有屋裡面有個穿窿位，阿 sir話一定要留番。

隔離屋都重要，前面個紅色桶、門口嘅雜物都要保留，但屋裡面就唔需要細描，亦都冇可能，所以用各種深色 pretend裡面有 d嘢咁。

再隔離就唔關事喇，隨便用 d色塊填滿佢就得。對面路嗰堆都係咁，用深色煞有介事咁扮堆咗好多嘢。

臨走前，阿 sir提醒我記得喺路面加上橫線表示路面係平嘅。而家睇落都好平，幾 ok👌

Cotman on Saunders Waterford 300g rough 8" x 11"

上呢堂學咗

1. 寫生要簡化畫面、

2. 但要搵一 d有趣味嘅細節、

3. 畫面色彩唔需要跟足眼見嘅嘢、

4. 比例、

5. 消失點。

比例⋯，呢幅畫已經唔啱比例，真係要多 d練習先得。

消失點⋯，我唔係唔明，係唔知點 apply落去⋯，就同素描搵兩條伸延線嘅相交點一樣，唔係好明白佢哋嘅因果關係，係囉，即係唔明啦。但就算要問阿 sir，我都唔識點問。同學好好學，佢會睇書，⋯我以前都會，買咗好幾本，但愈嚟愈懶😁

Rafa – 為退休而復出

Rafa宣布咗明年 AO復出。

有一次，Djokovic話 Rafa每次復出都掃晒 d獎項，不過我諗今次唔得喇。估計明年係佢嘅告別巡迴，佢舊年養傷時都話，退休要喺球場上，唔想傷咗順勢就唔再打波，默默咁退休。

一個東征西討咁多年，贏過咁多比賽，以 fighting spirit聞名嘅球員，點可以隨便咁喺屋企發份新聞稿宣布退休？點都要再去好好咁參與每一個賽事，好好咁同每一個球場告別。

最終告別賽會喺邊個球場？最有意義應該係 Roland Garros，但六月會唔會早咗少少？其實我唔希望佢參加 FO，唔想佢最後都要喺 FO輸，但告別巡迴又點能夠 skip FO呢⋯？😄點解我會覺得佢實輸？可能佢贏多次呢😊～

如果唔係 FO，咁就應該喺 Wimbledon， 四個grand slam集齊。

唔會想喺最冇意義嘅 year end final啩？拭目以待。

羽生結弦

早幾個月，羽生結弦忽然宣布佢結咗婚，但佢個 post好奇怪，講咗一句話已經結咗婚，就急轉直下話以後會繼續努力溜冰事業。我當時覺得佢係想表達佢對溜冰嘅熱愛，到咗要同溜冰結婚嘅地步。

早兩個星期，佢又宣布離婚，因為太多人騷擾佢太太同太太嘅家人，搞到太太幾個月嚟都唔敢出門口，而佢咁多個月以嚟都未同太太一齊生活過。

整段婚姻維持咗三個幾月，作為佢一個咁受注目嘅國寶級運動員（其實佢而家似藝人多d），難道佢結婚前估唔到會出現乜嘢情況？

佢唔會冇拍拖就結婚啩，既然拍拖都冇俾人知，結婚一樣咁低調就好，佢冇責任通知大家。但既然通知得大家，就簡單介紹埋太太，神神秘秘講 d唔講 d咁反而仲吸引人去查探。網上見佢 d粉絲講，只有比賽季節先會有佢嘅消息，其他時間佢係完全隱形嘅。咁即係話一係佢保護得自己好好，一係就係記者尊重佢私隱，唔會去跟蹤。但佢太太係邊個呢個問題，太多人想知。

有人話，點解要介紹太太出嚟？點解要順應 d八卦嘅人？但我覺得，好多人就係咁八卦，如果改變唔到佢哋，一係唔好俾佢哋知道，一係由得佢哋知道。世界唔係佢可以控制，佢宣布咗結婚，事情唔會就喺呢度停，好好奇究竟佢當時點諗，佢真係以為佢唔講就得？大家咁聽話，佢講幾多大家聽幾多就算？

聽講，另一個國寶級運動員大谷翔平規定記者同電視台唔可以拍到佢家人，好似一直都相安無事，羽生結弦都可以咁吖，介紹太太係邊個，平息咗大家嘅好奇心，然後話俾記者聽邊個騷擾我太太，以後唔會再接受佢採訪，以佢嘅受歡迎同寵愛程度，應該行得通。

婚都結咗，點解唔想辦法解決，而要離婚呢？離婚唔會解決到問題，一樣會有人想知道佢前妻係邊個？佢哋係唔係真係離咗婚？我估計連佢前妻日後同邊個約會都會係新聞。唔通佢諗住以後都唔再拍拖結婚？呢個問題始終都存在，以後都一樣要解決，點解唔而家解決？

我覺得成件事好蹺蹊。

畫畫 – 小島 03（水彩）

個天係我成日都幻想到好靚嘅金黃同粉紅色組合 ，但係唔係太重手？定係揀錯色？定係筆觸太生硬？總之好假😞

個海更離譜，顏色反映都唔知想點，我當時真係唔知想點😂

well⋯

Schmincke on Saunders Waterford 190g rough 7.5" x 5.5"

畫畫 – 花（水彩）

好耐冇上堂，愈畫愈差。

冇乜好講，純粹 record吓。

Schmincke on Saunders Water 190g rough 7.5" x 5.5"

畫畫 – 龍吐珠 clerodendrum thomsoniae （水彩）

白色唔夠白，應該係深色唔夠深，真係好難好難，心理有 d問題 😂，好似右邊白花下面落筆深色咗，親愛嘅 wald grun就係咁 vibrant，嚇死，即刻暈番開佢。但而家睇覺得就係應該咁，襯得嗰粒花都白 d。

紅花暗沉，本來好鮮明，我都唔知應該用乜嘢色嚟表現😓，對顏色太冇觸覺。

Schmincke on Saunders Waterford 190g rough 7.5" x 5.5"

同好多花一樣，呢種花有 n個名，除咗好俗氣嘅龍吐珠之外，仲有個名叫滴血的心，其實呢個名都好俗，不過浪漫吖嘛😌。傳說話有個叫 Thomson嘅傳教士見到呢種花，思念起亡妻，於是就叫佢做滴血的心（個『於是』用得有 d牽強😂）。

另一種叫荷包牡丹 lamprocapnos spectabilis嘅花都係叫滴血的心，我覺得嗰種更似。唉⋯世上滿是滴血的心😔

畫畫 – 小島 02（水彩）

懸崖上條天梯角度好驚險😂

Horadam嗰兩隻綠色真係好靚，olive好柔和，自帶顏色變化，wald grun好 vibrant，少少已經好夠色。

Schmincke on Saunders Waterford 190g rough 7.5" x 5.5"

畫畫 – 玉葉金花 Mussaenda Pubescens （水彩）

白色葉嘅植物好吸引，因為好特別，佢又唔係花，但又冇葉綠素，負責唔到製造營養，咁佢負責乜？

狠狠咁加深咗左方暗位，幅畫精神咗。

唔知應該點加鮮黃色嘅暗位又保持到鮮黃，諗過用咖啡色，但擔心會灰黯，用咗橙紅色，⋯算 ok啦。
堆細花嘅位置應該調整吓😐

呢幅畫我最滿意右下嗰片綠葉😁

都有用到 horadam嗰兩隻綠色，同 akademie混得好好，wald grün好顯色，少少已經好夠色，相反 auen oliv比較淡。

Schmincke Akademie on Saunders Waterford 190g rough

畫畫 – 小島 01（水彩）

近來影嘅相都好暗，原畫顏色冇咁深。

呢個小島唔係與世隔絕㗎，樹林後面有碼頭，仲有隻船仔添。

Schmincke Akademie on Saunders Waterford 190g rough 7.5"x5.5"

畫畫 – 屋仔、樹仔（水彩）

Schmincke Akademie on Saunders Waterford 190g rough 7.5"x5.5"

呢種灑點點嘅做法唔係時時都合適，今次感覺好詭異😁

Schmincke Akademie on Saunders Waterford 190g rough 7.5"x5.5"

Schmincke Horadam、畫筆

上星期去咗一間美術用品店 joy in art，佢哋除咗賣美術用品，仲有畫展同畫班，老師都有喺度開班。我想像中係一間好似藝林咁嘅店舖。

去到先知道，佢嘅美術用品部分好細，得一間房仔，可能畫展畫班場地分散喺其他單位。不過佢哋有好齊全嘅 Daniel Smith同 Schmincke，最好嘅係準備咗顏料同各種筆試用，都幾好吖，尤其係筆，要畫落去先感覺到枝筆係點（可能我用過嘅筆少，冇經驗啦），見過同學用⋯松鼠毛筆（？），完全冇彈性，好貴嘅一枝筆，但用唔到。

店員介紹咗一枝松鼠毛混合尼龍嘅筆，筆身攞上手好舒服，試畫感覺都好好，筆尖又夠細，所以本來冇諗住再買筆，都買咗。

咁本來諗住乜呢？

成日見到佢嘅廣告有一 set五枝 Daniel Smith granulating colour set，今日去開附近順便去睇吓。但連個店員都唔知有咁嘅嘢，可能太耐賣晒？⋯又可能根本唔係佢哋，或者係我都有 follow嘅一間台灣美術用品店都唔定⋯😂。

店員好有耐心同我介紹，睇睇吓睇到 schmincke horadam嘅 colour chart，又畀佢 d顏色吸引咗，真係目迷五色，有好幾隻好靚嘅綠色，我揀咗兩隻，又莫名其妙揀咗一隻啡色，反而唔記得買想要嘅紅色🤷

今次唔知算唔算係壓力之下嘅購物呢，我好怕畀人 sell，佢有耐心同我講得耐，我就會唔好意思唔買嘢，曾經因為一個好有禮貌好殷勤嘅細路女 sales而買咗一對唔係真係好啱嘅鞋😅。今日間店好特別，大廈裡面幾個單位，我搵到上去，個店員放低做緊嘅事，喺一間房特登開門去另一間陳列咗各種貨品嘅房，陪住我逐樣介紹。當時我已經諗：『點好意思淨係參觀？』

買咗三粒 half pan，仲以為可以攝喺 akademie個盒中間嗰行，但原來唔夠位，唯有另外擺。

擺住先啦，再有多先算。

schmincke嘅顏料真係好輕盈清透，最鍾意中間嗰隻綠色。

d顏色自帶層次感，唔知係筆嘅功勞定係顏料本身咁神奇，尤其呢隻綠色，局部泛少少黃，我未用過 horadam，唔知係唔係正常，不過我幾鍾意。

好鍾意 Waterford嘅質感，顏料散喺紙上面真係好靚。

不過我試完色就收埋咗，都係冇意慾畫畫🤷

水彩班 20 Mar 2023 – 提子

今次起稿都係用咗 grids，咁快變咗慣性？其實唔係畫動物，比例要求唔高，應該自己畫，太懶喇。

為咗遷就 d格仔，差不多用盡張紙，畫到粒提子好大，喺張畫紙睇感覺侷促。呢堂先發現，其他同學都係畫 A4 size㗎，但我上堂比較鍾意畫大張 d，起碼 A3 size先練習到點控制水份同上色。

首先鋪背景，有上次經驗，顏色唔算太淡，不過用色有 d悶，但又諗唔到可以用咩色會夾到串提子。阿 sir用咩色呢⋯基本上都係我用嘅色，但佢畫出嚟就係冇我咁悶🤷

先用淡淡嘅 ultramarine做提子上面嘅白色，再用 perm rose 或者crimson上色，阿 sir提醒千祈唔好用vermilion。

最後再用 perm rose或者 crimson強調提子，加埋塑膠綠或者 ultramarine畫暗位。畫埋塊木板同加陰影。

當所有同學都畫完畀阿 sir修改時，我仲畫緊第二步。我畫完變咗好淡色同灰黯，邊緣疊到背景又出咗條深色邊，有 d沮喪，我都冇心機喺堂上完成幅畫，不過我都攞畀阿 sir睇吓，請教吓跟住可以點幫佢起死回生。阿 sir叫我用 perm rose ＋ cadmium red加色，暗位用 crimson ＋ ultramarine。

跟阿 sir教咁加咗色，顏色鮮明咗好多，尤其最前面兩粒，都幾靚。我見阿 sir幫同學改時會加深背景勾番 d提子出嚟，可能我都都可以咁掩飾番提子嘅黑邊，不過我見提子已經幾深色，唔想背景又深色，由得佢啦。

會唔會係 ultramarin 同 perm rose加埋變咗灰晒呢⋯，我冇留意其他同學第一層上色後係唔係都灰咗⋯

我一直以為 palette裡面嗰隻係 vermilion，今日睇番 colour chart先知原來係 cadmium red。感覺我冇正紅色，正紅色叫咩名？

Cotman on Saunders Waterford 300g rough 15" x 11"

畫畫 – 仙人掌（水彩）

一早諗好背景用 perm pink加 raw sienna，但一落筆就忘記咗 raw sienna，畫畫吓仲忽然覺得要平衡吓加咗青綠色，都唔知自己做乜😂，而家好似發 mould咁。不過，個形態都接近我想要嘅樣喇。

綠色仙人掌部分都幾滿意，前面嗰堆想多 d藍色，明明記得有 cerulean blue好啱色，但佢好似喺我個 palette失蹤咗咁。

冇留白膠，仙人掌 d刺唔係留白嘅，係用 acrylic，😒好糾結，留白膠買咗兩次都擺到乾晒，需要用嘅時候又冇。（係唔係要怪自己偏偏要喺冇嘅時候畫呢 d畫？）

朵花，怪怪咁，扁扁哋。

旁邊伸出嘅枝葉都好唔自然。

不過，三種仙人掌分得清顏色，冇畫畫吓變晒一種色，都算一種成就啦。

Cotman on Saunders Waterford 190g rough 15" x 11"

 

水彩班 06 Mar 2023 – 鸚鵡

終於又上到一堂水彩班，阿 sir最近教咗好幾次鳥類，尋晚畫鸚鵡，上星期畫嗰幅風景好靚，真係可惜我上唔到堂。

阿 sir預早 WhatsApp咗幅圖畀我哋起咗稿先，😁真係慳好多時間，上堂前又會幫我哋執咗張稿先開始。

我起稿出咗貓，用咗 grid，對我嚟講幫助好大，唔使擦到紙都爛。

呢幅畫第一步係濕畫底色，我用色盡量深同濃，效果幾好，起碼乾咗都唔會變得淺色，算好成功咁一次過完成。

第二步畫鸚鵡嘅暗位，用 ultramarine ＋ 紫紅，淡淡咁。

第三步，用 vermilion嚟完成，因為隻鸚鵡主要係白色，所以都係淡淡咁。局部需要深色嘅用 vermilion加 ultramarin。

要注意嘅係：
– 差不多每一筆都要即刻暈開，先做到 fluffy嘅羽毛；
– 記得要留白，就算暗位都要留白，咁先表現到隻鸚鵡係白色，雖然原圖下截好暗同深色，但畫畫⋯應該有另一種表現手法。
– outline適當地模糊，咁唔會實，同表現到前後感覺。

Cotman on Saunders Waterford 300g rough 15"x11"

今次冇填滿畫紙， erm⋯還可以啦，可以接受，希望下次好 d。

本來鸚鵡下截冇乜 vermilion，但阿 sir話要加番，😟⋯佢張示範都冇乜𠴱喎⋯，不過老師叫加就加，可能我畫嘅版本適合咁啦。 

阿 sir叫加我就義無反顧咁加，雖然我都仲記得留白，但都加到少少似咗兩隻蝦😆，我已經洗過，睇真都仲係似😂

鸚鵡下巴嗰撻深色係影，但我睇極都覺得怪怪咁。

～*～*～*～*～

唔記得咗阿 sir仲有話鸚鵡左邊要加深添😖

畫畫 – 日落（水彩）

畫嘅時候覺得個天嘅顏色融合得好好，睇畫都還可以，影咗相似乎無所遁形。天嘅下截應該係霧氣，我畫實咗，有諗過洗吓佢，但通常越執越糟糕，都係算。

😅間屋畫錯咗，起咗稿都跟唔到，而家怪怪哋咁，但幾面牆我覺得幾好；煙囪本來有煙嘅，黃昏時份應該煮緊飯，不過唔記得留白，算啦，嗰晚可能叫外賣。

整體顏色都係冇乜變化，樹一律咁嘅色，天一律咁嘅色，其實畫嗰陣有喺唔同部分加唔同色，但因為反覆咁加深，又心急要喺乾之前完成，枝筆慌不擇路，亂咁攞色，終於天下大同。不過個天呢個綠色我都幾鍾意。

今次呢幅稍為冇咁悶，係咪？

Cotman on Saunders Waterford 190g rough 15" x 11"

畫畫 – 雪景（水彩）

終於畫番幅認真 d嘅畫。

左睇右睇，諗嚟諗去，都冇咩可以 elaborate。

呢幅畫同我其他嘅畫一樣，規規矩矩，整整齊齊，唔係太差，但⋯冇氣氛、冇❤️‍🔥激情😂，悶悶哋咁。

點解呢？

Cotman on Saunders Waterford 190g rough 15" x 11"