畫畫 - 山 （水彩，marker）

早排想畫山，上完色唔知點畫就擺低咗，後來連參考圖片都 del埋。日日都見到佢，諗住遲早都係淪落做試色紙。

尋日忽然想用marker畫埋佢，search 唔番張圖片，唯有自己畫啦，都好嘅，有圖我又梗係跟到足，今次自己睇住光線方向畫囉。

哈哈哈，幾舊逼埋一堆咁，第一舊好似嵌咗入第二舊咁。

最後嗰舊將個肚腩擺喺前面個頭頂，唉，啱啱仲話自己營造立體幾好添，閉門造車果然係唔得。

不過條天梯都幾好吖，用咗gel pen畫一邊扶手，唔知正統會點畫呢....

枝 T0 最遲買喎，點解咁快用晒架.....玩marker真係好貴，三十幾蚊一枝，第三次畫 1/4 a3就玩完，即係畫一張a3都唔夠。

水彩最慳，shinhan二百幾蚊30色，玩咗幾年都用唔到一半，唉...想轉用第隻又唔想浪費，雖然已經買咗一堆winsor n newton，呢個牌子仲大枝，可能到我往生都仲未用完，人哋仲有好多牌子想試......