畫畫 - 繡球花 1 （木顏色）

下堂畫嘅繡球花，覺得都冇稿可以起，碳筆素描又太難，就決定畫木顏色。
咁細幅嘅繡球花唔通仲工筆咩？梗係用水溶木顏色啦。
以前唔識畫水彩，好鍾意水溶木顏色，扮自己識水彩，學咗先知道其實唔同。

唉，畫到一pat咁。
構圖都好錯，唔平衡。

唔知哪來的毅力，即時再畫一張，

今次用咗兩層水溶後，仲攞埋polychromos出嚟加工。
d花係好似寫 "8"字咁寫出嚟，再random強調。
都做到fluffy效果，但睇唔出係繡球花，話係牡丹都可以...係咪因為有花芯呢？繡球花花芯唔係包喺中間嘅咩？但點解幅圖朵朵都見到花芯嘅？
中間嗰幾塊葉怪怪哋，尤其是正中間嗰塊，係咪唔夠暗呢？但又已經太黑『匿』唔番入花後面，而家好似頭箍咁箍住d 花。
不過我自己已經覺得唔錯喇，只係畫咗兩三個鐘。



用擦紙膠擦過塊葉，拉番低d花，都唔知有冇好咗。
唔知係咪因為waterford hp嘅關係，polychromos黐唔實，好容易擦。
感覺紙對木顏色嘅影響大過水彩，好似polychromos喺waterford會好似粉咁跣走，今次可能有albrecht durer打咗兩層底，冇咁明顯，仲出咗我想要嘅朦朧效果。不過post咗上同學會group好似唔係咁多人欣賞，我估大家都係比較欣賞超寫實嘅木顏色畫。

Albrecht Durer and Polychromos on Saunders Waterford 300g hp

如果摸索到另一種畫木顏色畫嘅方式，唔需要花大量時間就好，見過有人用排線同value嚟畫，又或者可以好似插畫咁畫，或者速寫吖，其實木顏色都有好多玩法嘅，可以逐樣試吓，咁我斥巨資買嘅顏色筆就唔使長住冷宮。
用木顏色畫到真嘅一樣，偶一為之係好有成就感，好似miracle咁，但真係花唔起時間，而且太傷神喇。

我都係決定將所有水溶木顏色擺埋一齊，唔要個筆袋喇，分開擺唔方便。
開始學嘅時候唔知道自己會抗拒唔到顏色筆嘅吸引力，覺得120色太浮誇而買咗60色（當時都唔係認真想學木顏色，買FC60色都算小小浮誇），後來忍唔住散裝買埋另外60色，又要另外買筆袋裝，但筆袋又唔好用....

決定掉咗個間隔，全體住studio














其實咁擺都唔係幾好，會撞到筆尖，或者加一行發泡膠喺上面擋一擋啦。

早知買120色，住原裝盒幾好呀....

~*~*~*~*~*
另一種畫法
https://iceefaery.blogspot.com/2018/01/blog-post_22.html