Winsor & Newton - Cotman

四年前開始畫畫，雖然唔係keep住畫水彩，但斷斷續續四年，99.9%都係用shinhan，最初買咗幾枝cotman，好偶然先用吓。

有時會覺得shinhan嘅顏色太鮮艷，唔知係因為自己調色習慣定係顏料特性，雖然我唔想做一個買畫材多過畫畫嘅人，但都畫咗四年，轉吓第二個牌子都唔可以話係浮誇啦，既然手上有幾枝cotman，順理成章就轉用。

不過，水彩顏料真係消耗得好慢（定係因為shinhan容易出色呢？以我少少用過cotman嘅經驗，shinhan係比較容易化開釋出濃厚顏色），cotman咁大枝，我又唔係好勤力，可能夠用一世。其實我都想試吓其他牌子，好似holbein，schmincke, maimeri，或者遲d可以試吓，淨買三原色囉，係咪？

有15色，應該夠用，不過相比而家用緊30色，小小擔心調唔出平時用開嘅顏色，不過試吓啦，（希望）練練吓就練成。

raw sienna同yellow orchre係唔係太接近呢？我本來冇諗住買raw sienna，但佢喺cotman個colour chart上好靚，臨時決定買埋。

除咗以前買落嘅sap green，我冇再添置綠色系，相信4種黃同4種藍可以調出夠用嘅綠色，唔夠先買啦。

下面嘅colour patches係嚟自呢個blogger：https://janeblundellart.blogspot.hk/search?q=cotman
應該係wn artist grade, 相信cotman嘅色相唔係差太遠，借用一下。

我自己都有做colour chart，不過冇佢咁專業。

本來想逐隻色試調色，但試第一隻就冇咗耐性，胡亂調色畫咗一堆，但出嚟嘅效果又幾好喎，正係似我哋成日想畫嘅樹，顏色冇混成一團，唔通真係顏料嘅關係？而且覺得cotman嘅顏色subtle d，雅緻d 。

下個course花卉風景，想開始轉用cotman，但仲未決定用乜嘢palette，用緊嗰款係for 30色，唔覺有少格數嘅palette賣，而且細嘅又會唔夠位調色，我得15色咁點呢？每色兩格？定留空？

　

市面上唔係好多款palette，多數都係塑膠，我唔係好想，覺得會stain，不過見唔少professional artist都話mijello好用，都心動想試吓，因為想轉吓款式，但我去嗰兩間都冇，而且我都係鍾意金屬多d，所以都係買番用緊嗰款。

我好勇敢咁用咗唔同嘅排列，黃同藍擺埋一齊，方便調出各種綠色，另一邊burnt umber旁邊擺咗extra嘅alizarin crimson, ultramarine同prussian blue，可以調出冷暖嘅灰黑。

不過，尋晚再試調色，四黃四藍，無論點配搭出嚟嘅綠都係差不多咁，而灰黑就好似唔夠灰黑，比例都幾難控制，用住睇吓點，真係唔得就擺埋payne's grey落去，買埋綠同紫囉，不過唔會唔得嘅，係咪？

再認真試調綠色，好似係ok嘅，raw sienna同yellow orchre好近似，但其實除咗冷暖有少少分別，rs係比較透明，而yo就粉粉哋，調色後分別大咗，單睇顏色我鍾意rs多d。

不過呢個colour chart只係for reference,黃藍比例唔同效果都會唔同。

畫畫 - 靜物（木顏色）

最近覺得自己應該多練習吓素描，可能會比較能夠了解物件嘅明暗關係。
上堂嘅靜物咁失敗，試吓用素描搵番d信心。

兩個梨幾好，雖然前面嗰個似咗桃。
個樽....似玻璃咩？
真係要練吓畫玻璃至得。

Polychromos on paper

水彩版
https://iceefaery.blogspot.com/2018/03/2018-10.html

水彩班 2018-10 - 靜物寫生

老師話今堂會用唔同畫法，但我睇完感覺其實係一樣。
上堂用灰調畫出底色同佈局，今堂就用物件嘅色，
我估今次用番同色係因為想效果乾淨d，因為主體係裝咗紅色液體嘅透明玻璃樽。

次次都係咁，睇嗰陣覺得唔係好難，有把握做到，
但一開始調色就唔掂，一落筆就失晒方向。

堂上已經重疊咗兩層，
顏色冇深度，太平，太實，
筆觸太硬。
唔知點解，我每次都調咗d詭異嘅顏色做底色。
唯有再重疊啦，水彩當acrylic咁畫。

都唔知重疊咗幾多次，放棄咗前面塊布嘅起伏，但留咗痕跡，唔理喇....
前面個梨太突出喇，但係睇實物同相佢都係咁光，咁...係唔係後面畫暗咗？又可能係前面太光後面又太暗....hmphhh...
兩個梨都好靚，但唔協調，都係要改，
不過暗嘅改唔到，唯有加暗前面啦。

　　　
加咗好多層，加到推晒d顏色去條邊度，都唔係好夠暗。
係咪因為前面冇加呢？但前面係受光位喎...

我諗我終於睇明咗，應該係因為成幅畫得個梨咁光，同其他物件唔協調。
今次真係用埋旁門左道先搞得掂，我用木顏色塗白咗個樽嘅受光位.....
真係愈活愈回去喇....
其實都仲係小小奇怪嘅，唉，算喇...

Shinhan on Saunders Waterford 190g rough 11"x15"

木顏色版
https://iceefaery.blogspot.com/2018/03/blog-post_26.html

水彩班 2018-9 - 靜物寫生

老師先調咗種好迷離嘅顏色打底，仲做埋明暗，一層已經有晒佈局。
呢隻咁迷離嘅顏色，我完全摸不著頭腦，連近似嘅都調唔出。

n次失敗後，我把心一橫，唔學老師嘅用色，調咗隻好明亮嘅底色（我內心有咁明媚咩？）。
右下嗰塊絲巾...，畫到硬硼硼，仲排得好整齊添，但要整齊嘅又唔整齊，個酒樽一如平時，都係邊大邊細，底色唔夠。
我經常都係兩個色塊接唔上，留咗白，但通常呢d位都係唔需要留白嘅。

兩個蘋果幾靚，我覺得後面嗰個仲靚，不過佢唔係主角，而且靚得嚟唔似我想畫嘅蘋果（當唔同品種得唔得呢？），都要畫番暗沈d。
左下個蕃茄本來好鮮明，但唔想佢太突出，於是畫暗咗，但似乎加錯色，瘀晒。
個樽都幾好，不過老師話唔好太綠，要啡番d，
究竟係因為構圖需要，定係因為個樽本身係偏啡色？
如果我係想強調個樽呢？
呢部分我一直都唔明，好似miss ho成日話：『唔好追色』，其實以我調色能力根本追唔到，所以通常都同實物唔同，但miss ho每次改我畫都用番實物本身嘅色，即係點呢？

張相影得太紅添，不過都睇得到背景似山多過似布囉。

個蕃茄洗過，加咗橙色，鮮明番d，柔化咗左邊，小小fade out表示自己係配角。

洗咗吓背景塊布，加強咗蘋果嘅紋，

個樽真係左右唔對稱到一個點....

Shinhan on Saunders Waterford 190g rough 11"x15"

塊布冇得救，或者應該認真練吓畫布。

好早返到課室，老師都好早，因為要set 位，佢已經擺好兩組靜物，唔知點講講吓我話set喺中間好d，咁老師好似又覺得我個講得啱，於是又搬位重新擺。

我唔清楚老師諗住點擺，而老師亦唔係好明我嘅意思，我覺得個效果唔會比佢原本諗嘅好，當然老師冇講乜嘢啦，但我估佢下堂會用番自己個plan。

我好多時都係咁，口多多，意見多多，但其實我只係當傾偈，我一向覺得人人都有自己想法，我講出嚟唔係想影響人，但好多時當對方係比較能夠接受意見，就會畀我影響咗，唔知我只係諗到乜就講乜。唉，咁大個人都仲管唔住自己把口....

老師講寫生

若一成不變照眼睛看到的色彩來表現一個畫面，結果勢必散亂、平庸、賓主不分、甚至喧賓奪主。

可以根據畫面主次來加強或減少色調層次。

改變色調層次的規律：
1. 主體的色調層次多：高光、亮部、中間色、陰影和投影。
2. 次要的地方色調層次少：亮部、中間色、陰影和投影。
3. 更次要的地方層次更少：只是亮部和陰影，或中間色和陰影。

謝明錩：『完全以大自然為師的色彩，和 "創作" 沒有關係，臨摹不是藝術，只有 "強調" 才是！』

許多畫家在色彩處理上都有自己的個性傾向，有些傾向於色彩，有些傾向於色調，有些是色調和色彩緊密結合。

畫面組織的需要，可以調整物象的輪廓、色彩，甚至無中生有。

左上角的深色塊與右下角的葡萄有色彩的呼應。（無中生有）

調整物象的輪廓、色彩：蘿蔔的體積，背景的深色塊既襯托了蘿蔔的形體，也在構圖上起平衡對比作用（無中生有）。

以色調來表現（work by Nanasaheb Yeole）

重組畫面明暗色調（work by Nanasaheb Yeole）

陳建智作品

簡忠威作品

天空與海面冷暖色彩對比（調整天空與海面的明暗和色彩）

以色彩虛實凝聚畫面焦點

畫畫 - 啤梨（木顏色）

最近對koh i noor嗰枝magic pencil好有興趣，連帶用番吓木顏色。

用咗張啤梨圖嚟畫，老師畀嘅圖都明暗分明，好易畫。

先用magic pencil打底，再用polychromos上色，畫畫吓，magic pencil嗰層七彩底色竟然唔見晒，
我都唔知層咁繽紛嘅底色究竟有冇影響個outcome。

我冇精雕細琢，唔打算追求realistic，會好攰，
我只想睇到明暗同立體，顏色都唔太苛求。

Koh-i-nor / Polychromos on paper

水彩版本

https://iceefaery.blogspot.com/2018/03/2018-8.html

水彩班 2018-8 - 啤梨

今堂畫3個啤梨。
老師示範時話顏色乾咗會變淡，無可避免要重疊，佢唔想重疊，所以大膽用深色d。
（因為老師鍾意偏淡偏灰嘅色調，好少用強烈嘅顏色）
（估唔到老師都有呢個問題，我見佢都係想點就畫到點咁）
我一向都唔係好敢用太深色，寧願留d空間重疊，
但既然老師都示範咗，而且次次靠重疊都唔學唔識縫合，不如今次大膽d啦，最多嘥咗張紙。

鑑於waterford紙快乾，我先上咗一層水，效果幾好，時間多咗，上色冇咁趕，
不過仍然係調唔到想要嘅色。
第一個我學老師用咗好深色，乾咗嘅效果的確係好d，但深淺過渡得....，應該話係冇過渡囉，唉，畫咗4年畫，上咗咁多個course，仲係咁...
跟住嗰兩個仲唔知點解深唔到色。
個影本來應該偏紫，因為個梨小小冷，個影要暖番d，但我調極都係咁嘅灰藍，可能我又用錯色。
係咪應該轉用cotman呢？我覺得shinhan d色唔係好正，而且太艷。

無可避免又要重疊。
老師教用burnt sienna調色，利用佢有沈澱嘅特性嚟表現啤梨上嘅點點。
今堂大家都攞自己張紙畀老師示範，我都趁機畀老師試，我早都想睇吓老師用waterford效果會點。
我同另一個用waterford嘅同學一直都控制唔到顏色喺紙上嘅分佈，無論點畫，乾咗就總係混成一隻色，我哋好沮喪。
睇老師畫完，發現呢個應該係waterford嘅特性，因為老師畫出嚟只係比我哋好少少，佢畫嘅時候都即刻做埋濕重疊，咁我有少少釋然，做唔到效果唔係我手法唔啱，只係張紙嘅特性令佢呈現唔到呢種效果。
係唔係應該explore吓其他紙？
老師一直都用雪山、寶虹呢d大陸紙，我估係出於經濟考慮，佢示範畫咁多畫，用貴紙成本太大，而且乜嘢紙都難佢唔到啦。但事實係呢d紙都有用得著嘅特性，我係咪唔需要盲目同虛榮地堅持用名牌紙？

第一層乾咗，我再重疊，despite of 冇咗水彩嘅輕靈，重疊過係好咗。
飄浮緊嗰個就係老師畫嘅，而家再睇，雖然同我畫嘅效果差不多，都係混埋咗，但起碼仲分到下半深上半淺。。。真係要認真練吓先得。

再疊多一次，個影加咗紫色，
影埋相真係好似。
不過，上一堂老師同我哋講寫生要注意嘅嘢，
有個大師話，如果幅畫用番大自然嘅顏色，只不過係臨摹，唔係寫生/藝術。
同樣，我只係臨摹緊一張圖片，冇光度明暗嘅調整、冇角度嘅選擇、冇景物嘅取捨，
總括嚟講，係冇風格，冇藝術感。
不過呢，畫得似，我都已經好開心，藝術，可遇不可求。

Shinhan on Saunders Waterford 190g rough 11"x15"

木顏色版本
https://iceefaery.blogspot.com/2018/03/blog-post_12.html