印記

好多年前，做過一間公司過年會贊助職員去旅行，有一年包咗團去菲律賓，80幾個同事，分兩駕旅遊車。

第4定第5日，去到宿霧，酒店有個氹氹轉好好玩，走嗰日，上咗車，但唔記得點解又未開車，架車就停喺個氹氹轉旁邊，我同多多都想玩多次，我走去隔離車搵W同K，因為前一日都係同佢哋玩，仲玩得好開心。點知我上到車，佢兩個無精打采咁攤喺個位度，我問：『玩多次吖？』W悶悶咁答：『唔玩喇...』雖然覺得奇怪，因為佢哋幾個男仔平日都玩得好high，未見過佢哋咁樣，但我都冇深究，冇再問。

跟住嗰兩日行程，呢伙人都好靜，但因為唔同車，我哋自己都好多人玩冇覺得異樣。

過咗一段時間，都唔記得幾耐，有一日W講起嗰次旅行，佢同K同房，原來去到酒店上咗房後，K入房一打開衣櫃，有陣黑氣冒出嚟，佢暈咗一暈，但又唔見有其他事，亦唔知係咪自己錯覺，所以雖然忐忑但都冇乜可以做。

出去玩咗一日，番到酒店，入房除咗件衫，W話見到K背脊有個印，比膚色白（K皮膚都幾黑，sun tanned），手掌形狀，但大過一般人手掌，而且有6隻手指。

嗰次之後，再冇人提過呢件事。而我亦離開咗間公司。

過咗好幾年，有一日，睇雜誌個靈異鬼怪專欄，赫然見到有張圖片，入面有個似手非手嘅圖形，雖然我只係聽過W形容，但一睇到就知係佢喇，當事人身份都吻合，雖然事情經過同我所知有出入，但可能係雜誌或當事人有原因而咁做，又或者W講嘅唔係事實全部啦。

對呢件事我一直半信半疑，因為個印其實可以造出嚟，用塊掌形嘢遮住曬太陽就可以啦，但係佢哋嗰幾日嘅表現真係好depressed，要知道呢幾個係一向好開朗好鍾意玩嘅男仔，會唔會為咗整蠱人作故事，仲要扮depressed去spoil自己嘅旅程呢？仲有係K喺呢個旅程後，喺公司都靜咗好多，冇乜笑容，我諗唔會花咁長時間嚟咁玩啩？後來仲要上雜誌添，唔會咁無聊玩到咁大啫。

咁，結論即係真係有......😲

唔知究竟發生乜嘢事，唔知解唔解決到呢？