畫畫 - 合掌瓜 （素描）

前兩晚執畫具，見畫簿裡面有張起咗稿嘅合掌瓜素描（係呀又係佢，畫咗好多次），決定畫埋佢。

以前唔鍾意素描，因為唔鍾意黑白，後來發現畫畫唔識素描真係差好遠，上咗個course後，又覺得都幾好玩，一筆一筆將件物件建構出嚟，好得意。

但都好少喺屋企畫，因為d碳粉會週圍飛，不過呢幾晚想畫，初時用普通hb鉛筆，唔捽就唔會污糟啦，畫畫吓覺得深唔夠深淺又唔夠淺，於是就攞番盒素描鉛筆出嚟，好開心咁4567b都出動晒，後來仲一不做二不休，攞埋miss ho派嗰塊棉花出嚟捽。捽過真係唔同架，筆觸blend得好靚，留番明顯筆觸都有另一種味道嘅，但我暫時做唔到深淺筆觸和諧咁接合，都係捽吓靚d。

右邊好d，左邊明暗唔夠分明，表現唔到個瓜硬嘅表面，好似鬆鬆哋咁。

雖然唔係功課，阿sir都like咗呀。

Faber Castel graphite on paper

.

水彩花卉風景 2017-6 - 巴西鳶尾

一向唔識花，唔係好睇得明個結構，上網search蘭花都搵唔到呢個品種...
後來發現原來唔係蘭花，係叫『巴西鳶尾』，但我打『蘭花 三瓣』，第一條就係呢種花，相信好多人好似我咁以為佢係蘭花。

為免畫到錯晒位，今次試吓打格。
效果真係幾好呀，有d唔知係乜嘅線條同色塊都照樣畫落去先，又係到時睇阿sir示範啦。
雖然有格線，但都係畫一筆擦一筆，唔知會唔會擦走咗畫紙sizing呢？

阿sir個稿同上次一樣咁虛無。
花瓣上嘅圖案雖然好密集，但我一路諗住阿sir會有好揮灑嘅手法上色，然後唔知點就會神奇咁表達到圖案，因為畫畫，尤其係水彩，好多錯覺嘛。
然而一開始，阿sir就一小筆一小筆咁描d花紋，
跟住畫花瓣陰影，雖然朵花白色，但落色都好重手，而我就總係唔敢，畫完又證實真係唔夠色，再疊就污糟唔似白花....
我以為會好似上堂咁整濕張紙渲染背景底色先，但阿sir今次就示範另一種畫法，邊上色邊加水塗開，用咗藍、綠、紫、啡，塗出嚟有啡有綠有佈局，而我，有一撻水份回流去顏色度，有水暈，有個位乾咗同旁邊接唔好有條縫，仲成張都差唔多色.....

堂上完成埋底色，雖然只係第一層，自己嚟講都算快，
花瓣陰影淡咗小小，但都表現到形態，幾自然。
混亂中底色遮咗左邊花瓣嘅尖尖，成片瓣鈍咗，唔知有冇辦法救番。

兩朵花底下仲有好多枝葉睇唔明，上堂前同學話阿sir應該會簡化，果然係省略咗。
我諗我個人真係太執著喇，唔識變通，畫畫睇出個性，唔知可唔可以反方向以改變畫法嚟改變性格呢？......oic，唔怪得話畫畫可以陶冶性情啦。

次次上堂都帶漏嘢，多數係試色嘅紙，都小事，今次好叻記得帶紙，但竟然冇帶畫筆！
唔係好多地方有似樣嘅畫筆賣，好彩附近有間春記，佢連散裝水彩都有。
我一向都節制自己唔好買太多畫具，但又考慮緊買番枝好d嘅畫筆，（好似好矛盾咁），今次一買就買咗一套6枝，因為只有佢價錢同質素都感覺ok，有咗咁多筆，咁我仲買唔買得da vinci....
125蚊，佢話係 black sable，我非常懷疑，只係覺得就算係fake sable佢個樣都似幾好用，主要係唔算好貴。
除咗甩甩哋毛，真係幾好用，好似好用過我用緊嗰枝，番去試真d先。

除咗背景太雜亂，我幾滿意呢幅。
如果背景亂成交錯形態就好嘞，可以睇成葉，但而家一團團咁就...真係亂成一團。
發覺自己營造立體感都幾成功，最大問題係唔識分輕重（唉，又係我做人嘅缺點之一），一幅畫係唔需要每一點都清晰，好似花瓣咁，有部分要模糊，咁先唔會太生硬。

阿sir本來提議用negative painting用第一層底色做葉，但我覺得咁仲難，negative painting我一定畫唔到塊葉直同挺，而且葉咁嘅色唔靚，所以我都係加多一層底色，再用綠色加葉，今次我好克制咁冇加太多葉，同埋化開咗疊住隔離都由得佢，以前我一定會畫番清楚每一片嘅來龍去脈架，而家我知道畫畫係要主體清晰，枝葉模糊，暫時領會到係咁啦。

Shinhan on Saunders Waterford 190g rough 11"x15"

Canadian Open - Rogers Cup atp1000 (4 - 13 August, 2017)

Nole同Wawrinka不約而同宣佈咗下半年唔參加比賽，
Murray亦因傷唔參加Rogers Cup。
所以今年Rogers Cup嘅陣容，喺我呢種『球員迷』睇嚟，冇幾多個認識，好似好冷落咁。
參加人數都唔夠，7位球員自動晉級，Nadal, Zverev, Tsonga, Dimitrov, Thiem, Nishikori 同埋Federer。A Zverev 真係來勢洶洶咁樣喎。

Berdych 突然受傷退出咗。今年傷情好嚴重咁喎，咁多前20受傷，可能ATP嘅賽程安排真係太緊密，加上近10年戰況激烈，職業網球已經唔同紳士淑女玩嗰種遊戲，其實所有職業運動都係一種格鬥，運動員都係戰士，戰士受傷好平常。

~*~*~*~*~*~*~*
round 1


除咗bye嗰幾個自動晉級，
del Potro, Raonic, Ferrer, 都晉級；Lopez 輸咗（不過老喇，35歲，唔係個個都似federer）, 輸畀韓國嘅鄭泫 H Chung，ATP好少亞洲人，以前Michael Chang雖然都係亞裔，但佢身份係美國人，真正亞洲代表最好成績應該都係Nishikori。
Ferrer好盡力，但感覺佢都係靠一種拼勁同心態，每次都唔能夠輕鬆贏。


~*~*~*~*~*~*~*~*~
round 2
Borna Coric，21歲，今年啱啱贏到第一個 atp title。

61 62 順利到round 3。

呢圈賽果對我嚟講極多意外。

出局嘅有 del potro, Raonic, Gasquet, Tsonga, Thiem, Nishikori；晉級嘅當然有federer，同rafa一樣都係61 62, a zverev 贏咗Gasquet, Dimitrov贏咗zverev阿哥，Schwartzman贏Thiem，Monfils贏Nishikori，全部都係三盤，仲有又係打到tie break嘅ferrer，下一圈對federer，加油啊ferrer！

~*~*~*~*~*~*~*~*
round 3
Denis Shapovalov
18歲，舊年先開始職業賽，左手單反，仲未贏過一次title。
但佢都唔係無名小卒，2015 贏咗us open junior double title，2016贏咗wimbledon junior title，junior 排名去到no.2㗎。

Rafa竟然輸咗，63 46 67
以前佢贏到第一盤就一定贏到場比賽，
以前tie break一定贏，今次仲要3-0贏緊都輸番．
仲以為今次可以番上第一添。

小朋友咁快就打到atp1000 quarter final，仲喺主場，一定好興奮。
我寧願係佢真係有實力贏rafa，唔希望係rafa狀態下滑得咁緊要，拭目以待。

亞洲代表出咗局，monfils同ferrer都輸咗，ferrer唔好彩，咁早遇上federer，64 46 26 成績都唔係一面倒。
a zverev, dimitrov, schwartzman晉級。
schwartzman有小小似ferrer，場場都唔會輕鬆，今次06 75 75。原來佢好年輕，仲有幾日先25歲，不過身材係好大弱點，1.7m 64kg，球員一般都過180，70kg以上，最新嗰代190都好多。除非佢有好驚人嘅絕技，otherwise都唔會有大成就。2009開始職業賽，最高排名32，到2016先贏到第一個atp250 title，相信係一個有毅力嘅人。

不得不佩服federer，35歲仲咁打得，好多人話因為佢打法唔費力，咁都要佢天份係可以用呢種打法先得。
不過federer都一樣有過低潮，希望Rafa調整後會有另一次高峰。

呢個tournament，如無意外都係federer贏，federer唔同rafa，佢冇咁多意外空間。


~*~*~*~*~*~*
Shapovalov真係唔係運氣，佢入到semi-final對zverev，46 57 輸咗。

final 係 zverev vd federer， 63 64贏埋。
呢個係佢第11個title，world ranking 7，得20歲，expecting to be future no.1 almost by all.
不過rafa 19歲已經 ranked no. 2，贏咗16個title包括第一個grand slam，
而federer，21歲先去到rank 7，贏到3個title，22歲先贏到第一個grand slam。
不過每個人都唔一樣，breakout 得早唔代表去得最高。

職業運動就係咁，fans睇住一代又一代運動員上去落嚟。

水彩花卉風景 2017-5 - 羅馬鬥獸場

第五堂畫鬥獸場，張圖有小小廣角鏡仰視角度，阿sir叫我哋畫番正面d。但我打算照圖畫，一來呢個角度好靚，二來，唔跟圖，咪仲難畫？！

畫極都唔啱高同闊嘅比例，要出埋計數機同間尺。
d門由大到細好難安排....或者我唔應該先畫外框，
應該由門畫起，逐隻門畫落去，只要比上一隻細d，畫到尾自然會連比例都啱埋。

畫畫吓又開始有素描feel，唔畫住喇，上堂先算，我唔想變到好似填色咁。

臨瞓前畫興大發，但冇細紙，攞咗張畫壞咗嘅細紙，用背面畫，我第一次用背面，因為前幾日st cuthberts個instagram話正反面差唔多。真係唔覺有分別，可能畫細張冇咁覺。

隨意畫，稿都冇起，感覺幾好，但左邊無端端加咗綠色唔協調，用紫紅應該會好d，...定係紫藍？

冇畫週圍d遊人，好似好荒涼咁，似墳墓多d。

sl話畫得幾好，不過太似幅圖。唉，我淨係識跟圖畫，不受控咁連色都跟埋，都唔知點解人哋咁叻畫出到另一種氣氛。

哈！阿sir都喺嗰個位用咗綠色！不過梗係blend得靚過我啦，呢個係技術問題，至少我嘅sense係啱嘅。

先整濕張紙暈染天空，因為構圖關係，天空右邊係重點，阿sir話我個天好靚，好開心啊~

其實嗰個位唔小心滴咗水落去，化開咗個水花，好似圓形嘅雲咁，ufo咩？唯有加色掃番勻，但匆忙間調唔番本來嘅色，又重手咗實咗，即刻又好似平時畫雲咁用紙巾索番小小，雖然唔滿意，但覺得畫天空less is more，算啦，由得佢，點知乾咗都幾好。所以真係唔好怕錯，平時驚破壞畫面好多效果都做唔到，要大膽d，如果真係救唔到咪畫過囉.....其實屋企都好多廢畫....

橙色打底，加ultramarine調成深淺啡色。唔直接用咖啡色因為佢本身唔夠鮮，呢幅畫受光位需要好鮮明，用橙加ultramarine可以兩邊走，要明要暗都好flexible，又唔會唔協調。

兩側，尤其左側嘅門模糊處理，見阿sir隨意畫，講都話唔使在意有幾多門，但我數吓，模糊之中，比例上，數目同幅圖係一樣嘅....，所以係：比例重要過細節。

建築物上有幾個睇穿見到天空嘅arch一定要留空填番天空嘅顏色，如果唔係成舊嘢就會實晒冇咗空間感。

建築物前面有一群一群嘅遊人，阿sir都係用呢兩隻色畫咗密集嘅11111，再喺上面點點點d頭出嚟，希望我唔會畫成一堆整齊嘅 i 啦....，不過我唔記得留白，阿sir話畫成群遊人留白都好重要，右邊都仲有小小嘅，左邊就....

兩邊d樹本來都ok，但邊緣太實在，希望加小小化得開可以救番，但又怕愈加愈大舊，要小心d。

草地記得加番兩舊石，如果唔係就會太空虛，唔balance。

阿sir叫我畫好右邊先，再就住右邊決定左邊要推到幾暗。

阿sir畫得好揮灑，而我就畫到好似工筆畫咁，冇晒水彩嘅感覺。

遊人畫細咗，由得佢啦，加筆會污糟渾沌，等佢襯得個鬥獸場宏偉d啦，我通常都畫到顯細，今次真難得！

 加極都好似唔夠暗，可能因為唔敢狠狠地冚色上去，

但阿sir係用色係暗，唔係濃...

啊！係我右邊唔夠光！深色咗！我仲一路以為好夠光添....拼埋先睇到。
睇咗阿sir好多寫生，覺得佢好叻表現光，睇畫都覺得曬。

感覺三層分唔清，加咗幾筆強調各層邊緣，好似好咗。

今次影相光線唔同，睇落氣氛又唔同咗，所以睇相唔真實。

Shinhan on Saunders Waterford 190g rough 11"x15"

印記

好多年前，做過一間公司過年會贊助職員去旅行，有一年包咗團去菲律賓，80幾個同事，分兩駕旅遊車。

第4定第5日，去到宿霧，酒店有個氹氹轉好好玩，走嗰日，上咗車，但唔記得點解又未開車，架車就停喺個氹氹轉旁邊，我同多多都想玩多次，我走去隔離車搵W同K，因為前一日都係同佢哋玩，仲玩得好開心。點知我上到車，佢兩個無精打采咁攤喺個位度，我問：『玩多次吖？』W悶悶咁答：『唔玩喇...』雖然覺得奇怪，因為佢哋幾個男仔平日都玩得好high，未見過佢哋咁樣，但我都冇深究，冇再問。

跟住嗰兩日行程，呢伙人都好靜，但因為唔同車，我哋自己都好多人玩冇覺得異樣。

過咗一段時間，都唔記得幾耐，有一日W講起嗰次旅行，佢同K同房，原來去到酒店上咗房後，K入房一打開衣櫃，有陣黑氣冒出嚟，佢暈咗一暈，但又唔見有其他事，亦唔知係咪自己錯覺，所以雖然忐忑但都冇乜可以做。

出去玩咗一日，番到酒店，入房除咗件衫，W話見到K背脊有個印，比膚色白（K皮膚都幾黑，sun tanned），手掌形狀，但大過一般人手掌，而且有6隻手指。

嗰次之後，再冇人提過呢件事。而我亦離開咗間公司。

過咗好幾年，有一日，睇雜誌個靈異鬼怪專欄，赫然見到有張圖片，入面有個似手非手嘅圖形，雖然我只係聽過W形容，但一睇到就知係佢喇，當事人身份都吻合，雖然事情經過同我所知有出入，但可能係雜誌或當事人有原因而咁做，又或者W講嘅唔係事實全部啦。

對呢件事我一直半信半疑，因為個印其實可以造出嚟，用塊掌形嘢遮住曬太陽就可以啦，但係佢哋嗰幾日嘅表現真係好depressed，要知道呢幾個係一向好開朗好鍾意玩嘅男仔，會唔會為咗整蠱人作故事，仲要扮depressed去spoil自己嘅旅程呢？仲有係K喺呢個旅程後，喺公司都靜咗好多，冇乜笑容，我諗唔會花咁長時間嚟咁玩啩？後來仲要上雜誌添，唔會咁無聊玩到咁大啫。

咁，結論即係真係有......😲

唔知究竟發生乜嘢事，唔知解唔解決到呢？

水彩花卉風景 2017-4 - 白玫瑰

阿sir知道我哋起稿慢，上堂派定下堂嘅圖，兩朵白玫瑰。

玫瑰花瓣線條好難捉摸，每一片都會向後捲，花瓣之間有虛位，於是就出咗一堆線條，畫畫吓我就迷失 .......

所以今次張稿我好似畫素描咁，連陰影都畫埋，咁先知道自己畫緊乜。但兩朵玫瑰白色𠴱喎，咁樣嘅稿會唔會整到好污糟呢？

張圖唔係好清晰，有d地方一pat咁....不過唔緊要，睇阿sir點畫囉😰  ~

上面嗰朵OK，下面嗰朵歪歪哋....今晚再執，真係好彩尋晚就開工 。

低手真係應該用靚紙㗎，如果唔係起稿嗰時已經擦爛 。

改極都係歪歪哋

我起稿起到素描咁，而阿sir個稿，...只係幾條虛線😰 ，因為花係白色，所以––––我都估到係咁，不過畫唔到啫😰 ，睇完示範個個番埋位係咁擦....哈哈哈

阿sir今晚又有新畫簿，同學又問長問短，我覺得阿sir好多嘢畀我哋學，但唔係佢用嘅紙囉，我一定會stick with Waterford，用慣咗比較容易handle。

阿sir先整濕張紙，用橙同青綠暈染朵花，藍（似係cerulean blue）同正紅暈染背景。乾後用番呢幾種色逐塊花瓣勾畫。圖片都幾多紫藍，畫嘅時候都有用紫藍畫暗位，但完成作品係偏黃.....用咗好少黃色之嘛.....點解咁嘅...？睇住都唔明😰，所以自己畫就變晒調...

左邊上堂畫都仲比較多黃色，右邊番屋企畫成朵紫晒咁滯。

唉，一團糟！

原來唔四邊貼膠紙就整濕張紙係唔得嘅，就算乾番都扭曲晒。

本來係想渲染一堆矇矓嘅枝葉做背景，但調唔到啱嘅暗色.....仲洗到有d位唔上色添...

周圍應該fade out，但唔知手慢定落筆重，變咗叉開晒。

白玫瑰就唔似喇，不過都算係一朵幾靚嘅花吖，幾立體，花瓣邊緣同背景接合得幾好，有清晰有矇矓。

應該好好哋處理個背景，今次有少少懶，諗住扮大師好揮灑咁渲染個背景，但眼高手低。

Shinhan on Saunders Waterford 190g rough 11"x15"

後來再畫另一朵玫瑰，好似畫得差咗。
https://iceefaery.blogspot.com/2018/02/2018-5.html


紫玫瑰
https://iceefaery.blogspot.com/2018/06/blog-post.html

畫畫 - 黃昏沙灘 （木顏色）

其實我學木顏色係意外，但投資比水彩多，淨係顏色筆都買咗成三千蚊。但木顏色畫一筆一筆咁填上去，好花時間，所以畫展後都冇再畫過。

呢幾日諗，唔一定要畫寫實啫，好似速寫咁都得喎，就攞水彩班嗰張沙灘嚟試吓。
雖然唔雕琢，但執吓執吓都畫咗半日。
最滿意舊石，色彩算豐富，正面背面分冷暖色。
個天顏色冇氣氛，感覺污糟。
個海....畫到興高采烈加咗太多色，尤其係橙棕色，搞到唔係好似海。
沙灘本來係啡色，為咗推暗加咗藍色，我覺得效果幾好。

呢粒石嘅光暗同立體都好靚，但其實係一個失敗，擦咗又擦唔清，儘量修補，結果反而仲自然。畫畫有時都係咁，畫得順利仲會純得滯冇質感。

Polychromos on paper