Wetcanvas

wetcanvas將會喺今年尾或明年初停止營運喇，舊年無端端話我 password錯 login唔到，我都冇再 post過畫，但都 keep住有睇，唉，乜嘢都變晒，世上真係冇嘢係永恆嘅。

呢個 forum本來屬於 artists network，係免費嘅，停止營運又唔係話會消失，仲係 search到同睇到所有舊 post，只係唔可以再 post嘢同 respond，members想繼續 communicate嘅話，可以去 artists network嘅 forum，係收費嘅，不過佢哋會 offer free trial畀 wetcanvas members。

個 forum有好多活躍會員，佢哋一定好難過，雖然可以付費轉去第二度，但一定會流失一 d熟悉嘅人，氣氛都會唔同咗，不過慢慢就會習慣，玩玩吓又會熟番。

以前曾經經常去一個 website嘅 forum，又係忽然唔再營運，原來個 website係有人為興趣自費營運嘅，唔似 wetcanvas本來背後有間公司，可以轉過去，而市面上亦冇其他相同主題嘅 forum，所以一群平時一齊交流嘅人變得好似要各散東西咁，雖然大家可以繼續聯絡，好似用 email咁，但冇咗個可以一齊交流嘅 platform，好可惜。當時仲未流行社交媒體，如果係而家，開個 Facebook page就可以解決，唔知佢哋後來有冇咁做呢？我從來冇 respond過，但因為經常去睇，而且嗰個 website冇咗就真係冇咗，乜都唔會留低，真係幾傷感。

人生就係會經歷各種嘅失去，唯有希望前面會有更好嘅啦。

畫班 Sep 2021 – 11. 配匙刻印小店（水彩）

阿 sir可能見我今期又用咗水彩，終於 offer教我水彩，佢話要教我畫 galaxy，我話我唔想學（好唔聽教），佢問我想學傳統水彩定速寫，我話要學剛畫完呢種，然後佢 send咗張圖去 group。

阿 sir畀我哋嘅圖好多時都係d artistic圖片，呢種圖片一般 d光都唔自然，難畫之餘又好難學到天然光嘅走向同影響，學唔到點睇光線，有時就好似今次咁，係人哋嘅畫，hmph⋯畫人哋嘅畫，😒為乜呢。我哋畫畫時，會將景裡面唔重要嘅嘢 blur咗，一團色就交代咗，我自己知道係乜，會畀番相應嘅色調明暗佢，人哋睇嘅時候點會知道係乜，咁我睇人嘅畫嚟畫，我要點處理呢團顏色，作一樣嘢出嚟，定係照跟一團顏色？

anyway，老師叫畫我就畫啦，都係一種挑戰，報班都係為咁。

呢幅畫嘅作者係一位台灣 urban sketcher，佢叫鄭開翔 Cheng Kai Hsiang。

～*～*～*～*～

呢種畫法係咪即係好似一幅認真嘅 value study？

睇畫勾番 d線出嚟真係唔容易，睇相或者實景會唔會更難？我自己覺得畫畫最難都係起稿，對住一張白紙，無中生有，到上咗第一層色就開始容易，最好玩就係最後嘅 enhancement，每一筆都睇到效果，好有成功感。

我畫好個 outline，但落唔到筆畫暗位嘅斜線，諗到跟住會加水彩，顏色都會表現出嚟，如果有埋斜線，會唔會過咗呢？我決定唔畫暗位嘅線，加咗色先，再畀阿 sir睇吓點。有同學都畫呢幅，post咗鉛筆稿問阿 sir，點知阿 sir好似睇唔到咁，覆晒其他人都冇覆佢，上一幅都係咁，佢 remind咗阿 sir一次，然而都係冇 feedback，點解呢？兩次我都諗住黐住學吓嘢，hmph⋯😒

加完色一睇，我好 surprised，點解顏色可以咁 vibrant嘅？都唔似我平時嘅畫，唔通同畫嘅嘢有關？今次係我第一次畫呢個題材。

Schmincke Akademie on Saunders Waterford 300g hp

呢種畫法比傳統水彩容易好多，好似填色畫冊咁，每一個色塊都好細，唔需要擔心水嘅問題，唔驚乾咗融合唔到，畫得好輕鬆。

我最滿意樓上嘅窗，畫到裡面嘅暗同外面窗簾嘅反映，不過呢，其實我唔係好明白呢個 area嘅結構，究竟嗰幾塊布係唔係窗簾？點解會喺窗外面？窗外嗰個得幾條鐵嘅框係乜？

有少少後悔太懶，冇留白，又懶得搵 acrylic出嚟😂，所有白色都係用 gel pen，唔夠白。😅

～*～*～*～*～

阿 sir睇到我幅畫，二話不說走去攞電話嚟影低，佢會擺我哋嘅畫喺佢畫室網頁，當作樣版畀人睇佢嘅學生畫作，其實我嘅畫算唔算係佢教出嚟？好似呢幅畫咁，佢一 d comment都冇😶，我問佢有冇嘢要修改或者加，佢話：好好喇，唔使喇。

如果話我冇學到嘢又唔公道嘅，佢介紹到新嘢畀我，好似粉彩，同埋 illustration，學埋呢期睇吓點啦。

畫班 Sep 2021 – 10. 城鎮水道（水彩）

上星期係第二期嘅第一堂，我冇上堂，諗住畫阿 sir send去 group嘅圖畫嚟交功課，唔知點解，冇喎😕。後來有同學 request水彩功課（吓？有水彩？um⋯有次上堂時間同上一班重疊咗，見過有同學畫水彩），咁就畫呢幅啦。

新一期有新同學，今期竟然由畫立方體開始，唔係素描，係用 9條線畫個立方體嘅框出嚟，一下子 basic到咁，然而，同學交嘅功課又證明真係有咁嘅需要，I didn't mean to be mean，但佢哋畫個立方體係唔對稱嘅，線條唔直，呢 d唔使阿 sir講，自己都睇到，點會唔改好先交嘅呢？

阿 sir教嘅水彩同我學嘅唔同，係畫晒線然後上色，仲會用排線做暗位嗰種，好 illustration風格，我特登去買咗兩枝 micron liner，唔知點解，我一直都想買，但冇乜用處😐，終於有個 excuse買。

佢只 send咗線條嘅圖，有 d地方睇唔明係乜，有 d難處理，另外，唔知原圖係咩 colour scheme，完全唔知應該用咩色，如果照我平時對呢種風景嘅印象，係好灰黑同暗嘅，考慮咗好耐，我決定畫得明媚 d。

我揀色同調色好弱，以前符 sir會教埋用 A色加 B色，再加少少 C色咁，自己又唔係做唔到，但會係好刻板，所以我 d畫幅幅都差唔多顏色，有 d悶，有時又會用錯色，搞到幅畫好詭異😂。

起完稿，淡淡上一層底色，然後畫線，應該唔係咁嘅，不過我希望畫線嗰時有 d顏色，畫起上嚟會有 feel d。今次張畫紙好唔合作，掃咗水成張發脹鬆晒咁，so weird，以前都未試過咁（唔記得咗用 300g，190g留返畫細畫用）。層底色⋯悶悶哋，幅圖好大部分係石，經過歲月嘅石路同屋，明媚極都有限。

上完一層底色，仍然決定唔到石地部分用乜嘢色（😂黐線），底色只係上咗 payne grey加 raw sienna，或者加 cobalt blue，淡淡咁，好淡好淡⋯，所有唔肯定嘅我都會咁，似有似冇，出事都唔會出大事😂

開始畫線，線條唔錯得，唔可以似平時咁畫細碎嘅線，應該係俐落嘅。最難係石級，一團亂石之餘又要畫出梯級形態，但我畫得唔夠爛，好拘謹😒（一道好拘謹嘅梯級😂）。

畫完線再加色，其實好想用紅色瓦頂，但好似一般都係綠色，我用咗 senellier嘅 turquoise色，Sharp d。

諗唔到牆除咗白色可以係乜嘢色，但咁又變咗成幅畫都係白牆，雖然局部加咗 d環境反射色，但都係好淺色。

幾隻窗好似太深色，變得好觸目咁，但其他部分好難加深，唔通要洗吓佢⋯？

Cotman on Saunders Waterford 190g rough 15"x11"

橋嘅倒影都係太深色，hmph⋯冇得救喇冇得救⋯

天都係失敗，舊雲好醜樣😁

隻 turquoise色真係好靚，呢幅畫中唯一嘅明媚。

屋邊嗰條柱（？）應該乜嘢色？

近處嘅石都幾好吖，不過梯級好生硬，佢應該係主角，畀我畫到咁，仲冇乜明暗，👎hmph⋯

我用咗幼線做倒影，唉，真係自作聰明，而家跳晒線咁，好唔夾。

上堂睇吓阿 sir點講。

😝😜😛d post愈嚟愈長😅😂😆

～*～*～*～*～*～*～

我問阿 sir係唔係唔應該用幼線畫倒影，佢話冇問題。講到條河，佢又話倒影唔使畫線，線條只適合用喺暗位，倒影係用顏色表示嘅。（⋯阿 sir你張圖明明有線⋯）

阿 sir話河面要加番屋嘅倒影（我以為嗰 d係河面植物嘅 cast shadow😅），加咗真係 sharp好多。

畫班 Jul 2021 – 9. 青蘋果（木顏色）

畫完隻蟲，冇新功課，又畫多次青蘋果，都係用黑紙，但今次用彩色。

黑紙上色同白紙好似有少少相反，白紙由深色畫到淺色，最後嘅淺色會有 blending效果，令深色更顯色，而黑紙似乎應該由淺到深，到最後嘅深色會令之前嘅淺色顯現出嚟，畫到尾先發現似乎係咁，因為覺得有地方淺色咗，加少少深色上去，點知一加竟然仲淺色咗。暫時發現係咁啦，用黑色紙好似由頭開始學過咁。

咁主動搵嘢畫，唔係因為好鍾意玩木顏色，但既然要畫就畫好佢啦，而且對 d技巧嘅效果都有 d好奇，所以試吓。

畫過好多次白色，都有龜裂情況（唔係真係龜裂，係有 d位顏料積厚咗，令表面唔平，愈疊色愈積得厚），今次我好頻密咁掃開顏色，想佢哋唔好累積太厚，但疊到一定層數都係龜裂，想好似普通畫紙咁大力塗上去，都唔係好得，淺色唔係好上色，深色好 d，真係奇怪。

d葉出乎意料咁容易上色，可能顏色夠深，現到黑色都唔覺啦，但連 hi-light嘅淺色都好易上色，幾片葉三幾吓就畫好。

曾經考慮過用 baby oil做 blending，幾年前同同學試過好多嘢，漸漸記番起，可能解決到龜裂問題，不過懶去搵出嚟。

最後諗住用 white charcoal做 hi-light，但上唔到色。

胭脂好似太粉紅，係唔係應該用橙紅？

始終都係太暗，點解決？

畫班 Jul 2021 – 8. 青蘋果 （木顏色）

其實呢幅應該係第 6，畫咗冇 post，但諗諗吓都想 record埋。

原圖係黑色背景嘅青蘋果，啱啱買咗幾枝白色筆，正好用嚟做單色素描。
已經唔記得咗用過邊枝筆，應該全部都用過啩😅

呢幅  d白色都係裂晒咁，我有捽開㗎（阿 sir唔主張捽，佢叫我哋畫細圈圈上色同控制深淺色），上色薄透番紙嘅黑色，疊多幾層厚咗又裂開，以前用 polychromos，我以為係枝筆嘅問題，但今次其他牌子都係咁，唔知點解。

係唔係白得滯？青蘋果可以深色番少少。

最滿意個木櫃，舊舊哋嘅木嘅質感👌

～*～*～*～*～

為咗方便搵舊 post，加咗幾個 category，然後自己都亂晒😂

畫班 Jul 2021 – 7. 獨角仙 allomyrina dichotoma （木顏色）

唉，d同學話要畫獨角仙😐，畫花唔得嘅？

唔清楚結構我畫唔到，唯有去 search吓獨角仙構造啦。昆蟲睇真係好可怕㗎，異形咁恐怖都係參考昆蟲啦，我仲要去仔細睇清楚佢，好彩唔係要畫隻反咗肚嘅昆蟲，唔係仲恐怖😑

諗起以前畫 bio d圖，又唔覺得恐怖喎，仲畫過老鼠嘅解剖圖添，可能細個唔識驚啦。

上一幅水溶好自然咁用咗 baohong畫紙，所以今次我終於記得要用水彩紙唔用 sketch book。之前次次起稿反覆畫同擦，搞到紙面滿晒筆痕上色唔平均，今次我先用 sketch book起稿，再移印落畫紙，希望成功。

～*～*～*～*～*～

移印成功👏
移印要反覆咁畫好多次，畫畫吓走咗樣，好似卡通化咗咁。
我已經好認真咁跟返比例起稿，上色時仍然發現畫歪咗、長咗短咗😑，唉⋯真係唔知起稿時對眼睇到乜。

Faber Castell Polychromos on baohong 300g 15"x10"

自從知道背景可以用乾粉彩後，畫木顏色輕鬆咗好多。

呢隻蟲畫得比我預期快，棵樹都係用乾粉彩，其實有少少出貓嘅感覺，我比較鍾意用單一 medium，好似水彩我寧願冒險留白，都唔想用 gouache。試過用 gelly roll加 hi-light，內心都係扣咗自己分㗎。

背部個殼畫咗好耐，因為好多顏色，雖然睇相唔覺，尤其係下半，張相影到黑晒，但幅畫本身多 d紫紅色。

畫完個殼開始倦怠，頭同角都還好，最差係下半部，已經畫到悶悶哋，仲要唔係好肯定隻蟲嘅結構，所以畫得有啲求其。

畫唔出反光、立立令嘅樣😕

畫班 Jul 2021 – 6. 小鎮 （水溶木顏色）

阿 sir不時都會 send d圖去 group，然後大家畫完就會交功課，呢個運作方式都幾好玩，啱畫就畫，唔想畫又可以 skip咗佢。

呢期嗰兩張係人像，化晒妝用埋 filter咁嘅樣，冇興趣畫，我揀咗較早前嘅圖，其實都唔係覺得呢張容易畫或者靚，只係冇選擇，張圖灰灰黑黑，個景亦冇趣味，但總要揀一張，當挑戰吓自己，而且見有同學畫緊，一齊畫有比較會好玩 d，『比較』，唔係競爭嘅意思，而係可以睇吓唔同人畫會有乜唔同效果，人哋會點處理。因為咁啱係課堂上，阿 sir見到就話：『你揀呢張呀？好少用木顏色畫風景，會畫到死㗎。』

畫風景同畫物件有乜分別？的確係少見嘅，anyway，我都唔打算用 polychromos，我用水溶，希望效果似水彩畫，好似上次畫水池嗰幅咁。

不過今次好似唔係幾成功，可能我上色唔夠深，溶開好淺色，都唔記得咗上次點畫。應該又係因為我總係對用色唔肯定，唔敢用力啦，我總係一層一層咁疊，慢慢睇佢疊出乜嘢色，再決定下一層點疊，就算肯定咗顏色，都決定唔到幾深色先啱，輕輕落色就實冇錯，⋯，所以我 d畫總係規規矩矩好悶咁？

（咁小事可以講到咁長篇嘅？真係得人驚😂）

好開心呢幅畫我冇跟原圖嘅顏色，基本上只跟佢嘅明暗同構圖（其實明暗都跟唔足，有 d錯咗），佢咁黑，我反而睇出好多顏色，都有用喺畫裏面。終於學識擺脫原圖嘅規限，可能係因為原圖顏色太灰黑啦，冇可能照跟，我挑戰呢張圖真係有收穫。

不過透視做得唔係幾好，左邊個屋頂完全畫錯晒，有時真係唔知自己做乜，條線明明向下，我都畫咗向上。右邊屋頂都係錯，成個走晒樣，不過幅畫睇嚟都幾靚吖，靚就得啦😁。

如果唔係用水溶，真係有排畫，d磚要逐塊畫，真係會畫到死，水溶就可以求其畫幾筆，加水先畫個型出嚟，容易好多。唔知點解，一見係木顏色，大家（甚至自己）都會 expect你畫到纖毫畢現，真嘅一樣咁，好攰。

d樹雖然冇跟足，但我幾滿意，顏色幾靚，仲分到兩邊唔同受光度添😄

Faber Castell Albrecht Durer on Baohong 300g hot press 11.5" x 11.5"

（黐線，真係好鍾意講嘢😅）

～*～*～*～*～*～

今日攞幅畫畀阿 sir睇，佢話兩邊嘅牆太淺色，好似 d樹變咗重點咁。其實我畫嘅時候真係將重點放喺兩邊樹嘅光影，局部嚟講都幾成功，但整幅畫嚟睇就平淡咗，始終樹嘅部分少，於是呢堂又繼續畫，希望唔使畫成個星期啦。

阿 sir對我用水溶有 d不以為然，冇落手畫嚟示範，佢一再話佢好少咁畫，又話水溶木顏色『係綽頭嘢嚟啫』，hmph......，點解呢，每種 medium都有佢獨特嘅地方，水溶木顏色唔係用嚟『扮水彩』，用嘅時候都需要技巧，用到嚟 create arts就得啦，佢畀同學用嘅都係水溶喎.....

佢好重視木顏色畫嘅還原同像真度，問我哋點睇，如果有人話幅畫畫到咁細緻同真實，不如用相機，我哋會點答，其實，我一向都覺得，木顏色畫到真嘅一樣係觀察力、質感形態顏色光線嘅掌握、同耐心嘅展現，佩服做到嘅人，但我就唔係好鍾意咁樣用 d時間同眼力，偶一為之就好喇，以前 take咗兩個 course，畫到死死吓，估唔到一場誤會而家又嚟過。

聽同學講，呢個 course以前真係教素描，例如教點解構一隻手點畫出嚟，隨住佢哋進度教到而家嘅油畫。但你收咗新生喎，第一堂就畀張圖叫我哋跟圖畫朵花出嚟，然後每堂畀張圖照畫，有天份嘅同學都畫得似模似樣，但有 d真係需要教 d畫畫嘅 basic knowledge囉，而家好似油畫嗰組先係學畫，我哋就只係借個位坐低畫畫咁。

我都係鍾意水彩多 d，尤其係想睇示範，報呢個素描班係諗住 strengthen基礎，真係唔想玩木顏色，佢都有講過畫完木顏色可以玩粉彩，舊同學都係咁講，hmph....上多一個 course睇吓點啦，畫完嘅畫畀老師同學睇吓，可以知道邊度畫得唔好，而且有人一齊畫畫好開心。

加工完畢，兩邊牆加深色，enhance咗層次感。